អ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុងឫទ្ធី គ្រុប យល់ឃើញថា រឿងកសិផលឡើងថ្លៃចុះថ្លៃ គឺជារឿងធម្មតានៅលើពិភពលោកនេះ មិនអាចបន្ទោសបង្អាប់ទៅលើអ្នកណានោះទេ ហើយចំពោះរាជរដ្ឋាភិបាលក៏តែងចង់ឱ្យតែប្រជាជនលក់កសិផលបានថ្លៃដូចគ្នា។
នៅលើបណ្តាញសង្គមហ្វេសប៊ុក នាថ្ងៃទី៦ ខែវិច្ឆិកា ឆ្នាំ២០២៥ អ្នកឧកញ៉ា បានលើកឡើងបែបនេះថា៖ “តាំងនាមរូបខ្ញុំជាអ្នកមានបទពិសោធន៍ធ្វើពាណិជ្ជកម្មលើវិស័យ កសិកម្ម កសិឧស្សាហកម្ម អស់រយៈពេលជាង ៣០ឆ្នាំកន្លងមកហើយ រហូតមកដល់ពេលបច្ចុប្បន្ននេះក៏នៅតែបន្តប្រកបមុខរបរនេះដោយមិនបោះបង់ បើទោះបីជាត្រូវជួបឧបសគ្គតូចធំយ៉ាងណាក្ដី។ ចំពោះរឿងកសិផលឡើងថ្លៃចុះថ្លៃវាជារឿងធម្មតារបស់ពិភពលោកនេះទៅហើយ យើងមិនអាចស្តីបន្ទោសបង្អាប់បង្ខូចកេរ្ដិ៍ឈ្មោះអ្នកណាបានទេ”។
អ្នកឧកញ៉ា បានបន្តថា បើចំពោះរាជរដ្ឋាភិបាលចង់ឱ្យតែប្រជាជនលក់កសិផលបានតម្លៃថ្លៃទេ និយាយដោយឡែកជាបន្តបន្ទាប់រហូតមកដល់ពេលបច្ចុប្បន្ននេះ លោកបានជួយប្រមូលទិញកសិផលដូចជាពោត ដំឡូងមី កន្ទក់ ចុងអង្ករ ពេលខ្លះជួយទិញស្រូវស្រាល យកមកិនជាសម្រូប ពីកសិករប្រមាណជាង ៤០លានដុល្លារសហរដ្ឋអាមេរិកជារាងរាល់ឆ្នាំ សម្រាប់យកមកចូលរោងចក្រកែច្នៃធ្វើជាចំណីសត្វ ដោយមានសាយឡូនិងឃ្លាំងសម្រាប់ស្តុកគ្រាប់ធញ្ញជាតិសរុបប្របាណជា ១០០,០០០សែនតោន។
ជាមួយគ្នានេះ អ្នកឧកញ៉ា ម៉ុង ឫទ្ធី ក៏បានចោទជាសំណួរផងដែរ ដោយលោកបានបន្ថែមថា លោកមានចម្ងល់ជាខ្លាំងចំពោះអ្នកយកលុយជាច្រើនមកដាក់តម្រៀបថតបង្ហោះហ្វេសប៊ុក ថានឹងយកលុយនេះមកជួយទិញស្រូវពីកសិករ តើពួកគាត់ធ្លាប់មានបទពិសោធន៍បច្ចេកទេសលើមុខរបរនេះដែឬអត់ទេ ហើយគាត់មានជាមូលដ្ឋានគ្រឹះ ដូចជាឡសម្ងួត សាយឡូ ឃ្លាំងស្តុក ម៉ាស៊ីនកិនស្រូវ និងមានទីផ្សារនៅទីណា? ទោះយ៉ាងណា អ្នកឧកញ៉ា ក៏សូមអភ័យទោសផងដែរ ដែលលោកនិយាយនេះគ្រាន់តែជាទស្សនផ្ទាល់ខ្លួនតែប៉ុណ្ណោះ៕
