ទឹកដីប្រវត្តិសាស្ត្រនៃព្រះរាជាណាចក្រកម្ពុជាបានក្លាយជាក្តីសង្ឃឹម និងការរួបរួមជាសកល ខណៈដែលយុវតី និងថ្នាក់ដឹកនាំកាយឫទ្ធិនារីរាប់ពាន់នាក់មកពីជុំវិញពិភពលោក បានធ្វើដំណើរមកជួបជុំគ្នាយ៉ាងឱឡារិកនៅលើទឹកដីដ៏សក្ការៈនៃប្រាសាទអង្គរវត្ត។
ក្នុងនាមជាម្ចាស់ផ្ទះរៀបចំ មហាសន្និបាតកាយឫទ្ធិនារីពិភពលោក (WAGGGS) លើកទី៣៩ និងកិច្ចប្រជុំប្រចាំឆ្នាំរបស់សហគមន៍ OB-PS លើកទី៤២ កម្ពុជាសូមស្វាគមន៍យ៉ាងកក់ក្តៅបំផុតចំពោះវត្តមានដ៏ខ្ពង់ខ្ពស់របស់គណៈប្រតិភូ យុវតី សមាជិកាដែលបានអញ្ជើញមកដែនដីអច្ឆរិយអង្គរ ខេត្តសៀមរាប ដោយទំនុកចិត្ត និងស្នាមញញឹមដ៏រីករាយ។
គួរឱ្យដឹងថា ព្រឹត្តិការណ៍កម្រិតពិភពលោកនេះ គឺជាស្ពានចម្លងវប្បធម៌ដ៏រស់រវើក ដែលអនុញ្ញាតឱ្យយុវតីគ្រប់ពូជសាសន៍អាចផ្សារភ្ជាប់ទំនាក់ទំនង ស្វែងយល់ពីប្រវត្តិសាស្ត្រ និងចែករំលែកចំណង់ចំណូលចិត្តរួមគ្នា។ គោលបំណងចម្បងនៃការជួបជុំនេះ គឺការរួមគ្នាបណ្តុះគំនិតច្នៃប្រឌិត និងការប្តេជ្ញាចិត្តខ្ពស់ ដើម្បីបង្កើតឱ្យមានការផ្លាស់ប្តូរជាវិជ្ជមាន ព្រមទាំងនាំយកថាមពល និងចំណេះដឹងថ្មីៗទៅបន្តបេសកកម្មកសាងពិភពលោកមួយដ៏ប្រសើរជាងមុន៕
