នាព្រលប់ថ្ងៃទី០៣ ខែកុម្ភៈ ឆ្នាំ២០២៣នេះ លោកឧកញ៉ា ហេង បូរិន ប្រធានក្រុមប្រឹក្សាភិបាលក្រុមហ៊ុន បុរី ហេង បូរិន គ្រុប បានប្រកាសផ្តល់ការឧបត្ថម្ភជាថវិកាមួយចំនួន ដល់កីឡាករប្រដាល់ឆ្នើមរបស់កម្ពុជា ព្រំ សំណាង ដែលនឹងត្រូវបង្ហាញខ្លួននៅលើសង្វៀន Thai Fight ជាលើកដំបូង នៅថ្ងៃទី០៥ ខែកុម្ភៈ ឆ្នាំ២០២៣ ចុងសប្តាហ៍នេះ។
លោកឧកញ៉ា ហេង បូរិន បានលើកឡើងថា កីឡាករ ព្រំ សំណាង ជាកីឡាករឆ្នើមមួយរូបរបស់កម្ពុជាយើង ដែលនឹងត្រូវប្រកួតនៅប្រទេសថៃ នៅថ្ងៃអាទិត្យ ទី០៥ ខែកុម្ភៈ ចុងសប្ដាហ៍នេះ។ ដូច្នេះលោកឧកញ៉ា លើកទឹកចិត្ត ប្រសិនបើប្រកួតឈ្នះ លោកនឹងឧបត្ថម្ភ ៥០០ដុល្លារ បើចាញ់ឧបត្ថម្ភចំនួន ៣០០ដុល្លារ។ លោកឧកញ៉ា បន្ថែមថា ថវិកានេះនឹងវេរទៅលោកគ្រូបង្វឹក ស៊ន អេលីត ដើម្បីយកទៅប្រគល់ជូនកីឡាករ ព្រំ សំណាង ជាការលើកទឹកចិត្ត។ យ៉ាងណាមិញ លោកឧកញ៉ា ហេង បូរិន សូមជូនពរឱ្យកីឡាករ ព្រំ សំណាង ឈ្នះការប្រកួតអន្តរជាតិដ៏ធំមួយនេះ ដើម្បីជួយលើកស្ទួយកិត្តិយសជាតិ និងមុខមាត់របស់ប្រទេសកម្ពុជា។
គួរបញ្ជាក់ថា កីឡាករ ព្រំ សំណាង នឹងត្រូវធ្វើដំណើរទៅប្រកួតនៅសង្វៀន Thai Fight ទីក្រុងបាងកក ប្រទេសថៃ ជាលើកដំបូងរបស់ខ្លួន សម្រាប់ការប្រកួតមិត្តភាពអន្តរជាតិ ដែលនឹងត្រូវប៉ះកីឡាករប្រដាល់ជើងខ្លាំងជនជាតិអង់គ្លេស Thomas Capenter នាថ្ងៃអាទិត្យ ទី០៥ ខែកុម្ភៈ ឆ្នាំ២០២៣ ស្ថិតក្នុងប្រភេទទម្ងន់ ៧៨គីឡូក្រាម។
សូមជម្រាបផងដែរថា នេះមិនមែនជាលើកទី១ទេ ដែលលោកឧកញ៉ា ហេង បូរិន ឧបត្ថម្ភថវិកាដល់កីឡាករប្រដាល់កម្ពុជា។ ជាក់ស្តែង កាលពីថ្ងៃទី២៥ ខែធ្នូ ឆ្នាំ២០២២កន្លងទៅ លោកឧកញ៉ា ក៏បានឧបត្ថម្ភថវិកាលើកទឹកចិត្តដល់កីឡាករ ធឿន ធារ៉ា ចំនួន ៣០០ដុល្លារ បន្ទាប់ពីកីឡាកររូបនេះ បានផ្តួលកីឡាករថៃ ឱ្យចុះចាញ់នៅទឹកទី១ និងទទួលបានពានរង្វាន់ស្តេចថៃ ជាប្រវត្តិសាស្ត្រ ហើយក្នុងនោះលោកឧកញ៉ា ក៏បានឧបត្ថម្ភដល់កីឡាករ ហ៊ុន កន ដែលចាញ់ការប្រកួតនៅទឹកទី២ ចំនួន ១០០ដុល្លារ ផងដែរ៕
