សហគ្រាស/ក្រុមហ៊ុនចិនប្រមាណ ២០ មកស្វែងយល់ពីស្ថានភាពពាណិជ្ជកម្ម និងវិនិយោគរបស់កម្ពុជា សំដៅឈានទៅតភ្ជាប់ទំនាក់ទំនងជាមួយកម្ពុជា។នេះបើយោងតាមកិច្ចប្រជុំស្តីពីការលើកកម្ពស់ពាណិជ្ជកម្ម និងវិនិយោគរវាងចិននិងកម្ពុជា ដែលរៀបចំដោយសមាគមចិន-កម្ពុជា ជាមួយលោក ឡៅ ងួន អេង អនុព័ន្ធពាណិជ្ជកម្មកម្ពុជា កាលពីចុងខែមីនា ឆ្នាំ២០២៦។
ក្រសួងពាណិជ្ជកម្ម បានឱ្យដឹងថា កិច្ចប្រជុំនេះ រៀបចំឡើងក្នុងគោលបំណងផ្តល់ការយល់ដឹងអំពីស្ថានពាណិជ្ជកម្ម និងវិនិយោគរបស់កម្ពុជានិងការតភ្ជាប់ទីផ្សារ ដោយមានការចូលរួមពីតំណាងសហគ្រាស/ក្រុមហ៊ុនចិនប្រមាណ ២០ ដែលមានបំណងតភ្ជាប់ទំនាក់ទំនងទីផ្សារ ធ្វើធុរកិច្ច និងពង្រីកការវិនិយោគនៅកម្ពុជា ដោយក្នុងនោះភាគច្រើននៃសហគ្រាសចិនចូលរួមនេះ មានជំនាញផលិតសម្គារ:ប្រើប្រាស់ប្រចាំថ្ងៃ និងកែច្នៃអាហារ ជាដើម។
ក្នុងរយៈពេល១ឆ្នាំពេញនៃឆ្នាំ២០២៥ ពោលគិតចាប់ពីខែមករា-ធ្នូ ប្រទេសចិននៅតែជាដៃគូពាណិជ្ជកម្មលំដាប់ទី១របស់កម្ពុជា ដែលទំហំពាណិជ្ជកម្មកម្ពុជា ចិន សម្រេចបានក្នុងទឹកប្រាក់ប្រមាណ ១៩,៧ ពាន់លានដុល្លារ កើនឡើងជិត ៣០% បើធៀបរយៈពេលដូចគ្នាក្នុងឆ្នាំ២០២៤។ នេះបើតាមរបាយការណ៍របស់ក្រសួងពាណិជ្ជកម្ម។
បើតាមរបាយការណ៍ ក្នុងឆ្នាំ២០២៥កន្លងទៅនេះ កម្ពុជាបានសម្រេចការនាំចេញទៅចិនក្នុងទឹកប្រាក់ប្រមាណ ១,៦ ពាន់លានដុល្លារ ធ្លាក់ចុះ ៣.៦៤% បើធៀបរយៈពេលដូចគ្នាក្នុងឆ្នាំ២០២៤ ខណៈនាំចូលមកវិញក្នុងទឹកប្រាក់ប្រមាណ ១៨ ពាន់លានដុល្លារ កើនឡើង ៣៤.២៩% បើធៀបរយៈពេលដូចគ្នាក្នុងឆ្នាំ២០២៤៕អត្ថបទ៖ហ្សាលីន
