លោក លូ គឹមឈន់ ជាមន្រ្តីជាន់ខ្ពស់រាជរដ្ឋាភិបាល ដែលកាន់មុខដំណែងជាប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ តាំងពីឆ្នាំ១៩៩៣ មកដល់ពេលបច្ចុប្បន្ន។ លោកមានស្រុកកំណើតនៅឃុំព្រែពោធិ៍ ស្រុកស្រីសន្ធរ ខេត្តកំពង់ចាម។
លោក លូ គឹមឈន់ ទទួលបានគោរមងារ «ឧកញ៉ា» ពីព្រះមហាក្សត្រ តាមរយៈព្រះរាជក្រឹត្យលេខ នស/រកត/០៩០៣/២៨៣ នៅថ្ងៃទី១៥ ខែកញ្ញា ឆ្នាំ២០០៣ ដំណាលគ្នានឹងលោក ហ៊ីវ គឹមហេង។
លោក លូ គឹមឈន់ បានទទួលគ្រឿងឥស្សរិយយស «The Order of the Rising Sun, Gold Rays with Neck Ribbon» សម្រាប់និទាឃរដូវឆ្នាំ២០២០ ពីរដ្ឋាភិបាលជប៉ុន ជាការទទួលស្គាល់គុណសម្បត្តិក្នុងការសម្រេចបានសមិទ្ធផលដ៏លេចធ្លោ លើការបម្រើផលប្រយោជន៍សាធារណៈ និងរួមចំណែកលើកកម្ពស់ចំណងមិត្តភាពរវាងប្រទេសជប៉ុន និងព្រះរាជាណាចក្រកម្ពុជា ក្នុងវិស័យអភិវឌ្ឍន៍កំពង់ផែ។
លោក គីមឈន់ បានកាន់តំណែងជាអគ្គនាយកកំពង់ផែស្វយ័តក្រុងព្រះសីហនុនៅឆ្នាំ១៩៩៣ ក្រោមការដឹកនាំរបស់លោក កំពង់ផែព្រះសីហនុបានអភិវឌ្ឍ ដោយពង្រីកវិសាលភាពដឹកជញ្ជូនទៅកំពង់ផែធំៗតាមប្រទេសនានា។
ក្រៅកាន់ដំណែងអគ្គនាយកកំពង់ផែស្វយ័តក្រុងព្រះសីហនុ លោកក៏ជាប្រធានក្រុមការងារចុះមូលដ្ឋានស្រុកស្រីសន្ធរ ខេត្តកំពង់ចាមរបស់គណបក្សប្រជាជនកម្ពុជាផងដែរ៕
