លោក ផន មុតសុក្រឆពណ្ណ ហៅ Richie ដែលជាកូនប្រុសរបស់ឯកឧត្តម ឧត្តមសេនីយ៍ឯក មុឹង ពន្លក អគ្គនាយក នៃអគ្គនាយកដ្ឋានភស្តុភារ ហិរញ្ញវត្ថុ ក្រសួងការពារជាតិ និងលោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស បានបញ្ចប់ការសិក្សាដោយជោគជ័យ នៅរាជបណ្ឌិតសភាយោធា Sandhurst ប្រទេសអង់គ្លេស។
ស្ថានទូតចក្រភពអង់គ្លេសប្រចាំកម្ពុជា នៅថ្ងៃទី៧ ខែសីហា ឆ្នាំ២០២៦ បានបង្ហាញសារអបអរសាទរដល់ នាយទាហាន ផន មុតសុក្រឆពណ្ណ ដែលបានបញ្ចប់ការសិក្សាដោយជោគជ័យនៅរាជបណ្ឌិតសភាយោធា Sandhurst និងទទួលបានមេដាយ Sandhurst នៅពេលបញ្ចប់ការសិក្សា។
សមិទ្ធផលនេះ គឺជាព្រឹត្តិការណ៍សំខាន់មួយទៀតនៅក្នុងភាពជាដៃគូដែលកំពុងរីកចម្រើនរវាងព្រីតថេន និងកម្ពុជា។ នាយទាហាន ផន មុតសុក្រឆពណ្ណ គឺជានាយទាហានកម្ពុជាទីបី ដែលបានបញ្ចប់ការសិក្សាពីសាលា Sandhurst ក្នុងរយៈពេលបីឆ្នាំកន្លងមកនេះ ដែលបង្ហាញពីភាពរឹងមាំកាន់តែខ្លាំងឡើងនៃកិច្ចសហប្រតិបត្តិការការពារជាតិ ទំនាក់ទំនងអប់រំយោធាវិជ្ជាជីវៈ និងចំណងមិត្តភាពរវាងប្រជាជន និងប្រជាជនរវាងប្រទេសទាំងពីរ។
សាលា Sandhurst ត្រូវបានគេទទួលស្គាល់ជាយូរមកហើយសម្រាប់ការអភិវឌ្ឍមេដឹកនាំយោធា នាពេលអនាគតពីជុំវិញពិភពលោក។ បទពិសោធន៍ដែលទទួលបានដោយនិស្សិតបញ្ចប់ការសិក្សាកម្ពុជា ជួយកសាងបណ្តាញវិជ្ជាជីវៈ ពង្រឹងជំនាញភាពជាអ្នកដឹកនាំ និងពង្រឹងការយល់ដឹងរវាងកងកម្លាំងប្រដាប់អាវុធ។ ស្ថានទូតចក្រភពអង់គ្លេសប្រចាំកម្ពុជា ងមានមោទនភាពក្នុងការអបអរសាទរភាពជោគជ័យរបស់នាយទាហាន ផន មុតសុក្រឆពណ្ណ និងសូមជូនពរឱ្យទទួលបានជោគជ័យក្នុងអាជីពនាពេលអនាគតជាមួយកងយោធពលខេមរភូមិន្ទ។
នាព្រឹកថ្ងៃទី៨ ខែសីហានេះ ឧត្តមសេនីយ៍ឯក មុឹង ពន្លក ក៏បានបង្ហោះវីដេអូនិងសារអបអរដល់កូនប្រុសបែបនេះថា៖ “ប៉ា ម៉ាក់ និងក្រុមគ្រួសារពិតជាសប្បាយរីករាយក្រៃលែងដោយរកអ្វីមកប្រៀបផ្ទឹមពុំបាន នៅថ្ងៃដែលកូនបានបញ្ចប់ការសិក្សានៅសាលា Royal Military Academy Sandhurst Commissioning Course 253”។
សូមជម្រាបផងដែរថា កាលខែមករា ឆ្នាំ២០២៤ លោក ផន មុតសុក្រឆពណ្ណ ហៅ Richie ដែលជាកូនប្រុសច្បងរបស់ថៅកែក្រុមហ៊ុន ហនុមាន ក៏បានបញ្ចប់ការសិក្សា និងទទួលសញ្ញាបត្រថ្នាក់អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល (International Businesses and Global Management) ពីសាកលវិទ្យាល័យ King’s College London នៅទីក្រុងឡុងដ៍ ប្រទេសអង់គ្លេស ផងដែរ។ សម្រាប់ជីវិតគ្រួសារ លោក Richie បានរៀបអាពាហ៍ពិពាហ៍យ៉ាង អធិកអធមបំផុត ជាមួយកញ្ញា តាំង ប៉ោហ្គិច ហៅ Jade ដែលជាកូនស្រីរបស់ឧកញ៉ា តាំង គីមថុង និងអ្នកស្រី ស៊ុយ សុផាន់ កាលពីថ្ងៃទី០១ ខែតុលា ឆ្នាំ២០២៣៕
