សាលាជាតិគយ នៃ អគ្គនាយកដ្ឋានគយនិងរដ្ឋាករកម្ពុជា កាលពីថ្ងៃទី៦ ខែតុលា ឆ្នាំ២០២៥ បានរៀបចំពិធីបើកវគ្គ បណ្តុះបណ្តាលវិជ្ជាជីវៈជើងសាគយជំនាន់ទី១២ ក្រោមអធិបតីភាពរបស់លោក សែ សុឃន អគ្គនាយករងនៃអគ្គនាយកដ្ឋានគយនិងរដ្ឋាករកម្ពុជា។
អគ្គនាយកដ្ឋានគយនិងរដ្ឋាករកម្ពុជា បានបានបញ្ជាក់ថា ការបើក “វគ្គបណ្តុះបណ្តាលវិជ្ជាជីវៈជើងសាគយជំនាន់ទី១២” នេះ ធ្វើឡើងស្របតាមការណែនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត និងស្របតាមផែនការសកម្មភាពនិងកម្មវិធីកែទម្រង់និងទំនើបកម្មរបស់អគ្គនាយកដ្ឋានគយនិងរដ្ឋាករកម្ពុជាផងដែរ។
ថ្លែងចំពោះមុខសិក្ខាកាមជាង៤០០នាក់ លោក សែ សុឃន បានលើកឡើងអំពីសារៈសំខាន់និងការទទួលខុសត្រូវរបស់ជើងសាគយម្នាក់ៗ។ ក្នុងនោះជើងសាគយត្រូវបានប្រគល់ឱ្យនូវទំនួលខុសត្រូវដ៏ធំមួយដើម្បីធានាថាការនាំចូលនិងការនាំចេញត្រូវអនុលោមតាមច្បាប់និងបទប្បញ្ញត្តិគយជាធរមាន។ ជំនាញវិជ្ជាជីវៈ ជើងសាគយ គឺមិនអាចខ្វះបានក្នុងកិច្ចដំណើរការបំពេញបែបបទបញ្ចេញទំនិញពីគយ ដែលអាចឱ្យទំនិញចរាចរឆ្លងកាត់ព្រំដែនបានដោយរលូន។
សូមជម្រាបជូនថា ជើងសាគយដើរតួនាទីយ៉ាងសំខាន់នៅក្នុងពាណិជ្ជកម្មអន្តរជាតិ និងខ្សែច្រវ៉ាក់ផ្គត់ផ្គង់សកល និងជាអន្តរការីរវាងម្ចាស់ទំនិញ អ្នកនាំចូល អ្នកនាំចេញ ជាមួយរដ្ឋបាលគយ។ ចំណេះដឹងពាក់ព័ន្ធនឹងបទប្បញ្ញត្តិគយ សមត្ថភាពជំនាញវិជ្ជាជីវៈ និងក្រមសីលធម៌របស់ជើងសាគយ គឺជាកត្តាសំខាន់បំផុតក្នុងកិច្ចការពារផលប្រយោជន៍របស់ម្ចាស់ទំនិញ និងរក្សានូវសុចរិតភាពនៃពាណិជ្ជកម្មអន្តរជាតិ។ នៅក្នុងការប្រកបធុរកិច្ចរបស់ខ្លួន ជើងសាគយត្រូវមានចំណេះដឹងនិងជំនាញវិជ្ជាជីវៈច្បាស់លាស់ ព្រមទាំងបន្តស្វែងយល់ជាប្រចាំនូវច្បាប់ បទប្បញ្ញត្តិ និងលិខិតបទដ្ឋានគតិយុត្តនានាពាក់ព័ន្ធការនាំចេញ ការនាំចូល និងការឆ្លងកាត់ ព្រមទាំងនីតិវិធីគយនិងបែបបទបញ្ចេញទំនិញពីគយ ដោយធានាថា ចរាចរទំនិញឆ្លងកាត់ព្រំដែនត្រូវបានប្រព្រឹត្តទៅដោយភាពរលូននិងគ្មានឧបសគ្គដែលមិនចាំបាច់៕
