ក្រុមហ៊ុន រ៉ូយ៉ាល់ រេលវេ ម.ក. (Royal Railway Plc.) របស់អ្នកឧកញ៉ា គិត ម៉េង នៅថ្ងៃទី២៥ ខែវិច្ឆិកា ឆ្នាំ២០២៥ បានចេញសេចក្តីប្រកាសបញ្ជាក់ជាសាធារណៈ ដោយច្រានចោលទាំងស្រុងនូវការលើកឡើងមួយចំនួន និងចាត់ទុកជាព័ត៌មានមិនពិតឡើយ បន្ទាប់ពីមានការចែករំលែកព័ត៌មាន និងការបញ្ចេញមតិយោបល់នៅលើបណ្តាញសង្គម ពាក់ព័ន្ធនឹងឧបទ្ទវហេតុខ្សែរថភ្លើងរអិលធ្លាក់ផ្លូវនៅខេត្តពោធិ៍សាត់ កាលពីថ្ងៃទី ១៧ ខែវិច្ឆិកា ឆ្នាំ២០២៥ ដោយមានការយល់ច្រឡំថា ប្រេងឥន្ធនៈដឹកតាមរថភ្លើងនោះនាំចូលពីប្រទេសថៃ។
យោងតាមសេចក្តីប្រកាសព័ត៌មានរបស់ក្រុមហ៊ុន រ៉ូយ៉ាល់ រេលវេ ម.ក. មានខ្លឹមសារទាំងស្រុងបែបនេះថា ក្រុមហ៊ុន រ៉ូយ៉ាល់ រេលវេ ម.ក. (Royal Railway Plc.) សូមធ្វើការបញ្ជាក់ជាសាធារណៈ និងផ្តល់ព័ត៌មានច្បាស់លាស់អំពីឧបទ្ទវហេតុខ្សែរថភ្លើងរអិលធ្លាក់ផ្លូវ ដែលកើតមាននៅខេត្តពោធិ៍សាត់កាលពីថ្ងៃទី១៧ ខែវិច្ឆិកា ឆ្នាំ២០២៥។
ជាដំបូង ក្រុមហ៊ុនសូមធ្វើការបញ្ជាក់ថាឧបទ្ទវហេតុនេះ ពុំមានបង្កគ្រោះថ្នាក់ដល់អាយុជីវិត ឬមានអ្នករងរបួសនោះទេ។ ក្រុមអ្នកជំនាញបច្ចេកទេសរបស់យើងខ្ញុំបានចុះទៅទីតាំងភ្លាមៗ ដើម្បីធានានូវសុវត្ថិភាពក្នុងបរិវេណតំបន់កើតហេតុ ដើម្បីធ្វើការស៊ើបអង្កេតលើមូលហេតុនៃឧបទ្ទវហេតុ និងចាប់ផ្តើមស្តារឡើងវិញនូវប្រតិបត្តិការប្រចាំថ្ងៃរបស់ក្រុមហ៊ុន។ ក្នុងនោះផងដែរ សេវាកម្មខ្សែរថដឹកអ្នកដំណើរ ខ្សែរថដឹកទំនិញ និងសេវាកម្មផ្សេងៗទៀតត្រូវបានកែសម្រួលតាមតម្រូវការជាក់ស្តែងភ្លាមៗកំឡុងពេលស្តារឡើងវិញ និងបានរួចរាល់ជាស្ថាពរនៅយប់ថ្ងៃតែមួយ។
ចំពោះការបញ្ចេញមតិក្នុងបណ្តាញសង្គមថា ប្រេងឥន្ធនៈដែលដឹកជញ្ជូន បាននាំចូលមកពីប្រទេសថៃនោះ ក្រុមហ៊ុនរ៉ូយ៉ាល់ រេលវេ ម.ក. សូមធ្វើការបញ្ជាក់យ៉ាងច្បាស់ដូចខាងក្រោម៖
១. គ្មានការនាំចូល ឬដឹកជញ្ជូនប្រេងឥន្ធនៈ ឬទំនិញអ្វីពីថៃឡើយ៖
ចាប់តាំងពីមានជម្លោះកម្ពុជា–ថៃមក ក្រុមហ៊ុនរ៉ូយ៉ាល់ រ៉េលវេ ម.ក. មិនធ្លាប់នាំចូល ឬនាំចេញផលិតផលណាមួយពីប្រទេសថៃ ឬទៅកាន់ប្រទេសថៃឡើយ រួមទាំងប្រេងឥន្ធនៈផងដែរ។ បច្ចុប្បន្ន គ្មានលំហូរដឹកជញ្ជូនតាមផ្លូវដែកឆ្លងដែនរវាងប្រទេសទាំងពីរនេះឡើយ។
២. ប្រេងឥន្ធនៈដែលពាក់ព័ន្ធនេះគឺនាំចូលដោយស្របច្បាប់ពីប្រទេសសិង្ហបុរី៖
ប្រេងឥន្ធនៈដែលកំពុងដឹកជញ្ជូននៅលើខ្សែរថដែលជួបឧបទ្ទវហេតុនេះ ជាកម្មសិទ្ធិរបស់ក្រុមហ៊ុនស្របច្បាប់ កម្ពុជាមួយដែលមានអាជ្ញាប័ណ្ណត្រឹមត្រូវ។ ប្រេងឥន្ធនៈនេះត្រូវបាននាំចូលដោយផ្ទាល់ពីប្រទេសសិង្ហបុរី ដោយអនុវត្តតាមបទប្បញ្ញត្តិទាំងអស់ និងស្របតាមស្តង់ដារគុណភាព ព្រមទាំងមានឯកសារបញ្ជាក់ច្បាស់លាស់។
៣. ការដឹកជញ្ជូនរបស់រថភ្លើងកម្ពុជាគឺនៅក្នុងប្រទេសតែប៉ុណ្ណោះ៖
តួនាទីរបស់ក្រុមហ៊ុនក្នុងការដឹកជញ្ជូន គឺដឹកជញ្ជូនពីកំពង់ផែព្រះសីហនុ ផ្លូវដែកភាគខាងត្បូង (Southern Line) ទៅកាន់ផ្លូវដែកភាគខាងជើង(Northern Line)។
៤. ការស៊ើបអង្កេតដែលកំពុងដំណើរការ៖
ក្រុមជំនាញផ្នែកបច្ចេកទេស និងសុវត្ថិភាពរបស់យើងកំពុងបន្តការស៊ើបអង្កេតយ៉ាងហ្មត់ចត់ ដើម្បីកំណត់មូលហេតុច្បាស់លាស់នៃការបង្កឱ្យមានឧបទ្ទវហេតុនេះ។ ក្រុមហ៊ុន ប្រកាន់ខ្ជាប់នូវប្រព័ន្ធសុវត្ថិភាពដ៏តឹងរ៉ឹង ហើយយើងនឹងព្យាយាមបន្ថែមទៀតក្នុងការអនុវត្តប្រព័ន្ធសុវត្ថិភាព ដើម្បីការពារមិនឱ្យមានឧបទ្ទវហេតុបែបនេះកើតឡើងនាពេលខាងមុខទៀត។
៥. កាតព្វកិច្ចឆ្លើយតប៖
យើងយល់ឃើញពីការព្រួយបារម្ភរបស់សាធារណជន និងសូមធ្វើការអរគុណចំពោះការសហការពីអាជ្ញាធរមូលដ្ឋាន និងសមាជិកសហគមន៍ ដែលបានចូលរួមសហការនៅទីតាំងផ្ទាល់។ ក្រុមហ៊ុន រ៉ូយ៉ាល់ រ៉េលវេ ម.ក. យើងខ្ញុំនៅតែប្តេជ្ញាចំពោះការទំនាក់ទំនង ដោយភាពត្រឹមត្រូវវប្រកបដោយវិជ្ជាជីវៈ និងប្រតិបត្តិការផ្លូវដែកដែលមានសុវត្ថិភាព និងអាចទុកចិត្តបានសម្រាប់ប្រជាជនទូទាំងប្រទេស៕
