លោកអ្នកឧកញ៉ា ៣រូប ក្នុងចំណោមលោកអ្នកឧកញ៉ាចំនួន៧រូប ដែលទើបទទួលបានគោរមងារជា «លោកអ្នកឧកញ៉ា» កាលថ្មីៗនេះគឺ លោកអ្នកឧកញ៉ា លី យ៉ុងផាត់, លោកអ្នកឧកញ៉ា ភាព ហៀក និងលោកអ្នកឧកញ៉ា លាង ឃុន បានអញ្ជើញទៅទស្សនាផ្ទាល់ ក្នុងព្រឹត្តិការណ៍កីឡាបាល់ទាត់មិត្តភាពសប្បុរសធម៌ ក្រោមអធិបតីភាពសម្ដេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា កាលពីល្ងាចថ្ងៃទី០១ ខែឧសភា ឆ្នាំ២០២៤ នៅពហុកីឡដ្ឋានជាតិអូឡាំពិក។
សម្ដេចតេជោ ហ៊ុន សែន ប្រធានព្រឹទ្ធសភា និងជាគ្រូបង្វឹកកិត្តិយសក្រុមបាល់ទាត់តារាកម្ពុជា (Cambodia football Super Stars) បានបញ្ជាក់ឱ្យដឹងលើទំព័រហ្វេសប៊ុកថា ក្នុងព្រឹត្តិការណ៍កីឡាបាល់ទាត់មិត្តភាពសប្បុរសធម៌ក្រោមមូលបទ «រួមគ្នាដើម្បីសប្បុរសធម៌ និងការប្រយុទ្ធប្រឆាំងគ្រឿងញៀន» និងដើម្បីប្រមូលថវិកាជួយដល់មន្ទីរពេទ្យគន្ធបុប្ផានេះ បានបញ្ចប់ដោយបរិយាកាសសប្បាយរីករាយបំផុត ដែលមានបងប្អូនប្រជាពលរដ្ឋទៅទស្សនាផ្ទាល់ប្រមាណជាង ៣ម៉ឺននាក់។
ក្នុងចំណោមអ្នកអញ្ជើញទៅទស្សនាផ្ទាល់ជាង ៣ម៉ឺននាក់ គេឃើញមានវត្តមាន លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា និងជាសមាជិកព្រឹទ្ធសភា, លោកអ្នកឧកញ៉ា ភាព ហៀក និងលោកអ្នកឧកញ៉ា លាង ឃុន សហស្ថាបនិកក្រុមហ៊ុន ជីប ម៉ុង។ លើសពីនេះ ក៏មានវត្តមាន អ្នកឧកញ៉ា លាង ម៉េង, អ្នកឧកញ៉ា ឡេង ប្រុស, ឧកញ៉ា លី ឆេង រួមទាំងឧកញ៉ា ខេមរៈ សិរីមន្ត ដែលបានអញ្ជើញឡើងច្រៀងចម្រៀងដ៏មានអត្ថន័យ ព្រមទាំងអ្នកឧកញ៉ា ឧកញ៉ា មួយចំនួនទៀត។
ព្រឹត្តិការណ៍កីឡាបាល់ទាត់មិត្តភាព ជាព្រឹត្តិការណ៍ដ៏សំខាន់ដែលឆ្លុះបញ្ចាំងពីសាមគ្គីភាព ហើយជំរុញប្រជាពលរដ្ឋស្រលាញ់កីឡា និងជៀសផុតពីគ្រឿងញៀន និងទឹកចិត្តសប្បុរសធម៌ ពិសេសដើម្បីប្រមូលថវិកាជួយដល់មន្ទីរពេទ្យគន្ធបុប្ផា ដែលជាការបង្ហាញឲ្យឃើញពីភាពសប្បាយរីករាយរបស់ប្រជាពលរដ្ឋកម្ពុជាក្រោមម្លប់សន្តិភាព និងស្របទៅតាមពាក្យស្លោក «កីឡារស់ក្នុងសន្តិភាព»។
សូមជម្រាបថា អ្នកឧកញ៉ា លី យ៉ុងផាត់, អ្នកឧកញ៉ា ភាព ហៀក និងអ្នកឧកញ៉ា លាង ឃុន និងអ្នកឧកញ៉ា ចំនួន៤រូបទៀត ត្រូវបានព្រះមហាក្សត្រ ព្រះករុណាព្រះបាទសម្ដេចព្រះបរមនាថ នរោត្តម សីហមុនី ត្រាស់បង្គាប់ប្រោសព្រះរាជទានគោរមងារជា “លោកអ្នកឧកញ៉ា” កាលពីថ្ងៃ ទី១២ ខែមេសា ឆ្នាំ២០២៤ និងត្រូវបានផ្ដល់កិត្តិយសប្រគល់ជូនផ្ទាល់ដៃ ដោយសម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានកិត្តិយសសមាគមឧកញ៉ាកម្ពុជា កាលពីល្ងាចថ្ងៃសុក្រ ទី២៦ ខែមេសា ឆ្នាំ២០២៤ ក្នុងពិធីសន្និបាតប្រចាំឆ្នាំលើកទី១ និងកម្មវិធីពិសាអាហារសាមគ្គីមហាគ្រួសារសមាគមឧកញ៉ាកម្ពុជា នៅសណ្ឋាគារ ហ្គាឌិនស៊ីធី៕
