ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារ លោក មាស ធំ ម្ចាស់កំពង់ផែពហុបំណងកំពត ជា «អ្នកឧកញ៉ា» កាលពីថ្ងៃទី២០ ខែមេសា ឆ្នាំ២០២៣ តបតាមសេចក្តីក្រាបបង្គំទូលថ្វាយរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
លោក មាស ធំ ត្រូវបានគេស្គាល់ថា ជាអ្នកជំនួញវ័យក្មេងមួយរូប និងជាអគ្គនាយកក្រុមហ៊ុន កំពត ឡូជីស្ទីក អេន ផត ឯ.ក (Kampot Logistics and Port Co., Ltd)។ ក្រុមហ៊ុន កំពត ឡូជីស្ទីក អេន ផត ឯ.ក ជាក្រុមហ៊ុន ដែលបានវិនិយោគលើមជ្ឈមណ្ឌលភ័ស្ដុភារកម្ម និងកំពង់ផែពហុបំណងកម្រិតអន្តរជាតិតម្លៃប្រមាណ ១,៥០០ លានដុល្លារអាមេរិក នៅលើមានផ្ទៃដីរហូតដល់ទៅ ៦០០ហិកតា មានទីតាំងនៅសង្កាត់ព្រែកត្នោត ក្រុងបូកគោ ខេត្តកំពត និងបានបើកការដ្ឋានសាងសង់ជាផ្លូវការ ក្រោមអធិបតីភាពឧបនាយករដ្ឋមន្ដ្រី ជា សុផារ៉ា រដ្ឋមន្ដ្រីក្រសួងដែនី នគរូបនីយកម្ម និងសំណង់ តំណាងសម្ដេចតេជោ ហ៊ុន សែន នាយករដ្ឋមន្ដ្រី នៃកម្ពុជា កាលពីថ្ងៃទី៥ ខែឧសភា ឆ្នាំ២០២២។
កាលថ្ងៃទី៥ ខែឧសភា ឆ្នាំ២០២៣កន្លងទៅថ្មីៗនេះ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីចុះហត្ថលេខាលើកិច្ចសន្យាសាងសង់ កំពង់ផែពហុបំណងកំពត រវាងក្រមហ៊ុន កំពត ឡូជីស្ទីក អេន ផត ឯ.ក និងក្រុមហ៊ុន ឆាយណា ហាបើរ អេនជីនារីង ខមភេនី អិលធីឌី ដើម្បីអនុញ្ញាតឱ្យក្រុមឆាយណា ហាបើរ ចាប់ផ្តើមធ្វើការសាងសង់នូវកំពង់ផែដ៏ថ្មីសន្លាងមួយនេះ។ ពិធីចុះហត្ថលេខា ត្រូវបានធ្វើឡើងនៅសណ្ឋាគារ Hyatt Regency Phnom Penh ដែលចុះហត្ថលេខាដោយអ្នកឧកញ៉ា មាស ធំ អគ្គនាយកក្រុមហ៊ុនកំពត ឡូជីស្ទីក អេន ផត ឯ.ក និងលោកស្រី LAN QIULI នាយកគ្រប់គ្រងនៃការិយាល័យ China Harbour Cambodia រួមទាំងអ្នកចូលរួមជាច្រើនរូបទៀត។
សូមជម្រាបថា បើតាមលោកទេសរដ្ឋមន្ត្រី ស៊ុន ចាន់ថុល បានឱ្យដឹងថា មជ្ឈមណ្ឌលភ័ស្ដុភារកម្ម និងកំពង់ផែពហុបំណងកំពត របស់អ្នកឧកញ៉ា មាស ធំ នឹងត្រូវសាងសង់លើផ្ទៃដីកម្មសិទ្ធិទំហំ ៦០០ ហិកតា និងមានជម្រៅទឹក ១៥ ម៉ែត្រ ដែលអាចឱ្យនាវាចំណុះ ១០ ម៉ឺនតោនចូលចតបាន។ លោកបន្តថា ការសាងសង់មជ្ឈមណ្ឌលភ័ស្តុភារកម្ម និងកំពង់ផែពហុបំណងនេះ ជាការចូលរួមចំណែកក្នុងការអភិវឌ្ឍប្រទេសកម្ពុជា ឱ្យបានរុងរឿងបន្ថែមទៀត និងជួយឱ្យកម្ពុជាឈានទៅសម្រេចបាននូវផែនការក្លាយជាប្រទេសមានប្រាក់ចំណូលកម្រិតខ្ពស់នៅឆ្នាំ២០៥០៕
