កិច្ចប្រជុំពិភាក្សានេះ ធ្វើឡើងកាលថ្ងៃទី២៧ ខែតុលា ឆ្នាំ២០២៦ ក្រោមវត្តមានលោក ពេជ្រ វាសនា អនុរដ្ឋលេខាធិការ និងជានាយកគម្រោង ជាមួយក្រុមការងារ Pre-Contact Mission នៃទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) មកពីទីក្រុងតូក្យូ ដែលដឹកនាំដោយលោក Hashizume Tamura។

លោក ពេជ្រ វាសនា អនុរដ្ឋលេខាធិការ និងជានាយកគម្រោង បានបញ្ជាក់ថា កិច្ចប្រជុំនេះធ្វើឡើងដើម្បីពិភាក្សាលើទំហំការងារ និងឥណទានសម្បទានពីរដ្ឋាភិបាលជប៉ុន សម្រាប់ «គម្រោងធ្វើឱ្យប្រសើរឡើងប្រព័ន្ធស្រោចស្រព និងដោះទឹកនៅកម្ពុជា» លើអនុគម្រោងស្តារឡើងវិញចំនួន ០២ រួមមាន៖ អនុគម្រោងទំនប់លោក-ខ្ពបត្របែក ស្ថិតក្នុងស្រុកត្រាំកក់ ខេត្តតាកែវ ដែលមានសមត្ថភាពស្រោចស្រពលើផ្ទៃដី ៥.១១៥ ហិកតា និងអនុគម្រោងស្ពានស្រែង ស្ថិតក្នុងស្រុកក្រឡាញ់ ខេត្តសៀមរាប និងស្រុកព្រះនេត្រព្រះ ខេត្តបន្ទាយមានជ័យ ដែលមានសមត្ថភាពស្រោចស្រពលើផ្ទៃដី ១២.៥០០ ហិកតា។

សូមជម្រាបថា កិច្ចប្រជុំនេះមានសមាសភាពចូលរួមសរុប ២០ រូប មកពី JICA ក្រសួងសេដ្ឋកិច្ច និងហិរញ្ញវត្ថុ (អ.ដ.ផល) ក្រសួងធនធានទឹក និងឧតុនិយម ក្រុមការងារទីប្រឹក្សាបច្ចេកទេស (កុងស៊ុលតង់) និងភាគីពាក់ព័ន្ធ។ ដោយឡែក បេសកកម្មវាយតម្លៃរបស់ក្រុមការងារ JICA មកពីទីក្រុងតូក្យូ នឹងប្រព្រឹត្តទៅរយៈពេល ០៥ ថ្ងៃ (ចាប់ពីថ្ងៃទី២៦ ដល់ថ្ងៃទី៣០ ខែតុលា ឆ្នាំ២០២៦) ដើម្បីសិក្សាបច្ចេកទេសមុនឈានដល់កិច្ចព្រមព្រៀងឥណទាន៕ អត្ថបទ៖ហ្សាលីន

The post ក្រសួងធនធានទឹក និង JICA  ជំរុញគម្រោងធ្វើឱ្យប្រសើរឡើងប្រព័ន្ធស្រោចស្រព និងដោះទឹកនៅកម្ពុជា appeared first on .

នាឱកាសដឹកនាំកិច្ចប្រជុំ លោក អឿង ចន្ថា អនុរដ្ឋលេខាធិការ និងជានាយកគម្រោង បានឱ្យដឹងថា កិច្ចប្រជុំនេះ ធ្វើឡើងកាលថ្ងៃទី២៦ ខែតុលា ឆ្នាំ២០២៦ ដោយក្រុមទីប្រឹក្សាបច្ចេកទេស បានសិក្សាសមិទ្ធិលទ្ធភាព (Feasibility Study) និងការរៀបចំប្លង់លម្អិត (Detailed Engineering Design) លើទីតាំងអនុគម្រោង ៣០កញ្ញា ស្ថិតក្នុងខេត្តកំពង់ធំ និងអនុគម្រោង កំពីងពួយ ស្ថិតក្នុងខេត្តព្រះវិហារ ក្នុងគោលដៅស្តារ និងពង្រឹងភាពរឹងមាំនៃទំនប់ បង្កើនសមត្ថភាពស្តុកទឹករបស់អាង និងធ្វើទំនើបកម្មប្រព័ន្ធធារាសាស្ត្រ ក្រោមក្របខ័ណ្ឌ «គម្រោងកែលម្អសន្តិសុខទឹកកម្ពុជា»។

លោកអនុរដ្ឋលេខាធិការ ក៏បានបញ្ជាក់ថា កិច្ចប្រជុំនេះរៀបចំឡើងក្នុងគោលបំណងពិនិត្យវឌ្ឍនភាព និងវាយតម្លៃស្ថានភាពជាក់ស្តែងជាមួយទីប្រឹក្សាបច្ចេកទេស បន្ទាប់ពីក្រុមការងារបានចុះសិក្សាផ្ទាល់អំពីស្ថានភាពបច្ចុប្បន្ននៃទំនប់ អាងទឹក ប្រព័ន្ធធារាសាស្ត្រ ព្រមទាំងប្រមូលមតិយោបល់ និងសំណូមពរពីអាជ្ញាធរមូលដ្ឋាន និងប្រជាពលរដ្ឋក្នុងតំបន់អនុគម្រោងទាំងពីរ ដើម្បីទទួលបានធាតុចូលបន្ថែម ប្រកបដោយគ្រប់ជ្រុងជ្រោយ និងមានប្រសិទ្ធភាពខ្ពស់។

សូមជម្រាបដែរថា តាមរយៈកិច្ចប្រជុំនោះ លោកអនុរដ្ឋលេខាធិការក្រសួងធនធានទឹក ក៏បានផ្តល់អនុសាសន៍ និងការណែនាំដល់ក្រុមទីប្រឹក្សាបច្ចេកទេស ត្រូវប្រកាន់ខ្ជាប់នូវបទដ្ឋានបច្ចេកទេសឱ្យបានត្រឹមត្រូវ ជំរុញការអនុវត្តគម្រោងឱ្យចំទិសដៅ និងទាន់ពេលវេលា សំដៅលើកកម្ពស់ប្រសិទ្ធភាពនៃការគ្រប់គ្រងវិស័យធនធានទឹក និងឧតុនិយមនៅកម្ពុជា ឆ្លើយតបទៅនឹងការប្រែប្រួលអាកាសធាតុ និងធានាបាននូវភាពជោគជ័យតាមផែនការគ្រោងទុក៕ អត្ថបទ៖ហ្សាលីន

The post ក្រសួងធនធានទឹក បើកកិច្ចពិភាក្សាជាមួយស្ថាប័នជំនាញ  ដើម្បីជំរុញគម្រោងកែលម្អសន្តិសុខទឹកកម្ពុជា appeared first on .

ក្នុងជំនួបនោះ លោករដ្ឋមន្ត្រី បានថ្លែងអំណរគុណចំពោះភាពជាដៃគូដ៏យូរអង្វែងរបស់ FAO ក្នុងការលើកកម្ពស់សេវាកសិ-ឧតុនិយម (agrometeorology) ការពង្រឹងភាពធន់នឹងអាកាសធាតុ ព្រមទាំងការអភិវឌ្ឍស្ថាប័ន និងធនធានមនុស្ស តាមរយៈគម្រោង PEARL នៅខាងជើងបឹងទន្លេសាប។

លោក​ ថោ ជេដ្ឋា បានគូសបញ្ជាក់ថា ក្រសួងចាត់ទុកសេវាឧតុនិយម និងអាកាសធាតុជាមុខងារសាធារណៈដ៏សំខាន់ ក្នុងការជួយបង្កើនផលិតភាពកសិកម្ម គ្រប់គ្រងធនធានទឹក និងកាត់បន្ថយហានិភ័យគ្រោះមហន្តរាយ ដោយធានាថាព័ត៌មានអាកាសធាតុដែលទាន់ពេល និងទុកចិត្តបាន នឹងទៅដល់ដៃកសិករជាក់ស្តែង។

ទន្ទឹមនឹងនេះ លោក ថោ ជេដ្ឋា ក៏បានស្នើឱ្យ FAO បន្តជួយលើការងារអាទិភាពចំនួន ៣ រួមមាន៖ ទីមួយ បន្តជួយពង្រឹងបណ្តាញស្ថានីយកសិ-ឧតុនិយម ដើម្បីធានាគុណភាពទិន្នន័យ និងនិរន្តរភាពសេវាកម្ម, ទីពីរ បន្តកៀរគរធនធានបន្ថែមជួយដល់ការគ្រប់គ្រងធនធានទឹក និងប្រព័ន្ធជូនដំណឹងជាមុន, និងទីបី ជួយបណ្តុះបណ្តាលអភិវឌ្ឍធនធានមនុស្សលើជំនាញឧតុនិយម ជលសាស្ត្រ កសិ-ឧតុនិយម និងការគ្រប់គ្រងធនធានទឹក ដើម្បីធានានិរន្តរភាព និងប្រសិទ្ធភាពសេវាសាធារណៈរយៈពេលវែង៕

The post ក្រសួងធនធានទឹក ស្នើ FAO បន្តជួយពង្រឹងបណ្ដាញស្ថានីយឧតុនិយម និងអភិវឌ្ឍធនធានមនុស្ស appeared first on .

ការអំពាវនាវនេះធ្វើឡើងបន្ទាប់ពីប្រទេសកម្ពុជាកំពុងឈានទៅរកការផ្លាស់ប្តូរពីរដូវវស្សាទៅរដូវប្រាំង ដោយរដូវវស្សាប្រចាំឆ្នាំ២០២៦ នឹងត្រូវបញ្ចប់ត្រឹមសប្តាហ៍ទី៣ នៃខែតុលា ឆ្នាំ២០២៦ នេះហើយ។ ការថយចុះនៃបរិមាណទឹកភ្លៀងជាបន្តបន្ទាប់ បណ្តាលមកពីការបញ្ចប់ឥទ្ធិពលរបបខ្យល់មូសុងនិរតី និងការកើនឡើងឥទ្ធិពលខ្យល់មូសុងឦសាន។

ជាមួយគ្នានេះ ស្ថានភាពអាកាសធាតុកាន់តែគួរឱ្យកត់សម្គាល់ ដោយសារបាតុភូតអែលនីញ៉ូ (El Niño) នឹងស្ថិតនៅក្នុងកម្រិត ១០០% រហូតដល់ខែកុម្ភៈ ឆ្នាំ២០២៧។ កត្តានេះនឹងធ្វើឱ្យខ្យល់មូសុងឦសាននាំមកនូវបរិមាណទឹកភ្លៀងក្នុងកម្រិតខ្សោយ ប៉ុន្តែអាចនឹងមានលាយឡំទៅដោយបាតុភូត ផ្គរ រន្ទះ ខ្យល់កន្ត្រាក់ និងបាតុភូតអាកាសធាតុមួយចំនួនទៀតដែលអាចកើតមានឡើងនៅក្នុងតំបន់មួយចំនួននៃប្រទេសកម្ពុជា។

ក្រសួងធនធានទឹក និងឧតុនិយម នឹងបន្តធ្វើការតាមដានអំពីស្ថានភាពធាតុអាកាស និងអាកាសធាតុ យ៉ាងយកចិត្តទុកដាក់ ដើម្បីជម្រាបជូនដំណឹងជាបន្តបន្ទាប់ក្នុងករណីមានការប្រែប្រួលជាយថាហេតុ។

The post ក្រសួងធនធានទឹក អំពាវនាវឱ្យប្រជាពលរដ្ឋប្រើប្រាស់ទឹកដោយសន្សំសំចៃ បន្ទាប់ពីរដូវវស្សានឹងបញ្ចប់នៅសប្តាហ៍ទី៣ នៃខែតុលានេះ appeared first on .

ក្នុងកិច្ចជំនួបនោះ លោករដ្ឋមន្ត្រី បានស្វាគមន៍គណៈប្រតិភូធនាគារអភិវឌ្ឍន៍អាស៊ី(ADB) ដែលបានមក ពិភាក្សាការងារស្ដីពីអាទិភាពនៃការអភិវឌ្ឍវិស័យធនធានទឹកនៅកម្ពុជាទាំងក្នុងពេលបច្ចុប្បន្ន និងទៅអនាគត ហើយដែលដើរតួនាទីយ៉ាងសំខាន់ក្នុងការគាំទ្រដល់ការអភិវឌ្ឍសេដ្ឋកិច្ចជាតិលើគ្រប់វិស័យ និងការលើកកម្ពស់ជីវភាពរស់នៅរបស់ប្រជាពលរដ្ឋនៅតំបន់ជនបទ។

លោកបន្តថា ក្រសួងធនធានទឹក កំពុងបន្តការកសាងហេដ្ឋារចនាសម្ព័ន្ធធារាសាស្ត្រពេញលេញ និងការធ្វើទំនើបកម្មលើការគ្រប់គ្រងធនធានទឹក ដើម្បីគាំទ្រដល់ការកែទម្រង់របស់រាជរដ្ឋាភិបាល និងពង្រឹងការអភិវឌ្ឍវិស័យធនធានទឹក និងឧតុនិយមប្រកបដោយប្រសិទ្ធភាព និរន្តរភាព និងបរិយាបន្ន ព្រមទាំងការកសាងភាពធន់ទៅនឹងការប្រែប្រួលអាកាសធាតុ។

តាមរយៈជំនួបនោះ ភាគីទាំងពីរ បានពិភាក្សាអំពីអាទិភាពនៃការអភិវឌ្ឍវិស័យធនធានទឹកនិងបញ្ហាប្រឈមសំខាន់ៗ និងពិនិត្យមើលវឌ្ឍនភាពនៃគម្រោងកំពុងអនុវត្តដែលមានការគាំទ្រពីធនាគារអភិវឌ្ឍន៍អាស៊ីនិងជម្រើសនានាសម្រាប់ការកែលម្អប្រសិទ្ធភាពការងារ ព្រមទាំងធ្វើការផ្លាស់ប្តូរទស្សនៈ និងស្វែងរកឱកាស ដើម្បីពង្រឹង និងពង្រឹកកិច្ចសហប្រតិបត្តិការបន្ថែមទៀត រវាងក្រសួងធនធានទឹក និងឧតុនិយម និងធនាគារអភិវឌ្ឍន៍អាស៊ី(ADB)។

សូមជម្រាបថា បច្ចុប្បន្ន ធនាគារអភិវឌ្ឍន៍អាស៊ី(ADB) បានផ្តល់ហិរញ្ញប្បទានសម្រាប់គម្រោងយុទ្ធសាស្ត្រ ចំនួន ៤ ដើម្បីគាំទ្រដល់ការគ្រប់គ្រងធនធានទឹក និងការអភិវឌ្ឍហេដ្ឋារចនាសម្ព័ន្ធធារាសាស្ត្រនៅកម្ពុជា ក្នុងនោះគម្រោងចំនួន ៣ កំពុងស្ថិតក្នុងដំណាក់កាលអនុវត្តគឺគម្រោងខ្សែច្រវាក់ផលិតកម្មប្រកបដោយភាតរបរិស្ថាន(CFAVC) គម្រោងកែលម្អវិស័យធារាសាស្ត្រកសិកម្ម(IAIP) គម្រោងគ្រប់គ្រងធនធានទឹកចម្រុះ(IWRM) និងគម្រោងចំនួន ១ កំពុងស្ថិតក្នុងដំណាក់កាលរៀបចំគម្រោង ការសិក្សាសមិទ្ធិលទ្ធភាព និងការរៀបចំគំនូសប្លង់វិស្វកម្មលម្អិត គឺគម្រោងគ្រប់គ្រងធនធានទឹកចម្រុះជំហានពីរ(SIWRMP) ៕ អត្ថបទ៖ហ្សាលីន

The post បច្ចុប្បន្ន៖ ADB បានផ្តល់ហិរញ្ញប្បទានសម្រាប់គម្រោងយុទ្ធសាស្ត្រចំនួន ៤ ដើម្បីគាំទ្រលើវិស័យធនធានទឹកនៅកម្ពុជា appeared first on .

​កិច្ចប្រជុំពិនិត្យវឌ្ឍនភាពការងារនេះ បានធ្វើឡើងថ្ងៃទី៥ ខែតុលា ឆ្នាំ២០២៦ នេះ ក្នុងក្របខណ្ឌគម្រោងកែលម្អសន្តិសុខទឹកកម្ពុជា (CaWSIP) ដោយមានការដឹកនាំពីលោក អឿង ចន្ថា អនុរដ្ឋលេខាធិការ និងជានាយកគម្រោង ព្រមទាំងមានការចូលរួមពីក្រុមការងារបច្ចេកទេសនៃធនាគារពិភពលោក (World Bank) ដឹកនាំដោយលោក Michael Webster នាយកប្រតិបត្តិការនៃធនាគារពិភពលោក ប្រចាំតំបន់អាស៊ីបូព៌ា និងប៉ាស៊ីហ្វិក។

នាឱកាសនោះ លោក អឿង ចន្ថា អនុរដ្ឋលេខាធិការ បានមានប្រសាសន៍ថា កិច្ចប្រជុំនេះរៀបចំឡើងក្នុងគោលបំណងពិនិត្យ និងពិភាក្សាលើវឌ្ឍនភាពការងារដែលបានអនុវត្តកន្លងមក ព្រមទាំងរៀបចំផែនការសកម្មភាពបន្តឱ្យកាន់តែមានភាពច្បាស់លាស់ ដើម្បីធានាឱ្យការអនុវត្តគម្រោងប្រព្រឹត្តទៅដោយរលូន និងសម្រេចបានលទ្ធផលតាមការរំពឹងទុក ដោយប្រកាន់ខ្ជាប់នូវតម្លាភាព គណនេយ្យភាព និងប្រសិទ្ធភាពខ្ពស់។

ជាមួយគ្នានេះ អនុរដ្ឋលេខាធិការ ក្រសួងធនធានទឹករូបនេះ ក៏បានថ្លែងអំណរគុណយ៉ាងជ្រាលជ្រៅចំពោះធនាគារពិភពលោក ដែលតែងតែគាំទ្រផ្នែកបច្ចេកទេស និងហិរញ្ញវត្ថុផងដែរ។

​សូមជម្រាបដែរថា តាមរយៈកិច្ចប្រជុំខាងលើ ក្រសួងធនធានទឹក ក៏បានសង្កត់ធ្ងន់ដែរថា លទ្ធផល និងអនុសាសន៍នៃកិច្ចប្រជុំនេះ ជាមូលដ្ឋានគ្រឹះយ៉ាងសំខាន់ក្នុងការជំរុញការអនុវត្តគម្រោងឱ្យចំទិសដៅ ដើម្បីលើកកម្ពស់ការគ្រប់គ្រងវិស័យធនធានទឹក ឧតុនិយម និងបង្កើនសមត្ថភាពឆ្លើយតបនឹងការប្រែប្រួលអាកាសធាតុប្រកបដោយចីរភាព៕ អត្ថបទ៖ហ្សាលីន

The post ក្រសួងធនធានទឹក និងធនាគារពិភពលោក រួមគ្នាជំរុញគម្រោងកែលម្អសន្តិសុខទឹកនៅកម្ពុជា appeared first on .

កិច្ចប្រជុំនេះ បានធ្វើឡើងកាលថ្ងៃទី២៩ ខែកញ្ញា ឆ្នាំ២០២៦នេះ ដឹកនាំដោយលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅសាលប្រជុំនៃទីស្ដីការក្រសួង។

ថ្លែងក្នុងកិច្ចប្រជុំ លោក ថោ ជេដ្ឋា រដ្ឋមន្ត្រីក្រសួងធនធានទឹក បានមានប្រសាសន៍ឱ្យដឹងថា អនុក្រឹត្យនេះជាឧបករណ៍គតិយុត្តមួយសម្រាប់អនុវត្តច្បាប់ស្តីពីការគ្រប់គ្រងធនធានទឹកនៅក្នុងព្រះរាជាណាចក្រកម្ពុជាឆ្នាំ២០០៧ ក៏ដូចជាក្រមបរិស្ថាននិងធនធានធម្មជាតិឆ្នាំ២០០៣ ហើយដែលបទប្បញ្ញត្តិនៃច្បាប់បានចែងយ៉ាងច្បាស់អំពីសកម្មភាពនៃការប្រើប្រាស់ទឹក និងធនធានទឹក ត្រូវស្នើសុំអាជ្ញាបណ្ណទឹក ឬលិខិតអនុញ្ញាត។

លោករដ្ឋមន្ត្រី បានបញ្ជាក់ឱ្យដឹងថា អនុក្រឹត្យនេះនឹងជួយសម្រួលដល់អ្នកប្រើប្រាស់ទឹក និងធនធានទឹក ដែលជាម្ចាស់អាជីវកម្ម រោងចក្រ សហគ្រាស ក្នុងវិស័យកសិកម្ម ឬឧស្សាហកម្ម ក្នុងការទទួលបានទម្រង់បែបបទសម្រាប់ការស្នើសុំ ការផ្តល់ ការផ្ទេរ ការព្យួរទុក ការពន្យាពេល ការកែប្រែ និងការលុបចោលអាជ្ញាបណ្ណទឹក និងលិខិតអនុញ្ញាត ព្រមទាំងជួយដល់ក្រសួងធនធានទឹក និងឧតុនិយម ក្នុងការក្តាប់បាននូវទិន្នន័យនៃការប្រើប្រាស់ទឹក និងធនធានទឹក ដើម្បីងាយស្រួលក្នុងការរៀបចំផែនការគ្រប់គ្រងធនធានទឹកប្រកបដោយនិរន្តរភាពផងដែរ។

សូមបញ្ជាក់ថា ខ្លឹមសារនៃសេចក្តីព្រាងអនុក្រឹត្យនេះចែកចេញជា ១០ជំពូក ៤៣ មាត្រា ដែលមានកំណត់អំពីលក្ខខណ្ឌ ទម្រង់បែបបទ និងនីតិវិធីនៃការផ្ដល់សិទ្ធិក្នុងការប្រើប្រាស់ទឹក ធនធានទឹក និងសកម្មភាពនានាពាក់ព័ន្ធនឹងធនធានទឹក ក្នុងគោលដៅធ្វើអាជីវកម្ម ដើម្បីធានាដល់ការបែងចែក ការគ្រប់គ្រង និងការអភិរក្សធនធានទឹក ប្រកបដោយប្រសិទ្ធភាព និរន្តរភាព និងបរិយាបន្ន៕ អត្ថបទ៖ហ្សាលីន

The post រដ្ឋ ជំរុញសេចក្ដីព្រាងអនុក្រឹត្យស្ដីពីអាជ្ញាបណ្ណទឹក ដើម្បីធានាដល់ការបែងចែកឱ្យមានប្រសិទ្ធភាព appeared first on .

រូបភាពប្រកៀកដៃគ្នាជាជំហរដ៏រឹងម៉ាំនេះ ក្នុងដំណើរអមសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងឱកាសសម្តេចត្រួតពិនិត្យផ្ទាល់ និងសួរសុខទុក្ខប្រជាពលរដ្ឋដែលរងគ្រោះដោយទឹកជំនន់​ នៅខេត្តបាត់ដំបង និងបន្ទាយមានជ័យ កាលពីថ្ងៃទី២៨ ខែកញ្ញា ឆ្នាំ២០២៦។

ក្នុងនោះ លោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន , លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម, លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ , រួមជាមួយ លោក ឆាយ រិទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ បានរួមគ្នាក្នុងកិច្ចការជួយសង្គ្រោះប្រជាពលរដ្ឋដែលរងគ្រោះដោយទឹកជំនន់​នេះផងដែរ។

សូមជម្រាបថា កាលពីថ្ងៃទី២៨ ខែកញ្ញា សម្តេចធិបតី ហ៊ុន ម៉ាណែត បានចុះពិនិត្យស្ថានភាពទឹកជន់លិចនៅតំបន់មួយចំនួនក្នុងខេត្តបាត់ដំបង និងខេត្តបន្ទាយមានជ័យផ្ទាល់។ ដោយសម្តេចលើកឡើងថា ការសង្គ្រោះជីវិតរបស់ប្រជាពលរដ្ឋ គឺជាអាទិភាពចំបងរបស់រាជរដ្ឋាភិបាល។

គួរឱ្យដឹងថា នាពេលកន្លងមក អាជ្ញាធរខេត្ត ស្រុក-ក្រុង កងកម្លាំងប្រដាប់អាវុធពាក់ព័ន្ធ និងកម្លាំងស្ម័គ្រចិត្តទាំងអស់ក៏បានរួមគ្នាជួយសង្គ្រោះប្រជាពលរដ្ឋនៅក្នុងខេត្តទាំងពីរ ក៏ដូចជានៅតាមបណ្តាខេត្តនានានៅទូទាំងប្រទេសដែលទទួលរងផលប៉ះពាល់ដោយទឹកជំនន់ បានរហ័សទាន់ពេលវេលា ទៅកាន់ទីទួលសុវត្ថិភាពផងដែរ៕

The post រដ្ឋមន្រ្តីក្រសួង៤ បង្ហាញរូបភាពប្រកៀកដៃគ្នាចុះពិនិត្យ និងសង្គ្រោះប្រជាពលរដ្ឋដែលរងគ្រោះទឹកជំនន់ appeared first on .

នាឱកាសនោះ លោក ចាន់ ស៊ីណាត រដ្ឋលេខាធិការ និងជានាយកគម្រោងនៃក្រសួងធនធានទឹក និងឧតុនិយម បានឱ្យដឹងថា កិច្ចប្រជុំនេះត្រូវបានរៀបចំឡើងតាមទម្រង់ផ្ទាល់ និងតាមប្រព័ន្ធ Zoom ដោយមានការចូលរួមពី លោក ឡុង ពិសិដ្ឋ តំណាងធនាគារ ADB, ក្រសួងសេដ្ឋកិច្ច និងហិរញ្ញវត្ថុ, ក្រសួងកិច្ចការនារី, រដ្ឋបាលខេត្តគោលដៅ, ថ្នាក់ដឹកនាំ-មន្ត្រីជំនាញនៃក្រសួងធនធានទឹក និងឧតុនិយម ព្រមទាំងតំណាងអាជ្ញាធរទន្លេសាប និងគណៈកម្មាធិការជាតិទន្លេមេគង្គកម្ពុជា។

ថ្លែងក្នុងកិច្ចប្រជុំ លោករដ្ឋលេខាធិការ បានបញ្ជាក់ថា បេសកកម្មត្រួតពិនិត្យនេះ បានបញ្ចប់ទៅដោយជោគជ័យ និងរលូន ស្របតាមផែនការ និងលក្ខខណ្ឌតម្រូវរបស់ ADB។ ជាមួយគ្នានេះ តំណាងធនាគារអភិវឌ្ឍន៍អាស៊ី បានសម្តែងនូវការកោតសរសើរចំពោះក្រសួងធនធានទឹក និងឧតុនិយម ដែលបានខិតខំប្រឹងប្រែងសម្រេចបាននូវលទ្ធផលធំៗ និងគ្រប់គ្រងដោះស្រាយហានិភ័យផ្សេងៗ បានទាន់ពេលវេលា និងមានប្រសិទ្ធភាព។

សូមជម្រាបដែរថា តាមរយៈកិច្ចប្រជុំខាងលើ តំណាង ADB បានឯកភាពលើសំណូមពរ និងទស្សនវិស័យយុទ្ធសាស្ត្ររបស់ថ្នាក់ដឹកនាំក្រសួង ក្នុងការអភិវឌ្ឍប្រព័ន្ធធារាសាស្ត្រទំនើប និងគ្រប់ជ្រុងជ្រោយ ដើម្បីបម្រើផលប្រយោជន៍ប្រជាពលរដ្ឋ កាត់បន្ថយគ្រោះជំនន់ ធានាទឹកប្រើប្រាស់គ្រប់គ្រាន់នៅរដូវប្រាំង និងបង្កើនរដូវដាំដុះរហូតដល់ ៣ដងក្នុងមួយឆ្នាំ សំដៅលើកកម្ពស់ជីវភាព និងសេដ្ឋកិច្ចជាតិ៕ អត្ថបទ៖ហ្សាលីន

The post ADB ឯកភាពសំណូមពរអភិវឌ្ឍប្រព័ន្ធធារាសាស្ត្រទំនើប និងគ្រប់ជ្រុងជ្រោយរបស់ក្រសួងធនធានទឹកកម្ពុជា appeared first on .

កិច្ចពិភាក្សានេះ បានធ្វើឡើងកាលថ្ងៃទី៤ ខែកញ្ញា ឆ្នាំ២០២៦ ក្រោមការដឹកនាំ ដោយលោក សុត រស្មី រដ្ឋលេខាធិការ និងជាប្រធានគណៈកម្មាធិការលទ្ធតំណាងដ៏ខ្ពង់ខ្ពស់ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម។ កិច្ចប្រជុំនេះ មានការអញ្ជើញចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ តំណាងនាយកដ្ឋានជំនាញពាក់ព័ន្ធ និងតំណាងក្រុមហ៊ុនដេញថ្លៃ ដើម្បីផ្តល់ការបកស្រាយបំភ្លឺ ព្រមទាំងសម្របសម្រួលលើទិដ្ឋភាពបច្ចេកទេស និងតម្លៃ ប្រកបដោយតម្លាភាព និងប្រសិទ្ធភាពខ្ពស់។

នៅក្នុងឱកាសនោះ លោករដ្ឋលេខាធិការបានបញ្ជាក់ថា ក៏ការវាយតម្លៃនេះធ្វើឡើងដើម្បីធានាភាពត្រឹមត្រូវ តម្លាភាព និងគណនេយ្យភាព ផ្អែកលើបទដ្ឋានបច្ចេកទេស និងតម្លៃជាក់ស្តែង។ ជាមួយគ្នានេះ គណៈកម្មាធិការបានពិចារណាយ៉ាងល្អិតល្អន់លើការប្រែប្រួលតម្លៃប្រេងសកល ដើម្បីធានាគុណភាព និងប្រសិទ្ធភាពការងារ ក្នុងការរួមចំណែកលើកកម្ពស់សេដ្ឋកិច្ចគ្រួសារ និងសង្គមជាតិ។

​សូមជម្រាបដែរថា គម្រោងទាំង ៣ ដែលត្រូវយកមកពិនិត្យ និងចរចាថ្លៃនាឱកាសនោះ រួមមាន៖ ទី១. ការងារជួសជុលអគារ តាមបណ្តាអង្គភាពក្រោមឱវាទក្រសួងធនធានទឹក និងឧតុនិយម ឆ្នាំ២០២៦។ ទី២. ការងារស្តារអូរដំឡូង និងសាងសង់សំណង់សិល្បការ្យ ស្ថិតក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ។ ទី៣. ការងារសិក្សាសមិទ្ធិលទ្ធភាពពេញលេញ គម្រោងសាងសង់សំណង់ស្ទាក់ទឹកបន្ទាយស្ទោង ស្ថិតក្នុងឃុំបន្ទាយស្ទោង ស្រុកស្ទោង ខេត្តកំពង់ធំ៕ អត្ថបទ៖ហ្សាលីន

The post អន្តរក្រសួង បើកកិច្ចពិភាក្សាពិគ្រោះថ្លៃ និងចរចាថ្លៃលើគម្រោងសំខាន់ចំនួន ៣ សម្រាប់ឆ្នាំ២០២៦ appeared first on .