ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារជា «អ្នកឧកញ៉ា» ដល់ ឧកញ៉ា លី ហុង អគ្គនាយក្រុមហ៊ុន បុរីអង្គរ ផាលេស កាលពីថ្ងៃទី ១៨ ខែសីហា ឆ្នាំ២០២៣ តាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន។
ក្រៅពីមានតួនាទីជាអគ្គនាយកនៃ ក្រុមហ៊ុន បុរីអង្គរ ផាលេស ដែលជាក្រុមហ៊ុន វិនិយោគលើការសាងសង់ និងអាជីវកម្មសណ្ឋាគារលំដាប់ផ្កាយ ៥ អ្នកឧកញ៉ា លី ហុង ក៏ជាប្រធាននាយកប្រតិបត្តិ ក្រុមហ៊ុន តេង ឡាយ ឡូជីស្ទិក និងជាប្រធានក្រុមប្រឹក្សាភិបាលនៃ ក្រុមហ៊ុន អង្គរ ផាលេស ឌីវេឡុបមិន ឯ.ក ផងដែរ។ នេះបើយោងតាមការចុះផ្សាយរបស់ សមាគមឧកញ៉ាកម្ពុជា ។
នៅក្នុង សមាគមឧកញ៉ាកម្ពុជា អ្នកឧកញ៉ា ដែលមានស្រុកកំណើតនៅខេត្តកំពង់ចាមរូបនេះ ក៏មានតួនាទីជាសមាជិកក្រុមប្រឹក្សាភិបាល ក្នុងចំណោមសមាជិកក្រុមប្រឹក្សាភិបាលទាំង ៣២រូប ផងដែរ។ ក្នុងនាមជាអ្នកជំនួញចាស់វស្សាមួយរូប អ្នកឧកញ៉ា លី ហុង និងក្រុមគ្រួសារ ត្រូវបានគេកត់សម្គាល់ថា តែងតែមានវត្តមានក្នុងបញ្ជីរាយនាមសប្បុរសជន ចូលរួមបរិច្ចាគធនធានទ្រព្យសម្បត្តិ និងកម្លាំងកាយ ចិត្ត លើគ្រប់សកម្មភាពជួយសង្គម និងសប្បុរធម៌ ជាមួយរាជរដ្ឋាភិបាល ៕
