កីឡាករឆ្នើម Yudai Ogawa របស់ជប៉ុន ដែលបច្ចុប្បន្នកំពុងប្រកបអាជីពលេងនៅក្លិបបាល់ទាត់ភ្នំពេញក្រោន បានទទួលការអនុញ្ញាតឱ្យចូលសញ្ជាតិកម្ពុជា និងបានជាប់ឈ្មោះលេងឱ្យក្រុមបាល់ទាត់ជម្រើសជាតិកម្ពុជា បន្ទាប់ពីរូបគេ បានមករស់នៅលើទឹកដីកម្ពុជា អស់រយៈពេល ៥ឆ្នាំមកហើយ។
ខ្សែបម្រើ Yudai Ogawa កើតនៅឆ្នាំ១៩៩៦ ក្នុងទីក្រុង Kawasaki ប្រទេសជប៉ុន។ លោកបានឈានជើងលើទឹកដីអង្គរ ជាលើកដំបូងក្នុងវ័យត្រឹមតែ ២២ឆ្នាំ នៅឆ្នាំ២០១៨ និងបានចូលរួមជាមួយក្លិបក្រសួងការពារជាតិ ដែលបច្ចុប្បន្នជា កងយោធលខេមរភូមិន្ទ លើកិច្ចសន្យារយៈពេល ១ឆ្នាំ។
មួយឆ្នាំក្រោយមក ក្លិបអង្គរថាយហ្គឺរ នាថ្ងៃទី១៦ ខែមករា ឆ្នាំ២០១៩ បានទិញយក ក្រោមកិច្ចសន្យា ២ឆ្នាំ ជាទីកន្លែង ដែលរូបគេបានសាងភាពលេចធ្លោលើទីលាន រហូតត្រូវបាន ភ្នំពេញក្រោន ទាក់ទងយកទៅកាន់រាជធានីវិញ នៅ២ឆ្នាំបន្ទាប់។
ថ្ងៃទី០១ ខែមករា ឆ្នាំ២០២១ ភ្នំពេញក្រោន ក្រោមការដឹកនាំរបស់អតីតប្រធានក្លិប លោកឧកញ៉ា ឬទ្ធី សំណាង (ទទួលមរណភាព) បានចុះកិច្ចសន្យានាំយក Yudai ជាផ្លូវការ។ Yudai បានសាងភាពអស្ចារ្យជាច្រើនជាមួយក្លិបភ្នំពេញក្រោន ដោយបានរួមចំណែកជួយក្លិបឈ្នះពានរង្វាន់ធំៗជាច្រើនដូចជា ៖ ខេមបូឌានព្រីមៀរលីគ ២លើក ខេមបូឌានស៊ូភើខាប់ ២លើក និងពានរង្វាន់ខេមបូឌានលីគខាប់ ២លើកផងដែរ ក្រោមការដឹកនាំពីលោកស្រី ភូ ឈាលីន ជាប្រធានក្លិបថ្មីបន្តពីស្វាមី។
នៅព្រឹកថ្ងៃទី០៦ ខែតុលា ឆ្នាំ២០២៣នេះ សហព័ន្ធកីឡាបាល់ទាត់កម្ពុជា បានប្រកាសជាផ្លូវការពីការចូលរួមរបស់ Yudai ក្នុងក្រុមជម្រើសជាតិកម្ពុជា ក្រោយរូបគេបំពេញលក្ខខណ្ឌគ្រប់គ្រាន់ ព្រមទាំងមានសមត្ថភាពពេញលេញ ដើម្បីពាក់អាវកងទ័ពអង្គរ ចាប់ពីឆ្នាំ២០២៣នេះតទៅ៕
