ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រ ត្រាប់បង្គាប់ផ្តល់គោរមងារជា «អ្នកឧកញ៉ា» ដល់ឧកញ៉ា ម៉ៅ ចំណាន ដោយព្រះរាជក្រឹត្យលេខ នស/រកត/០៧២៣/១៣៨៤ នៅថ្ងៃទី៤ ខែកក្កដា ឆ្នាំ២០២៣។ ការផ្តល់គោរមងារអ្នកឧកញ៉ានៅពេលនេះ ធ្វើឡើងតាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន នាយរកដ្ឋមន្រ្តី។
បច្ចប្បន្នលោកស្រីជានាយិការប្រតិបត្តិក្រុមហ៊ុន រ៉ូយ៉ាល់គ្រុប។ គិតមកដល់ឆ្នាំ២០២៣នេះ អតីតតារាសម្តែងល្បីឈ្មោះ លោកជំទាវ ម៉ៅ ចំណាន មានអាយុ ៤០ឆ្នាំហើយ។
លោកស្រីដែលជាអ្នកខេត្តស្វាយរៀងរូបនេះ បានជំហានចូលប្រឡូកក្នុងវិថីសិល្បៈ នៅអំឡុងឆ្នាំ១៩៩៨ អាជីពដំបូងរបស់លោកស្រីគឺ ច្រៀង តាមភោជនីយដ្ឋាន បន្ទាប់មកនាងក៏មានឱកាសបានចូលសម្តែង ខារ៉ាអូខេ នៅក្នុងផលិតកម្មហង្សមាស ផលិតកម្ម យូធូ និងផលិត ស្ទឹងសង្កែ រហូតបានឡើងជាពិធីការិនី ប្រចាំស្ថានីយទូរទស្សន៍ ប៉ុស្តិ៍លេខ៥។
បាត់មុខមួយរយៈធំលើវិថីសិល្បះ ក្រោយមកឮព័ត៌មានថា នាងបានសាងស្នេហ៍យ៉ាងផ្អែមត្រជាក់ ជាមួយមហាសេដ្ឋីប្រាក់លានម្នាក់ គឺអ្នកឧកញ៉ា គិត ម៉េង។ អ្នកទាំងពីរបានរួមរស់សាងគ្រួសារ បែបលាក់លួចហើយមានកូនចៅជាមួយគ្នា។ អតីតតារាសម្តែងល្បីឈ្មោះ អ្នកនាង ម៉ៅ ចំណាន បន្ទាប់ពីរស់នៅជាមួយគ្នាអស់រយៈពេលជាង ១០ឆ្នាំ ក្រោយមកក៏បានរៀបអាពាហ៍ពិពាហ៍ ជាមួយអ្នកឧកញ៉ា គិត ម៉េង នៅថ្ងៃទី២០ ខែមីនា ឆ្នាំ២០១៥។
ចំណងស្នេហ៍ដ៏ស្អិតរមួតរបស់អតីតតារាសម្ដែងលោកជំទាវ ស្រីតូច ចំណាន និងអ្នកជំនួញល្បីឈ្មោះអ្នកឧកញ៉ាគិត ម៉េង ក្នុងរយៈពេលជិត ២០ ឆ្នាំនេះ បានបន្សល់ទុកចំណងដៃបុត្រាបុត្រីចំនួន ៤ នាក់ ទី១ យុវជន គិត ស៊ូឡា, យុវតី គិត ស៊ូរៀរង្សី, យុវតី គិត ស៊ូណាវីន និងយុវជន គិត ស៊ូឡូង៕
