អ្នកឧកញ៉ា ហេង សៀ អគ្គនាយកក្រុមហ៊ុន ហេង ស្រេងហុង (HSH) និងជាសមាជិកសភាពាណិជ្ជកម្មកម្ពុជា សូមអនុញ្ញាតសម្តែងនូវសេចក្តីរំភើបរីករាយយ៉ាងក្រៃលែង និងសូមសម្ដែងនូវអំណរអរគុណយ៉ាងជ្រាលជ្រៅបំផុត ចំពោះអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ដែលបានផ្ញើលិខិតអបអរសាទរដ៏មានអត្ថន័យយ៉ាងជ្រាលជ្រៅបំផុតដល់លោក ក្នុងឱកាសដែលលោកត្រូវបានព្រះមហាក្សត្រផ្ដល់គោរមងារជា «អ្នកឧកញ៉ា»។
អ្នកឧកញ៉ា ហេង សៀ សូមយកឱកាសនេះ សម្តែងនូវការដឹងគុណយ៉ាងជ្រាលជ្រៅជាទីបំផុត ជូនចំពោះអ្នកឧកញ៉ាប្រធាន ដែលតែងតែយកចិត្តទុកដាក់ ប្រកបដោយស្មារតីទទួលខុសត្រូវខ្ពស់ ក្នុងការដឹកនាំសភាពាណិជ្ជកម្មកម្ពុជា ឱ្យសម្រេចបាននូវសមិទ្ធផលយ៉ាងច្រើន និងជោគជ័យយ៉ាងត្រចះត្រចង់ ទាំងក្នុងប្រទេស និងនៅលើឆាកអន្តរជាតិ ព្រមទាំងការលើកស្ទួយវិស័យឯកជន និងការកៀរគរការវិនិយោគិនទាំងក្នុង និងក្រៅប្រទេស ដែលនេះជាការចូលរួមចំណែកយ៉ាងសំខាន់ ជាមួយនឹងរាជរដ្ឋាភិបាលកម្ពុជា ដែលធ្វើឱ្យប្រទេសជាតិមានការរីកចម្រើន និងប្រជាពលរដ្ឋរស់នៅប្រកបដោយសុខសុភមង្គល និងវិបុលភាព ដែលស្ថិតនៅក្រោមម្លប់នៃសន្តិភាព។
ជាថ្មីម្ដងទៀត អ្នកឧកញ៉ា ហេង សៀ និងលោកជំទាវ ព្រមទាំងក្រុមគ្រួសារ សូមគោរពបួងសួងដល់វត្ថុស័ក្តិសិទ្ធិក្នុងលោក សូមតាមជួយថែរក្សាអភិបាលប្រោះព្រំ ជូនដល់ អ្នកឧកញ៉ាប្រធាន និងលោកជំទាវ ជាទីគោរពដ៏ខ្ពង់ខ្ពស់ ព្រមទាំងបុត្រាបុត្រី ជាទីស្រលាញ់ និងថ្នាក់ដឹកនាំ សមាជិក សមាជិកា សភាពាណិជ្ជកម្មកម្ពុជា សូមប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ដើម្បីបន្តដឹកនាំសភាពាណិជ្ជកម្មកម្ពុជា ឱ្យកាន់តែរីកចម្រើន និងសម្រេចសទ្ធិផលថ្មីៗថែមទៀត៕
