ក្នុងឱកាសទិវាគ្រុនចាញ់ពិភពលោក និងទិវាជាតិប្រយុទ្ធនឹងជំងឺគ្រុនចាញ់ លោករដ្ឋមន្រ្តី បានលើកឡើងពីសមិទ្ធផលសំខាន់ៗ របស់កម្ពុជា ក្នុងការកាត់បន្ថយជំងឺឆ្លង តាមរយៈការអនុវត្តយុទ្ធសាស្ត្រជាតិ និងការពង្រឹងប្រព័ន្ធសុខាភិបាល។ ជោគជ័យនេះ កើតចេញពីការវិនិយោគរបស់រាជរដ្ឋាភិបាល ការអនុវត្តយុទ្ធសាស្ត្រ «សុខភាពតែមួយ» ដែលផ្សារភ្ជាប់រវាងសុខភាពមនុស្ស សត្វ និងបរិស្ថាន ព្រមទាំងបានមកពីការចូលរួមយ៉ាងសកម្មរបស់យើងទាំងអស់គ្នា ធ្វើឱ្យសហគមន៍ មានការយល់ដឹង និងការពារការចម្លងជំងឺ និងការមកទទួលយកសេវាសុខភាពបានទាន់ពេលវេលា។

សូមរំលេចដែរថា ជំងឺគ្រុនចាញ់ក្នុងប្រទេសកម្ពុជាកំពុងអវត្តមានករណីជំងឺឆ្លងថ្មីក្នុងប្រទេសចាប់តាំងពីថ្ងៃទី ៨ ខែកញ្ញា ឆ្នាំ២០២៥ មកដល់បច្ចុប្បន្នឆ្នាំ២០២៦ និងជាប្រទេសទី១ក្នុងមហាអនុតំបន់ទន្លេមេគង្គដែលបានសម្រេចគោលដៅតាមផែនការគ្រោងទុកមុនគេតាមកាលកំណត់ជាក់លាក់ដោយគ្មានការផ្លាស់ប្តូរផែនការពេលវេលា។ កម្មវិធីជាតិប្រយុទ្ធនឹងជំងឺគ្រុនចាញ់ សម្រេចបាននូវផលិតភាពសមិទ្ធផលផែនការយុទ្ធសាស្រ្ត ទាំង ៣គោលដៅ រួមមាន៖ ១). បញ្ចប់ភាពស៊ាំថ្នាំអាតេមីស៊ីនីនសម្លាប់មេរោគគ្រុនចាញ់នៅឆ្នាំ២០១៥ តាមផែនការ, ២). បញ្ចប់មិនឱ្យមានស្លាប់ដោយគ្រុនចាញ់នៅឆ្នាំ២០១៨ មុនផែនការ៣ឆ្នាំ ព្រមទាំងបញ្ចប់លែងឱ្យមានគ្រុនចាញ់សន្ធំប្រភេទហ្វាល់ស៊ីប៉ារ៉ូមត្រឹមដំណាច់ឆ្នាំ២០២៤, និង ទី៣) ករណីជំងឺគ្រុនចាញ់ឆ្លងក្នុងប្រទេសបានធ្លាក់ចុះមកដល់សូន្យករណី ក្នុងត្រីមាសចុងក្រោយឆ្នាំ២០២៥តាមផែនការ៕អត្ថបទ៖ហ្សាលីន

The post រដ្ឋមន្រ្តីក្រសួងសុខាភិបាល ប្រកាសថា ប្រទេសកម្ពុជាសម្រេចបានសមិទ្ធផលធំៗចំនួន ៣ appeared first on .

ក្រសួងសុខាភិបាល នៅថ្ងៃទី៦ ខែមេសា ឆ្នាំ២០២៦ បានអំពាវនាវក្រើនរំលឹក ដល់ពលរដ្ឋទាំងអស់ សូមមេត្តាយកចិត្តទុកដាក់ប្រុងប្រយ័ត្នផ្ទាល់ខ្លួនប្រកបដោយស្មារតីទទួលខុស និងបានប្រកាសដាក់ចេញនូវវិធានការបង្ការនានារួមមាន៖

ក្រសួងបានណែនាំឱ្យរក្សាអនាម័យ លាងសម្អាតដៃឱ្យបានញឹកញាប់ជាមួយសាប៊ូនិងទឹកស្អាត ឬអាល់កុល មុនចាប់កាន់អាហារ ក្រោយចេញពីបង្គន់ ក្រោយប៉ះពាល់សត្វ បោចសម្អាតសត្វស្លាប លាងសម្អាតសាច់ និងសម្ភារៈចម្អិនអាហារ។ត្រូវពាក់ស្រោមដៃ និងម៉ាស់ ឬយកក្រមាចងបិតច្រមុះ មុនពេលចាប់កាន់មាន់ទាធ្វើម្ហូបអាហារ។

ប្រសិនបើមានមាន់ទាឈឺឬងាប់ច្រើននៅផ្ទះឬក្នុងភូមិ ហើយមានអាការៈក្តៅខ្លួន ក្អក ហូរសំបោរ ឬពិបាក ដកដង្ហើម សូមប្រញាប់ស្វែងរកការពិគ្រោះយោបល់ និងការពិនិត្យព្យាបាលនៅមណ្ឌលសុខភាព ឬ មន្ទីរពេទ្យ ដែលនៅជិតជាបន្ទាន់ ចៀសវាងការពន្យារពេល ធ្វើឱ្យប្រឈមនឹងហានិភ័យខ្ពស់អាចឈាន ដល់មរណភាពជាយថាហេតុ។

ក្រសួងក៏ណែនាំឱ្យ ទុកដាក់អាហារឆៅ និងអាហារឆ្អិនឱ្យដាច់ដោយឡែកពីគ្នា សម្អាតសម្ភារៈប្រើប្រាស់សម្រាប់ចម្អិន អាហារឱ្យបានត្រឹមត្រូវ និងចម្អិនអាហារឱ្យឆ្អិនល្អមុនបរិភោគ ជាពិសេសសាច់សត្វបក្សី ស៊ុតនិងអាហារ សមុទ្រ។ ត្រូវរក្សាទុកចំណីអាហារក្នុងសីតុណ្ហភាពមានសុវត្ថិភាព អាហារត្រជាក់ត្រូវរក្សាទុកក្រោម៥អង្សាសេ និង អាហារក្តៅលើសពី៦០អង្សាសេ ហើយចៀសវាងទុកអាហារសេសសល់នៅសីតុណ្ហភាពធម្មតាយូរម៉ោង ដើម្បីបង្ការការផ្តើម ដែលអាចបណ្តាលឱ្យ រាក ឈឺពោះ ឬក្អួត។ត្រូវប្រើប្រាស់ទឹកស្អាត និងវត្ថុធាតុដើមមានគុណភាពល្អ មិនត្រូវប្រើប្រាស់សារធាតុគីមីបន្ថែម។

ជាមួយគ្នានេះ ក្រសួងក៏បានណែនាំឱ្យ ចៀសវាងការប្រើប្រាស់គ្រឿងស្រវឹង ដែលអាចបង្កអំពើហឹង្សា និងគ្រោះថ្នាក់ចរាចរណ៍ជាយថាហេតុ ហើយក្រសួងក៏ណែនាំឱ្យត្រូវប្រុងប្រយ័ត្ន និងបង្ការអគ្គីភ័យនៅតាមផ្ទះសម្បែងរៀងខ្លួនផងដែរ។

ជាថ្មីម្តងទៀត ក៏ក្រសួងក៏សូមអាជ្ញាធរមូលដ្ឋាន មេត្តាយកចិត្តទុកដាក់តាមដានស្ថានភាពសុខភាពប្រជាជនក្នុងដែនសមត្ថកិច្ច ជា ពិសេសជនងាយរងគ្រោះ និងសហការចាត់ចែងជាបន្ទាន់ ក្នុងករណីមានបញ្ហាសុខភាពណាមួយកើតឡើង៕ អត្ថបទ៖ហ្សាលីន

The post ក្រសួងសុខាភិបាល ចេញវិធានការការពារ និងរក្សាសុខភាព នាឱកាសបុណ្យចូលឆ្នាំប្រពៃណីខ្មែរ appeared first on .

ពិធីប្រកាសផ្សព្វផ្សាយ ដាក់ឲ្យអនុវត្តជាផ្លូវការ គម្រោងខាងលើ បានធ្វើឡើងកាលថ្ងៃទី៣១ ខែមីនា ឆ្នាំ២០២៦ ក្រោមអធិបតីភាពលោកស្រីវេជ្ជបណ្ឌិត ប្រាក់ សោភ័ណនារី រដ្ឋលេខាធិការក្រសួងសុខាភិបាល។

ក្រសួងសុខាភិបាល បានឱ្យដឹងថា គោលបំណងនៃការអនុវត្តគម្រោង គឺដើម្បីទប់ស្កាត់ និងដោះស្រាយបញ្ហាកង្វះសារធាតុចិញ្ចឹម របស់កម្មកររោងចក្រ ជាពិសេសកម្មករ កម្មការិនីរោងចក្រកាត់ដេរ ភាគច្រើនជាស្ត្រី តាមរយៈការលើកកម្ពស់ការប្រើប្រាស់អង្ករ ដែលមានបញ្ចូលនូវមីក្រូសារជាតិ នៅតាមអាហារដ្ឋាន និងកន្លែងលក់ដូរ។

គម្រោងនឹងផ្ដល់អត្ថប្រយោជន៍ ដល់កម្មករ កម្មការិនីរោងចក្រ សរុបប្រមាណ ៨០០,០០០នាក់ ក្នុងនោះជាស្ត្រីចំនួន ៦៤០,០០០នាក់។ តាមការប៉ាន់ប្រមាណ រាល់ការវិនិយោគ​ ១ដុល្លា ទៅលើការបញ្ចូលមីក្រូសារជាតិក្នុងចំណីអាហារ នឹងទទួលបានអត្ថប្រយោជន៍ត្រលប់មកវិញ ២៧ដុល្លា​ តាមរយៈការលើកកម្ពស់សុខភាពល្អឱ្យកាន់តែប្រសើរ​ បង្កើនផលិតភាពការងារ និងមានស្ថេរភាពសេដ្ឋកិច្ច។

សូមជម្រាបផងដែរថា អង្ករដែលមានបញ្ចូលនូវមីក្រូសារជាតិ (Fortifies Rice) គឺជាការលាយបញ្ចូលគ្នានូវ ៩៩% នៃគ្រាប់អង្ករធម្មតា និង ១% នៃគ្រាប់អង្ករដែលមានបន្ថែមសារធាតុចិញ្ចឹមពិសេស ដូចជាវីតាមីន និងសារធាតុរ៉ែខនិក។ ក្នុង​ន័យ​នេះ ​រាល់អង្ករធម្មតា ១០០​គ្រាប់​​ មានអង្ករខនិក​ ១​គ្រាប់ ហើយសារធាតុចិញ្ចឹមបន្ថែមទាំងនេះ ជួយពង្រឹង និងទ្រទ្រង់ការលូតលាស់ ព្រមទាំង ការអភិវឌ្ឍន៍បញ្ញាស្មារតីផងដែរ។នេះបើតាមការបញ្ជាក់បន្ថែមពីក្រសួងសុខាភិបាល៕ អត្ថបទ៖ហ្សាលីន

The post កម្ពុជា-ជប៉ុន ដាក់ឱ្យអនុវត្តជាផ្លូវការនូវការបញ្ចូលមីក្រូសារជាតិក្នុងអាហារសម្រាប់កម្មករក្នុងវិស័យរោងចក្រកាត់ដេរ appeared first on .

កិច្ចពិភាក្សានេះ ដឹកនាំដោយ លោក កុយ វ៉ាន់នី រដ្ឋលេខាធិការក្រសួងសុខាភិបាល  និងជានាយកគម្រោងអភិវឌ្ឍមន្ទីរពេទ្យតំបន់  នាថ្ងៃទី១៨ ខែកុម្ភៈ ឆ្នាំ២០២៦។

គោលបំណងនៃកិច្ចជំនួបនោះ គឺដើម្បីពិនិត្យវឌ្ឍនភាពនៃការវាយតម្លៃសំណើដេញថ្លៃកម្រឹតបច្ចេកទេសរបស់ក្រុមហ៊ុននានាពីប្រទេសជប៉ុន និងទីប្រឹក្សាជំនាញសម្រាប់ធ្វើការឌីហ្សាញ រចនាប្លង់ និងមើលការខុសត្រូវសំណង់ មន្ទីរពេទ្យខេត្តសៀមរាប និងកំពង់ចាម ។ 

ក្នុងឱកាសនោះ លោក កុយ វ៉ាន់នី បានថ្លែងអំណរគុណដល់ JICA ដែលតែងតែផ្តល់ភាពសហការណ៍ដ៏ជិតស្និទ្ធិ ក្នុងវិស័យសុខាភិបាល ក៏ដូចជាការគាំទ្រក្នងការបង្កើតមន្ទីរពេទ្យតំបន់ក្នុងខេត្តសៀមរាប និងកំពង់ចាម ឱ្យទៅជាមន្ទីរពេទ្យថ្នាក់តំបន់ប្រកបដោយស្តង់ដារខ្ពស់ស្របតាមផែនការយុទ្ធសាស្រ្តបញ្ចកោណ របស់រាជរដ្ឋាភិបាលកម្ពុជា។

គួរបញ្ជាក់ផងដែរថា គម្រោងអភិវឌ្ឍមន្ទីរពេទ្យតំបន់នៅកម្ពុជា ពិតជាមានសារៈសំខាន់សម្រាប់ការអភិវឌ្ឍមន្ទីរពេទ្យតំបន់នៅកម្ពុជា ដោយគម្រោងនេះ បានទទួលការយកចិត្តទុកដាក់ខ្ពស់ពីរាជរដ្ឋាភិបាលកម្ពុជា និងមានការសហការពីដៃគូរអភិវឌ្ឍន៍ប្រទេសជប៉ុន ដើម្បីជួយក្នុងការលើកកម្ពស់សមត្ថភាព ប្រសិទ្ធិភាព ព្យាបាលនិងការថែទាំជំងឺ នៅកម្រិតមន្ទីរពេទ្យតំបន់ដែលត្រូវជួយគាំទ្រមន្ទីរពេទ្យខេត្ត ជាមួយសមត្ថភាព និងមានកម្រិតស្តង់ដារខ្ពស់ ប្រហាក់ប្រហែលមន្ទីរពេទ្យកម្រិតថ្នាក់ជាតិ៕

The post ក្រសួងសុខាភិបាល និង​JICA ពិភាក្សាលើវឌ្ឍនភាពនៃគម្រោងអភិវឌ្ឍមន្ទីរពេទ្យតំបន់ ក្រោមក្របខណ្ឌហិរញ្ញប្បទានពីរដ្ឋាភិបាលជប៉ុន appeared first on .

វីរុសត្រូវបានរកឃើញក្នុងប្រទេសបង់ក្លាដែសនិងប្រទេសឥណ្ឌាក្នុងឆ្នាំ ២០០១ និងមានការ ផ្ទុះឡើងស្ទើររាល់ឆ្នាំក្នុងប្រទេសបង់ក្លាដែសនិងភាគខាងកើតប្រទេសឥណ្ឌានៅចន្លោះពេលទៀងទាត់។ ក្រសួងបញ្ជាក់ថា ប្រទេសកម្ពុជានៅមិនទាន់រកឃើញមានវីរុសនីប៉ាហ៍នៅលើមនុស្សនៅឡើយ និងធ្លាប់រកឃើញលើសត្វប្រចៀវ។

ជាមួយគ្នានេះគ្នា ក្រសួងសុខាភិបាលបានប្រាប់ពីរបៀបចម្លង ដោយ៖

សត្វប្រចៀវស៊ីផ្លែឈើដែលមានវីរុសនីប៉ាហ៍ ចម្លងវីរុសទៅ សត្វជ្រូក សេះ ពពែ ចៀម ឆ្មា និងឆ្កែ រួចចម្លងមកមនុស្សតាមរយៈការប៉ះពាល់ផ្ទាល់ជាមួយទឹកសរីរាង្គសត្វដូចជា ឈាម លាមកឬទឹក នោមនៃសត្វទាំងនេះ។ ការទទួលទានផ្លែឈើ ឬ ទឹកផ្លែឈើ (ដូចជាទឹកត្នោត) ដែលមានទឹកនោម ឬទឹកមាត់សត្វ ប្រចៀវដែលមានផ្ទុកវីរុសនីប៉ាហ៍ចូលក្នុងនោះ ។ មនុស្សប៉ះពាល់ផ្ទាល់ជាមួយសត្វប្រចៀវស៊ីផ្លែឈើដែលមានវីរុសនីប៉ាហ៍ ការប៉ះពាល់ផ្ទាល់ ឬតាមរយៈទឹកសរីរាង្គរបស់បុគ្គលមានផ្ទុកវីរុសនីប៉ាហ៍ ដូចជា ឈាម ទឹកនោម ទឹកមាត់ ទឹកសំបោរ ឬតំណក់ទឹកតូចៗចេញពីផ្លូវដង្ហើម ឬច្រមុះ ។

រោគសញ្ញា៖ បុគ្គលដែលឆ្លងវីរុសនីប៉ាហ៍ អាចគ្មានរោគសញ្ញា រហូតដល់មានជំងឺផ្លូវដង្ហើមស្រួចស្រាវ និងរលាកខួរក្បាលធ្ងន់ធ្ងរ ដូចជាហើមខួរក្បាល និងអាចស្លាប់។ រយៈពេលពីឆ្លងវីរុសនីប៉ាហ៍រហូតដល់ចាប់ផ្តើមមានរោគសញ្ញា គឺ មានចន្លោះពី ៤ថ្ងៃ ទៅ ១៤ ថ្ងៃ តែអាចរហូតដល់ ៤៥ ថ្ងៃ រោគសញ្ញារួមមានគ្រុនក្តៅ ឈឺក្បាល ក្អក ឈឺបំពង់ក ពិបាកដកដង្ហើម ក្អួត ឈឺសាច់ដុំ។ នៅពេលដែលខួរក្បាលហើម ធ្វើឱ្យវិលមុខ ងងុយដេក វិបត្តិស្មារតី ប្រកាច់ សន្លប់ក្នុងអំឡុង ២៤-៤៨ ម៉ោង ដែលជារោគសញ្ញាទាក់ទងនិងប្រព័ន្ធប្រសាទ ។ បុគ្គលដែលមានជំងឺរលាកខួរក្បាលស្រួចស្រាវ តែងមានផលវិបាកប្រព័ន្ធប្រសាទរយៈពេលយូរ បន្ទាប់ពីជាសះស្បើយ ក្នុងនោះ ២០% នៃអ្នកជំងឺមានជំងឺប្រកាច់ ហើយបុគ្គលមួយចំនួនតូចឈឺ ឡើងវិញ ឬវិវត្តន៍ទៅជាមានជំងឺរលាកខួរក្បាលជាថ្មី។ បច្ចុប្បន្ននេះមិនមានឱសថ ឬវ៉ាក់សាំងជាក់លាក់ណាមួយសម្រាប់ការពារការឆ្លងវីរុសនីប៉ាហ៍ មានតែការព្យាបាលថែទាំគាំទ្រទៅតាមផលវិបាកនៃជំងឺផ្លូវដង្ហើមធ្ងន់ធ្ងរនិងប្រព័ន្ធប្រសាទ ប៉ុណ្ណោះ។

ទន្ទឹមនឹងនេះ ក្រសួងសុខាភិបាលក៏បានប្រាប់ពីរបៀបបង្ការផងដែរ ដោយត្រូវ៖ លាងសម្អាតដៃ និងរក្សាអនាម័យក្នុងកសិដ្ឋានចិញ្ចឹមជ្រូក ជាប្រចាំ ជាមួយនឹងសាប៊ូ ចៀសវាងប៉ះពាល់ជាមួយ សត្វប្រចៀវ សត្វប្រឹង ឬជ្រូកឈឺ បើមានការសង្ស័យថាមានការផ្ទុះឡើងកន្លែងសត្វគួរតែត្រូវបានដាក់ឱ្យនៅដាច់ពីគេជាបន្ទាន់។ ការ សម្លាប់សត្វដែលឆ្លងវីរុសត្រូវអនុវត្តវិធីកប់ ឬដុតសាកសពឱ្យត្រឹមត្រូវ ដើម្បីកាត់បន្ថយហានិភ័យនៃ ការឆ្លងដល់មនុស្ស។ ហាមផ្លាស់ទីសត្វពីកសិដ្ឋានដែលមានវីរុសទៅកាន់តំបន់ផ្សេងទៀត ។ កុំឱ្យសត្វប្រចៀវអាចប៉ះជាមួយបំពង់សម្រាប់ត្រងទឹកត្នោតនិងផលិតផលអាហារស្រស់ផ្សេងទៀត។ ទឹកត្នោតដែលទើបប្រមូលបានថ្មីៗគួរដាំឱ្យពុះ លាងសម្អាតផ្លែឈើ និងបកសំបកមុនពេលទទួលទាន ផ្លែឈើដែលមានសញ្ញាថាសត្វប្រចៀវចោះ ឬស៊ី ត្រូវបោះចោល។ ពាក់ស្រោមដៃ និងសម្លៀកបំពាក់ការពារ ខណៈពេលកាន់សត្វឈឺ ឬទឹកសរីរាង្គ របស់វា និងក្នុង អំឡុងពេលនៃការសម្លាប់ និងការកំទេចចោល កុំប៉ះផ្ទាល់ជាមួយអ្នកឆ្លងវីរុសនីប៉ាហ៍។ លាងសម្អាតដៃជាប្រចាំបន្ទាប់ពីការថែទាំឬសួរ សុខទុក្ខអ្នកជំងឺ បុគ្គលិកថែទាំសុខភាពដែលមើលថែទាំអ្នកជំងឺសង្ស័យ ឬបញ្ជាក់ថាមានការឆ្លង ត្រូវអនុវត្តការ ប្រុងប្រយ័ត្នគ្រប់គ្រងការចម្លងរោគគ្រប់ពេលវេលា។ ការប្រមូលសំណាកពីមនុស្ស និងសត្វ ដែលមានការសង្ស័យថាមានការឆ្លងវីរុសនីប៉ាហ៍ ត្រូវអនុវត្ត ដោយបុគ្គលិកដែលបានទទួលការបណ្តុះបណ្តាលនិងពាក់សម្ភារការពារខ្លួន។

សម្រាប់ព័ត៌មានបន្ថែម សូមទាក់ទងលេខទូរសព្ទទាន់ហេតុការណ៍របស់ក្រសួងសុខាភិបាល លេខ១១៥ ដោយឥតគិតថ្លៃ។

The post ក្រសួងសុខាភិបាល ប្រាប់ពីវិធីការពារខ្លួនពីការឆ្លងវីរុសនីប៉ាហ៍ (Nipah Virus) appeared first on .

ការបង្ហាញពីគោលបំណងរបស់ក្រុមហ៊ុន នៅក្នុងជំនួបរវាង លោក ឈាង រ៉ា រដ្ឋមន្រ្តីក្រសួងសុខាភិបាល  ជាមួយ គណៈប្រតិភូក្រុមហ៊ុន ដឹកនាំដោយលោក  សេង ញ៉ក់ សមាជិកសភា និងជាតំណាងអ្នកវិនិយោគ ព្រមទាំងមានការចូលរួមដោយ លោក សូ ហ្វង់ ទីប្រឹក្សាលោក អ៊ុច បូររិទ្ធ លោក យ៉ង លីវ ប្រធានក្រុមហ៊ុនShenzhen Jintong និងសាស្ត្រាចារ្យ ហ្សាង សូជី ប្រធានផ្នែកវិទ្យាសាស្ត្រ និងស្រាវជ្រាវវេជ្ជសាស្ត្ររួមជាមួយក្រុមការងារ នាថ្ងៃទី១៤ ខែតុលា ឆ្នាំ២០២៥។

ក្នុង​ឱកាសនោះ លោកប្រធានក្រុមហ៊ុនShenzhen Jintong និងសាស្ត្រាចារ្យ ហ្សាង សូជី ប្រធានផ្នែកវិទ្យាសាស្ត្រ និងស្រាវជ្រាវវេជ្ជសាស្ត្ររួមជាមួយក្រុមការងារ បានបង្ហាញពីគោលបំណងរបស់ខ្លួន ដោយចង់ស្វែងយល់អំពី ឱកាសវិនិយោគលើវិស័យឱសថ និងសុខាភិបាលនៅកម្ពុជា។

លោក សេង ញ៉ក់ បានជម្រាបថា គណៈប្រតិភូដែលបានមកនាពេលនេះ ត្រូវបាននាំមកក្នុងគោលបំណងសិក្សាស្វែងយល់អំពីបរិបទ និងឱកាសវិនិយោគក្នុងវិស័យសុខាភិបាលនៅកម្ពុជា ជាផ្នែកមួយនៃការចូលរួមសហការរវាងរដ្ឋាភិបាលទាំងពីរ និងជួយលើកស្ទួយសេដ្ឋកិច្ចជាតិ។

ជាការឆ្លើយតប លោក ឈាង រ៉ា បានគូសបញ្ជាក់ថា ក្រសួងសុខាភិបាលសូមស្វាគមន៍ និងគាំទ្រជានិច្ចដល់កិច្ចសហប្រតិបត្តិការនានា និងការវិនិយោគក្នុងវិស័យសុខាភិបាល ដែលអនុវត្តដោយគោរពតាមនីតិវិធីច្បាប់ និងស្តង់ដារជាតិ និងអន្តរជាតិ ដើម្បីធានាបាននូវគុណភាពសេវាសុខាភិបាល និងសុវត្ថិភាពប្រជាពលរដ្ឋជាចម្បង៕

The post ក្រុមហ៊ុនមួយមកពីចិន សំឡឹងឃើញឱកាសវិនិយោគលើវិស័យឱសថ និងសុខាភិបាលនៅកម្ពុជា appeared first on .

លោកស្រី យក់ សម្បត្ដិ បានឱ្យដឹងថា ប្រទេសកម្ពុជាជាប្រទេសដំបូងគេនៅក្នុងតំបន់ ដែលបានដាក់ឱ្យប្រើប្រាស់ CAB-PrEP ។ នេះជាវិធីសាស្ត្រមួយ នៃយុទ្ធសាស្ត្របង្ការមេរោគអេដស៍ ដែលមានលក្ខណៈរួមបញ្ចូលគ្នា និងផ្តល់ជម្រើសច្រើនក្នុងការបង្ការ។ ឱសថ CAB-PrEP នេះ ត្រូវចាក់រៀងរាល់ពីរខែម្តង ផ្តល់នូវជម្រើសមួយងាយស្រួល មានឯកជនភាព បន្ថែមលើជម្រើស PrEP លេប ដែលមានប្រសិទ្ធភាពខ្ពស់រហូតដល់ ៩៥% ក្នុងការបង្ការមេរោគអេដស៍។

លោកស្រីបន្តថា ក្នុងជំហានដំបូង ក្រសួងសុខាភិបាលនឹងដាក់ឱ្យប្រើប្រាស់ថ្នាំ CAB-PrEP នៅរាជធានីភ្នំពេញ គឺមាននៅគ្លីនិកជាតិព្យាបាលជំងឺអេដស៍ សើស្បែក និងកាមរោគ ( ART-1 and ART-2), គ្លីនិកជាតិទីតាំងទី២ នៅទួលគោក (NCHADS-AHF ART-3 គឺមណ្ឌលសុខភាពទួលគោក និងសមាគមឈូកស (គ្លីនិកឈូកស)។

ទោះបីជាយ៉ាងណា ក្រសួងសុខាភិបាលក៏បានអំពាវឱ្យប្រជាជន ក្រុមប្រជាជនប្រឈមមុខខ្ពស់នឹងការឆ្លងមេរោគអេដស៍ យុវវ័យ ត្រូវប្រកាន់ភ្ជាប់នូវផ្នត់គំនិត និងឥរិយាបថវិជ្ជមាន ក្នុងការបង្ការការចម្លងមេរោគអេដស៍ ដើម្បីបង្ការខ្លួនយើង គ្រួសារយើង សហគមន៍យើង និងសង្គមជាតិយើងពីការរីករាល នៃមេរោគអេដស៍ ព្រោះថា «យើងអាចភ្លេចអេដស៍ តែអេដស៍ពុំភ្លេចយើងឡើយ»។

យោងតាមការប៉ាន់ប្រមាណការឆ្លងរាលដាលមេរោគអេដស៍ជាតិ នៅឆ្នាំ២០២៥ ដែលចេញផ្សាយដោយអាជ្ញាធរជាតិប្រយុទ្ធនឹងជំងឺអេដស៍ មជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ និងការិយាល័យអង្គការ UNAIDS ប្រចាំកម្ពុជា ឡាវ និងម៉ាឡេស៊ី៖ ចំនួនអ្នកឆ្លងមេរោគអេដស៍ថ្មីបានថយចុះមកត្រឹម ១,២០០នាក់ ក្នុងឆ្នាំ២០២៤ ដែលជាការថយចុះ៤៥% ពីកម្រិតមូលដ្ឋាននៅឆ្នាំ២០១០ និងជាការថយចុះជាង៩០% ចាប់តាំងពីការឆ្លងរីករាលដាលនៃមេរោគច្រើនបំផុតនៅចុងទសវត្សរ៍ឆ្នាំ១៩៩០៕

The post កម្ពុជាទទួលបានឱសថបង្កាមេរោគអេដស៍ថ្មី មានប្រសិទ្ធភាពខ្ពស់ដល់ទៅ៩៥%   appeared first on .

នៅក្នុងសិក្ខាសាលាសភាថ្នាក់តំបន់ ស្តីពី « បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតបបញ្ហាប្រឈម សម្រាប់ប្រជាជនសកម្ម និងយុវជន » កាលពីថ្ងៃទី៣១ខែមីនា ឆ្នាំ២០២៥ នៅវិមានរដ្ឋសភា លោករដ្ឋមន្ត្រី បានបញ្ជាក់ថា ៨០% នៃជំងឺបេះដូង ដាច់សរសៃឈាមខួរក្បាល ទឹកនោមផ្អែមប្រភេទ ២ និងលើសពី ៣០% នៃជំងឺមហារីកអាចចៀសវាងបាន ដោយការឈប់ពិសាបារី និងគ្រឿងស្រវឹង ការបរិភោគអាហារដែលមានសុខភាពល្អ និងការធ្វើលំហាត់ប្រាណ។

លោកបានបញ្ជាក់ទៀតថា «តាមការសិក្សារបស់អង្គការសុខភាពពិភពលោក ជំងឺមិនឆ្លងមានតម្លៃស្មើនឹង ៦,៦% នៃផលិតផល ក្នុងស្រុកសរុបរបស់កម្ពុជា និងបណ្តាលឱ្យខាតបង់ ១,៥ ពាន់លានដុល្លារអាមេរិក ក្នុងមួយឆ្នាំ។ នេះជាការកើនឡើងនៃបន្ទុកហិរញ្ញវត្ថុបណ្តាលមកពីការវិវត្តប្រជាសាស្ត្រ នៅបណ្តាឆ្នាំខាងមុខ»។ ប្រទេសអភិវឌ្ឍន៍បានជួបប្រទះនឹងនិន្នាការនេះរួចហើយ។ ក្នុងរយៈពេល ៣០ឆ្នាំចុងក្រោយនេះ ពួកគេត្រូវចំណាយ ៣០% នៃផលកំណើនដើម្បីប្រយុទ្ធប្រឆាំងនឹងជំងឺទាំងនេះ និងផលប៉ះពាល់នៃភាពចាស់ក្នុងសង្គម។ នេះគឺជាហេតុ ផលមួយដែលសហគមន៍អន្តរជាតិបានកំណត់ជាគោលដៅសុខភាពមួយ ក្នុងចំណោមគោលដៅអភិវឌ្ឍន៍ប្រកបដោយ ចីរភាព គឺកាត់បន្ថយការស្លាប់មុនអាយុបណ្តាលមកពីជំងឺមិនឆ្លងចំនួន ៣០% នៅឆ្នាំ២០៣០។

លោករដ្ឋមន្ត្រីក្រសួងសុខាភិបាល បានឱ្យដឹងបន្ថែមថា ក្នុងប៉ុន្មានឆ្នាំខាងមុខនេះ ប្រទេសកម្ពុជានឹងប្រឈមមុខនឹងបញ្ហាសុខភាព-សង្គមពីរ។ ម៉្យាង ការចំណាយលើការ ព្យាបាលនឹងកើនឡើង ពីព្រោះមនុស្សចាស់កាន់តែច្រើននឹងកើតជំងឺចម្រុះច្រើនមុខ និងជំងឺរ៉ាំរ៉ៃ ដែលការថែទាំមាន រយៈពេលវែង និងចំណាយច្រើន។ ម៉្យាងទៀត មូលដ្ឋានធនធានសម្រាប់ការផ្តល់ហិរញ្ញប្បទាននឹងកើនឡើងតិចតួច ដោយសារនឹងមានអត្រាយុវជនសកម្មតិចជាងមុន ដែលអាចចូលរួមចំណែកក្នុងការផ្តល់ហិរញ្ញប្បទានដល់ការចំណាយ លើសុខភាព តាមរយៈពន្ធ និងវិភាគទានសន្តិសុខសង្គម៕

The post ជំងឺមិនឆ្លង បណ្តាលឱ្យមនុស្សស្លាប់ប្រមាណ ៦៤% នៅកម្ពុជា appeared first on .

វេទិកានេះ ដឹកនាំដោយ លោក ពុយ គា ប្រធានក្លឹបអ្នកកាសែតកម្ពុជា និងលោក ឈាង រ៉ា រដ្ឋមន្ត្រីក្រសួងសុខភិបាល ព្រមទាំងមានការចូលរួមពីអ្នកសារព័ត៌មានជាច្រើនរូបផងដែរ។

ថ្លែងក្នុងវេទិកានោះ លោក ឈាង រ៉ា រដ្ឋមន្រ្តីក្រសួងសុខាភិបាល បានឱ្យដឹងថា លទ្ធផលការងារក្នុងរយៈពេលមួយឆ្នាំរបស់ក្រសួងសុខាភិបាល ចាប់តាំងពីដើមនីតិកាលទី៧ នៃរដ្ឋសភា សកម្មភាពរបស់ក្រសួងត្រូវបានអនុវត្តតាមអ័ក្សបី៖ ១. ការឆ្លើយតបនឹងតម្រូវការចំពោះមុខរបស់ប្រជាជន តាមរយៈការពង្រីកសេវាសុខភាពទៅដល់ប្រជាពលរដ្ឋដោយផ្ទាល់។ នាពេលបច្ចុប្បន្ននេះ ប្រជាពលរដ្ឋប្រមាណ៤៣% ទទួលបានប័ណ្ណក្រីក្រ និងបសស ដែលមានសមាជិក ២ ៤៥៣ ០០០នាក់នៅចុងខែកក្កដា ហើយមានមូលដ្ឋានសុខាភិបាលបន្ថែមចំនួន ១ ៥៧៣ បានចូលរួម។

ទី២. ការកសាងយុទ្ធសាស្ត្រសុខាភិបាលតាមវិស័យ និងការចូលរួមក្នុងការរៀបចំយុទ្ធសាស្ត្រអន្តរក្រសួង និងទី៣. ការពង្រឹងមធ្យោបាយឆ្លើយតបទៅនឹងរាល់បញ្ហាប្រឈមដំណាលគ្នា ពោលគឺការកើតមានទន្ទឹមគ្នារវាងជំងឺមិនឆ្លង និងជំងឺរ៉ាំរ៉ៃ ដែលកំពុងតែកើនឡើងយ៉ាងខ្លាំង។

ជាមួយគ្នានោះ លោក ឈាង រ៉ា បានគូសបញ្ជាក់ថា វឌ្ឍនភាពដែលត្រូវសម្រេចបានលើប្រធានបទផ្សេងទៀត ដូចជាការឈានឆ្អោះទៅរកការគ្របដណ្តប់សុខភាពជាសាកល ដែលត្រូវការកើនឡើងពី៥១% ទៅ៨០% ក្នុងឆ្នាំ២០៣៥ ការចាត់តាំងបុគ្គលិកសុខាភិបាលនៅតំបន់ជនបទដាច់ស្រយាល ការពង្រឹងគោលនយោបាយបង្ការ ការពង្រឹងការប្រយុទ្ធប្រឆាំងជំងឺមហារីកជាដើម។

សូមជម្រាបថា រាជរដ្ឋាភិបាលក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានដាក់ឱ្យអនុវត្តនូវយុទ្ធសាស្ត្របញ្ចកោណដំណាក់កាលទី១ និងកម្មវិធីគោលនយោបាយអាទិភាពចំនួន៦ ក្នុងនោះអាទិភាពទី១ គឺ « ការពង្រីកសេវាថែទាំសុខភាពឆ្ពោះទៅកាន់ការគ្របដណ្តប់សុខភាពជាសកល» តាមរយៈការពង្រីកការគ្របដណ្តប់៖ (១) កម្មវិធីមូលនិធិសមធម៌សម្រាប់គ្រួសារងាយរងហានិភ័យ និង (២) របបថែទាំសុខភាពនៃបេឡាជាតិសន្តិសុខសង្គម (ប.ស.ស) សម្រាប់សមាជិកគ្រួសារ និងអ្នកនៅក្នុងបន្ទុកសមាជិក ប.ស.ស តាមគោលការណ៍ស្ម័គ្រចិត្ត រួមជាមួយនឹងការអនុវត្តវិធានការគន្លឹះក្នុងវិស័យសុខាភិបាល ដែលផ្តោតលើការលើកកម្ពស់គុណភាពសេវាសុខាភិបាល និងការពង្រឹងសមត្ថភាពផ្តល់សេវាសុខភាពបឋមនៅមូលដ្ឋាន៕

The post ក្លិបអ្នកកាសែតកម្ពុជា សហការជាមួយក្រសួងសុខាភិបាល រៀបចំវេទិកាបង្ហាញពីស្ថានភាពនៃវិស័យសុខាភិបាលកម្ពុជា appeared first on .

ឧត្តមសេនីយ៍ឯក វេជ្ជបណ្ឌិត លី សុវណ្ណ អគ្គនាយករង អគ្គនាយកដ្ឋានភស្តុភារ ហិរញ្ញវត្ថុ ក្រសួងការពាជាតិ និងជានាយកមន្ទីរពេទ្យព្រះកេតុមាលា បានឱ្យដឹងថា អគារនេះមានកម្ពស់៧ជាន់ ស្មើនឹង ៣១,៨៥ម៉ែត្រ ទទឹង១៥,៦ម៉ែត្រ និងបណ្ដោយ ៣៦,៩ម៉េត្រ អាចដាក់គ្រែព្យាបាលអ្នកជំងឺបានចំនួន ៧៣គ្រែ បន្ទប់បុគ្គលិកបំពេញការងារចំនួន១៥បន្ទប់។ អគារសង្គ្រោះតំបូងថ្មីនេះ ត្រូវបានជួយឧបត្ថម្ភពីសម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ អតីតរដ្ឋមន្រ្តីក្រសួងការពារជាតិ ដែលបញ្ចុះសិលាសាងសង់កាលពីនៅថ្ងៃទី២៥ ខែកុម្ភៈ ឆ្នាំ២០២២ និងបានបញ្ចប់ការសាងសងនៅថ្ងៃទី៣០ ខែមិថុនា ឆ្នាំ២០២៣។

ថ្លែងក្នុងពិធីសម្ពោធដាក់ឲ្យប្រើប្រាស់ជាផ្លូវការ នាយឧត្តមសេនីយ៍ ទៀ សីហា បានគូសបញ្ជាក់ថា សម្តេចពិជ័យសេនា ទៀ បាញ់ មានចក្ខុវិស័យវែងឆ្ងាយប្រកបដោយគតិបណ្ឌិត ក្នុងការធ្វើទំនើបកម្ម មន្ទីរពេទ្យព្រះកេតុមាលា ឱ្យមានការអភិវឌ្ឍចាប់តាំងពីឆ្នាំ១៩៨៨ រហូតមានការរីកចម្រើនឥតឈប់ឈរ។

លោកបន្តថា «អគារសម្តេចពិជ័យសេនា ទៀ បាញ់ ១៧៧» ដែលសម្ពោធដាក់ឱ្យប្រើប្រាស់ជាផ្លូវការនេះ គឺជាសមិទ្ធផលមួយក្នុងចំណោមសមិទ្ធផលជាច្រើនដែលប្រសូត្រចេញពីកិច្ចខិតខំប្រឹងប្រែង និងការលះបង់គ្រប់ែបបយ៉ាងរបស់ថ្នាក់ដឹកនាំ នាយទាហាន នាយទាហានរង និងពលទាហាននៃមន្ទីរពេទ្យព្រះកេតុមាលា ដែលបានឆ្លុះបញ្ចាំងឱ្យឃើញពីផលវិជ្ជមាននៃដំណើរឆ្ពោះទៅមុខក្នុងការអភិវឌ្ឍហេដ្ឋារចនាសម្ព័ន្ធវិស័យសុខាភិបាល របស់កម្ពុជា ជាពិសេសការជំរុញវិស័យសុខាភិបាលក្នុងកងយោធពលខេមរភូមិន្ទផងដែរ។

នាយឧត្តមសេនីយ៍ ទៀ សីហា បានគូសបញ្ជាក់បន្ថែមថា មន្ទីរពេទ្យព្រះកេតុមាលា បានរួមចំណែកជាមួយរាជរដ្ឋាភិបាលកម្ពុជា លើផ្នែកសុខាភិបាល ចាប់តាំងពីឆ្នាំ១៩៧៩ រហូតមកបច្ចុប្បន្នក្នុងការថែទាំ ព្យាបាលជំងឺជូននាយទាហាន នាយទាហានរង និងពលទាហាន ព្រមទាំងក្រុមគ្រួសារកងទ័ព។ តាមរយៈនយោបាយឈ្នះឈ្នះ របស់សម្តេចតេជោ ហ៊ុន សែន ក្នុងរយៈពេលជិត២៥ឆ្នាំមកនេះ បានធ្វើឱ្យប្រទេសកម្ពុជា មានសន្តិភាព និងការឯកភាពជាតិពេញលេញ ធ្វើឱ្យកម្ពុជា មានការរីកចម្រើនលើគ្រប់វិស័យក្នុងនោះបានធ្វើឱ្យមន្ទីរពេទ្យព្រះកេតុមាលា មានលទ្ធភាពពង្រឹងសមទ្ធភាពទាំងហេដ្ឋារចនាសម្ព័ន្ធនានា និងការលើកកម្ពស់សមត្ថភាពក្រុមវេជ្ជបណ្ឌិតជាដើម៕

The post មន្ទីរពេទ្យព្រះកេតុមាលា សម្ពោធឲ្យប្រើប្រាស់នូវអគារសង្គ្រោះបឋមថ្មី កម្ពស់៣១,៨៥ម៉ែត្រ appeared first on .