អ្នកឧកញ៉ា ទ្រី ភាព អគ្គនាយកក្រុមហ៊ុន ទ្រីភាព គ្រុប និងលោកស្រីអ្នកឧកញ៉ា គៀន ស្រីនាង ព្រមទាំងបងប្អូនក្រុមគ្រួសារ ញាតិមិត្តជិតឆ្ងាយ បានអញ្ជើញចូលរួមក្នុងពិធីបុណ្យកាន់បិណ្ឌវេនទី១០ នៅវត្តបទុមវតីរាជវរារាម ហៅវត្តបទុមវតី រាជធានីភ្នំពេញ កាលពីរសៀលថ្ងៃអាទិត្យ ទី០៨ ខែតុលា ឆ្នាំ២០២៣។
ការរៀបចំពិធីបុណ្យកាន់បិណ្ឌវេនទី១០ របស់អ្នកឧកញ៉ា ទ្រី ភាព និងលោកស្រីអ្នកឧកញ៉ា គៀន ស្រីនាង គឺក្នុងឱកាសដ៏សោមនស្សរីករាយនៃពិធីបុណ្យប្រពៃណីជាតិ ដែលប្រជាពុទ្ធបរិស័ទកម្ពុជា មានសេចក្តីអំណរសាទរក្លៀវក្លា និងសាមគ្គីធ្វើបុណ្យធ្វើទានដោយសេចក្តីជ្រះថ្លា នារដូវកាលបុណ្យកាន់បិណ្ឌ-ភ្ជុំបិណ្ឌ នៅតាមទីអារាមនានា ដើម្បីទទួលយកនូវកុសលផលបុណ្យរៀងៗខ្លួន និងជាការរួមចំណែកលើកតម្កើងវិស័យព្រះពុទ្ធសាសនា។
ជាកិច្ចចាប់ផ្ដើមពិធីសូត្រមន្តកាន់បិណ្ឌវេនទី១០នេះ អ្នកឧកញ៉ា ទ្រី ភាព និងលោកស្រីអ្នកឧកញ៉ា គៀន ស្រីនាង បានអញ្ជើញអុជទានធូប បូជាផ្កាភ្ញី ថ្វាយ និងបួងសួងរំលឹកដល់គុណ ព្រះពុទ្ធ ព្រះធម៌ និងព្រះសង្ឃ មុននឹងចាប់ផ្ដើមនមស្សការព្រះរតនត្រៃ។
នៅក្នុងបរិយាកាសប្រកបដោយសទ្ធា និងសេចក្ដីជ្រះថ្លានេះ សម្តេចព្រះមហាសុមេធាធិបតី កិត្តិឧទ្ទេសបណ្ឌិត នន្ទ ង៉ែត សម្ដេចព្រះចៅអធិការវត្តបទុមវតីរាជវរារាម ព្រមទាំងព្រះសង្ឃ បានធ្វើពិធីសូត្រមន្តចម្រើនព្រះបរិត្ត និងពុទ្ធជ័យមង្គល រួមទាំងមានព្រះធម្មវិសេសទេសនា សម្ដែងដោយព្រះភិក្ខុកិត្តិបាលោ ពេញ វិបុល មន្ត្រីសង្ឃក្នុងវត្តខាងលើ៕
