ក្រសួងសាធារណការ និងដឹកជញ្ជូន ប្រកាសមិនអនុញ្ញាតឱ្យធ្វើចរាចរយានយន្តគ្រប់ប្រភេទលើផ្លូវល្បឿនលឿន ភ្នំពេញ-ក្រុងព្រះសីហនុ ក្រោមហេតុផលជៀសវាងការរំខាន់ដល់ដំណើរការសាងសង់ឲ្យបានទាន់ពេលវេលាគ្រោងទុក និងគ្រោះថ្នាក់ក្នុងការធ្វើដំណើរ ពិសេសនៅមិនទាន់បានបំពាក់បរិក្ខារសុវត្ថិភាពចរាចរណ៍នៅឡើយ។
លិខិតជូនដំណឹងរបស់ក្រសួងសាធារណការ និងដឹកជញ្ជូន នៅព្រឹកថ្ងៃទី១២ កក្កដានេះ បានបញ្ជាឲ្យក្រុមហ៊ុនសាជីវកម្មស្ពានថ្នល់ចិន ធ្វើការបិទគ្រប់ច្រកចេញចូលប្រើប្រាស់ផ្លូវល្បឿនលឿន លើកលែងតែរថយន្តដែលមានការអនុញ្ញាតិពីក្រសួងធារណការតែប៉ុណ្ណោះ ចាប់ពីថ្ងៃនេះរហូតដល់ថ្ងៃជូនដំណឹងសារជាថ្មីម្តងទៀត។
ថ្មីៗនេះ ក្រសួងសាធារណការ ក៏បានចរចាជាមួយភាគីក្រុមហ៊ុនវិនិយោគផ្លូវនេះ ដើម្បីអនុញ្ញាតឱ្យប្រជាពលរដ្ឋអាចធ្វើការបើកបរសាកល្បងនៅលើផ្លូវនេះសំដៅឱ្យបានយល់ដឹងពីស្ថានភាពផ្លូវជាមុនសិន មុននឹងឈានទៅដាក់ឱ្យប្រើប្រាស់ជាផ្លូវការ ដោយការបង់ប្រាក់។
ប្រការប្រកាសបិទសារជាថ្មីរបស់ក្រសួងសាធារណការ ទំនងដោយសារក្រោមហេតុផលមានគ្រោះថ្នាក់ចរារចរណ៍ញឹកញ៉ាប់បានកើតឡើងលើផ្លូវល្បឿនលឿនរវាងរថយន្ត និងរថយន្ត។
ផ្លូវល្បឿនលឿនភ្នំពេញ-ក្រុងព្រះសីហនុ មានប្រវែង១៨៧គីឡូម៉ែត្រ មាន៤គន្លង សាងសង់ផ្លូវប្តូរទិស៩កន្លែង សាងសង់តំបន់ផ្តល់សេវាកម្ម៣កន្លែង ចំណតរថយន្ត១កន្លែង និងមណ្ឌលប្រតិបត្តិការនិងថែទាំផ្លូវ៤កន្លែង វិនិយោគដោយក្រុមហ៊ុនសាជីវកម្មស្ពានថ្នល់ចិន មានតម្លៃវិនិយោគសរុប ចំនួន២ពាន់លានដុល្លារសហរដ្ឋអាមេរិក។
យោងតាមរបាយការណ៍របស់ក្រុមហ៊ុនអភិវឌ្ឍន៍ផ្លូវល្បឿនលឿនភ្នំពេញ-ព្រះសីហនុ បានឱ្យដឹងថាតាមផែនការផ្លូវល្បឿនលឿនពីភ្នំពេញទៅក្រុងព្រះសីហនុ នឹងចប់រួចរាល់ជាស្ថាពរនៅខែកញ្ញា ឆ្នាំ២០២២ បន្ទាប់ពីបើកការដ្ឋានសាងសង់នៅថ្ងៃទី២២ ខែមីនា ឆ្នាំ២០១៩ ក្នុងទុនវិនិយោគរបស់ក្រុមហ៊ុនសាជីវកម្មស្ពាន និងថ្នល់ចិន(CRBC)ពីប្រទេសចិនតាមរយៈក្រុមហ៊ុន Cambodian PPSHVExpressway Co.,Ltdប្រមាណ២.០០០លានដុល្លារអាមេរិកនិងហិរញ្ញប្បទានឥតសំណងពីរដ្ឋាភិបាលចិនប្រមាណ១៥០លានដុល្លារ៕
