លោកជំទាវឧកញ៉ា ឡេង ចាន់ណា សហគ្រិនស្រ្តីវ័យក្មេងក្នុងវិស័យអចលនទ្រព្យ បានចែករំលែកដំបូន្មានដ៏ខ្ពង់ខ្ពស់របស់ឯកឧត្តមបណ្ឌិត ហ៊ុន ម៉ាណែត បេក្ខភាពអនាគតនាយករដ្ឋមន្ត្រី ដែលបានផ្តល់ជាអនុសាសន៍ថា ភាពជោគជ័យ គឺឈរលើកត្តាសំខាន់ៗចំនួន៤យ៉ាង។
ស្ត្រីវ័យ៣៣ឆ្នាំ ឧកញ៉ា ឡេង ចាន់ណា បានលើកឡើងតាមរយៈទំព័រហ្វេសប៊ុក កាលពីដើមសប្តាហ៍នេះ យ៉ាងដូច្នេះថា កត្តាជោគជ័យ គឺឈរលើកត្តាសំខាន់ចំនួន ៤ ៖ ១.ជោគជ័យធំ កើតឡើងពីជោគជ័យតូចៗផ្តុំគ្នា ២.ការខិតខំ ប្រឹងប្រែង តស៊ូ ជាកត្តាសំខាន់នៃភាពជោគជ័យ៖ គ្មានភាពជោគជ័យណា ដែលកើតឡើងដោយគ្មានការតស៊ូនោះទេ ៣.ភាពជោគជ័យ អាចប្រើប្រាស់ពេលវេលាយូរអង្វែង ដូចនេះទាមទារនូវការអំណត់ អត់ធន់ និង ៤.ការកំណត់គោលដៅច្បាស់លាស់ និងបន្តទៅមុខជារៀងរហូត ហើយពេលខ្លះក្នុងពេលបរាជ័យ។ លោកជំទាវបានបញ្ជាក់ថា នេះជាដំបូន្មានដ៏ខ្ពង់ខ្ពស់របស់ឯកឧត្តមបណ្ឌិត ហ៊ុន ម៉ាណែត។
គួរបញ្ជាក់ថា ឧកញ៉ា ឡេង ចាន់ណា គឺជាស្ថាបនិកក្រុមហ៊ុន ប្រ៊ីលាន ស៊ីធី វើលដ៍ ឯ.ក និងបានកាន់កាប់តួនាទីជាអគ្គនាយិកាប្រតិបត្តិផ្ទាល់លើសកម្មភាពអាជីវកម្ម។ ក្រុមហ៊ុនអ្នកស្រីជាក្រុមហ៊ុន អភិវឌ្ឍអចលនទ្រព្យដ៏ធំមួយក្នុងខេត្តកំពង់ធំ ហើយបាននឹងកំពុងពង្រើកខ្លួនចូលក្នុងទឹកដីខេត្តសៀមរាប និងបណ្តាខេត្តផ្សេងៗទៀតលើវិសយ័អចលនទ្រព្យ ហើយលោកស្រីក៏កំពុងនាំចូល និងចែកចាយគ្រឿងសម្អាងទៀតផង។
ក្រៅពីប្រកបមុខជំនួញ ឧកញ៉ា ឡេង ចាន់ណា ក៏មានតួនាទីជាប្រធានសមាគមលើកកម្ពស់ពលករ និងអតីតពលករដើម្បីសប្បុរសធម៌ ដែលមានសមាជិករាប់ពាន់នាក់។ លើសពីនេះ លោកជំទាវ ក៏ជាសកម្មជនគណៈបក្សដ៏សកម្មមួយរូប ដែលជួយជ្រោមជ្រែងដល់ឯកឧត្តមបណ្ឌិត ហ៊ុន ម៉ាណែត ប្រធានយុវជនគណបក្សប្រជាជនកម្ពុជាថ្នាក់កណ្តាល ដើម្បីចុះជួយមូលដ្ឋាននៃខេត្តកំពង់ធំ និងខេត្តសៀមរាបផងដែរ៕
