ក្រុមហ៊ុន Crown Resort Co.,Ltd ដែលត្រូវបានគេស្គាល់ថា Crown Casino ត្រូវបានបង្កើតឡើងដំបូង កាលខែមេសា ឆ្នាំ១៩៩៩ នៅក្រុងប៉ោយប៉ែត ខេត្តបន្ទាយមានជ័យ ក្នុងគោលបំណងបម្រើសេវាកម្សាន្តល្បែងកាស៊ីណូដ៏សម្បូរបែប ជាមួយនឹងបុគ្គលិកមានបទពិសោធន៍ និងរួសរាយរាក់ទាក់។ បច្ចុប្បន្នទីតាំងដំបូងនេះ ត្រូវបានបំបែកជាអគារជាប់ៗគ្នាចំនួន៤ គឺ Golden Crown, Princess Crown, Genting Crown និង Dreamworld។
រយៈពេលជាច្រើនឆ្នាំមកនេះ ក្រុមហ៊ុន Crown Resort បានពង្រីកប្រតិបត្តិការរបស់ខ្លួន នៅតាមព្រំដែនកម្ពុជា-ថៃ និងកម្ពុជា-វៀតណាម ដោយបានបង្កើត Crown Casino នៅតំបន់ជ្រៃធំ ស្រុកកោះធំ ខេត្តកណ្តាល នៅខែមិថុនា ឆ្នាំ២០០៥, បង្កើត Crown Casino នៅក្រុងបាវិត ខេត្តស្វាយរៀង ក្នុងខែមិថុនា ឆ្នាំ២០១០ និងបង្កើតទីតាំងទី៤ Crown Casino នៅខេត្តប៉ៃលិន នៅខែកញ្ញា ឆ្នាំ២០១៣។
ស្ថាបនិករបស់កាស៊ីណូទាំង៤ទីតាំងខាងលើនេះ គឺអ្នកឧកញ៉ា កុក អាន។ អ្នកឧកញ៉ា កុក អាន ជាលំដាប់មហាសេដ្ឋីជើងចាស់ឈានមុខគេមួយរូបនៅកម្ពុជា ដែលលោកមានមុខជំនួញជាច្រើនក្នុងដៃ ព្រមទាំងមានតួនាទីក្នុងស្ថាប័ននីតិបញ្ញត្តិរបស់ជាតិផងដែរ។ មហាសេដ្ឋី កុក អាន អគ្គនាយកក្រុមហ៊ុន Anco Group មានឈ្មោះដើម ភូ កុកអាន កូនកាត់ចិន ឬ ចៅចិន កើតនៅខេត្តកោះកុង ខែកក្កដា ឆ្នាំ១៩៥៤។
អ្នកឧកញ៉ា កុក អាន មានមុខជំនួញ និងក្រុមហ៊ុនដូចជា ក្រុមហ៊ុនចែកចាយបារី Anco Brother Co., Ltd, ក្រុមហ៊ុនកាស៊ីណូ សណ្ឋាគារ និងការកម្សាន្ត Crown Resort Co.,Ltd, ក្រុមហ៊ុនបណ្តាញអគ្គីសនី Anco Electricity Co., Ltd, ក្រុមហ៊ុនចែកចាយអគ្គីសនី Khmer Electrical Power Co., Ltd, រោងចក្រ រោងចក្រ Ice Cream &Pure Drinking Water, ធនាគារ ឯកទេស អានកូ (Anco Specialized Bank) និងជាស្ថាបនិកក្លិបបាល់ទាត់ភ្នំពេញក្រោន បានបង្កើតឡើងនៅឆ្នាំ២០០១។ បច្ចុប្បន្នអ្នកឧកញ៉ា កុក អាន ក៏ជាសមាជិកព្រឹទ្ធសភា មួយរូបផងដែរ៕
