ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ នៅព្រឹកថ្ងៃចន្ទ ទី២៤ ខែវិច្ឆិកា ឆ្នាំ២០២៥នេះ បានបង្ហោះសារនៅលើបណ្ដាញទំនាក់ទំនងសង្គមផ្លូវការរបស់ឯកឧត្តម ឱ្យដឹងថា រោងចក្រចំនួន២កន្លែង គ្រោងនឹងបើកដំណើរការ នាពេលឆាប់ៗខាងមុខនេះ និងមានតម្រូវការការងារជាង ៦០០០កន្លែង ហើយនេះជាឱកាសសម្រាប់បងប្អូននៅស្រុកគិរីវង់ ខេត្តតាកែវ និងបងប្អូនស្រុកអង្គរជ័យ ខេត្តកំពត។
តាមរយៈសារលើបណ្តាញសង្គមហ្វេសប៊ុក ឯកឧត្តម វ៉ី សំណាង បានលើកឡើងបែបនេះថា ឱកាសការងាររបស់បងប្អូនប្រជាពលរដ្ឋក្នុងស្រុកគិរីវង់ (ខេត្តតាកែវ) និងស្រុកអង្គរជ័យ (ខេត្តកំពត) បានមកដល់ទៀតហើយ! ក្រុមការងារ នៃរដ្ឋបាលខេត្តតាកែវ បានចុះពិនិត្យទីតាំងដីស្នើសុំសាងសង់រោងចក្រចំនួន ០២ទីតាំង ដូចខាងក្រោម៖
១/ រោងចក្រកាត់ដេរសម្លៀកបំពាក់ ស្ថិតនៅភូមិត្រើយទន្លាប់ ឃុំព្រះបាទជាន់ជុំ ស្រុកគិរីវង់ ខេត្តតាកែវ ដែលមានតម្រូវការកម្មករនៅចន្លោះពី ១០០០ ទៅ ១៥០០នាក់។
២/ រោងចក្រកាត់ដេរសម្លៀកបំពាក់ ស្ថិតនៅភូមិព្រៃអំពក ឃុំព្រៃអំពក ស្រុកគិរីវង់ ខេត្តតាកែវ ដែលមានតម្រូវការកម្មករ ចាប់ពី ៥០០០នាក់ទ្បើងទៅ។
ឯកឧត្តម វ៉ី សំណាង អភិបាល នៃគណៈអភិបាលខេត្តតាកែវ បានបញ្ជាក់ថា ជារួមរោងចក្រទាំងពីរខាងលើនេះ មានតម្រូវការកម្មករសរុបប្រមាណ ៦៥០០នាក់ ដូច្នេះឱកាសការងាររបស់បងប្អូនប្រជាពលរដ្ឋក្នុងស្រុកគិរីវង់ និង ស្រុកអង្គរជ័យ បានមកដល់ជណ្ដើរផ្ទះបងប្អូនហើយ។
សូមបញ្ជាក់ថា កាលពីពេលថ្មីៗនេះ ឯកឧត្តម វី សំណាង ក៏បានឱ្យដឹងផងដែរថា រយៈពេល ៦ខែ ដើមឆ្នាំ២០២៥នេះ ខេត្តតាកែវ ទទួលបានអ្នកវិនិយោគចូលមកបណ្ដាក់ទុនចំនួន ៣១ក្រុមហ៊ុន ដែលមានទំហំទឹកប្រាក់ចំនួនជាង ៩៧លានដុល្លារអាម៉េរិក។ ជាមួយគ្នានេះ ខេត្តតាកែវនឹងមានរោងចក្រ សហគ្រាសថ្មីចំនួន ២៣ កន្លែង ដែលបានបោះទុនវិនិយោគប្រមាណ ៧៥ លានដុល្លារអាម៉េរិក ហើយអាចផ្ដល់ឱកាសការងារសរុបដល់ទៅ ១៥,០០០ កន្លែង។ នេះសបញ្ជាក់ឱ្យឃើញពីសក្ដានុពលរីកចម្រើននៃវិស័យឧស្សាហកម្មនៅខេត្តតាកែវ និងតម្រូវការកើនឡើងឥតឈប់ឈរចំពោះកម្លាំងពលកម្ម៕
