កាលពីម្សិលមិញ មន្រ្តីក្រសួងសាធារណការនិងដឹកជញ្ជូន បានទទួលជួបប្រតិភូតំណាងមូលនិធិរូបិយវត្ថុអន្តរជាតិប្រចាំកម្ពុជា (IMF) ដែលជំនួបបានលើកពិភាក្សាការងារទាក់ទងនឹងការទទួលបានហិរញ្ញប្បទានពីដៃគូអភិវឌ្ឍន៍។
លោក ផែង សុវិជ្ជានោ រដ្ឋលេខាធិការក្រសួងសាធារណការ និងដឹកជញ្ជូន បានថ្លែងថា ក្នុងកិច្ចប្រជុំនេះផ្តោតជាសំខាន់លើការស្វែងយល់អំពីព័ត៌មានទាក់ទងនឹងការទទួលបានហិរញ្ញប្បទានពីដៃគូអភិវឌ្ឍន៍ ជាពិសេសពាក់ព័ន្ធនឹងនីតិវិធីដំណើរការនៅក្នុងការធ្វើការជាមួយអង្គការដៃគូអភិវឌ្ឍន៍នានាលើវិស័យផ្សេងៗរបស់ក្រសួង និងកិច្ចសហប្រតិបត្តិការជាមួយក្រសួង-ស្ថាប័នពាក់ព័ន្ធ ដូចជា៖ ក្រសួងសេដ្ឋកិច្ច និងហិរញ្ញវត្ថុ និងក្រសួងផែនការ។
ក្នុងជំនួបនោះដែរ លោក រដ្ឋលេខាធិការក្រសួងសាធារណការក៏បានជម្រាបជូនអំពីគម្រោងអាទិភាពនានារបស់ក្រសួងពាក់ព័ន្ធជាមួយនឹងវិស័យផ្លូវទឹក ផ្លូវដែក ផ្លូវគោក កំពង់ផែ ផែនការភស្តុភារកម្ម និងកិច្ចសហប្រតិបត្តិការរវាងក្រសួងជាមួយនឹងដៃគូអភិវឌ្ឍន៍កន្លងរហូតមកដល់បច្ចុប្បន្ន។
ជាការឆ្លើយតប តំណាងភាគី IMF ក៏បានស្នើឱ្យក្រសួងចែករំលែកបទព័ត៌មាន និងបទពិសោធន៍ទាក់ទងនឹងការទទួលបានហិរញ្ញប្បទានពីដៃគូអភិវឌ្ឍន៍ តាមរយៈកិច្ចសហប្រតិបត្តិការជាមួយនឹងក្រសួង-ស្ថាប័នពាក់ព័ន្ធ៕
