ក្រុមហ៊ុន GREENTECH INC របស់កូរ៉េ បានបង្ហាញកិច្ចសហការអភិវឌ្ឃការបំពាក់បច្ចេកវិទ្យាឆ្លាតវៃការគ្រប់គ្រងវិស័យផ្គត់ផ្គង់ទឹកស្អាតជាជំហ៊ានដំបូងនៅរដ្ឋាករទឹកស្វយ័តក្រុងភ្នំពេញនាពេលឆាប់ខាងមុខនេះ តាមសំណើរបស់កម្ពុជា។
ការលើកឡើងនេះ ត្រូវបានបង្ហាញឡើងក្នុងជំនួបពិភាក្សាការងាររវាងឯកឧត្តម ចម ប្រសិទ្ធ រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជាមួយប្រតិភូក្រុមហ៊ុន GREENTECH INC កូរ៉េ ស្តីពីគម្រោងបំពាក់បច្ចេកវិទ្យាឆ្លាតវៃសម្រាប់វិស័យទឹកស្អាត នៅកម្ពុជា កាលថ្ងៃទី២៨ខែកក្កដា ឆ្នាំ២០២២។
ថ្លែងក្នុងជំនួបនោះ លោកTae-Yong Kwon ប្រធានក្រុមដឹកនាំគម្រោងរបស់ក្រុមហ៊ុនខាងលើ បានឲ្យដឹងថា គោលបំណងនៃជំនួបពិភាក្សាបានផ្តោតការយកចិត្តទុកដាក់ទៅលើការប្រើប្រាស់បច្ចេកវិទ្យាឆ្លាតវៃក្នុងការដោះស្រាយបញ្ហាប្រឈម និងពង្រឹងប្រសិទ្ធភាពនៃការគ្រប់គ្រងនៃការផ្គត់ផ្គង់ទឹកស្អាតនៅទីក្រុងភ្នំពេញ។
ជាមួយគ្នានេះលោកក៏បង្ហាញជំហរមុតមាំក្នុងកិច្ចសហការអភិវឌ្ឃការបំពាក់បច្ចេកវិទ្យាឆ្លាតវៃការគ្រប់គ្រងវិស័យផ្គត់ផ្គង់ទឹកស្អាតជាជំហ៊ានដំបូងនៅរដ្ឋាករទឹកស្វយ័តក្រុងភ្នំពេញ ព្រមទាំងការបណ្តុះបណ្តាលធនធានមនុស្ស និងឈានទៅអភិវឌ្ឍនៅបណ្តាខេត្តនានាបន្តទៀត តាមសំណើររបស់ឯកឧត្តម ទេសរដ្ឋមន្រ្តី ចម ប្រសិទ្ធផងដែរ។
ជាការឆ្លើយតប ឯកឧត្តម ចម ប្រសិទ្ធ ក៏បានបង្ហាញការស្វាគមន៍ និងគាំទ្រពេញទំហឹងចំពោះគម្រោងខាងលើ ព្រោះគម្រោងនេះមានសារៈសំខាន់ណាស់សម្រាប់បំពេញបន្ថែមនូវភាពខ្វះចន្លោះ និងជាផ្នែកមួយនៃការ អភិវឌ្ឍន៍វិស័យទឹកស្អាតនៅកម្ពុជា ជាពិសេសជួយដល់រដ្ឋាករទឹកស្វយ័តក្រុងភ្នំពេញ។
ឯកឧត្តម បានបញ្ជាក់បន្តថា ការបំពាក់ប្រព័ន្ធបច្ចេកវិទ្យាឆ្លាតវៃលើវិស័យទឹកស្អាតនេះ គឺជាប្រព័ន្ធដែលទំនើប ដែលយើងអាចត្រួតពិនិត្យដឹងទាន់ពេលវេលា ពីលំហូរសម្ពាធទឹក គុណភាពទឹក និងទឹកលេចធ្លាយជាដើម ដោយអាចដោះស្រាយបានទាន់ពេលវេលា ដោយមិនស៊ីពេលស្វែងរកច្រើនថ្ងៃ ក្នុងពេលមានបញ្ហាកើតឡើង។
ជាមួយគ្នានេះ ឯកឧត្តម ក៏មានជំនឿដែរថា គម្រោងនេះនឹងទទួលការសម្រេចពីរដ្ឋាភិបាលកូរ៉េឆាប់ៗ ក្នុងជំនួយឥតសំណងក្រោមក្របខណ្ឌ ODA និងការសិក្សាពីសមិទ្ធិលទ្ធភាពបានជោគជ័យ ។
គួរបញ្ជាក់ដែរថា ក្រុមហ៊ុន GREENTECH INC កូរ៉េ គឺមានចំណែកទីផ្សារជាប់ចំណាត់ថ្នាក់លេខ១នៅកូរ៉េ ផ្នែកប្រព័ន្ធគ្រប់គ្រងវិស័យទឹកស្អាត។ យ៉ាងណា តំណាងក្រុមហ៊ុននេះ បានអះអាងដែរថា នៅសប្តាហ៍ក្រោយនេះ វិស្វករចំនួន៧រូបរបស់កូរ៉េ នឹងមកធ្វើការងារនិងកិច្ចសហការជាមួយមន្ត្រីជំនាញរបស់កម្ពុជា ដើម្បីជំរុញល្បឿននៃការអនុវត្តគម្រោងនេះឲ្យបានជោគជ័យផងដែរ៕
