ក្នុងស្មារតីសាមគ្គីជាតិជាធ្លុងមួយ និងដើម្បីតបស្នងគុណ ទៅវីរកងទ័ពដែលកំពុងឈរជើងការពារទឹកដី ក្រុមហ៊ុន ស៊ីម៉ងត៍អូដ្ឋ ជីប ម៉ុង បានឧបត្ថម្ភស៊ីម៉ងត៍អូដ្ឋបន្ថែមចំនួន ១,០០០ តោន ជូនដល់រាជរដ្ឋាភិបាល សម្រាប់ប្រើប្រាស់ក្នុងកិច្ចសាងសង់លេណណដ្ឋាន និងហេដ្ឋារចនាសម្ព័ន្ធការពារជាតិ នៅតាមបន្ទាត់ព្រំដែន។
នេះមិនមែនគ្រាន់តែជាការឧបត្ថម្ភសម្ភារសំណង់ប៉ុណ្ណោះទេ ប៉ុន្តែគឺជាការផ្ញើជូននូវ «បេះដូង និងកម្លាំងចិត្ត» ពីក្រោយខ្នង ទៅកាន់វីរជនជួរមុខដែលកំពុងលះបង់ ដើម្បីសន្តិភាពនៃមាតុភូមិ។
«ខ្មែរជួយខ្មែរ»៖ទោះបីជាស្ថានភាពព្រំដែនមានការឈ្លានពាន និងការប្រឈមខ្លាំងយ៉ាងណាក៏ដោយ ក៏ការសាងសង់លេណដ្ឋានការពារជាតិនៅតែត្រូវបន្តយ៉ាងសកម្ម។ ស៊ីម៉ងត៍អូដ្ឋ ១,០០០ តោនថ្មីនេះ នឹងត្រូវប្រែក្លាយជា «ខែលរឹងមាំ» ការពាររាល់គ្រាប់ខ្យល់ និងគ្រាប់ភ្លៀងជូនដល់បងៗវីរកងទ័ព ក៏ដូចជាបង្គោលគ្រឹះដ៏កក់ក្តៅមួយសម្រាប់បងៗវីរកងទ័ព។
រហូតមកដល់ពេលនេះ ស៊ីម៉ងត៍អូដ្ឋបានហែហមជាមួយវីរកងទ័ពអស់រយៈពេលជាច្រើនឆ្នាំ ដោយបានបរិច្ចាគសរុបជាង ៣,០០០ តោនរួចមកហើយ។ យើងប្តេជ្ញានឹងបន្តឈរនៅពីក្រោយខ្នងរាជរដ្ឋាភិបាល និងកងទ័ពជានិច្ច ឱ្យតែមាតុភូមិត្រូវការ។
អ្នកឧកញ៉ា លាង ពៅ អគ្គនាយកក្រុមហ៊ុនស៊ីម៉ងត៍អូដ្ឋ និង ស៊ីម៉ងត៍វី បាននាំយកនូវផលិតផលមោទនភាពជាតិខ្មែរនេះ ទៅប្រគល់ជូនដល់ដៃបងប្អូនកងទ័ពដោយផ្ទាល់ ដើម្បីសាកសួរសុខទុក្ខ និងបង្ហាញថា៖ «ទោះបីគេបន្តឈ្លានពាន ស៊ីម៉ងត៍អូដ្ឋនៅតែបន្តជួយ និងនៅក្បែរវីរកងទ័ពគ្រប់ពេលវេលា។ យើងនឹងក្រៀកស្មាគ្នា ជួយគ្នាក្នុងគ្រាដែលប្រទេសជាតិកំពុងជួបទុក្ខលំបាក»។
ក្នុងគ្រានោះដែរ អ្នកឧកញ៉ា លាង ពៅ បានសម្តែងនូវចំណាប់អារម្មណ៍យ៉ាងជ្រាលជ្រៅថា៖ «បងប្អូនប្រជាជនខ្មែរទាំងអស់ សូមរឹងមាំជាមួយគ្នា ដូចស៊ីម៉ងត៍ខ្មែរមួយនេះរឹងមាំជាមួយវីរកងទ័ពយើងដូច្នេះដែរ ។
ស៊ីម៉ងត៍អូដ្ឋ ស៊ីម៉ងត៍ខ្មែរដើម្បីខ្មែរ យើងមានឈាមជ័រជាខ្មែរតែមួយ យើងពួតដៃគ្នាឡើង យើងរួមសុខរួមទុក្ខជាមួយគ្នា !
ក្រុមហ៊ុនជីប ម៉ុង ស៊ីម៉ងត៍អូដ្ឋ សូមអំពាវនាវដល់បងប្អូនប្រជាជនខ្មែរគ្រប់ទិសទី សូមបន្តរក្សាស្មារតីរួបរួមគ្នា និងផ្តល់កម្លាំងចិត្តដល់វីរកងទ័ពយើង។ ដរាបណាពួកយើងពួតដៃគ្នា យើងនឹងក្លាយជាកម្លាំងមួយដែលមិនអាចបំបែកបាន។
ស៊ីម៉ងត៍អូដ្ឋ ស៊ីម៉ងត៍ខ្មែរ ដើម្បីខ្មែរ! រឹងមាំជាមួយកងទ័ព រឹងមាំជាមួយមាតុភូមិ!
