កាលពីរសៀលថ្ងៃទី២៣ ខែកុម្ភៈ ឆ្នាំ២០២៣ អ្នកឧកញ៉ាបណ្ឌិត សុខ គង់ ប្រធានក្រុមហ៊ុន សូគីម៉ិច អ៊ិនវេសមេន គ្រុប និងជាម្ចាស់សណ្ឋាគារ សុខា បានអញ្ជើញធ្វើបដិសណ្ឋារកិច្ចវត្តមានដ៏ខ្ពង់ខ្ពស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានអញ្ជើញជាអធិបតីក្នុងពិធីបិទសន្និបាតត្រួតពិនិត្យលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងមហាផ្ទៃ នៅសណ្ឋាគារ សុខាភ្នំពេញ។
វត្តមានរបស់សម្តេចតេជោ ហ៊ុន សែន ទៅកាន់សណ្ឋាគារ សុខាភ្នំពេញ ក្នុងពិធីបិទសន្និបាតខាងលើនេះ គេឃើញមានការចូលរួមធ្វើបដិសណ្ឋារកិច្ចពីសំណាក់មន្ត្រីជាន់ខ្ពស់របស់រាជរដ្ឋាភិបាលកម្ពុជាជាច្រើនរូប ទាំងមន្ត្រីស៊ីវិល និងកងកម្លាំងនគរបាលជាន់ខ្ពស់។ ទទឹមនឹងនោះ អ្នកឧកញ៉ា សុខ គង់ ក៏បានចូលរួមធ្វើបដិសណ្ឋារកិច្ចសម្តេចតេជោ ដោយផ្ទាល់ទៅកាន់សណ្ឋាគាររបស់លោក ដើម្បីចូលរួមក្នុងវេទិកាសន្និបាតផងដែរ។
ជាមួយគ្នានេះ លោកបណ្ឌិត ងិន បាណាល់ កូនប្រសាររបស់អ្នកឧកញ៉ា សុខ គង់ ក៏បានអញ្ជើញចូលរួមក្នុងពិធីបិទសន្និបាតនេះដែរ។ លោកឧត្តមសេនីយ៍ឯក ងិន បាណាល់ អគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ នៃក្រសួងមហាផ្ទៃ បានបង្ហោះរូបភាពមួយសន្លឹកលើទំព័រហ្វេសប៊ុករបស់លោក ភ្ជាប់ជាមួយនឹងសារថា៖ “ថ្ងៃនេះ ខ្ញុំបាទទទួលបានកិត្តិយសដ៏ឧត្តុងឧត្តមបានថតរូបអនុស្សាវរីយ៍ក្នុងឯកសណ្ឋានជាមួយ លោកជំទាវកិត្តិសង្គហបណ្ឌិត ម៉ែន សំអន និងលោកពុក។ ដោយសេចក្តីគោរពដ៏ខ្ពង់ខ្ពស់”។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានធ្វើសេចក្ដីរាយការណ៍ ឱ្យដឹងថា ផ្អែកលើសេចក្ដីរាយការណ៍នៃលទ្ធផលការងារប្រចាំឆ្នាំ២០២២ និងលើទិសដៅការងារឆ្នាំ២០២៣ របស់ក្រសួងមហាផ្ទៃ បានបង្ហាញឱ្យឃើញសមិទ្ធផល បញ្ហាប្រឈម និងដំណោះស្រាយ សំដៅលើកកម្ពស់គុណភាពការងាររបស់ក្រសួងមហាផ្ទៃ និងរដ្ឋបាលថ្នាក់ក្រោមជាតិ។
សូមជម្រាបជូនថា ឆ្លៀតឱកាសនោះ សម្ដេចតេជោ ហ៊ុន សែន នាយករដ្ឋមន្ដ្រី បានមានប្រសាសន៍ណែនាំដល់កងកម្លាំងនគរបាលជាតិ សម្រាប់អនុវត្តការងារឆ្នាំ២០២៣ ថា ត្រូវបន្ដពង្រឹង និងថែរក្សាការពារសន្ដិភាព ស្ថិរភាពនយោបាយ បូរណភាពទឹកដី អធិបតេយ្យជាតិ ការពារព្រះមហាក្សត្រ ការពាររបបរាជានិយម ព្រមទាំងបន្ដលើកកម្ពស់លទ្ធិប្រជាធិបតេយ្យ និងសេរី ពហុបក្ស សិទ្ធិសេរីភាពរបស់ប្រជាពលរដ្ឋ និងការពង្រឹងនិតិរដ្ឋ ព្រមទាំងរដ្ឋធម្មនុញ្ញ នៃព្រះរាជាណាចក្រកម្ពុជា៕
