គិតចាប់ពីខែមករា ដល់ខែឧសភា ដើមឆ្នាំ២០២៤នេះ កម្ពុជាទទួលបានភ្ញៀវទេសចរអន្តរជាតិសរុបប្រមាណ២,៦៤០,៩៩៩នាក់ កើនឡើង២២.១% ធៀបនឹងរយៈពេលដូចគ្នាក្នុងឆ្នាំ២០២៣។នេះបើតាមប្រភពក្រសួងទេសចរណ៍ នារសៀលថ្ងៃទី១១ ខែកក្កដា។
ក្រសួងទេសចរណ៍បានឱ្យដឹងទៀតថា ក្នុងចំណោមទេសចរជាង២លាននាក់នេះ មានភ្ញៀវទេសចរចូលមកតាមផ្លូវអាកាសប្រមាណ ៩៨៦ ៤៣៥ នាក់ ផ្លូវគោកប្រមាណ ១ ៦១២ ៥៤៧ នាក់ និងផ្លូវទឹកប្រមាណ ៤២,០១៧ នាក់។
គួរបញ្ជាក់ផងដែរថា ក្នុងរយៈពេល៥ខែ ដើមឆ្នាំ២០២៤នេះ កម្ពុជាមានភ្ញៀវទេសចរផ្ទៃក្នុងសរុបប្រមាណ ១០,៦៨៨,០៧៣ នាក់ ក្នុងនោះភ្ញៀវទេសចរជាជនបរទេសមានចំនួនប្រមាណ ១,៩០៦,៨០០នាក់ កើនឡើង៦៩.១% បើប្រៀបធៀបនឹងរយៈពេលដូចគ្នាក្នុងឆ្នាំ២០២៣។
គោលដៅទេសចរណ៍ធំៗដូចជា រាជធានីភ្នំពេញ ទទួលបានទេសចរប្រមាណ ១,០៩០,៤៣៤ នាក់ ,ខេត្តសៀមរាប ប្រមាណ ៤៧២,២៥៨ នាក់, តំបន់ឆ្នេរ ប្រមាណ២៤១,២៧៣ នាក់, តំបន់អេកូទេសចរណ៍ ប្រមាណ ១៨,៧៩៨ នាក់ និងតំបន់ផ្សេងៗទៀត ប្រមាណ ៨៤,០៥៣ នាក់។
សូមជម្រាបជូនផងដែរថា ប្រទេសទាំង ១០ ដែលមានភ្ញៀវទេសចរធ្វើដំណើរមកកាន់ប្រទេសកម្ពុជាច្រើនជាងគេមានដូចជា ១, ប្រទេសថៃ ២, ប្រទេសវៀតណាម ៣, ប្រទេសចិន៤, ប្រទេសឡាវ ៥, សហរដ្ឋអាមេរិក ៦, ប្រទេសកូរ៉េខាងត្បូង ៧, ប្រទេសឥណ្ឌូនេស៊ី ៨, ប្រទេសបារាំង ៩, ចក្រភពអង់គ្លេស និង ១០, ប្រទេសជប៉ុន៕
