នៅរសៀលថ្ងៃទី៣១ ខែសីហា ឆ្នាំ២០២២នេះ ក្រុមប្រឹក្សាជាតិប្រាក់ឈ្នួលអប្បបរិមា បានបន្តកិច្ចប្រជុំរបស់ខ្លួន ដើម្បីបន្តពិភាក្សាកំណត់ប្រាក់ឈ្នួលអប្បបរិមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ២០២៣។
កិច្ចប្រជុំខាងលើនេះ ភាគីតំណាងកម្មករ បានបន្ថយតួលេខពីចំនួន ២១៥ដុល្លារ មកតួលេខ ២១៣ដុល្លារ ខណៈដែលភាគីនិយោជក (តំណាងក្រុមហ៊ុន) ហ៊ានឱ្យតួលេខត្រឹម ១៩៦ដុល្លារ។ នៅក្នុងកិច្ចប្រជុំត្រីភាគីនេះ ភាគីរាជរដ្ឋាភិបាល ក៏បានបន្តសម្របសម្រួល និងផ្តល់នូវការពន្យល់បន្ថែមលើចំណុចនានា ហើយបើតាមលក្ខណៈបច្ចេកទេស អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមា បានគណនាឃើញថា តួលេខប្រាក់ឈ្នួលអប្បបរមា សម្រាប់ឆ្នាំ២០២៣ គឺ ១៩៧,៨៦ ដុល្លារ។
ដូច្នេះជារួមមក កិច្ចប្រជុំនៅថ្ងៃនេះ គ្រប់ភាគីខាងលើ ពុំទាន់ព្រមព្រៀងឯកភាពគ្នាក្នុងតួលេខណាមួយនៅឡើយទេ ហើយភាគីទាំងពីរ និងតំណាងរាជរដ្ឋាភិបាល សម្រេចឱ្យមានកិច្ចប្រជុំបន្តទៀត នៅថ្ងៃទី១៣ ខែកញ្ញា ឆ្នាំ២០២២ និងកិច្ចប្រជុំចុងបញ្ចប់ នៅថ្ងៃទី២១ ខែកញ្ញា ឆ្នាំ២០២២។
សូមរំឭកជូនថា ប្រាក់ឈ្នួលអប្បបរមាឆ្នាំ២០២២ សម្រាប់កម្មករ វិស័យវាយនភណ្ឌ កាត់ដេរ ផលិតស្បែកជើង និងសម្ភារៈធ្វើដំណើរ ជាលក្ខណៈបច្ចេកទេសគឺមិនមានការតម្លើងឲ្យពីភាគីនិយោជកទេ ពោលគឺរក្សាទុក ១៩២ដុល្លារ ដូចឆ្នាំ២០២១ តែសម្តេចតេជោ ហ៊ុន សែន នាយករដ្ឋមន្ត្រី បានបន្ថែម២ដុល្លារ ដែលធ្វើឲ្យប្រាក់ឈ្នួលកម្មករ ក្នុងឆ្នាំ២០២២ កើនដល់១៩៤ដុល្លារ៕
