ធនាគារ ស្ថាបនា បានបង្កើតឡើងកាលពីឆ្នាំ២០១៦ ជាមួយនឹងដើមទុនចុះបញ្ជី ១២០លានដុល្លារអាមេរិក នៅធនាគារជាតិនៃកម្ពុជា។ មែនទែនទៅ ស្ថាបនា ត្រូវបានបំលែងខ្លួនចេញពីគ្រឹះស្ថានមីក្រូហិរញ្ញវត្ថុ មកជាធនាគារពាណិជ្ជ ប៉ុន្មានឆ្នាំមុនលក់ភាគហ៊ុនទៅឱ្យធនាគារជប៉ុន ម៉ារ៉ូហាន់ ភីអិលស៊ី ក្នុងតម្លៃរាប់លានដុល្លារ នៅឆ្នាំ២០១២។
មួយឆ្នាំបន្ទាប់ពីការលក់ភាគហ៊ុនមកកាន់ ម៉ារ៉ូហាន់ ពោលគឺក្នុងឆ្នាំ២០១៣ ដើមទុនធនាគារស្ថាបនា មានចំនួន ៣០០លានដុល្លារសហរដ្ឋអាមេរិក ហើយត្រឹមឆ្នាំ២០២៥ ស្ថាបនា បានព្យាករថា នឹងកើនឡើងដល់ ៣ពាន់លានដុល្លារសហរដ្ឋអាមេរិក។
នៅត្រឹមឆ្នាំ២០២២នេះ ធនាគារ ស្ថាបនា មានទ្រព្យសកម្មសរុបលើស ២ពាន់លានដុល្លារអាមេរិក និងមានបុគ្គលិកច្រើនជាង ៤០០០នាក់។ ធនាគារមានបណ្តាញសាខាច្រើនជាង ១៧០ទីតាំង សេវាស្ថាបនាព្រីមារណ៍ ៣ទីតាំង និងអេធីអឹមជាង ២៣០កន្លែងទូទាំងប្រទេស។
សូមរំលឹកថា ធនាគារ ស្ថាបនា បង្កើតឡើងក្នុងឆ្នាំ១៩៩៥ ដែលជាអង្គការក្រៅរដ្ឋាភិបាលក្នុងស្រុកមួយ ដោយលោក ប៊ុន មុនី ហើយរយៈពេល ៥ខែកន្លងមក លោកបានសម្រេចចិត្តវិវត្តន៍ទៅជាធនាគារពាណិជ្ជ វិញម្តង។
បន្ទាប់ពីលក់ភាគហ៊ុនឱ្យធនាគារជប៉ុន ម៉ារ៉ូហាន់ ក៏ត្រូវកំលាយខ្លួនមកជា ធនាគារ ស្ថាបនា ភីអិលស៊ី ក្នុងខែមេសា ឆ្នាំ២០១៦ ជាមួយនឹងដើមទុនចុះបញ្ជី ១២០ លានដុល្លារសហរដ្ឋអាមេរិក មានសាខាចំនួន ១៦០ មានម៉ាស៊ីន អេធីអឹម ៧៣ និងបុគ្គលិកចំនួន ៣៤៥៨ នាក់៕
