លោកឧកញ៉ា សេង ញ៉ក់ នាយកក្រុមហ៊ុន អិល វ៉ាយ ភី គ្រុប និងជាអគ្គនាយកក្រុមហ៊ុន ភ្នំពេញស៊ួហ្គើ ដែលជាកូនប្រសារអ្នកឧកញ៉ា លី យ៉ុងផាត់ ជាអ្នកនយោបាយវ័យក្មេង បានជាប់ឆ្នោតជាតំណាងរាស្ត្រ នៅមណ្ឌលខេត្តកំពង់ស្ពឺ។
យោងតាមបញ្ជីរាយនាមបេក្ខជនជាប់ឆ្នោតជាតំណាងរាស្ត្រ នីតិកាលទី៧ ក្នុងការបោះឆ្នោតកាលពីថ្ងៃអាទិត្យ ទី២៣ ខែកក្កដា ឆ្នាំ២០២៣ តាមលំដាប់អាយុពីខ្ពស់ មកទាប របស់ គជប កាលពីថ្ងៃទី០៥ ខែសីហា ឆ្នាំ២០២៣ បានបង្ហាញឱ្យដឹងថា ក្នុងចំណោមតំណាងរាស្ត្រទាំង ១២៥រូប លោកឧកញ៉ា សេង ញ៉ក់ វ័យ៤៣ឆ្នាំ បានស្ថិតនៅលេខរៀងទី១១៥ ហើយមានអាយុប្រហាក់ប្រហែលនឹងតំណាងរាស្ត្រវ័យក្មេង និងថ្នាក់ដឹកនាំជំនាន់ថ្មីមួយចំនួនទៀតដូចជា លោក កើត រិទ្ធ, លោក ឌិត ទីណា, លោក សាយ សំអាល់, លោកជំទាវ ចម និម្មល, លោក ទៀ សីហា និងលោក ស សុខា ជាដើម។
សូមជម្រាបថា លោកឧកញ៉ា សេង ញ៉ក់ ជាស្វាមីរបស់លោកស្រី លី អាផណ កូនស្រីរបស់អ្នកឧកញ៉ា លី យ៉ុងផាត់ សមាជិកព្រឹទ្ធសភា, ទីប្រឹក្សាផ្ទាល់សម្តេចតេជោនាយករដ្ឋមន្ដ្រី, ប្រធានសមាគមឧកញ៉ាកម្ពុជា និងជាអគ្គនាយកក្រុមហ៊ុន អិល វ៉ាយ ភី គ្រុប។ លោក សេង ញ៉ក់ ទទួលបានគោរមងារ «ឧកញ៉ា» កាលខែមករា ឆ្នាំ២០១៦៕
