បើទោះបីស្ថានភាពសេដ្ឋកិច្ចពិភពលោកកំពុងប្រឈមនឹងបញ្ហាវិបត្តិកូវីដ-១៩យ៉ាងណាក្តី សម្រាប់ប្រទេសកម្ពុជា តាមរយៈកំពុងផែស្វយ័តក្រុងព្រះសីហនុនៅតែរក្សាកំណើនប្រាក់ចំណូលសរុបរបស់ខ្លួន ដោយគិតត្រឹមត្រីមាសទី២ឆ្នាំ២០២១នេះ កំពុងផែមានចំណូលសរុបចំនួន ៨៥.៨៥៧.៥៥៤ពាន់រៀល កើនជាងក្នុងត្រីមាសទី២ ឆ្នាំ២០២០ ចំនួន ១០.២៣១.៩៣៧ ពាន់រៀល ស្មើនឹង១៣,៥៣% និងចំណេញសុទ្ធក្នុងការិយបរិច្ឆេទចំនួន ១៤.០៧៥.៩៦៧ពាន់រៀល កើនឡើងចំនួន៥.៧៣៥.៨៤៣ពាន់រៀល ស្មើនឹង ៦៨,៧៧%។
កំពង់ផែស្វយ័តក្រុងព្រះសីហនុ បានបង្ហាញរបាយការណ៍ហិរញ្ញវត្ថុរបស់ខ្លួន នៅថ្ងៃទី១២ ខែសីហានេះថា សម្រាប់រយៈពេល៦ខែ គិតត្រឹមថ្ងៃទី ៣០ ខែ មិថុនា ឆ្នាំ២០២១ មានចំណូលសរុបចំនួន ១៦៧.១៤៨.៦៦៧ពាន់រៀល កើនឡើងចំនួន១៩.៨១៥.២៦៩ពាន់រៀល ស្មើនឹង ១៣,៤៥% បើធៀបនឹងរយៈពេល ៦ខែ គិតត្រឹមថ្ងៃទី ៣០ ខែ មិថុនា ឆ្នាំ ២០២០ និងចំណេញសុទ្ធក្នុងការិយបរិច្ឆេទចំនួន ៥០.៨៨១.១៧៤ពាន់រៀល កើនឡើងចំនួន ៤១.៧២០.៦៥៥ពាន់រៀល ស្មើនឹង ៤៥៥,៤៤% បើធៀបនឹងរយៈពេល ៦ខែ គិតត្រឹមថ្ងៃទី ៣០ ខែ មិថុនា ឆ្នាំ ២០២០។
សូមបញ្ជាក់ថា ដោយគិតត្រឹមថ្ងៃទី៣០ ខែមិថុនា ឆ្នាំ២០២១នេះ ទ្រព្យសកម្ម សរុបរបស់ កំពង់ផែស្វយ័តក្រុងព្រះសីហនុ មានចំនួន ១.៣៩៦.៦០៨.៩០៣ពាន់រៀល កើនឡើងចំនួន ៦.៧៦៦.២០២ពាន់រៀល ស្មើនឹង ០,៤៩% និងមូលធនសរុប មានចំនួន ៧៤១.០៦៧.៩៤៣ពាន់រៀល កើនឡើងចំនួន ៣៨.៧០៦.៥២៥ពាន់រៀល ស្មើនឹង ៥,៥១%។
សូចនករសំខាន់ៗសម្រាប់ត្រីមាសទី ២ ឆ្នាំ ២០២១ មានដូចខាងក្រោម៖
| ១. | អនុបាតចរន្ត | ២,៤០ ដង |
| ២. | អនុបាតចរន្តលឿន | ២,១០ ដង |
| ៣. | អនុបាតចំណេញធៀបនឹងទ្រព្យសកម្ម | ១,០១ % |
| ៤. | អនុបាតចំណេញធៀបនឹងមូលធន | ១,៩០ % |
| ៥. | អនុបាតគំលាតចំណេញដុល | ២៧,១៤ % |
| ៦. | អនុបាតគំលាតចំណេញភាព | ១៦,៣៩ % |
| ៧. | អនុបាតលទ្ធភាពសងការប្រាក់ | ៧,៦៧ ដង |
| ៨. | ចំណេញក្នុងមួយឯកតាមូលបត្រកម្មសិទ្ធិ | ១៦៤,១១ រៀល |
