ស្ថានទូតអាល្លឺម៉ង់ បានលើកឡើងពីសាររបស់លោកបណ្ឌិត Gidon Windecker អនុប្រធានបេសកកម្មទទួលបន្ទុកកិច្ចសហប្រតិបត្តិការអភិវឌ្ឍន៍ ដោយបានបង្ហាញយ៉ាងច្បាស់ពីចំណុចសំខាន់នៃសិក្ខាសាលាផ្ទៀងផ្ទាត់លទ្ធផលស្តីពី «ការវាយតម្លៃហិរញ្ញប្បទានខ្សែច្រវាក់តម្លៃគ្រាប់ស្វាយចន្ទីគ្រប់ជ្រុងជ្រោយ»។ដោយក្នុងនោះ លោកបានបញ្ជាក់បន្តថា បញ្ហាប្រឈមបន្ទាប់ មិនមែនគ្រាន់តែជាការផលិតឱ្យបានច្រើនជាងមុនប៉ុណ្ណោះទេ ប៉ុន្តែគឺការរក្សាតម្លៃបន្ថែមឱ្យបានកាន់តែច្រើននៅក្នុងប្រទេសកម្ពុជា»។

ស្ថានទូត បន្ថែមថា សិក្ខាសាលាផ្ទៀងផ្ទាត់លទ្ធផលស្តីពី «ការវាយតម្លៃហិរញ្ញប្បទានខ្សែច្រវាក់តម្លៃគ្រាប់ស្វាយចន្ទីគ្រប់ជ្រុងជ្រោយនោះដែរ គឺរៀបចំឡើងដោយក្រសួងសេដ្ឋកិច្ច និងហិរញ្ញវត្ថុ និងបានផ្តល់ជាវេទិកាដ៏សំខាន់មួយសម្រាប់ស្ថាប័នរដ្ឋាភិបាល ស្ថាប័នហិរញ្ញវត្ថុ អាជីវកម្មពាក់ព័ន្ធនឹងគ្រាប់ស្វាយចន្ទី និងដៃគូអភិវឌ្ឍន៍ ចូលរួមពិភាក្សា ផ្លាស់ប្តូរមតិយោបល់ប្រកបដោយភាពសកម្ម និងបើកចំហ។

តាមរយៈ កិច្ចពិភាក្សានៅក្នុងសិក្ខាសាលាខាងលើ ក៏បានលើកឡើងពីសារៈសំខាន់នៃការពង្រឹងកិច្ចសម្របសម្រួល និងការចែករំលែកព័ត៌មានរវាងភាគីពាក់ព័ន្ធ ដើម្បីលើកកម្ពស់ចីរភាព និងសមត្ថភាពប្រកួតប្រជែងរបស់វិស័យស្វាយចន្ទីកម្ពុជា។ នាពេលនោះ ប្រទេសអាល្លឺម៉ង់ និងសហភាពអឺរ៉ុប តាមរយៈគម្រោង EU-German CAPSAFE គឺមានសេចក្តីសោមនស្សរីករាយក្នុងការគាំទ្រដល់កិច្ចពិភាក្សាដ៏មានសារៈសំខាន់នេះ និងការបន្តកិច្ចសហប្រតិបត្តិការ ដើម្បីពង្រឹងការកែច្នៃគ្រាប់ស្វាយចន្ទីក្នុងស្រុក បង្កើតការងារដែលកាន់តែប្រសើរជាងមុន និងរក្សាតម្លៃបន្ថែមឱ្យបានកាន់តែច្រើននៅក្នុងប្រទេសកម្ពុជា។

សូមជម្រាបដែរថា ស្វាយចន្ទីជាដំណាំឧស្សាហកម្មដែលមានសារៈសំខាន់សម្រាប់កំណើនសេដ្ឋកិច្ចជាតិ។ បើគិតត្រឹមរយៈពេល៤ខែ ដើមឆ្នាំ២០២៦នេះ កម្ពុជាបាននាំចេញគ្រាប់ស្វាយចន្ទីឆៅ​​ប្រមាណ ៨៣១ ១៧៩ តោន ទៅកាន់ប្រទេសវៀតណាម ​ដោយ​រកចំណូលបានប្រមាណ ១ ៤៤០ លានដុល្លារ ​កើនឡើង ២៤.១៧% ធៀបនឹងឆ្នាំមុន។ នេះបើ​យោងតាមទិន្នន័យនាំចេញក្រៅផ្លូវការ ដែលទទួលបានពីសមាគមស្វាយចន្ទីកម្ពុជា៕អត្ថបទ៖ហ្សាលីន

The post អាល្លឺម៉ង់ និងសហភាពអឺរ៉ុប និងបន្តកិច្ចសហប្រតិបត្តិការជួយពង្រឹងការកែច្នៃគ្រាប់ស្វាយចន្ទីនៅកម្ពុជា appeared first on .

យោងតាមជំនួបរវាង លោក សរ ចិត្រា អគ្គលេខាធិការនៃក្រសួងកសិកម្ម ជាមួយគណៈប្រតិភូក្រុមហ៊ុន Inoue Calcium Corporation របស់ប្រទេសជប៉ុន កាលពីថ្ងៃទី៩ កញ្ញា បានឱ្យដឹងថា គណៈប្រតិភូជប៉ុននឹងជួយកៀរគរវិនិយោគិនបរទេសឱ្យមកវិនិយោគលើវិស័យកសិកម្មនៅកម្ពុជាឱ្យកាន់តែច្រើន ដោយផ្តោតលើការកែច្នៃកសិផលក្នុងស្រុក ជាពិសេសលើដំណាំស្វាយចន្ទី ពីព្រោះការជំរុញការវិនិយោគលើការកែច្នៃនេះនឹងជួយបង្កើតតម្លៃបន្ថែមខ្ពស់សម្រាប់ផលិតផលកសិកម្ម និងជួយឱ្យកសិករអាចលក់កសិផលបានក្នុងតម្លៃខ្ពស់ជាងមុននៅលើទីផ្សារ។

ជាមួយគ្នានេះ គណៈប្រតិភូជប៉ុនក៏បានដាក់ទុនវិនិយោគរួមគ្នាជាមួយក្រុមហ៊ុនឯកជនមួយនៅស្រុកសៀមបូក ខេត្តស្ទឹងត្រែង ដោយមានផែនការបញ្ជាទិញគ្រាប់ស្វាយចន្ទីពីកម្ពុជា ប្រមាណពី​ ២ ០០០​តោន ទៅ ៣ ០០០ ​តោនក្នុងមួយឆ្នាំ សម្រាប់យកមកកែច្នៃតាមស្តង់ដារជប៉ុនសម្រាប់នាំចេញទៅប្រទេសជប៉ុនជាជំហានដំបូង ដោយផ្តល់តម្លៃទិញខ្ពស់ជាងតម្លៃដែលកសិករលក់ទៅឱ្យប្រទេសជិតខាងនាពេលកន្លងមក។

បន្ថែមពីនេះ គណៈប្រតិភូជប៉ុនមានគម្រោងអនុញ្ញាតឱ្យនិស្សិតផ្នែកកសិកម្មរបស់កម្ពុជា ទៅធ្វើទស្សនកិច្ចនៅប្រទេសជប៉ុន ដើម្បីផ្លាស់ប្តូរ និងចែករំលែកបទពិសោធន៍រវាងគ្នានិងគ្នា​​ ព្រមទាំងមានគម្រោងសហការ​​ គឺសាកលវិទ្យាល័យ Kochi University of Technology​ នៃប្រទេសជប៉ុនត្រៀមចុះអនុស្សរណៈនៃការយោគយល់គ្នាជាមួយសាកលវិទ្យាល័យភូមិន្ទកសិកម្ម និងពិចារណាស្វែងរកកិច្ចសហប្រតិបត្តិការផ្សេងទៀតរវាងភាគីជប៉ុន​ និងបណ្ឌិត្យសភាវិទ្យាសាស្រ្តកសិកម្មកម្ពុជា នាពេលអនាគត៕

The post ជប៉ុន ប្រកាសទិញគ្រាប់ស្វាយចន្ទីពីកម្ពុជា ប្រមាណ២ពាន់​តោន ទៅ៣ពាន់​តោន ក្នុងមួយឆ្នាំ កែច្នៃនាំចេញទៅប្រទេសជប៉ុន appeared first on .

ស្ថានទូតអូស្រ្តាលី បានបន្តថា កម្ពុជាគឺជាប្រទេសផលិតគ្រាប់ស្វាយចន្ទីឆៅធំជាងគេលំដាប់ទីពីរនៅលើពិភពលោក ប៉ុន្តែមានតែ ៥ ភាគរយប៉ុណ្ណោះនៃទិន្នផលសរុបដែលត្រូវបានកែច្នៃនៅក្នុងប្រទេស។ការខ្វះខាតសមត្ថភាពកែច្នៃក្នុងស្រុកនេះ ធ្វើឱ្យកម្ពុជាបាត់បង់ចំណូលសក្តានុពលជាង ១២៥ លានដុល្លារអាមេរិកក្នុងមួយឆ្នាំ ខណៈដែលកសិករ និងពាណិជ្ជករនៅតែប្រឈមនឹងហានិភ័យពីការប្រែប្រួលតម្លៃទីផ្សារ។

ហេតុនេះហើយ ទើបអូស្ត្រាលីកំពុងសហការជាមួយក្រុមហ៊ុន Olam Food Ingredients (ofi) ដែលជាក្រុមហ៊ុនកសិពាណិជ្ជកម្មសកល មានចំណែកពី ២០ ទៅ ២៥ ភាគរយនៃទីផ្សារគ្រាប់ស្វាយចន្ទីពិភពលោក ដើម្បីបង្កើនសមត្ថភាពកែច្នៃគ្រាប់ស្វាយចន្ទីចំនួន ៨០ តោនក្នុងមួយថ្ងៃ និងជំរុញការវិនិយោគរហូតដល់ ១០ លានដុល្លារអាមេរិកក្នុងវិស័យកែច្នៃគ្រាប់ស្វាយចន្ទីនៅកម្ពុជា។នេះបើតាមការបញ្ជាក់បន្ថែមពីស្ថានទូតអូស្រ្តាលី។

ជាថ្មីម្តីម្តងទៀត បើតាមស្ថានទូតអូស្ត្រាលី ក៏បន្តប្តេជ្ញាទាក់ទាញការវិនិយោគប្រកបដោយគុណភាព ដែលបង្កើតការងារ និងគាំទ្រដល់អាជីវកម្ម ដើម្បីជួយកម្ពុជាកសាងសេដ្ឋកិច្ចរឹងមាំ និងវិបុលភាពផងដែរ៕ អត្ថបទ៖ហ្សាលីន

The post អូស្ត្រាលី ជំរុញការវិនិយោគរហូត ១០ លានដុល្លារ ជួយពង្រឹងសក្តានុពលនៃការកែច្នៃគ្រាប់ស្វាយចន្ទីនៅកម្ពុជា appeared first on .

ការបង្ហាញពីបំណងរបស់ក្រុមហ៊ុន ក្នុងឱកាស លោក រស់ សូដែន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ដឹកនាំក្រុមការងារនៃនាយកដ្ឋានកសិឧស្សាហកម្ម ទៅទស្សនកិច្ចនៅប្រទេសចិន ចាប់ពីថ្ងៃទី២២-២៥ ខែកក្កដា ឆ្នាំ២០២៦ ដើម្បីជំរុញ និងស្រូបទាញអ្នកវិនិយោគចិនលើការកែច្នៃនៃវិស័យឧស្សាហកម្មស្វាយចន្ទីកម្ពុជាឱ្យកាន់តែរីកចម្រើន។

ជាលទ្ធផលក្រោយពីទស្សនកិច្ច និងពិភាក្សាគ្នា ភាគីក្រុមហ៊ុន និងប្រតិភូកម្ពុជា បានឯកភាពគ្នា ដោយក្រុមហ៊ុនមានបំណងក្នុងការមកវិនិយោគបង្កើត រោងចក្រកែច្នៃគ្រាប់ស្វាយចន្ទីតែម្ដងនៅខេត្តក្រចេះ។ លើសពីនេះ ក្រុមហ៊ុន នឹងលើកកម្ពស់ស្វាយចន្ទីកម្ពុជា ជាម៉ាកស្វាយចន្ទីសរីរាង្គតាមរយៈការប្រមូលទិញគ្រាប់ស្វាយចន្ទីកម្ពុជាដោយផ្ទាល់យកមកកែច្នៃនៅប្រទេសចិន ដើម្បីនាំចេញ ទៅកាន់ទីផ្សារអឺរ៉ុប ជប៉ុន និងទីផ្សារក្នុងស្រុកតែម្ដង។

បន្ថែមពីលើនេះ ក្រុមហ៊ុននឹងជួលក្រុមហ៊ុនទី៣ ដើម្បីទៅប្រទេសកម្ពុជាធ្វើការចុះសិក្សា ពិនិត្យ និងវាយតម្លៃអំពីអនុលោមភាពស្វាយចន្ទីសរីរាង្គ (ទាំងស្វាយចន្ទីពូជ M23 និងពូជប្រពៃណី) នៅតាមបណ្ដាខេត្តមួយចំនួនដូចជាខេត្តរតនគីរី, ស្ទឹងត្រែង, ក្រចេះ, កំពង់ចាម, កំពង់ធំ, សៀមរាប និងខេត្តព្រះវិហារជាដើម នៅអំឡុងខែសីហា ឆ្នាំ២០២៦ ខាងមុខឆាប់ៗនេះ។

ប្រតិភូកម្ពុជា បានគាំទ្រដំណើរទស្សនកិច្ចរបស់ក្រុមហ៊ុនចិនមកកាន់ប្រទេសកម្ពុជាក្នុងគោលបំណងមកធ្វើការសិក្សា និងវាយតម្លៃលើស្វាយចន្ទីសរីរាង្គនៅកម្ពុជា និងលើកសំណើនេះជូនថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសុំគោលការណ៍ជូននាយកដ្ឋានកសិឧស្សាហកម្មចូលរួមសម្របសម្រួលឱ្យបានសម្រេចជោគជ័យតាមផែនការ។

សូមជម្រាបដែរថា ដំណាំស្វាយចន្ទី គឺជាកសិផលដ៏សំខាន់ និងជាដំណាំយុទ្ធសាស្ត្រមួយរបស់កម្ពុជា។កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក៕

The post ក្រុមហ៊ុនចិន មានបំណងបង្កើតរោងចក្រកែច្នៃគ្រាប់ស្វាយចន្ទី នៅខេត្តក្រចេះ appeared first on .

ជុំវិញរឿងនេះ លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់បណ្តាញសារព័ត៌មានក្នុងស្រុកថា គ្រាប់ស្វាយចន្ទីឆៅប្រមាណ ១ ០៣០ ០០០ តោន ត្រូវបាននាំចេញទៅកាន់ប្រទេសវៀតណាម ដោយរកផ្តល់ចំណូលបានប្រមាណ ១ ៧៥១លានដុល្លារអាម៉េរិក កើនឡើង ២៨.៩% បើធៀបនឹងរយៈពេលដូចគ្នាកាលពីឆ្នាំមុន។ចំពោះ តម្លៃស្វាយចន្ទីនៅឆ្នាំនេះក៏ល្អប្រសើរជាងឆ្នាំមុនផងដែរ ជាក់ស្តែង ក្នុងខែកក្កដា នេះ គ្រាប់ស្វាយចន្ទីស្រស់មានតម្លៃ ៨ ២០០រៀលក្នុងមួយគីឡូក្រាម ខណៈកាលពីឆ្នាំ២០២៥ មានតម្លៃត្រឹមតែ ៧ ៥០០រៀលប៉ុណ្ណោះ។

សូមជម្រាបដែរថា ដំណាំស្វាយចន្ទី គឺជាកសិផលដ៏សំខាន់ និងជាដំណាំយុទ្ធសាស្ត្រមួយរបស់កម្ពុជា។ កម្ពុជាមានផ្ទៃដីដាំដុះដំណាំស្វាយចន្ទីប្រមាណជាង ៥៨ម៉ឺនហិកតា នៅទូទាំងប្រទេសគិតត្រឹមឆ្នាំ២០២៤ ដែលអាចផ្ដល់ទិន្នផលជាមធ្យមប្រមាណ ១,៥តោនក្នុងមួយហិកតា។

ផ្ទៃដីសរុបដែលសមស្របអាចដាំដុះដំណាំស្វាយចន្ទីមានប្រមាណ ១,២៤លានហិកតា ដែលធ្វើឱ្យកម្ពុជាជាប់ចំណាត់ថ្នាក់លេខ៣ បើធៀបនឹងប្រទេសដាំដុះដំណាំស្វាយចន្ទីនៅលើពិភពលោក។ ជារួម ដំណាំស្វាយចន្ទីក៏ជាផ្នែកមួយដែលជួយជំរុញខឿនសេដ្ឋកិច្ចជាតិឱ្យរីកចម្រើនផងដែរ៕ អត្ថបទ៖ហ្សាលីន

The post ឆមាសទី១ឆ្នាំ២០២៦៖កម្ពុជា រកចំណូលបានជាង ១ ៧០០លានដុល្លារ ពីការនាំចេញគ្រាប់ស្វាយចន្ទីឆៅ appeared first on .

នេះបើយោងតាមជំនួបពិភាក្សាការងាររវាងលោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ (EPTF) ជាមួយលោក Jiang Xiaofei នាយកនៃគណៈកម្មាធិការការងារពង្រីកសហគ្រាសនៅក្រៅប្រទេស នៃវិទ្យាស្ថានចិនសម្រាប់យុទ្ធសាស្រ្តនវានុវត្តន៍ និងអភិវឌ្ឍន៍ (China Institute for Innovation and Development Strategy – CIIDS) ដឹកនាំគណៈប្រតិភូក្រុមហ៊ុន China Bonded Port Group Co., Ltd. និងតំណាងក្រុមហ៊ុន Men Sarun MDR Co., Ltd. កាលថ្ងៃទី១១ ខែមីនា ឆ្នាំ២០២៦។

ជំនួបនេះត្រូវបានរៀបចំឡើងក្នុងគោលបំណងពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគទ្វេភាគីកម្ពុជា-ចិន ព្រមទាំងស្វែងយល់ពីសក្តានុពលក្នុងការជំរុញការនាំចេញកសិផលកម្ពុជា។

នាឱកាសនោះ លោករដ្ឋលេខាធិការ បានស្វាគមន៍និងបានផ្លាស់ប្តូរយោបល់យ៉ាងផុសផុលលើការគាំទ្រដល់ការធ្វើឱ្យប្រសើរឡើងនូវវិស័យកសិ-ឧស្សាហកម្ម និងខ្សែចង្វាក់តម្លៃ ដែលជាចលករជំរុញដល់ការអភិវឌ្ឍសេដ្ឋកិច្ចកម្ពុជាប្រកបដោយចីរភាព។

នៅក្នុងជំនួបពិភាក្សាខាងលើ លោក ក៏បានអញ្ជើញជាសាក្សី ក្នុងពិធីចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពី “កិច្ចសន្យាផ្គត់ផ្គង់គ្រាប់ស្វាយចន្ទីកម្ពុជា” រវាងក្រុមហ៊ុន China Bonded Port Group Co., Ltd. និងក្រុមហ៊ុន Men Sarun MDR Co., Ltd.។

តាមរយៈកិច្ចព្រមព្រៀងនេះ កម្ពុជានឹងចាប់ផ្តើមនាំចេញគ្រាប់ស្វាយចន្ទីទាំងសំបក (ប្រភេទ M23) ក្នុងជំហានដំបូងដែលមានទំហំទឹកប្រាក់ប្រមាណ ៣៥លានដុល្លារសហរដ្ឋអាម៉េរិក ដោយភាគីទាំងពីរមានចក្ខុវិស័យយុទ្ធសាស្ត្រក្នុងការជំរុញទំហំនាំចេញបន្ថែមទៀត ដែលរំពឹងថានឹងអាចកើនឡើងដល់សក្តានុពលទឹកប្រាក់ប្រមាណ ៤០០លានដុល្លារសហរដ្ឋអាម៉េរិក នាពេលអនាគត។

គួរបញ្ជាក់ផងដែរថា សមិទ្ធផលនេះ គឺជាលទ្ធផលនៃកិច្ចខិតខំប្រឹងប្រែងសម្របសម្រួល និងផ្គូរផ្គងយ៉ាងសកម្មរបស់ ក្រុមការងារជំរុញការនាំចេញ (EPTF) នៃក្រសួងពាណិជ្ជកម្ម ដែលតែងតែដើរតួនាទីជាតួអង្គស្នូលក្នុងការផ្សារភ្ជាប់ទំនាក់ទំនងរវាងអ្នកនាំចេញកម្ពុជា ជាមួយអ្នកបញ្ជាទិញសក្តានុពលអន្តរជាតិ។ ទន្ទឹមនឹងនេះ កិច្ចសហប្រតិបត្តិការដ៏រឹងមាំរវាងក្រុមហ៊ុនទាំងពីរ មិនត្រឹមតែធានាបាននូវកំណើននៃការនាំចេញស្វាយចន្ទីទៅកាន់ទីផ្សារប្រទេសចិនជាបន្តបន្ទាប់ប៉ុណ្ណោះទេ ប៉ុន្តែថែមទាំងជាសញ្ញាវិជ្ជមានដ៏ធំក្នុងការទាក់ទាញវិនិយោគិនចិន ឱ្យមកបណ្តាក់ទុននៅកម្ពុជា ដើម្បីពង្រីកវិសាលភាពនៃការនាំចេញកសិផលជាតិចូលទៅកាន់ទីផ្សារអន្តរជាតិឱ្យកាន់តែទូលំទូលាយបន្ថែមទៀត៕ អត្ថបទ៖ ហ្សាលីន

The post កម្ពុជា នឹងនាំចេញគ្រាប់ស្វាយចន្ទីសំបក (ប្រភេទ M23) ក្នុងតម្លៃប្រមាណ ៣៥ លានដុល្លារឆាប់ៗនេះ appeared first on .

នៅក្នុងជំនួបនោះ លោក តូច ប៊ុនហួរ បានសម្តែងការស្វាគមន៍ដល់គណៈប្រតិភូឥណ្ឌា ដែលមានបំណងពង្រឹងកិច្ចសហប្រតិបត្តិការទ្វេភាគី និងស្វែងរកឱកាសវិនិយោគផលិតផលសក្តានុពលកម្ពុជា ជាក់ស្តែងការចាប់អារម្មណ៍ និងចង់បង្កើនការនាំចូលគ្រាប់ស្វាយចន្ទីស្រស់ ទៅកាន់ទីផ្សារឥណ្ឌា៖ ពង្រឹងពង្រីកការវិនិយោគលើដំណាំស្វាយចន្ទី ការកែច្នៃ និងការនាំចេញ ដោយបង្កើតរោងចក្រ សម្រាប់កែច្នៃគ្រាប់ស្វាយចន្ទីនៅខេត្តកំពង់ធំ និងពង្រីកការវិនិយោគលើវិស័យកសិកម្មដែលមានសក្តានុពល ដើម្បីបង្កើនកសិ-ពាណិជ្ជកម្មឱ្យកាន់តែមានទំហំកើនឡើងថែមទៀត រវាងប្រទេសទាំងពីរ។

លោកបានបញ្ជាក់ជូនគណ:ប្រតិភូធុរកិច្ចថា ប្រទេសកម្ពុជាបើកទូលាយស្វាគមន៍ដល់អ្នកវិនិយោគទាំងឡាយណា ដែលមានបំណងចង់បង្កើតរោងចក្រកែច្នៃគ្រាប់ស្វាយចន្ទី និងនាំចេញទៅកាន់ទីផ្សារអន្តរជាតិ។ កម្ពុជា ជាប្រទេសផលិតគ្រាប់ស្វាយច្រើន ដែលមានប្រភេទពូជល្អ គុណភាពខ្ពស់ នឹងរសជាតិឆ្ងាញ់ ដូចជាប្រភេទពូជ៖ M23 M10 H09 និង IM4។

គួរបញ្ជាក់ថា បន្ទាប់ពីកិច្ចពិភាក្សាខាងលើ គណៈប្រតិភូឥណ្ឌា នឹងបន្តជួបជាមួយវិស័យឯកជនកម្ពុជា និងធ្វើទស្សនកិច្ចឆ្ពោះទៅខេត្តកំពង់ធំ ដែលជាតំបន់សក្តានុពលស្វាយចន្ទី សំដៅបង្កើនការវិនិយោគលើកែថ្នៃគ្រាប់ស្វាយចន្ទីកម្ពុជា មិនត្រឹមតែប៉ុណ្ណោះជំរុញការពង្រឹងនិងពង្រីកកិច្ចសហប្រតិបត្តិរវាងប្រទេសទាំងពីរ។

កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក។

កម្ពុជាគឺជាប្រទេសផលិតគ្រាប់ស្វាយចន្ទីធំជាងគេទី២ របស់ពិភពលោក ប្រមាណ១៧% នៃចំណែកផលិតកម្មពិភពលោក​ បន្ទាប់ពីកូតឌីវ័រ ប្រមាណ២៤% នៃចំណែកផលិតកម្មពិភពលោកក្នុងឆ្នាំ២០២៤៕

The post ឥណ្ឌា មានបំណងចង់បង្កើនការនាំចូលគ្រាប់ស្វាយចន្ទីស្រស់កម្ពុជាទៅកាន់ទីផ្សាររបស់ខ្លួន appeared first on .

ក្រសួងកសិកម្ម​ រុក្ខាប្រមាញ់​ និងនេសាទ​ ចាត់ទុកថា​ ការនាំចេញគ្រាប់ស្វាយចន្ទីកម្ពុជាលើកដំបូងទៅកាន់ប្រទេសអ៊ីតាលី គឺជាជំហានដ៏សំខាន់សម្រាប់ដំណាំស្វាយចន្ទី ដែលជាដំណាំយុទ្ធសាស្ត្រ ហើយឆ្លុះបញ្ចាំងពីការប្តេជ្ញាចិត្តរបស់រដ្ឋាភិបាលក្នុងការជំរុញការនាំចេញផលិតផលកែច្នៃ។

ជាមួយគ្នានេះ ការចូលទៅកាន់ទីផ្សារដែលមានតម្លៃខ្ពស់ដូចជាប្រទេសអ៊ីតាលី និងសហភាពអឺរ៉ុប មិនត្រឹមតែលើកកម្ពស់កេរ្តិ៍ឈ្មោះស្វាយចន្ទីកម្ពុជាប៉ុណ្ណោះទេ ប៉ុន្តែថែមទាំងធានានូវការបន្ថែមតម្លៃកាន់តែច្រើនសម្រាប់សេដ្ឋកិច្ចជាតិផងដែរ។

ក្រសួងកសិកម្ម បានបង្ហាញការសង្ឃឹមយ៉ាងមុតមាំថា គ្រាប់ស្វាយចន្ទីខ្មែរ នឹងមានទីផ្សារនាំចេញកាន់តែច្រើននិងទូលំទូលាយបន្ថែមទៀតនាពេលអនាគត។

សូមជម្រាបជូនថា កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក៕

The post គ្រាប់ស្វាយចន្ទីកែច្នៃរបស់កម្ពុជា​​ ១៤តោន​ បាននាំចេញទៅកាន់ទីផ្សារប្រទេសអ៊ីតាលីជាលើកដំបូង appeared first on .

យោងតាមរបាយការណ៍ស្តីពីការនាំចេញផលិតផលដំណាំក្នុងរយៈពេល៧ខែ ឆ្នាំ២០២៤និង២០២៥ របស់អគ្គនាយកដ្ឋានកសិកម្ម បង្ហាញថា ការនាំចេញគ្រាប់ស្វាយចន្ទីឆៅទៅក្រៅប្រទេសនៅក្នុងក្នុងរយៈពេល៧ខែ ឆ្នាំ២០២៥នេះមានបរិមាណ៦០ម៉ឺនតោន ពោលគឺមានការកើនឡើងប្រមាណ៩ភាគរយ បើប្រៀបធៀបនិងរយៈពេលដូចគ្នានិងឆ្នាំ២០២៤ មានបរិមាណ៥៤ម៉ឺនតោន។ ចំណែកការនាំចេញគ្រាប់ស្វាយចន្ទីកែច្នៃវិញនាំចេញបាន៣១តោន ពោលថយចុះ៦៩ភាគរយ បើប្រៀបធៀបនិងរយៈពេលដូចគ្នាឆ្នាំ២០២៤ មានចំនួន១០ម៉ឺនតោន។

ពាក់ព័ន្ធនិងការនាំចេញគ្រាប់ស្វាយចន្ទីកែច្នៃធ្លាក់ចុះនេះដែរ លោក អួន ស៊ីឡុត ប្រធានសមាគមស្វាយចន្ទីកម្ពុជា បានឯកភាពជាមួយនិងរបាយការណ៍របស់អគ្គនាយកដ្ឋានកសិកម្មថាពិតជាមានការធ្លាក់ចុះបែបនេះមែន។
លោក អួន ស៊ីឡុត មានប្រសាសន៍ថា ការធ្លាក់ចុះគ្រាប់ស្វាយចន្ទីកែច្នៃនេះ ដោយសារតម្លៃគ្រាប់ស្វាយចន្ទីឆៅមានតម្លៃល្អ ធ្វើឱ្យកសិករលក់ឱ្យឈ្មួញនាំចេញទៅខាងក្រៅ ធ្វើឱ្យអ្នកកែច្នៃក្នុងស្រុកគាត់ពិបាកប្រកួតប្រជែងទិញពីកសិករ។

លោកគូសបញ្ជាក់ថា ក្នុងរយៈពេល២ឆ្នាំចុងក្រោយនេះ តម្លៃគ្រាប់ស្វាយចន្ទីស្រស់ជាមធ្យមថ្លៃ៥៣០០រៀល ហើយតម្លៃនេះវាល្អ ខណៈគ្រាប់ស្វាយចន្ទីស្ងួតមួយគីឡូក្រាមកសិករលក់បានថ្លៃ៦០០០រៀល។ ដូចនេះសហគ្រាសក្នុងស្រុកមិនមានលទ្ធភាពប្រកួតប្រជែងទិញជាមួយក្រុមហ៊ុននៅក្នុងប្រទេសជិតខាងនោះទេ។

បើតាមលោក អួន ស៊ីឡុត គិតមកដល់ខែសីហានេះ កសិករបានបញ្ចប់ការប្រមូលផលគ្រាប់ស្វាយចន្ទី ហើយស្ថិតក្នុងដំណាក់កាលនេះកសិករ ឬម្ចាស់ចំការស្វាយចន្ទីបាននិងកំពុងតែងមែក ដាក់ជីគល់និងសម្អាតចំការស្វាយចន្ទីរបស់ខ្លួន៕

The post ការនាំចេញគ្រាប់ស្វាយចន្ទីកែច្នៃធ្លាក់ចុះ៦៩% អាចមកពីតម្លៃគ្រាប់ស្វាយចន្ទីឆៅលក់បានល្អនៅលើទីផ្សារ appeared first on .

ពិធីចុះហត្ថលេខាលើកិច្ចសន្យាស្តីពី «ការផលិត និងផ្គត់ផ្គង់គ្រាប់ស្វាយចន្ទី» រវាងសហគមន៍កសិកម្មទំនើបចំនួន៣ និងក្រុមហ៊ុន MIRARTH ធ្វើឡើងដោយមានសក្ខីភាពលោក ឃឹម ហ្វីណង់ រួមជាមួយនាយកដ្ឋានកសិឧស្សាហកម្ម នាយកដ្ឋានអភិវឌ្ឍន៍សហគមន៍កសិកម្ម និងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ កាលពីថ្ងៃទី២៦ ខែមីនា ឆ្នាំ២០២៥។

លោក ឃឹម ហ្វីណង់ បានឱ្យដឹងថា ការធ្វើផលិតកម្មកសិកម្មតាមកិច្ចសន្យាសម្រាប់សហគមន៍ ដើម្បីការពារសមាជិកទាំងអស់ពីហានិភ័យទីផ្សារនៃការប្រែប្រួលថ្លៃលើសពីការរំពឹងទុក។

លោកក៏បានណែនាំឱ្យនាយកដ្ឋានកសិឧស្សាហកម្ម និងសហគមន៍ផ្ទាល់ បន្តចុះកិច្ចសន្យាលក់គ្រាប់ស្វាយចន្ទីបន្ថែមទៀត រហូតដល់ចប់រដូវប្រមូលផល ព្រមទាំងពិចារណាស្តុកទុកក្នុងកម្រិតណាមួយ សម្រាប់ការលក់ជាគ្រាប់ស្ងួតផងដែរ។ បន្ថែមពីនោះសម្រាប់រដូវកាលបន្ទាប់ សហគមន៍គួរត្រៀមធ្វើកិច្ចសន្យាជាមួយក្រុមហ៊ុនទទួលទិញពីដើមរដូវទុកឱ្យហើយទើបជាការប្រសើរ។

សូមបញ្ជាក់ថា កិច្ចសន្យានេះមានទំហំគិតជាទឹកប្រាក់ចំនួនប្រមាណ ៦៥ម៉ឺនដុល្លារ សម្រាប់ការផ្គត់ផ្គង់គ្រាប់ស្វាយចន្ទី៤០០តោន ហើយនេះគឺជាលើកទីមួយហើយ ដែលសហគមន៍កសិកម្មទំនើបសម្រាប់ដំណាំស្វាយចន្ទីទាំង៣ បានសហការគ្នាលក់គ្រាប់ស្វាយចន្ទី តាមរយៈការចុះកិច្ចសន្យាទុកជាមុនច្បាស់លាស់ក្នុងតម្លៃថេរមួយ សម្រាប់រដូវកាលប្រមូលផលដំបូងរបស់ខ្លួន។ គួរបញ្ជាក់បន្ថែមថា តាមការព្យាករណ៍ បរិមាណគ្រាប់ស្វាយចន្ទីដែលបានចុះកិច្ចសន្យានេះ មានចំនួនប្រហាក់ប្រហែលនឹង២០%នៃបរិមាណផលសរុបដែលសហគមន៍ទាំង៣គ្រោងនឹងផលិតបានក្នុងឆ្នាំ២០២៥នេះ៕

The post ក្រុមហ៊ុនមួយចុះកិច្ចសន្យាទិញគ្រាប់ស្វាយចន្ទីប្រមាណ៤០០តោនពីសហគមន៍កសិកម្មទំនើប៣នៅខេត្តកំពង់ធំ appeared first on .