គម្រោងសាងសង់ផ្លូវឡូរីប្រវែង ១០គីឡូម៉ែត្រ រួមមានទាំងរូងក្រោមដី ទាំងទៅនិងមក នៅក្នុងតំបន់អភិវឌ្ឍន៍រមណីយដ្ឋានកសិ-ទេសចរណ៍ ម៉ុង ឫទ្ធី សែនជ័យ ស្ថិតនៅក្នុងស្រុកសំរោងទង ខេត្តកំពង់ស្ពឺ របស់អ្នកឧកញ៉ា ម៉ុង ឫទ្ធី កំពុងតែដំណើរការនៃការសាងសង់យ៉ាងសកម្ម និងគ្រោងបើកដំណើរការទទួលភ្ញៀវទេសចរណ៍ជាតិ និងភ្ញៀវទេសចរណ៍អន្តរជាតិ ជិះកម្សាន្តលេង នៅចុងឆ្នាំ២០២៤ ខាងមុខនេះ។
តាមទំព័រហ្វេសប៊ុកក្រុងច្បារមន ឱ្យបង្ហាញរូបភាពមួយចំនួននៃវឌ្ឍនភាពការស្ថាបនាសាងសង់ផ្លូវរត់ទៅមក ឡូរី ក្នុងតំបន់អភិវឌ្ឍន៍រមណីយដ្ឋានកសិ-ទេសចរណ៍ ម៉ុង ឫទ្ធី សែនជ័យ កាលពីថ្ងៃទី៥ ខែមីនា ឆ្នាំ២០២៤ ដោយក្នុងនោះឃើញថា ផ្លូវដែកសម្រាប់ឡូរីរត់ គឺបានសាងសង់ស្ទើរតែរួចរាល់ហើយ និងនៅសល់តែផ្លូវរូងក្រោមដី ដែលកំពុងបន្តដំណើរការសាងសង់។ យ៉ាងណាមិញ ប្រភពពីតំបន់អភិវឌ្ឍន៍រមណីយដ្ឋានកសិ-ទេសចរណ៍ ម៉ុង ឫទ្ធី សែនជ័យ បានបង្ហើបឱ្យដឹងថានៅចុងឆ្នាំ២០២៤ខាងមុខនេះ ផ្លូវឡូរីប្រវែង ១០គីឡូម៉ែត្រ រួមនឹងផ្លូវរូងក្រោមដីចំនួន ៦កន្លែង នឹងបើកដំណើរជូនភ្ញៀវទេសចរណ៍ជាតិ និងអន្តរជាតិជិះលេងកម្សាន្តហើយ។
អ្នកឧកញ៉ា ម៉ុង ឫទ្ធី ដែលត្រូវបានគេស្គាល់ថា ជាមហាសេដ្ឋីក្នុងមុខជំនួញកសិ-ឧស្សាហកម្ម ធំបំផុតក្នុងប្រទេសកម្ពុជា និងជាអគ្គនាយកក្រុមហ៊ុន ម៉ុង ឫទ្ធី គ្រុប តាមរយៈទំព័រហ្វេសប៊ុកផ្ទាល់ខ្លួន កាលពីថ្ងៃទី២៩ ខែកញ្ញា ឆ្នាំ២០២៣ បានប្រកាសពីគម្រោងសាងសង់ផ្លូវឡូរីប្រវែង ១០.០០០ម៉ែត្រ ទាំងទៅនិងមក ដើម្បីចូលរួមចំណែកទាក់ទាញភ្ញៀវទេសចរណ៍ជាតិ និងអន្តរជាតិ ឱ្យចូលលេងកម្សាន្តនៅក្នុងតំបន់រមណីយដ្ឋានអភិវឌ្ឍន៍កសិទេសចរណ៍ ម៉ុង ឫទ្ធី សែនជ័យ ឱ្យបានកាន់តែច្រើន។
អ្នកឧកញ៉ា ដែលទើបជាប់ឆ្នោតបន្តជាសមាជិកព្រឹទ្ធសភា នីតិកាលទី៥ រូបនេះ ធ្លាប់បានបញ្ជាក់ឱ្យដឹងទៀតថា ជាជំហានបឋម គម្រោងនេះនឹងបង្កើតឱ្យមានឡូរី ចំនួន ៥០គ្រឿងសិន។ អ្នកឧកញ៉ា បន្ថែមទៀតថា ដោយសារតែការងារសាងសង់ផ្លូវរត់ឡូរី ត្រូវសាងសង់ឆ្លងកាត់ជ្រោះជ្រង ជ្រលងដងអូឡើងចុះជាច្រើនកន្លែង ដូច្នេះហើយទើបការងារសាងសង់នេះត្រូវប្រើពេលយូរបន្តិច។ ទោះយ៉ាងណា ពេលចាប់ផ្តើមដំណើរការ ភ្ញៀវទេសចរណ៍នឹងអាចបានមកជិះឡូរី លេងកម្សាន្ត ព្រមទាំងបានគយគន់មើលទេសភាពព្រៃភ្នំ ស្រូបយកខ្យល់អាកាសដ៏បរិសុទ្ធជាក់ជាមិនខានឡើយ៕
