ប្រមុខរដ្ឋស្តីទី សម្តេចវិបុលសេនាភក្តី សាយ ឈុំ ត្រាស់បង្គាប់តែងតាំងនាយទាហានជាន់ខ្ពស់ ១រូប នៃក្រសួងការពារជាតិ ឧត្តមសេនីយ៏ឯក គឹម រស្មី ជាទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្រ្តី មានឋានៈស្មើរដ្ឋលេខាធិការ បន្ថែមលើមុខងារបច្ចុប្បន្ន។ នេះបើតាមអនុក្រឹត្យ កាលពីថ្ងៃទី២៤ ខែសីហា ឆ្នាំ២០២២ ចុះហត្ថលេខាដោយសម្តេចវិបុលសេនាភក្តី សាយ ឈុំ ប្រមុខរដ្ឋស្ដីទី និងជាប្រធានព្រឹទ្ធសភាជាតិ។
ឧត្តមសេនីយ៏ឯក ផ្កាយ ៣ គឹម រស្មី គឺជាបញ្ញាវន្តខ្មែរមួយរូប មានបទពិសោធន៍ និងចំណេះដឹងជ្រៅជ្រះលើវិស័យការពារជាតិ បច្ចុប្បន្នកាន់តួនាទីជាអគ្គលេខាធិការរង នៃអគ្គលេខាធិការដ្ឋាន ទទួលបន្ទុកការងារ មជ្ឈមណ្ឌលបណ្តុះបណ្តាលការងាររដ្ឋបាល នៃកងយោធពលខេមរភូមិន្ទ ក្រសួងការពារជាតិ។
បន្ថែមទៀតនោះ ឧត្តមសេនីយ៍ឯក ក៏ជាអនុប្រធានគណៈកម្មការដឹកនាំការងារហ្វឹកហ្វឺន អប់រំចិត្តសាស្រ្តប្រវត្តិសាស្ត្រយោធា និង សណ្តាប់ធ្នាប់ នៃក្រសួងការពារជាតិ។
សូមជម្រាបជូនថា ឧត្តមសេនីយ៍ឯកផ្កាយ ៣ គឹម រស្មី កាលពីថ្ងៃទី១០ ខែកុម្ភៈ ឆ្នាំ២០១៨ ក៏ត្រូវបានរាជរដ្ឋាភិបាលកម្ពុជា ស្នើព្រះមហាក្សត្រ ត្រាស់បង្គាប់ផ្តល់គោរម្យងារ “ឧកញ៉ា” ផងដែរ៕
