នៅក្នុងរយៈពេល៧ខែដើមឆ្នាំ២០២៤ កម្ពុជាផលិតគ្រាប់គ្រាប់ស្វាយចន្ទីឆៅបានជាង៨៣ម៉ឺនតោន កើនឡើង ៣៦,៧ភាគរយ ដែលធ្វើឱ្យកម្ពុជា ជាប់ចំណាត់ថ្នាក់លេខ២ជាប្រទេសនាំចេញស្វាយចន្ទីច្រើនជាងគេលើពិភពលោក។

ស្វាយចន្ទីជាកសិផលដ៏សំខាន់មួយរបស់កម្ពុជា។ គិតត្រឹមឆ្នាំ២០២៤នេះ ប្រទេសកម្ពុជាមានផ្ទៃដីដាំដុះដំណាំស្វាយចន្ទីជាង ៥៨ម៉ឺនហិកតា នៅទូទាំងប្រទេស ដែលអាចផ្ដល់ទិន្នផលជាមធ្យមប្រមាណ ១,៥តោន ក្នុង១ហិកតា។នេះបើតាមស្ថិតិរបស់ក្រសួងកសិកម្ម រុក្ខាប្រមាញ់ និងនេសាទ។

កញ្ញា អ៊ឹម រចនា អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅថ្ងៃទី ១២ ខែកញ្ញា ឆ្នាំ ២០២៤នេះថា ដើម្បីសម្រេចបាននូវការងារនេះ ក្រសួងកសិកម្ម កំពុងចងក្រង បង្កើតសហគមន៍កសិកម្មទំនើបស្វាយចន្ទីចំនួន៣ នៅខេត្តកំពង់ធំ។ ការចងក្រង សហគមន៍កសិកម្មទំនើបស្វាយចន្ទី នឹងផ្សារភ្ជាប់សហគមន៍ទៅកាន់ទីផ្សារដោយផ្ទាល់ តាមរយៈការសម្របសម្រួលពីក្រសួង។ មិនត្រឹមតែប៉ុណ្ណោះ ក្រសួងនឹងជួយគាំទ្រផ្នែកទុន និងបច្ចេកទេស ដើម្បីធានាថា សហគមន៍អាចដំណើរការបានដោយរលូន និងទទួលបានតម្លៃបន្ថែម ព្រមទាំងផលចំណេញខ្ពស់។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា រយៈពេល ៨ ខែកន្លងមកនេះ ទិន្នផលដែលប្រមូលបានប្រមាណ៨៧ ម៉ឺនតោន នៃការផលិតទូទៅ ក្នុងនោះនាំចេញទៅវៀតណាមប្រមាណ ៨០ ម៉ឺនតោន ដែលមានទឹកប្រាក់ប្រមាណ១ពាន់២រយលានដុល្លារ។

ប្រធានសមាគមស្វាយចន្ទីកម្ពុជាបានឱ្យដឹងថា៖ ទិន្នផលស្វាយចន្ទីបានកើនឡើងគួឱ្យកត់សម្គាល់នៅឆ្នាំ ២០២៤ ទោះបីប្រឈមមុខនឹងបាតុភូតអេលនីណូ។ លោកបញ្ជាក់ថា កំណើននេះ ដោយសារសមាគមបានផ្ដល់ដំណោះស្រាយដល់កសិករតាំងពីខែកញ្ញា ឆ្នាំ ២០២៣។

គួរបញ្ជាក់ថា រដ្ឋាភិបាលកម្ពុជាបានដាក់គោលនយោបាយជាតិ ស្តីពីស្វាយចន្ទី ឆ្នាំ២០២២-២០២៧ ដែលត្រូវបានអនុម័តនៅក្នុងកិច្ចប្រជុំពេញអង្គគណៈរដ្ឋមន្រ្តី កាលពីថ្ងៃទី១៣ ខែមករា ឆ្នាំ២០២៣ និងត្រូវបានប្រកាសដាក់ឱ្យប្រើប្រាស់ជាផ្លូវការ កាលពីថ្ងៃទី១៤ ខែមិថុនា ឆ្នាំ២០២៣ កន្លងទៅ។

លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា (គ.វ.ក.) គោលនយោបាយជាតិស្តីពីស្វាយចន្ទីឆ្នាំ២០២២-២០២៧ មានភាពមុតស្រួច និងចំគោលដៅ ដើម្បីរុញច្រានខ្សែច្រវាក់ផលិតកម្ម និងកែច្នៃស្វាយចន្ទីដែលជាដំណាំយុទ្ធសាស្ត្ររបស់កម្ពុជាឱ្យអស់ពីសក្តានុពល។ ភាពចាំបាច់នៃយុទ្ធសាស្ត្រផលិត, កែច្នៃ, និងនាំចេញគឺជាបេះដូងនៃការពង្រឹង និងពង្រីកការផ្គត់ផ្គង់ស្វាយចន្ទីឱ្យកាន់តែរីកធំធាត់ប្រកបដោយនវានុវត្តន៍, សមស្របទៅតាមតម្រូវការទីផ្សារ, ប្រែក្លាយកសិករទៅជាកសិពាណិជ្ជករ, និងមានភាពប្រកួតប្រជែងខ្ពស់។

សូមបញ្ជាក់ថា៖ រាជរដ្ឋាភិបាលកម្ពុជានិងវិស័យឯកជនបាននិងកំពុងយកចិត្តទុកដាក់ និងជំរុញការនាំចេញគ្រាប់ស្វាយចន្ទីឱ្យបានច្រើនជាងគេនៅលើពិភពលោកនាពេលខាងមុខ។ ទន្ទឹមនឹងនេះ សមាគមស្វាយចន្ទីកម្ពុជាក៏រំពឹងថាកម្ពុជានឹងក្លាយជាប្រទេសដែលមានគ្រាប់ស្វាយចន្ទីល្អ និងឆ្ងាញ់ជាងគេផងដែរ៕

The post កម្ពុជាកំពុងខិតខំប្រែក្លាយខ្លួនទៅជាប្រទេសនាំចេញគ្រាប់ស្វាយចន្ទីច្រើនជាងគេលើពិភពលោក និងជា អធិរាជស្វាយចន្ទីនាពេលអនាគត appeared first on .

តាមរយៈសំណេរលើបណ្តាញហ្វេសប៊ុកផ្លូវការរបស់កញ្ញា អ៊ឹម រចនា នៅថ្ងៃទី២២ ខែសីហានេះថា កៅស៊ូជាដំណាំកសិឧស្សាហកម្មដែលមានវត្តមាននៅកម្ពុជាជាង១សតវត្សកន្លងមកហើយ។ ១សតវត្សកន្លងមកនេះ បើទោះបីជាកម្ពុជាឆ្លងកាត់និងផ្លាស់ប្ដូររបបដឹកនាំជាច្រើនក៏ដោយ ក៏ដំណាំនិងវិស័យកៅស៊ូរបស់កម្ពុជា នៅតែរស់រានរហូតមកទល់សព្វថ្ងៃ។

កញ្ញាបន្តថា «គិតត្រឹមពេលនេះ កម្ពុជាមានផ្ទៃដីដាំដុះកៅស៊ូជាង ៤០ម៉ឺនហិកតា លាតសន្ធឹងនៅខេត្តចំនួន ១១។ ក្នុងចំណោមនោះ មានដើមកៅស៊ូជិត ៨០ភាគរយ កំពុងផ្ដល់ផលសម្រាប់កែច្នៃផ្គត់ផ្គង់ទីផ្សារក្នុងស្រុក និងនាំចេញទៅកាន់ទីផ្សារបរទេស»។

សូមបញ្ជាក់ជូនថា ផ្ទៃដីដាំដុះកៅស៊ូជាង៤០ម៉ឺនហិកតានោះ ផ្ទៃដីចៀរជ័រមានចំនួន៣២០ ១៨៤ហិកតា ស្មើនឹង៧៩% និងផ្ទៃដីថែទាំមានចំនួន៨៦,៩៨៨ហិកតា ស្មើនឹង២១%។ ជាមួយគ្នានោះ កម្ពុជាក៏បាននិងកំពុងធ្វើការជំរុញវិស័យកៅស៊ូ ឱ្យក្លាយជាដំណាំឧស្សាហកម្ម និងមានទីផ្សារខ្ពស់ តាមរយៈការកែច្នៃចេញជាផលិតផលសម្រេចផ្សេងៗ សំដៅឈានទៅជម្រុញកំណើនសេដ្ឋកិច្ច និងជីវភាពប្រជាពលរដ្ឋ។

សូមជម្រាបជូនផងដែរថា ផលិតផលជ័រកៅស៊ូរបស់កម្ពុជាក្នុងខែកក្កដា ឆ្នាំ២០២៤ មានចំនួន៣៣ ៦៩៣តោន កើន២ ៩៨៦តោន ស្មើនឹង៩,៧២% ធៀបនឹងខែមុន និងបានកើន២ ៣៨០តោន ស្មើនឹង៧,៦០%ធៀបនឹងឆ្នាំមុន ខណៈផលិតផលជ័រកៅស៊ូគិតត្រឹមខែកក្កដា ឆ្នាំ២០២៤ មាន១៧៤ ៣៤៦តោន កើនឡើង ៤ ២៥៨តោន ស្មើនឹង២,៥០% ធៀបនឹងឆ្នាំមុន។ចំណែកផលិតផលឈើកៅស៊ូក្នុងខែកក្កដា មាន៣ ៥២៧ម៉ែត្រគូប ខណៈផលិតផលឈើកៅស៊ូគិតត្រឹមខែកក្កដា មាន២១ ៣១៨ម៉ែត្រគូប។

លើសពីនេះ បើគិតត្រឹម៧ខែ ឆ្នាំ២០២៤ កម្ពុជាប្រមូលចំណូលបានប្រមាណជាង២៧១លានដុល្លារ ពីការនាំចេញជ័រកៅស៊ូ និងឈើកៅស៊ូ ក្នុងនោះចំណូល ដែលកម្ពុជាបានពីជ័រកៅស៊ូមាន២៦៩លានដុល្លារ និងពីឈើកៅស៊ូជាង២លានដុល្លារ៕

The post បច្ចុប្បន្នកម្ពុជាមានផ្ទៃដីដាំដុះកៅស៊ូជាង៤០ម៉ឺនហិកតា កំពុងផ្តល់ផលកែច្នៃផ្គត់ផ្គង់ទីផ្សារក្នុងស្រុក និងនាំចេញទៅបរទេស appeared first on .

សូមរំលឹកថា កាលឆ្នាំ២០២៣ កម្ពុជា បាននាំចេញបង្កងប៉ាកជាលើកដំបូងទៅទីផ្សារចិនចំនួន១តោនហើយរំពឹងថានៅដំណាច់ឆ្នាំនេះ រំពឹងថានឹងមានការបញ្ជាទិញច្រើនពីភាគីចិន។

ពាក់ព័ន្ធនឹងការនាំចេញផលិតផលជលផលផ្សេងទៀត  លោក ឃឹម ហ្វីណង់ អនុរដ្ឋលេខាធិកានិងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុងរយៈពេល៥ខែឆ្នាំ២០២៤ កម្ពុជាបាននាំចេញអន្ទង់រស់ទៅចិនចំនួន ០.២០តោន និងនាំចេញកំពឹសបង្កកចំនួន៣៥.៨០តោន។

ចំណែកកាលឆ្នាំ២០២៣ កម្ពុជា បាននាំចេញអន្ទង់បង្កកចំនួន២តោន កំពឹសបង្កកចំនួន៤៧តោន និង បង្កងប៉ាករស់ចំនួន១ តោន។

គួរកត់សម្គាល់ថា នៅដើមឆ្នាំ២០២៤នេះ ប្រទេសកម្ពុជាបានសម្រេចការនាំចេញផលិតផលជលផលរបស់ខ្លួនចូលទៅកាន់ទីផ្សារប្រទេសចិន បានចំនួន៣៨តោន ក្រោយពីប្រទេសទាំងពីរបានចុះកិច្ចព្រមព្រៀងពាណិជ្ជកម្មសេរីជាមួយគ្នា កាលពីឆ្នាំ២០២០។នេះបើយោងតាមរបាយការណ៍ពីក្រសួងកសិកម្ម រុក្ខាប្រមាញ់ និង នេសាទ។

យោងតាមរបាយការណ៍ បានគូសបញ្ជាក់ថា កម្ពុជាបាននាំចេញផលិតផលជលផលចំនួន ៥០តោន ក្នុងឆ្នាំ២០២៣ និង ៣៨តោន កាលពីដើមឆ្នាំ២០២៤នេះ ទៅកាន់ប្រទេសចិនដែរ ។

ក្រៅពីផលិតផលជលផលទៅទីផ្សារចិន កម្ពុជាក៏បាននាំត្រីងៀតចំនួន ៣,៧តោន ទៅកាន់ប្រទេសអូស្រ្តាលីជាលើកដំបូង នៅដើមឆ្នាំ២០២៤នេះផងដែរ។សម្រាប់កម្ពុជា បានចាត់ទុកថានេះ គឺជាលទ្ធផលនៃកិច្ចសហការយ៉ាងជិតស្និទ្ធជាមួយដៃគូអភិវឌ្ឍនានា លើការពង្រឹងគុណភាព សុវត្ថិភាព និងការកែច្នៃផល ផលិតផល ជលផលកម្ពុជា ទាំងសម្រាប់ទីផ្សារក្នុងស្រុក និងបរទេស។

គួរបញ្ជាក់ថា កម្ពុជាសម្រេចបានផលវារីវប្បកម្មសរុបចំនួន ៣១៤ ពាន់តោន ទាំងទឹកសាប និងសមុទ្រ ក្នុងឆ្នាំ២០២៣ ដែលជាការរួមចំណែកកាត់បន្ថយសម្ពាធលើធនធានជលផលធម្មជាតិ កាត់បន្ថយការនាំចូល ទ្រទ្រង់ជីវភាពវារីវប្បករ និងលើកស្ទួយសេដ្ឋកិច្ចជាតិ។ ជាងនេះទៀត កម្ពុជាសម្រេចបានការនាំចេញ ផលិតផលជលផលទាំងស្រស់ និងកែច្នៃរួចចំនួនជិត ៣ពាន់តោន ក្នុងឆ្នាំ២០២២ និងជាង ៣ ៥០០តោន ក្នុងឆ្នាំ២០២៣ ទៅប្រទេសជិតខាង៕ដោយៈសុភក្ត្រា

The post កម្ពុជា នាំចេញបង្កងប៉ាករស់ជាង២តោន ទៅកាន់ទីផ្សារចិន appeared first on .

សមាគមស្វាយចន្ទីកម្ពុជា បានឱ្យដឹងបន្តថា នាំចេញទៅក្រៅប្រទេស ៧៥០ ០០០តោន ដែលអាចរកចំណូលបានលើស ១ពាន់លានដុល្លានេះ ខណៈផលិតកម្មស្វាយចន្ទីពិភពលោកបានធ្លាក់ចុះប្រមាណ​៣០ភាគរយ។

លើសពីនេះ ការនាំចេញទៅវៀតណាមច្រើនជាងការរំពឹងទុកប្រមាណ ៧២០ ៨០០ តោន គិតជាទឹកប្រាក់ ៩២១ ៥០០​ ០០០ ដុល្លារ​ នាដើមខែមិថុនា ឆ្នាំ២០២៤នេះ។

លោក អួន ស៊ីឡុត ប្រធានសមាគមស្វាយចន្ទីកម្ពុជា បានបញ្ជាក់ថា ដោយយោងតាមការអង្កេតដោយយកចិត្តទុកដាក់របស់សមាគមស្វាយចន្ទីកម្ពុជា បានព្យាការណ៍ថា ២០២៤នេះ កម្ពុជានឹងផលិតគ្រាប់ឆៅបាន ៨៥ម៉ឺនតោន ក្នុងនោះនាំចេញទៅក្រៅប្រទេសប្រមាណ៧៥ម៉ឺនតោន ដែលអាចរកចំណូលបានលើស ១ពាន់លានដុល្លារ។

លោកបញ្ជាក់បន្ថែមថា ដោយសារកាលខែកញ្ញា ឆ្នាំ២០២៣កន្លងទៅ សមាគមបានចេញនៅសារជូនដំណឹងដល់សមាជិកសមាគមអំពីផលប៉ះពាល់នៃអែនីញូ បើសិនជាយើងមិនប្រឹងប្រែង មិនទប់ស្កាត់ទេ វានឹងអាចបាត់បង់ផល ចន្លោះពី១០ទៅ២០ ឬ៣០% ។ដូច្នេះ មកដល់ពេលនេះ ដំណោះស្រាយនេះប្រសិទ្ធភាពហួសពីការរំពឹងទុករបស់សមាគម ទើបមានការកើនឡើង។

បើតាមលោក អួន ស៊ីឡុត នៅក្នុងរយៈពេល៥ខែ ឆ្នាំ២០២៤ កម្ពុជាផលិតគ្រាប់ស្វាយចន្ទីឆៅសម្រេចបាន ៧១ ម៉ឺន ៦ ពាន់តោន ក្នុងនោះនាំចេញទៅប្រទេសវៀតណាមចំនួន ៦៦ ម៉ឺន ៧ ពាន់តោន កើនឡើង ៣៨ ភាគរយ បើប្រៀបធៀបរយៈពេលដូចគ្នា កាលពីឆ្នាំ២០២៣ ដែលគិតជាទឹកប្រាក់ប្រមាណ ៨៥១ លានដុល្លារ។

ពាក់ព័ន្ធនឹងរឿងនេះ កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ ក៏បានគូសបញ្ជាក់ឱ្យដឹងផងដែរថា សម្រាប់ដំណាំស្វាយចន្ទី ទីផ្សារធំជាងគេគឺប្រទេសវៀតណាម។តែពេលថ្មីៗនេះបានពិនិត្យវិភាគឃើញថា ការនាំចេញគ្រាប់ស្វាយចន្ទីស្រស់ទៅកាន់ប្រទេសវៀតណាម មានការថយចុះបន្តិច។

កញ្ញា បានបញ្ជាក់ថា កាលពីប៉ុន្មានឆ្នាំមុន គ្រាប់ស្វាយចន្ទីស្ទើរតែ៩៩ភាគរយ ហូរចេញទៅទីផ្សារបរទេសហើយភាគច្រើនទៅប្រទេសវៀតណាម។ រហូតមកដល់ពេលនេះ ការនាំចេញគ្រាប់ស្វាយចន្ទីស្រស់ទៅកាន់ទីផ្សារបរទេស ក៏ដូចជាប្រទេសវៀតណាមមានការថយចុះ តែយើងសង្កេតឃើញមាននិន្នាការកើនឡើងលើការកែច្នៃក្នុងស្រុក៕

The post ការនាំចេញគ្រាប់ស្វាយចន្ទីឆៅទៅក្រៅប្រទេសឆ្នាំ២០២៤នេះ ត្រូវបានព្យាការណ៍ថាកើនដល់៧៥ម៉ឺនតោន គិតជាទឹកប្រាក់លើស១ពាន់លានដុល្លារ appeared first on .

កញ្ញា អ៊ឹម រចនា បញ្ជាក់ថា « ស្ថិតិផលចាប់ការធ្វើអាជីវកម្មនេសាទដាយត្រី កើនឡើង៣ឆ្នាំជាប់គ្នា គិតចាប់ពីឆ្នាំ២០២១មក។ ក្នុងឆ្នាំ២០២១ ផលនេសាទដាយត្រីទទួលបានចំនួន ៨ ៧០០តោន ឆ្នាំ២០២២ទទួលបានផលត្រីចំនួន ១៣ ០០០តោន ហើយនៅឆ្នាំ២០២៣នេះ ផលនេសាទដាយត្រីរំពឹងថានឹងកើនដល់ ១៣ ៦៥០តោន»។

ពាក់ព័ន្ធនឹងការប្រមូលផលត្រីប្រហុកនៅឆ្នាំ២០២៣នេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានចុះពិនិត្យការប្រមូលផលត្រីប្រហុកនៅដាយត្រីលេខ១៥ ស្ថិតក្នុងភូមិតាពៅ ឃុំកោះចិន ស្រុកពញាឮ ខេត្តកណ្តាល។

លោករដ្ឋមន្ត្រី បានគូសបញ្ជាក់ថា ក្រសួងបាននឹងបន្តចុះពិនិត្យការប្រមូលផលត្រីជារៀងរាល់ឆ្នាំ ហើយក្នុងឆ្នាំនេះ ផលត្រីមានការកើនឡើងជាងឆ្នាំមុនប្រមាណ ៥% ដោយសារការសហការបង្ការនិងបង្ក្រាបបទល្មើសនេសាទប្រកបដោយភាពម៉ឺងម៉ាត់ ច្បាស់លាស់ និងប្រកបដោយការទទួលខុសត្រូវខ្ពស់។

ផលត្រីដែលប្រមូលបានជាប្រភេទត្រីប្រហុក ហើយភាគច្រើននៅដើមដៃនេះ ត្រីប្រមាណ ៧០% ជាប្រភេទត្រីស្លឹកឫស្សី ១០%ត្រីឆ្វៀត និង២០%ត្រីចម្រុះ។ ចំពោះស្តង់ដានៃការកែច្នៃប្រហុកវិញ គឺត្រូវគោរពតាមគោលការណ៍ភូតគាមអនាម័យ (SPS) សម្រាប់ផ្នែកបច្ចេកទេស និងស្តង់ដាទីផ្សារនាំចេញ។

លោក រដ្ឋមន្ត្រី បានបញ្ជាក់បន្ថែមថា ការធ្វើប្រហុក រហូតមកទល់ពេលនេះ ប្រជាពលរដ្ឋភាគច្រើននៅតែបន្តធ្វើប្រហុកតាមបែបប្រពៃណីសម្រាប់ការប្រើប្រាស់ប្រចាំគ្រួសារ។ រីឯសហគ្រិនខ្នាតតូច និងមធ្យមវិញ កំពុងកែច្នៃប្រហុកស្ងួតតាមតម្រូវការទីផ្សារ ហើយបច្ចុប្បន្នកំពុងស្នើសុំវិញ្ញាបនបត្របញ្ជាក់គុណភាព សុវត្ថិភាព ដើម្បីបង្កើនទំនុកចិត្ត និងតម្លៃបន្ថែមសម្រាប់ការនាំចេញ។ លើសពីនេះទៀត ក្រសួងបានចាប់ផ្តើមសាកល្បងឱ្យមានការប្រកួតប្រជែងការកែច្នៃប្រហុកឆ្ងាញ់កាលពីឆ្នាំកន្លងទៅ ដោយមានការគាំទ្រពីក្រុមហ៊ុន Conferel ហើយនឹងបន្តធ្វើបន្ថែមទៀត។

សូមជម្រាបជូនថា រដូវបើកនេសាទគន្លងដាយត្រី ចាប់ផ្ដើមពីខែតុលា ដល់ខែកុម្ភៈ តែផែ្អកលើស្ថានភាពទឹកនៅបឹងទន្លេសាប។ បើគ្មានព្យុះ និងមេឃស្រឡះ គន្លងដាយត្រីអាចប្រមូលផលត្រីបានច្រើនចាប់ពីខែធ្នូ ដល់ខែមករា ហើយជាទូទៅក្នុងពេលខែខ្នើត៕ អត្ថបទ៖ សារេត

The post ការប្រមូលផលត្រីប្រហុកឆ្នាំនេះរំពឹងកើនឡើងដល់ជាង១៣ពាន់តោន appeared first on .

កញ្ញា អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនៅលើទំព័រហ្វេសប៊ុកផ្ទាល់ខ្លួន កាលពីថ្ងៃទី២៧ តុលាថា មួយឆ្នាំកន្លងទៅនេះ អគ្គនាយកដ្ឋានកសិកម្ម បានចុះបញ្ជីចម្ការមៀន និងរោងចក្រវេចខ្ចប់សម្រាប់នាំចេញផ្លែមៀនស្រស់ពីកម្ពុជាទៅកាន់ប្រទេសចិន បានចំនួន ៩៧ក្រុមហ៊ុន/ម្ចាស់ចម្ការ និង ១២រោងចក្រវេចខ្ចប់ និងមានការអនុម័តទទួលស្គាល់ជាផ្លូវការពីអគ្គរដ្ឋបាលគយនៃសាធារណរដ្ឋប្រជាមានិតចិន (GACC)។

កញ្ញាបន្តថា បើគិតរយៈពេល១ឆ្នាំ ពោលចាប់ពីថ្ងៃទី២៧ ខែតុលា ឆ្នាំ២០២២ ដល់ថ្ងៃទី២៧ ខែតុលា ឆ្នាំ២០២៣ ការនាំចេញផ្លែមៀនស្រស់កម្ពុជាទៅប្រទេសចិន មានចំនួនសរុប ១៤ ៣៤៥,៧៤តោន។ប៉ុន្តែ បើគិតនៅក្នុងឆ្នាំ២០២២ (ចាប់ពីថ្ងៃទី២៧ ខែតុលា ដល់ដំណាច់ខែធ្នូ) កម្ពុជាបាននាំចេញផ្លែមៀនស្រស់ទៅប្រទេសចិន ចំនួន ២ ៩៤២,៥១តោន។ដោយឡែក សម្រាប់ឆ្នាំ២០២៣នេះ បើគិតចាប់ពីខែមករា ដល់ថ្ងៃទី២៧ ខែតុលា កម្ពុជាបាននាំចេញផ្លែមៀនស្រស់ទៅកាន់ប្រទេសចិនមានចំនួន ១១ ៤០៣,២៣តោន។

បើតាមកញ្ញា អ៊ឹម រចនា ក្រៅពីការនាំចេញទៅកាន់ទីផ្សារប្រទេសចិន សហគ្រាសនៅកម្ពុជាកំពុងកែច្នៃផ្លែមៀនស្រស់របស់ខ្មែរ ទៅជាដំណាប់មៀន ផ្លែមៀនកំប៉ុង ទឹកមៀនកៀប និងស្រាមៀន ដែលមានដាក់លក់នៅតាមផ្សារទំនើបនានានៅក្នុងប្រទេសផងដែរ។

ជាមួយគ្នានេះ ក្រសួងកសិកម្ម បន្តលើកទឹកចិត្ត និងគាំទ្រសហគ្រាសទាំងអស់ចំពោះកិច្ចខិតខំប្រឹងប្រែងនៅក្នុងការកែច្នៃផលិតផលកសិកម្មខ្មែរឲ្យមានតម្លៃបន្ថែមខ្ពស់ ហើយក្រសួងនឹងសហការជាមួយភាគីពាក់ព័ន្ធដើម្បីផ្សព្វផ្សាយ និងរុញផលិតផលដែលមានគុណភាពទាំងអស់នេះ ទៅកាន់ទីផ្សារពិភពលោក។

គួរឱ្យផងដែរថា ក្រសួងកសិកម្ម និងស្ថានទូតចិនប្រចាំនៅកម្ពុជា បានសម្ពោធជាផ្លូវការ ការនាំចេញផ្លែមៀនស្រស់ពីកម្ពុជា ទៅកាន់ទីផ្សារប្រទេសចិន កាលពីថ្ងៃទី២៣ ខែតុលា ឆ្នាំ២០២២៕

The post ជិត១០ខែមកនេះ កម្ពុជានាំចេញផ្លែមៀនស្រស់ទៅកាន់ប្រទេសចិន បានជាង ១ម៉ឺន ១ពាន់តោន appeared first on .

កញ្ញាបានប្តថា ក្រសួងកសិកម្ម រុក្ខាប្រមាញ់ និងនេសាទ ជាមួយអគ្គរដ្ឋបាលគយយចិន បានចុះហត្ថលេខាលើពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់ការនាំចេញផ្លែដូងស្រស់ពីកម្ពុជាទៅកាន់ប្រទេសចិន​ កាលពីថ្ងៃទី១៥ កញ្ញា កន្លងទៅ។  

អ្នកនាំពាក្យខាងលើ បានឱ្យដឹងថា៖« បើតាមលោកជំទាវអ្នកនាំពាក្យ នៅពេលសម្រេចបានពិធីសារនេះហើយ កម្ពុជាត្រូវធ្វើការជាមួយប្រជាកសិករធ្វើយ៉ាងណាឱ្យពួកគាត់ដាំដុះផ្លែដូង ស្របទៅតាមស្តង់ដាអនាម័យ និងភូតគាមអនាម័យ កំណត់ដោយរដ្ឋបាលគយចិន»។

ទន្ទឹមគ្នានេះដែរ អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានចាប់ផ្ដើមជូនដំណឹងដល់ម្ចាស់ចម្ការដូង សហគមន៍កសិកម្មដូងក្រអូប និងម្ចាស់កែច្នៃនិងវេចខ្ចប់ផ្លែដូងស្រស់ ដែលមានបំណងផលិតនិងកែច្នៃវេចខ្ចប់ផ្លែដូងស្រស់ទៅកាន់ទីផ្សារប្រទេសចិន សូមរួសរាន់ដាក់ពាក្យស្នើសុំចុះបញ្ជីចម្ការ និងរោងចក្រកែច្នៃនិងវេចខ្ចប់ផ្លែដូងស្រស់សម្រាប់នាំចេញទៅកាន់ប្រទេសចិន។

លើសពីនេះទៀត អគ្គនាយកដ្ឋានកសិកម្ម នឹងចាត់មន្ដ្រីជំនាញចុះវាយតម្លៃស្របតាមនីតិវិធីបច្ចេកទេសដូចមានចែងនៅក្នុងពិធីសារ មុននឹងបញ្ជូនបញ្ជីឈ្មោះចម្ការ និងរោងចក្រកែច្នៃវេចខ្ចប់ផ្លែដូងស្រស់ទៅកាន់ភាគីចិន នៅដើមខែធ្នូ ឆ្នាំ២០២៣ខាងមុខ ដើម្បីភាគីចិនពិនិត្យ និងវាយតម្លៃបញ្ចប់ មុននឹងឈានដល់ការនាំចេញជាផ្លូវការ។

សូមបញ្ជាក់ដែរថា គិតត្រឹមឆ្នាំ២០២២ នៅប្រទេសកម្ពុជាសព្វថ្ងៃ មានផ្ទៃដីដាំដុះដំណាំដូងចំនួន ១ម៉ឺន៧ពាន់ហិកតា ក្នុងនោះ ផ្ទៃដីប្រមូលផលមានចំនួន ១ម៉ឺន៤ពាន់ហិកតា។ ចំណែកទិន្នផលសរុបនៅក្នុងឆ្នាំ២០២២ នៅទូទាំងប្រទេស មានចំនួនសរុប ២៤ម៉ឺន៨ពាន់តោន៕ អត្ថបទ៖ ពិសី

The post ក្រសួងកសិកម្ម ស្នើឱ្យម្ចាស់ចម្ការ និងរោងចក្រកែច្នៃផ្លែដូង មកចុះបញ្ជីសម្រាប់នាំចេញទៅកាន់ទីផ្សារចិន appeared first on .

កញ្ញា អ៊ឹម រចនា បានឱ្យដឹងនៅថ្ងៃទី១៥ ខែកញ្ញា ឆ្នាំ២០២៣ថា ការនាំចេញផលិតផលជលផលកម្ពុជាទៅកាន់ទីផ្សារប្រទេសចិនជាលើកដំបូងនេះ គឺជាជោគជ័យមួយជំហាន ហើយសរបញ្ជាក់ថា កម្ពុជានៅមានការងារច្រើនទៀតដែលត្រូវធ្វើ។

កញ្ញាបន្តថា៖«ក្រសួងសូមអបអរសាទរចំពោះកិច្ចខិតខំប្រឹងប្រែងរបស់ក្រុមហ៊ុន​ ដែលបានសហការយ៉ាងជិតស្និទ្ធជាមួយវារីវប្បករ រហូតសម្រេចបានការនាំចេញផលិតផលជលផលកម្ពុជាទៅកាន់ទីផ្សារប្រទេសចិន​ជាលើកដំបូង ​កាលពីថ្ងៃទី១៤ កញ្ញា ឆ្នាំ២០២៣»។​

អ្នកនាំពាក្យខាងលើ បានបញ្ជាក់ដែរថា ការងារអាទិភាពដំបូង​ គឺធ្វើយ៉ាងណារក្សានូវគុណភាព ស្របតាមស្តង់ដារអនាម័យ និងភូតគាមអនាម័យ កំណត់ដោយរដ្ឋបាលគយចិន ដើម្បីធានាឱ្យបានថា ផលិតផលជលផលរបស់ខ្មែរនៅតែអាចនាំចូលទៅកាន់ទីផ្សារប្រទេសចិនបាន។ ចំណែកការងារបន្ទាប់ កញ្ញាថា គឺការជំរុញឱ្យផលិតផលជលផលរបស់ខ្មែរ មានគុណភាពកាន់តែខ្ពស់ មានសោភណ្ឌភាពកាន់តែល្អ មានសុវត្ថិភាព និងមានរសជាតិកាន់តែឆ្ងាញ់ ក្នុងគោលដៅពង្រឹងនិងពង្រីកតម្រូវការរបស់អតិថិជននៅលើទីផ្សារប្រទេសចិន។

មន្រ្តីនាំពាក្យ កញ្ញាបន្តដែរថា៖«នៅពេលដែលសេចក្ដីត្រូវការនៅទីផ្សារចិនកើនឡើង ការនាំចេញផលិតផលជលផលពីកម្ពុជាទៅកាន់ប្រទេសចិននឹងមានកំណើន។ចំណែកវារីវប្បករ​​ អ្នកចិញ្ចឹមត្រីនៅស្រុកខ្មែរ នឹងមានការងារធ្វើកាន់តែច្រើនផងដែរ»។

សូមបញ្ជាក់ដែរថា ផលិតផលជលផលកម្ពុជា ចំនួន២មុខ គឺ កំពឹស និងអន្ទង់ ដែលបាននាំចេញទីកាន់ទីផ្សារចិនជាលើកដំបូងនាពេលនេះ គឺជាផលិតធម្មជាតិសុទ្ធសាធ។

តាមរយៈការជំរុញការនាំចេញផលិតផលជលផលខ្មែរទៅកាន់ទីផ្សារប្រទេសចិននេះ ក្រសួងកសិកម្ម ក៏បានក្តីសង្ឃឹមយ៉ាងមុតមាំថា វានឹងអាចជួយបង្កើនជីវភាពបងប្អូនវារីវប្បករនៅស្រុកខ្មែរយើងឱ្យកាន់តែមានការរីកចំរើនទៅមុខ​ និងរួមចំណែកជួយដល់កំណើនសេដ្ឋកិច្ចជាតិផងដែរ៕

អត្ថបទ៖ ពិសី

The post អ្នកនាំពាក្យ៖ ផលិតផលជលផលកម្ពុជា ចំនួន២មុខ បាននាំចេញទៅកាន់ទីផ្សារចិនជាលើកដំបូង appeared first on .