ឧកញ៉ា ហុង ឆេងឈុន ប្រធានសមាគមសហគ្រិនយុវជនកម្ពុជាសាមគ្គីដើម្បីអភិវឌ្ឍន៍ និងក្រុមប្រឹក្សាភិបាល កាលពីរសៀលថ្ងៃទី២០ ខែកុម្ភៈ បានបើកកិច្ចប្រជុំពិភាក្សាអំពីការរៀបចំផែនការសកម្មភាពសម្រាប់ដំណើរទស្សនកិច្ចការងារទៅកាន់សាធារណរដ្ឋឥណ្ឌូនេស៊ី ក្នុងពេលឆាប់ៗនេះ។
កិច្ចប្រជុំនេះ មានការចូលរួម ពីមន្ត្រីជំនាញនៃក្រុមប្រឹក្សាអភិវឌ្ឍន៍កម្ពុជា មន្ត្រីជំនាញនៃក្រសួងពាណិជ្ជកម្ម និងមន្រ្តីជំនាញនៃក្រសួងរ៉ែ និងថាមពល ព្រមទាំងសហគ្រិនចំនួនប្រមាណ១៥ ក្រុមហ៊ុន។ តាមផែនការគ្រោងទុកដំណើរទស្សនកិច្ចរបស់សមាគមនឹងប្រព្រឹត្តធ្វើឡើងនៅចុងខែកុម្ភៈ ខាងមុខនេះ ក្នុងគោលបំណងពិនិត្យមើលលទ្ធភាព ទៅលើកិច្ចសហប្រតិបត្តិការធុរកិច្ចរវាងប្រទេសទាំងពីរលើវិស័យផ្សេងៗ។
គួររំឭកថា កាលពីថ្ងៃទី១៤ ខែវិច្ឆិកា ឆ្នាំ២០២៣ លោកឧកញ៉ា ហុង ឆេងឈុន ក៏បានដឹកនាំក្រុមប្រឹក្សាភិបាល និងសមាជិក អញ្ជើញចូលសម្តែងការគួរសម និងសំណេះសំណាលកិច្ចការធុរកិច្ចជាមួយ ឯកឧត្តម សាន់តូ ដាម៉ូស៊ូម៉ាតូ (Santo Darmosumarto) ឯកអគ្គរដ្ឋទូតថ្មីនៃប្រទេសឥណ្ឌូនេស៊ី ប្រចាំកម្ពុជា។
លោកឧកញ៉ាប្រធានសមាគម បានឱ្យដឹងថា ជំនួបខាងលើនេះ ធ្វើឡើងក្នុងគោលបំណងដើម្បីពង្រីកពង្រឹងលើការវិនិយោគនានា ជាពិសេសលើវិស័យសេដ្ឋកិច្ច រវាងប្រទេសកម្ពុជា-ឥណ្ឌូនេស៊ី ក៏ដូចជាការផ្តល់ឱកាសសម្រាប់សហគ្រិនរវាងប្រទេសទាំងពីរ ឱ្យមានឱកាសសហការរួមគ្នា ដើម្បីនាំចេញ-នាំចូលផលិតផលកម្ពុជា-ឥណ្ឌូនេស៊ី ព្រមទាំងគោលបំណងបង្កើនការនាំចេញ-នាំចូល ឱ្យមានទំហំទឹកប្រាក់ឱ្យលើសពី ១០០០លានដុល្លារក្នុងមួយឆ្នាំ៕
