ឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប យល់ឃើញថា នៅឆ្នាំ២០២៤នេះ អ្នកប្រកបរបរអាជីវកម្មលើវិស័យកសិកម្ម កសិឧស្សាហកម្ម កំពុងជួបនូវបញ្ហាប្រឈមមួយគឺ ការបម្រែបម្រួលអាកាសធាតុ ដែលធ្វើឱ្យខ្វះទឹកស្រោចស្រពដំណាំ។
ការយល់ឃើញបែបនេះ បន្ទាប់ពីលោកឧកញ៉ា បានចុះទៅពិនិត្យមើលដំណាំផ្សេងៗដល់ចម្ការដោយផ្ទាល់។ លោកឧកញ៉ា បានលើកឡើងលើទំព័រហ្វេសប៊ុក កាលពីថ្ងៃទី១៩ ខែមីនា ឆ្នាំ២០២៤ ថាក្រោយពីបានចុះមកពិនិត្យមើលដល់ចម្ការរួចមកលោកឃើញថាឆ្នាំ២០២៤នេះ ធូរេន សាវម៉ាវ ក្រូចថ្លុង ឱ្យផលច្រើនខ្លាំងណាស់ តែមានបញ្ហាមួយកើតឡើងសម្រាប់អ្នកប្រកបមុខរបរអាជីវកម្មលើវិស័យកសិកម្ម កសិឧស្សាហកម្ម គឺបញ្ហាបម្រែបម្រួលអាកាសធាតុ អូសបន្លាយរដូវប្រាំងមិនមានភ្លៀងកក់ខែ ធ្វើឱ្យដំណាំជួបបញ្ហាកង្វះទឹកយកមកស្រោចស្រព។
គួរបញ្ជាក់ថា តាមការព្យាកររបស់ក្រសួងធនធានទឹក និងឧត្តុនិយម កាលពីថ្ងៃទី២ ខែមីនា ឆ្នាំ២០២៤ បានឱ្យដឹងថា ស្ថានភាពអាកាសធាតុនៅកម្ពុជា នៅរដូវប្រាំង ឆ្នាំ២០២៤នេះ គឺសីតុណ្ហភាពនៅទូទាំងប្រទេសនឹងឡើងខ្ពស់ជាងមធ្យមភាគច្រើនឆ្នាំ ដែលជាកត្តាធ្វើឱ្យអាកាសធាតុក្តៅហើយស្ងួត។ ចំពោះបរិមាណទឹកភ្លៀងនឹងទាបជាងមធ្យមភាគច្រើនឆ្នាំ ហើយភ្លើងកក់ខែធ្លាក់តិចតួច ដោយតិចជាងឆ្នាំ២០២៣ ជាមួយគ្នានឹងបាតុភូតផ្គររន្ទះ និងខ្យល់កន្ត្រាក់ដែលកើតឡើងច្រើន៕
