ជប៉ុន ផ្តល់ឥណទានសម្បទានប្រមាណ ២០០លានដុល្លារ ដល់កម្ពុជាសម្រាប់ជំរុញកំណើនសេដ្ឋកិច្ច និងថាមពលប្រកបដោយចីរភាព

រាជរដ្ឋាភិបាលកម្ពុជា និងរដ្ឋាភិបាលជប៉ុន បានឈានដល់ការចុះហត្ថលេខាជាផ្លូវការលើលិខិតប្ដូរការ និងឯកសារពាក់ព័ន្ធ ស្តីពីការផ្តល់ឥណទានសម្បទានជាទឹកប្រាក់ចំនួន ៣០ ប៊ីលានយ៉េន (ប្រមាណ ២០០ លានដុល្លារអាមេរិក) សម្រាប់អនុវត្ត «គម្រោងគាំទ្របន្ទាន់លើការពង្រឹងភាពធន់សេដ្ឋកិច្ច និងការផ្គត់ផ្គង់ថាមពលប្រកបដោយចីរភាព»។

ពិធីចុះហត្ថលេខានេះ បានប្រព្រឹត្តទៅកាលពីថ្ងៃទី២៧ ខែតុលា ឆ្នាំ២០២៦ រវាង ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និង លោក ISHIZUKI Hideo ឯកអគ្គរាជទូតទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា គម្រោងហិរញ្ញប្បទានដ៏ធំនេះមានគោលបំណង គាំទ្រស្ថិរភាពសេដ្ឋកិច្ច កាត់បន្ថយផលប៉ះពាល់ ពង្រឹងការផ្គត់ផ្គង់ថាមពល។

ការបន្តផ្តល់ជំនួយហិរញ្ញវត្ថុពីសំណាក់រដ្ឋាភិបាលជប៉ុននាពេលនេះ មិនត្រឹមតែបង្ហាញពីការប្តេជ្ញាចិត្តយ៉ាងមុតមាំក្នុងការលើកកម្ពស់ការអភិវឌ្ឍសង្គម-សេដ្ឋកិច្ចរបស់កម្ពុជានោះទេ ប៉ុន្តែវាក៏ជាសក្ខីភាពមួយយ៉ាងច្បាស់ក្រឡែត បញ្ជាក់ពីការពង្រឹងទំនាក់ទំនងដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ កម្ពុជា-ជប៉ុន ឱ្យកាន់តែរឹងមាំ និងរីកចម្រើនបន្ថែមទៀត៕