អ្នកឧកញ៉ា ទៀ វិចិត្រ ទិញទុរេន ៨០០ផ្លែ ចែកជូនបុគ្គលិក ៨០០នាក់ ហូបឱ្យឆ្ងាញ់មាត់

អ្នកឧកញ៉ា ទៀ វិចិត្រ អគ្គនាយកក្រុមហ៊ុន ជីធីវីសុី គ្រុប និងជាសមាជិកសមាគមឧកញ៉ាកម្ពុជា បានទិញទុរេន ៨០០ផ្លែ ដើម្បីចែកជូនបុគ្គលិកចំនួន ៨០០នាក់ ហូបឱ្យឆ្ងាញ់មាត់គ្រប់គ្នា។

អ្នកឧកញ៉ាអគ្គនាយកក្រុមហ៊ុនទូកល្បឿនលឿន GTVC Speedboat Cambodia បានបង្ហោះរូបមួយសន្លឹកថតជាមួយផ្លែទុរេនជាច្រើន លើទំព័រហ្វេសប៊ុក នារសៀលថ្ងៃទី០៦ ខែឧសភានេះ ភ្ជាប់ជាមួយសារថា៖ “មិនមែនជាអ្នកលក់ដូរទេ ៨០០ ផ្លែ សម្រាប់ចែកជូនបុគ្គលិក ៨០០ នាក់ ហូបអោយឆ្ងាញ់មាត់ម្តង”។

អ្នកជំនួញនៅប៉ែកនិរតីរូបនេះ បច្ចុប្បន្នជាប្រធានសមាគមភ្នាក់ងារដឹកជញ្ជូនទេសចរណ៍ជលយាន ខេត្តព្រះសីហនុ ហើយអ្នកឧកញ៉ា ជានិច្ចកាលតែងតែជួយការងារសប្បុរធម៌ជួយសង្គ្រោះជីវិតមនុស្ស ដូចជា ការជួយសង្គ្រោះការលិចទូករបស់ពលរដ្ឋ និងភ្ញៀវទេសចរនៅកណ្តាលសមុទ្រ និងការជួយសង្គ្រោះស្ត្រីមានផ្ទៃពោះ ដែលរស់នៅលើកោះនានា មកសម្រាលនៅទីរួមខេត្តជាដើម។

សូមជម្រាបថា អ្នកឧកញ៉ា ទៀ វិចិត្រ ជាអ្នកជំនួញដ៏លេចធ្លោ និងមានឥទ្ធិពលខ្លាំងបំផុតមួយរូប នៅក្នុងទឹកដីខេត្តព្រះសីហនុ និងខេត្តកោះកុង។ លោកត្រូវបានព្រះមហាក្សត្រចេញព្រះរាជក្រឹត្យ ផ្តល់គោរមងារ «ឧកញ៉ា» កាលពីថ្ងៃទី៤ ខែមិថុនា ឆ្នាំ២០១៥ និងទទួលបានគោរមងារ «អ្នកឧកញ៉ា» កាលថ្ងៃទី២៦ ខែឧសភា ឆ្នាំ២០២៣៕