ប្រមុខរាជរដ្ឋាភិបាលកម្ពុជា សម្ដេចធិបតី ហ៊ុន ម៉ាណែត បញ្ជាក់ថា នៅឆ្នាំ ២០២៦នេះ កម្ពុជាបានចរចាធ្វើការបើកផ្លូវដឹកជញ្ចូនទំនិញតាមផ្លូវគោកជាលើកដំបូងទៅប្រទេសចិនតាមរយៈច្រកប្រទេសឡាវ។នេះបើយោងតាមប្រសាសន៍របស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ថ្លែងក្នុងទិវាមច្ឆជាតិ និងលែងកូនត្រី១.៥លានក្បាល ចូលទន្លេវ៉ៃគោ នៅខេត្តស្វាយរៀង ថ្ងៃទី១ កក្កដា ឆ្នាំ២០២៦។
នាឱកាសនោះ សម្តេចធិបតី ហ៊ុន ម៉ាណែត បានបញ្ជាក់ថា កាលពីមុនកម្ពុជាដឹកជញ្ជូនទំទិញទៅទីផ្សារប្រទេសចិនតាមរយៈផ្លូវទឹកប៉ុណ្ណោះ ប៉ុន្តែសម្រាប់ឆ្នាំ ២០២៦នេះទៅ កម្ពុជាបានចរចាធ្វើការបើកផ្លូវដឹកជញ្ចូនទំនិញតាមផ្លូវគោកជាលើកដំបូងទៅប្រទេសចិនតាមរយៈច្រកប្រទេសឡាវ ហើយឥឡូវកម្ពុជាអាចដឹកកសិផលទៅតាមផ្លូវគោកឡើងទៅប្រទេសចិនតែម្ដង ដូច្នេះការធានាការដឹកការសិផលកម្ពុជាពិសេសនៅតំបន់ភាគខាងជើងកម្ពុជាគឺអាចតភ្ជាប់តាមរយៈផ្លូវគោកនេះតែម្ដង។
ជាមួយគ្នានេះ សម្តេចធិបតី បានថ្លែងបន្តថា កម្ពុជាតូច ប្រជាជនតិច ផលជលផល ឬកសិផលមានផលច្រើននាំឱ្យសល់បន្ទាប់ពីបំពេញការហូបហើយ ដូច្នេះរាជរដ្ឋាភិបាល បានប្រឹងប្រែងរកទីផ្សារនៅក្រៅប្រទេស ដើម្បីនាំចេញជលផល និងកសិផល ដែលសល់ពីការហូបនោះ។សម្តេចធិបតី បានថ្លែងទៀតថា ក្រៅពីប្រឹងប្រែងរកទីផ្សារហើយនោះ រាជរដ្ឋាភិបាល ក៏បានដាក់ចេញកិច្ចអន្តរាគមន៍ជាច្រើនទៀត ជួយដល់កសិករ ដូចជាការបញ្ចេញថវិកា ៦០លានដុល្លារជួយទិញស្រូវ ការអន្តរាគមន៍បូមទឹកស្រោចស្រប់ជាដើមផងដែរ។សម្តេច ក៏បន្តជំរុញមន្ត្រីរាជការ និងអ្នកពាក់ព័ន្ធក្នុងវិស័យកសិកម្ម ខិតខំប្រឹងប្រែងដោះស្រាយរាល់បញ្ហារបស់ប្រជាកសិករជាបន្ទាប់ផងដែរ។
សូមរម្លឹកដែរថា កម្ពុជា-ឡាវ កាលថ្ងៃទី២២ ខែមិថុនា ឆ្នាំ២០២៦ បានចាប់ផ្តើមបើកការដឹកជញ្ជូនឆ្លងកាត់សម្រាប់នាំចេញផលិតផលកម្ពុជា៦មុខ ទៅកាន់ទីផ្សារចិនជាផ្លូវការ ដែលរួមមានចេក ស្វាយ អង្ករ មៀនប៉ៃលិន ម្សៅដំឡូងមី និងទុរេន។ការបើកផ្លូវឆ្លងកាត់ជាផ្លូវការនៅពេលនេះ ធ្វើឡើងបន្ទាប់ពីភាគីកម្ពុជា និង ឡាវ បានធ្វើការចរចាជាមួយគ្នាអស់រយៈពេល ៦ ខែកន្លងមក។ច្រកថ្មីនេះ នឹងធ្វើឱ្យកម្ពុជាចំណេញពេលដឹកជញ្ជូនដែលជាធម្មតាត្រូវចំណាយពេលពី ១៥ទៅ២០ថ្ងៃ ហើយឥឡូវអាចបង្រួញមកត្រឹមតែ១សប្ដាហ៍តែប៉ុណ្ណោះ៕អត្ថបទ៖ហ្សាលីន
