បើតាមប្រធានក្រុមប្រឹក្សាភិបាលនៃសមាគមអ្នកចិញ្ចឹមសត្វកម្ពុជា បានឱ្យដឹងថា នៅក្នុងរដូវកាលបុណ្យចូលឆ្នាំចិន វៀតណាមឆ្នាំនេះ ជាពេលវេលាមួយដែលអ្នកចិញ្ចឹមជ្រូកមានការសប្បាយចិត្ត ដោយសារតម្រូវការជ្រូករស់កើនឡើងខ្ពស់ធ្វើឱ្យតម្លៃអាចលក់បានថ្លៃជាងពេលធម្មតា។

លោក លី ឡាវីល បានគូសបញ្ជាក់ថា “ក្នុងរដូវបុណ្យចូលឆ្នាំចិននេះ តម្រូវការជ្រូករស់កើនឡើងច្រើនគួរសម ទាំងការកំម្ម៉ង់ជ្រូកជ្រូកខ្វៃ ជ្រូកធំ បានធ្វើឱ្យតម្លៃជ្រូករស់កើនឡើង។ តួយ៉ាងនៅដើមឆ្នាំ២០២៦មកនេះតម្លៃជ្រូករស់របស់កសិករចាប់ផ្តើមហក់ឡើងជាសន្សឹមៗ បើប្រៀបធៀបនិងពេលដូចគ្នាឆ្នាំ២០២៥”។

លោកលើកឡើងថា កសិករចិញ្ចឹមជ្រូក មិនសម្រាប់តែផ្គត់ផ្គង់នៅក្នុងរដូវកាលបុណ្យចូលឆ្នាំចិនវៀតណាមទេ គឺដើម្បីឆ្លើយតបតម្រូវការនៅទូទាំងប្រទេស ក្នុងមួយថ្ងៃមានប្រមាណ១ម៉ឺនក្បាល។ ប៉ុន្តែចូលមកដល់ជិតបុណ្យចូលឆ្នាំចិននេះតម្រូវការជ្រូករស់អាចកើនដល់១ម៉ឺន២ពាន់ក្បាល។ ផ្អែកលើតម្រូវការកើនឡើង បានធ្វើឱ្យតម្លៃជ្រូករស់ឡើងថ្លៃដល់ជាង១ម៉ឺនរៀលក្នុងមួយគីឡូក្រាម តែក្រោយពីបុណ្យចូលឆ្នាំចិនបានបញ្ចប់ តម្លៃជ្រូកវានឹងធ្លាក់មកវិញចន្លោះពី៩ពាន់រៀលទៅ១ម៉ឺនរៀល។

បើយោងតាមប្រធានក្រុមប្រឹក្សាភិបាលសមាគមខាងលើ បានសង្កត់ធ្ងន់ថា ក្នុងនាមជាក្រុមប្រឹក្សានៃសមាគមអ្នកចិញ្ចឹមសត្វគឺលោកចង់ឱ្យវិស័យចិញ្ចឹមសត្វមានការរីកចម្រើន ហើយចង់ឃើញប្រជាពលរដ្ឋរស់នៅក្នុងប្រទេស គាំទ្រនិងប្រើប្រាស់ផលិតផលសាច់ជ្រូកដែលបានដាក់លក់នៅលើទីផ្សារ៕

The post អ្នកជំនាញ ៖តម្លៃនិងតម្រូវការជ្រូករស់កើនក្នុងរដូវបុណ្យចូលឆ្នាំចិន-វៀតណាម appeared first on .

លោក រស់ ឆាំងគី បានឱ្យដឹងថា «ទីផ្សារជ្រូកបច្ចុប្បន្នបើគិតចាប់ពីថ្ងៃទី១២ ខែមីនា ក្រោយពីបិទសាច់ជ្រូកបង្កកមក តម្លៃឃើញមានការងើបឡើង គ្រាន់តែងើបឡើងរាងយឺត ប៉ុន្តែក៏ជាសញ្ញាមួយល្អសម្រាប់បងប្អូនដែលគាត់ជាអ្នកចិញ្ចឹម ព្រោះតំបន់ខ្លះបងប្អូនគាត់ជាអ្នកចិញ្ចឹមជាកសិករ គាត់អាចលក់បានតម្លៃក្នុចន្លោះ៨០០០រៀល ទៅ៨៥០០រៀល ប៉ុន្តែមានតំបន់មួយចំនួនតូចដែលនៅលក់បានក្រោមតម្លៃ៨០០០រៀល វាជាតំបន់ដែលពោពេញដោយការប្រកួតប្រជែងឬក៏តំបន់ដែលឈ្មួញគេបង្អាក់តម្លៃក៏យើងមិនដឹងច្បាស់ ប៉ុន្តែតម្លៃជាទូទៅគឺនៅក្នុងចន្លោះពី៨០ ទៅ៨៥ នេះគឺក្រោយពីការចូលជាធរមានចាប់ពីថ្ងៃទី១២ មីនា ឆ្នាំ២០២៤មក។ហើយយើងសង្ឈឹមថានាឱកាសជិតចូលឆ្នាំខ្មែរ ក៏ដូចជាឱកាសក្រោយពេលចូលឆ្នាំខ្មែរនេះ សន្ទុះឬការឡើងជាសន្សឹមៗនៅតែបន្តឡើង ដោយនេះជាអ្វីដែលជាក្តីសង្ឈឹមរបស់ប្រជាពលរដ្ឋ ដែលគាត់ជាអ្នកចិញ្ចឹមជ្រូក»។

លោកបន្តថា «សម្រាប់តម្លៃ៨០០០ទៅ៨៥០០នេះ បើសិនជាកសិករគាត់គ្រប់គ្រងអត្រាងាប់ អត្រាឈឺរបស់គាត់បានល្អ វាជាតម្លៃមួយដែលគាត់អាចនឹងរួចខ្លួន ឬក៏ចំណេញបានតិចតួចបំផុត។អីចឹងហើយបានជាយើងដែលជាអ្នកចិញ្ចឹមចង់បានតម្លៃមួយដែលក្នុងចន្លោះ៩៥០០ ដើម្បីឱ្យគាត់អាចបានចំណេញ ពីព្រោះគាត់ខាតយូរហើយ។ អីចឹងតម្លៃល្អបំផុតគឺតម្លៃ៩០០០ ទៅ៩៥០០ជាតម្លៃស្ថេរភាពល្អបំផុតសម្រាប់បងប្អូនដែលគាត់ជាអ្នកចិញ្ចឹម។ ដោយឡែកសម្រាប់តម្លៃ៨០០០ទៅ៨៥០០នេះ ជាតម្លៃមួយដែលគាត់អាចរួចខ្លួន តែបងប្អូនខ្លះដែលគាត់អាចមានបច្ចេកទេសល្អ គាត់កាត់បន្ថយ គាត់បង្កើនបច្ចេកទេស អីចឹងតម្លៃនេះគាត់អាចមានការចំណេញខ្លះហើយ»។

បើតាមលោក រស់ ឆាំងគី ជាការរំពឹងទុក ក្រោយពេលចូលឆ្នាំ លោករំពឹងថាតម្លៃជ្រូកវានឹងកាន់តឺមានការកើនឡើង ប៉ុន្តែក៏ជាការព្រួយបារម្ភផងដែរ ព្រោះដោយសារក្រោយចូលឆ្នាំហើយ កម្មវិធីនានាដូចជាពិធីការ កម្មវិធីផ្សេងៗ ឬក៏ជារដូវវស្សាដែលសម្បូរម្ហូបតាមជនបទ។អីចឹងជាក្តីកង្វល់ក៏ខ្លាចវាមានតម្រូវការធ្លាក់ចុះដែរ នេះជារឿងពិតសម្រាប់តម្រូវការសាច់ជ្រូក។ប៉ុន្តែយើងក៏សង្ឈឹមថាវានឹងកើនឡើងតាមរយៈការទប់ស្កាត់ជាមួយនឹងបញ្ហាសាច់បង្កកផ្សេងៗ ដែលធ្វើឱ្យតម្រូវការនៅតែរក្សារលំនឹង ធ្វើឱ្យទាញតម្លៃឱ្យនៅស្ថេរភាពបន្តកើតឡើងជាសន្សឹមៗរហូតទៅដល់កន្លែងមួយដែលរស់បានទាំងអស់គ្នា សម្រាប់បងប្អូនដែលចិញ្ចឹមចន្លោះពី៩០០០ទៅ៩៥០០។

ចំណែកឯអ្នកស្រី លី ស៊ីណា កសិករចិញ្ចឹមជ្រូកនៅខេត្តពោធិ៍សាត់ បានឱ្យដឹងថា តម្លៃជ្រូកគិតត្រឹមថ្ងៃទី១០ ខែមេសានេះ មានតម្លៃ៨០០០រៀលក្នុងមួយគីឡូក្រាម សម្រាប់ជ្រូកល្អមានសាច់មិនស្គម តែសម្រាប់ជ្រូកស្គមជាង៧៥០០រៀលប៉ុណ្ណោះ។អ្នកស្រីបន្តថា តម្លៃជ្រូកកាលពីខែមករាដល់កុម្ភៈ ឆ្នាំនេះតម្លៃជ្រូករស់ធ្លាក់ចុះខ្លាំងមែនទែនទើបតែចូលដល់ខែមេសាតម្លៃជ្រូកចាប់ផ្តើមងើបឡើងបន្តិចវិញ។

បើតាមកសិករចិញ្ចឹមជ្រូករូបនេះ តម្លៃចន្លោះ៨០០០រៀលនេះមិនទាន់អាចចំណេញនៅឡើយទេតែអាចសម្រួលថ្លៃដើមបាន ហើយអ្នកស្រីសង្ឈឹមថាមុនចូលឆ្នាំមួយថ្ងៃឬអំឡុងពេល និងក្រោយចប់ចូលឆ្នាំតម្លៃជ្រូកអាចនឹងកាន់តែប្រសើរឡើងថែមទៀត៕

The post ជិតចូលឆ្នាំខ្មែរតម្លៃជ្រូករស់មានការងើបឡើងវិញ ខណៈក្រោយពេលចូលឆ្នាំកសិកររំពឹងថាកាន់តែបន្តឡើងថែមទៀត appeared first on .

ថ្លែងនៅក្នុងពិធីបិទកិច្ចប្រជុំប្រចាំឆ្នាំ និងសិក្ខាសាលាស្តីពីឧត្តមភាពនៃវិស័យចិញ្ចឹមសត្វនៅកម្ពុជា កាលថ្ងៃទី២៩ ខែកុម្ភៈ ឆ្នាំ២០២៤ ថា កន្លងមកទោះបីជួបការលំបាកយ៉ាងណាក៏ដោយមិនថាជ្រូកចុះថ្លៃខ្លាំង ឡើងថ្លៃលក់បានត្រឹមរួចខ្លួន និងប្រឈមនឹងជំងឺទូទៅក៏យើងនូវតែរួបរួមសាមគ្គីគ្នាដើម្បីចូលរួមចំណែកកសាងនិងអភិវឌ្ឍន៍ប្រទេសកម្ពុជាជាមួយនឹងរាជរដ្ឋាភិបាលដែលដឹកនាំដោយសម្តេចធិបតី ហ៊ុន ម៉ាណែត ។

អ្នកឧកញ៉ា មានប្រសាសន៍ថា «សមាគមអ្នកចិញ្ចឹមសត្វរបស់យើងគឺនៅក្មេងខ្ចីណាស់ ទើបតែកើតឡើងបានប៉ុន្មានឆ្នាំ អីចឹងយើងត្រូវតែខិតខំប្រឹងប្រែងបន្តរួមសាមគ្គីគ្នាជាធ្លុងមួយដើម្បីពង្រឹង ពង្រីកវិស័យចិញ្ចឹមសត្វរបស់យើងនេះឱ្យកាន់តែរីកចម្រើនជឿនលឿនតទៅមុខទៀត ហើយខ្ញុំនៅតែចូលរួមចំណែកក្នុងវិស័យចិញ្ចឹមសត្វនេះបន្តទៅទៀតជាមួយថ្នាក់ដឹកនាំទាំងអស់នៅពេលមានតម្រូវការរូបខ្ញុំ ខ្ញុំនឹងខិតខំរិះរកគ្រប់មធ្យោបាយជួយជំរុញវិស័យចិញ្ចឹមសត្វរបស់យើងនេះឱ្យកាន់តែរីកចម្រើនជឿនលឿនទៅមុខ»។

អ្នកឧកញ៉ាលើកឡើងថា រាល់ពេលសមាគមអ្នកចិញ្ចឹមសត្វនៅទូទាំងប្រទេសពេលជួបការលំបាក ថ្នាក់ដឹកនាំសមាគមតែងតែរិះរកគ្រប់មធ្យោបាយដើម្បីឱ្យរាជរដ្ឋាភិបាលជួយដោះស្រាយ ក្នុងនោះតម្រូវការចាំបាច់គឺរូបខ្ញុំ ឱ្យជួយសម្របសម្រួល តាំងពីខ្ញុំមិនទាន់ជាប្រធានគណកម្មាការទី៣ព្រឹទ្ធសភា អាណត្តិទី១នៃរាជរដ្ឋាភិបាល រហូតមកដល់បច្ចុប្បន្ននេះ មិនត្រឹមតែការចិញ្ចឹមសត្វទេ កសិផលទាំងអស់ពេលជួបបញ្ហា តែងតែរិះរកគ្រប់មធ្យោបាយជួយសម្របសម្រួលឱ្យរាជរដ្ឋាភិបាលជួយដោះស្រាយ ដើម្បីឱ្យកសិករយើងអាចប្រកបរបរអាជីវកម្មលើវិស័យកសិកម្ម កសិឧស្សាហកម្មបានតទៅមុខទៀត។

បើយោងតាមអ្នកឧកញ៉ា ម៉ុង ឬទ្ធី កន្លងមកស្រូវចុះថ្លៃ ជ្រូកឡើងថ្លៃ តែពេលនេះស្រូវឡើងថ្លៃ តែជ្រូកចុះថ្លៃ ហើយសត្វចិញ្ចឹមភាគច្រើនចុះថ្លៃ។ ដូចនេះវាពិបាកណាស់ ទីផ្សារមិនទៀងទាត់ ហើយខ្ញុំនៅតែពេញចិត្តបម្រើដោយឥតលក្ខខណ្ឌ៕ តាកែវ

The post ប្រធានគណៈកម្មការទី៣ព្រឹទ្ធសភា លើកទឹកចិត្តដល់អ្នកចិញ្ចឹមសត្វឱ្យបន្តសាមគ្គីគ្នាដើម្បីឆ្ពោះទៅរកភាពរីកចម្រើន appeared first on .

ថ្លែងក្នុងបទសម្ភាសន៍ជាមួយអ្នកសារព័ត៌មានកាលពីពេលថ្មីៗនេះ លោក ស្រ៊ុន ពៅបានមើលឃើញថាក្នុងឆ្នាំ២០២៣ វិស័យចិញ្ចឹមសត្វមានការរីកចម្រើនខ្លាំងហួសពីការស្មាន ដោយសារយើងចិញ្ចឹមបានច្រើន ប៉ុន្តែទីផ្សាររៀងចង្អៀត។

លោកបន្តថា សម្រាប់ឆ្នាំ២០២៤ មុនចូលឆ្នាំចិន សាច់ជ្រូករស់នៅកម្ពុជាលក់បានតម្លៃ៨០០០រៀល ក្នុងមួយគីឡូ ដល់ពេលឥឡូវនៅសល់តែ៧ពាន់ជាង។ដែលនេះដោយសារសាច់បង្កកដែលនៅក្នុងឃ្លាំង ត្រូវបង្ខិតបង្ខំចេញ ក្នុងនោះសាច់បង្កកដែលជិតផុតកំណត់ និងសាច់បង្កកដែលមិនសូវមានស្តង់ដារ។ ដូច្នេះហើយពួកគេត្រូវតែបង្ខំបញ្ចេញ ព្រោះខែមីនា ថ្ងៃទី១២ ឆ្នាំ២០២៤ខាងមុខ យើងនឹងអនុវត្តច្បាប់ដែលរាជរដ្ឋាភិបាលដាក់ឱ្យអនុវត្តគឺសាច់បង្កកណាមិនត្រឹមត្រូវ ខុសស្តង់ដារត្រូវតែកម្ទេចចោល។

លោកបន្តទៀតថា បច្ចុប្បន្នកសិករបានបិទផ្អាកការចិញ្ចឹមទាំងស្រុងសឹងថា១០០ភាគរយហើយ ដោយឡែកមានតែកសិដ្ឋាន ក្រុមហ៊ុនធំៗទេដែលនៅខាំស្មៅ តស៊ូ ដោយសារកសិដ្ឋានគាត់មួយសំណង់សាងសង់ និងដើមទុនគឺរាប់សិបលានដុល្លារ ដូច្នេះហើយគាត់មិនអាចឈប់ឬផ្អាកអាជីវកម្មនោះទេ ទោះបីជាគាត់ត្រូវលក់ដីក៏ដោយ ខ្ចីលុយធនាគារក៏ដោយ។

បើតាមប្រធានសមាគមអ្នកចិញ្ចឹមសត្វ បញ្ហានេះសមាគមក៏បានសហការជាមួយក្រសួងកសិកម្ម ក្រសួងពាក់ព័ន្ធ ហើយរាជរដ្ឋាភិបាលបានកំពុងយកចិត្តទុកដាក់លើវិស័យនេះ ជាពិសេសនៅថ្ងៃទី១២ខែមីនាខាងមុខ ជាថ្ងៃសម្រេចបិទផ្អាកបំណែកនៃសាច់បង្កកទាំងស្រុង។ដូច្នេះហើយដល់ខែមីនា យើងនឹងទទួលបានពន្លឺបណ្តើរៗហើយ លោកជឿជាក់ថាវាទើបតែបិទដំបូងមិនទាន់អស់ភ្លាមនោះទេ ក៏ប៉ុន្តែយ៉ាងយូរខែ៤នឹងមានតម្លៃមួយឱ្យកសិករយើងទទួលយកបាន។

ជាមួយគ្នានេះ លោកក៏បានលើកទឹកចិត្តឱ្យត្រូវតែរួបរួមគ្នាមិនថាអ្នកចិញ្ចឹម មិនថាអ្នកកាប់ឬមិនថាអ្នកនាំចូលទេ ត្រូវតែសហការគ្នាកាន់ដៃគ្នាទៅមុខ ទើបរីកចម្រើន រកប្រាក់ចំណេញអ្នកអស់គ្នាឃើញ។ហើយសមាគមបានខិតខំប្រឹងប្រែងដើម្បីរកដំណោះស្រាយ ជួបជុំគ្នាពិភាក្សាដើម្បីរកតម្លៃមួយដែលអាចចំណេញទាំងអស់គ្នា ចំណេញទាំងអ្នកចិញ្ចឹម ចំណេញទាំងអ្នកហូប ចំណេញទាំងអ្នកកាប់។

ទន្ទឹមនឹងនេះ ប្រធានសមាគមអ្នកចិញ្ចឹមសត្វក៏អំពាវនាវឱ្យស្ថាប័នតាមព្រំដែនអនុវត្តតាមអនុសាសន៍សម្តេចធិបតីដែលដាក់រឹតបន្តឹងសាច់ណាដែលខូចៗ ប្រាកដថាមានលិខិតស្នាមច្បាស់លាស់ និងជាពិសេសប្រជាពលរដ្ឋ កសិករទាំងអស់នៅក្នុងប្រទេសខំតស៊ូបន្តិចទៀត ដើម្បីវិស័យចិញ្ចឹមសត្វនៅកម្ពុជា ដោយយ៉ាងយូរ១ខែទៀត លោកជឿជាក់ថានឹងមានពន្លឺឡើងវិញ៕

The post លោក ស្រ៊ុន ពៅ អំពាវនាវដល់អ្នកចិញ្ចឹមសត្វខិតខំ ទ្រាំបន្តិចទៀត យ៉ាងយូរត្រឹមមួយខែទៀត តម្លៃជ្រូកនឹងមានពន្លឺឡើងវិញ appeared first on .

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាបានបង្ហាញការវាយតម្លៃថា នៅក្នុងកំឡុងពេលចូលឆ្នាំចិន វៀតណាមឆ្នាំនេះជ្រូករស់លក់អត់អាចបានថ្លៃទេ ហើយតម្រូវការទីផ្សារអាចកើនឡើងតិចតួចប៉ុណ្ណោះ តែជ្រូកធ្វើហើយដាក់លក់នៅជ្រុញអាចលក់បានថ្លៃ។

លោកស្រ៊ុន ពៅ វាយតម្លៃថា តម្លៃជ្រូករស់នៅទូទាំងប្រទេសអាចលក់បានថ្លៃប្រមាណ៨០០០រៀលក្នុងមួយគីឡូក្រាម ហើយនៅក្នុងរដូវកាលចូលឆ្នាំចិន នៅឆ្នាំនេះតម្លៃជ្រូករស់មិនអាចកម្រើកឡើងលើសពីតម្លៃ៨០០០រៀលបានទេ ខណៈ តម្លៃជ្រូករស់ក្នុងស្រុក មុនពេលរាជរដ្ឋាភិបាលមិនទាន់ចេញមកដោះស្រាយ ជ្រូករស់លក់បានថ្លៃតែជាង៦០០០រៀល។

ទន្ទឹមនឹងតម្លៃជ្រូករស់មិនអាចងើបឡើងបាន, លោកស្រ៊ុន ពៅ បានលើកឡើងថា« កាលពីឆ្នាំមុនៗ ខ្វះតែប៉ុន្មានថ្ងៃចូលដល់ឆ្នំាចិន វៀតណាម យើងឃើញថាការដឹកជញ្ជូនជ្រូករស់មានមកពីគ្រប់ខេត្ត តែនៅឆ្នាំនេះជិតដល់ថ្ងៃចូលឆ្នាំចិនហើយ បែរជាមានសភាពធម្មតាទៅវិញ»។

តែទោះយ៉ាងនេះក្តី លោកស្រ៊ុន ពៅ ថាសមាគមនៅមានច្រកឬនៅមានក្តីសង្ឃឹមមួយទៀតពេលចូលដល់ខែមីនាខាងមុខនេះ និងមានការបិទមិនឱ្យមានការនាំចូលសាច់បំណែកសាច់បង្កករយៈពេល៦ខែ។ ផ្អែកលើចំណុចនេះសមាគមសង្ឃឹមថា តម្លៃជ្រូកអាចមានសន្ទុះ។ តែបើសិនជាដល់ពេលនោះក្រុមហ៊ុន មិនបានប្រមូលទិញសាច់ជ្រូកនៅក្នុងស្រុកទៅតាមការចង់បានរបស់សមាគម យើងអាចលក់បានគ្រប់បំណែកទំាងអស់នៅលើទីផ្សារដោយខ្លួនឯង ព្រោះអត់មានសាច់បង្កកធ្វើឱ្យប៉ះពាល់ទីផ្សារ៕ តាកែវ

The post ជ្រូករស់មិនអាចលក់ថ្លៃលើសពី៨០០០រៀលទេ ក្នុងរដូវចូលឆ្នាំថ្មីប្រពៃណីចិន-វៀតណាម appeared first on .

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា ការដឹកជញ្ជូនជ្រូករស់នៅក្នុងស្រុក ឃើញមាននៅតំបន់ខ្លះកន្លងមកនេះ ដើម្បីចែកចាយនៅតាមតំបន់នៅបន្ទាប់ពីកសិកមួយចំនួនធំបានបោះបង់ការចិញ្ចឹមជ្រូក។

លោក ស្រ៊ុន ពៅ មានប្រសាសន៍ថា «ក្នុងរដូវបុណ្យភ្ជុំបិណ្ឌនៅឆ្នំានេះ តាមខ្ញុំសង្កេតមើលឃើញ ថាការលក់ដូរសាច់ជ្រូកនៅលើទីផ្សារវាមានការកើនឡើង ហើយតម្លៃវាក៏មានការកើនឡើងជិតដល់៩០០០រៀលក្នុងមួយគីឡូក្រាម ពោលវា ល្អជាងពេលមុនបន្តិច។ដូចនេះក្នុងរដូវបុណ្យភ្ជុំបិណ្ឌឆ្នំានេះតម្រូវការជ្រូកមានការកើនឡើងទំាងបរិមាណនិងតម្លៃនៅលើទីផ្សារ»។

បើតាមប្រធានសមាគមអ្នកចិញ្ចឹមសត្វ លោកស្រ៊ុន ពៅ ថាខណៈពេលតម្លៃជ្រូកកសិករអាចលក់បានថ្លៃ៩០០០រៀលក្នុងមួយគីឡូក្រាមក្នុងពេលសព្វថ្ងៃនេះសម្រាប់ប្រជាពលរដ្ឋដែលប្រើប្រាស់សាច់ជ្រូក ទទួលយកបាន។ប៉ុន្តែសម្រាប់អ្នកចិញ្ចឹមជ្រូកនៅមិនទាន់អាចទទួលយកបាននៅឡើយនោះទេ ព្រោះកសិករនៅជួបបញ្ហាប្រឈមជាមួយតម្លៃចំណីសត្វនៅលើទីផ្សារ ។

លោក ស្រ៊ុន ពៅ បានវាយតម្លៃថា « ក្នុងរដូវបុណ្យភ្ជុំបិណ្ឌឆ្នំាំ២០២៣នេះ តម្រូវការជ្រូកនៅទូទំាងប្រទេសក្នុងមួយថ្ងៃមានប្រមាណ៩៥០០ក្បាល ចាប់ពីថ្ងៃកាន់បិណ្ឌទី១រហូតដល់ថ្ងៃកាន់បិណ្ឌទី១៤នៃរដូវបុណ្យភ្ជុំបិណ្ឌ»៕អត្ថបទ៖សារេត

The post តម្លៃ និងតម្រូវការជ្រូកនៅលើទីផ្សារងើបឡើងវិញ ក្នុងរដូវបុណ្យភ្ជុំបិណ្ឌឆ្នាំនេះ appeared first on .

លោក ស្រ៊ុន ពៅ បានឱ្យដឹងថាបញ្ហាការនាំជ្រូកថៃទៅវៀតណាម ដោយឆ្លងកាត់កម្ពុជានៅកន្លងមកនេះបើតាមអ្វីដែលខ្ញុំបានដឹង ខាងវៀតណាមគេបានបិទច្រកនៅតាមព្រំដែនហើយ មិនបានមានការដឹកឆ្លងចូលទៅប្រទេសគេទេ ។ បើគេឱ្យនាំទៅពេលត្រួតពិនិត្យជ្រូកទំាងនោះរកឃើញមានសារធាតុអ្វីមិនល្អ គេនិងដុតកម្ទេចចោល។

បើតាមលោកប្រធានសមាគមខាងលើ ដើម្បីដឹងព័ត៌មានកាន់តែច្បាស់អំពីការនាំជ្រូកពីថៃទៅវៀតណាមបានឬយ៉ាងណាទាល់តែអគ្គនាយកដ្ឋានសុខភាពសត្វនិងផលិតកម្មសត្វ ឬក្រសួងកសិកម្មរុក្ខាប្រមាញ់និងនេសាទទើបដឹង។
ទន្ទឹមនិងការលើកឡើងអំពីបញ្ហាការនាំជ្រូកថៃទៅវៀតណាមបានឬយ៉ាងណា សម្រាប់លោកស្រ៊ុន ពៅ បញ្ជាក់ថា« ខ្ញុំគ្រាន់តែដឹងថាជ្រូកក្នុងស្រុកធ្លាក់ថ្លៃដល់កម្រិត។ជ្រូកចិញ្ចឹមនៅតាមកសិដ្ឋានអាចលក់បានថ្លៃ៨០០០រៀល តែសម្រាប់កសិករអាចលក់បានថ្លៃក្រោម៨០០០រៀលក្នុងមួយគីឡូក្រាម»។

លោក ស្រ៊ុន ពៅ «លើកឡើងថាសព្វថ្ងៃនេះតម្លៃជ្រូកថៃនិងជ្រូករបស់កម្ពុជា ថ្លៃប្រហាក់ប្រហែលគ្នា អីចឹងយើងចំាបាច់អីនិយាយវែងឆ្ងាយ ឃើញថានៅប្រទេសថៃលក់ជ្រូករស់ក្នុងមួយគីឡូក្រាមថ្លៃជាង៧០០០ហើយនៅកម្ពុជាថ្លៃ៧០០០ទៅ៨០០០រៀលដែរ។ដូចនេះបើចង់ឱ្យជ្រូករបស់កម្ពុជាឡើងថ្លៃ លុះត្រាតែជ្រូកថៃឡើងថ្លៃដែរ នឹងទើបយើងមានសង្ឃឹម បើជ្រូកថៃចុះថ្លៃរបៀបនេះ ជ្រូកចិញ្ចឹមនៅកម្ពុជាយើងមិនអាចឡើងថ្លៃបាន មានតែចុះថ្លៃដូចគេដែរ តាមការមើលឃើញជាក់ស្តែងគឺអីចឹង»៕

អត្ថបទ៖សារេត

The post លោក ស្រ៊ុន ពៅ៖ ជ្រូកនៅក្នុងស្រុកធ្លាក់ថ្លៃដល់កម្រិតហើយ! appeared first on .

អ្នកស្រី ខូវ ម៉េងអ៊ាម អ្នកចិញ្ចឹមជ្រូកនៅខាងស្រុកព្រៃឈរ ខេត្តកំពង់ចាមបានសង្កេតមើលឃើញថាតម្លៃជ្រូករស់មានសញ្ញាធ្លាក់ចុះសន្សឹមៗមកវិញពីជាង៩ពាន់រៀលមកនៅជាង៨ពាន់រៀល ឬនៅក្រោម៨ពាន់រៀលក្នុងមួយគីឡូក្រាមដូចសព្វថ្ងៃនេះ វាបានធ្វើឱ្យប៉ះពាល់ទៅដល់ទឹកចិត្តយើងជាអ្នកចិញ្ចឹមជ្រូក ព្រោះអ្នកចិញ្ចឹមរងការខាតបង់ប្រាក់ច្រើននៅពេលលក់ជ្រូកចេញ។

បើតាមអ្នកស្រី ខូវ ម៉េងអ៊ាម តម្លៃជ្រូករស់នៅក្នុងតំបន់បានធ្លាក់ចុះពីជាង៩ពាន់រៀលមកនៅជាង៧ពាន់រៀលក្នុងមួយគីឡូក្រាម ប៉ុន្តែចំណីជ្រូកលក់នៅលើទីផ្សារមិនចុះតាមហាងឆេងជ្រូកនោះទេ វាមានតម្លៃថ្លៃដដែល។

អ្នកស្រី បញ្ជាក់ថា «កាលដើមឆ្នំា២០២៣ ខ្ញុំបានលក់ជ្រូកជាង១ពាន់ក្បាល បានថ្លៃតែ៧៥០០រៀលក្នុងមួយគីឡូ ពោលក្នុងជ្រូកមួយក្បាលខាតអស់ប្រាក់ប្រមាណ៥០ដុល្លារអាមេរិក និងនៅពេលខាងមុខនេះត្រៀមលក់ជ្រូកចេញជាង១ពាន់ក្បាល ហើយប្រហែលត្រូវខាតបង់ដូចវគ្គមុនទៀតហើយ ព្រោះតម្លៃជ្រូកបានធ្លាក់ចុះ»។
ស្របពេលតម្លៃជ្រូករស់កំពុងមានការធ្លាក់ចុះ ហើយជ្រូកប្រឈមជាមួយនិងការកើតជំងឺ អ្នកស្រី ថា លក់ជ្រូកអស់វគ្គនេះគិតថាផ្អាកឈប់ចិញ្ចឹមជ្រូកសិនហើយ ព្រោះតម្លៃជ្រូកនៅលើទីផ្សារប្រែប្រួលខ្លំាងពេក។

អ្នកស្រី បន្តថា «ខ្ញុំធ្លាប់ចិញ្ចឹមជ្រូកអស់រយៈពេលជាង២០ឆ្នំា ហើយការចិញ្ចឹមកាលពីដំបូងៗ ខ្ញុំនៅអាចរកប្រាក់ចំណេញបានគ្រាន់បើ ទោះបីតម្លៃជ្រូកឡើងចុះៗក៏ដោយ ប៉ុន្តែចូលមកដល់រយៈពេល២ឆ្នំាចុងក្រោយនេះ តម្លៃជ្រូកនៅលើទីផ្សារធ្លាក់ថ្លៃជាប់គ្នារហូត ហើយជ្រូកតែងកើតនៅជំងឺប្លែកៗនិងពិបាកព្យាបាល ខុសពីឆ្នំាកន្លងមុនៗ»។

តាមអ្នកស្រី ខូវ ម៉េងអ៊ាម នៅពេលជ្រូកប្រឈមការកើតជំងឺ តម្លៃជ្រូកធ្លាក់ចុះ ធ្វើឱ្យមានខាតបង់ជាបន្តបន្ទាប់នេះ អ្នកស្រីបានបង្ហាញអារម្មណ៍ថាអស់ទឹកចិត្តក្នុងការចិញ្ចឹមជ្រូក ខណៈកសិដ្ឋានរបស់អ្នកស្រីក្នុងពេលសព្វថ្ងៃកំពុងចិញ្ចឹមនិងមើលថែជ្រូកជាង៣ពាន់ក្បាល ហើយត្រូវការចំណាយប្រាក់អស់ជិត១០ម៉ឺនដុល្លារអាមេរិកនៅក្នុងមួយខែ។

ទន្ទឹមនឹងអស់ទឹកចិត្តទៅលើមុខរបរចិញ្ចឹមជ្រូកឬជ្រូកកំពុងធ្លាក់ថ្លៃ អ្នកស្រី បានសំណូមពរទៅដល់រាជរដ្ឋាភិបាលថ្មីជួយដល់វិស័យកសិកម្ម ហើយជួយឱ្យអ្នកចិញ្ចឹមសត្វមានលទ្ធភាពរកបានប្រាក់ចំណេញសម្រាប់ផ្គត់ផ្គង់ជីវភាពគ្រួសារ។ អ្នកស្រីថា «ខ្ញុំរំពឹងថារាជរដ្ឋាភិបាលថ្មីក្រោយនេះនឹងធ្វើការគិតគូរនិងរៀបចំវិស័យកសិកម្ម ពិសេសការចិញ្ចឹមសត្វនិងការដំាដុះដំណំា ដើម្បីជួយឱ្យកសិករមានសេដ្ឋកិច្ចល្អនៅតាមគ្រួសារ»៕

អត្ថប៖សារេត

The post អ្នកចិញ្ចឹមជ្រូកខ្នាតពាណិជ្ជកម្មធំមួយ នៅខាងកំពង់ចាមបង្ហាញអារម្មណ៍បាក់ទឹកចិត្តលើមុខរបរ appeared first on .

លោក អាន ឬទ្ធី បានឱ្យដឹងថា «មកដល់សព្វថ្ងៃនេះយើងបានផ្លាស់ប្តូរយុទ្ធសាស្ត្រខ្លះៗដែរ។ កាលពីមុនការចិញ្ចឹមជ្រូកយើងលក់ជ្រូករស់ទៅលើទីផ្សារទំាងដុល ប៉ុន្តែឥលូវនេះយើងធ្វើជ្រូកអំាងលក់ដោយខ្លួនឯងដើម្បីយកប្រាក់ទៅចំណាយលើថ្លៃទិញចំណីបានប្រមាណ៣០ទៅ៤០% ។លើសពីនេះយើងកំពុងរកមើលទីផ្សាររហូតដល់ឈានទៅកាប់ជ្រូកលក់នៅដោយខ្លួនឯងនៅក្នុងសហគមន៍ថែមទៀត»។

ក្រៅពីប្រើយុទ្ធសាស្ត្រធ្វើជ្រូកអំាងលក់ដោយខ្លួនឯង អស់មួយក្បាលទៅពីរក្បាលជារៀងរាល់ថ្ងៃលោក អាន ឬទ្ធី ទទួលបានចំណូលមួយផ្នែកទៀតពីការដំាដំណាំបន្លែផ្លែឈើប្រមាណ៣០% យកទៅទ្រទ្រង់នៅក្នុងមុខរបរចិញ្ចឹមជ្រូករបស់ខ្លួននាពេលលសព្វថ្ងៃ។

លោកបញ្ជាក់ថា« មុខរបរចិញ្ចឹមជ្រូកសព្វថ្ងៃនេះ បើមិនមានច្នៃប្រឌិតមុខរបរបន្ថែមជួយទេ អាជីវកម្មចិញ្ចឹមជ្រូកមួយនេះបានបិទទ្វារយូរហើយ ខណៈកសិករចិញ្ចឹមជ្រូកលក្ខណៈខ្នាតតូចនៅក្នុងតំបន់ប្រហែល៦០%ពួកគាត់បានបិទទ្វារឈប់ចិញ្ចឹមជ្រូក»។

ស្របពេលតម្លៃជ្រូករស់មិនទាន់ឆ្លើយតបទៅនឹងការចង់បានរបស់ប្រជាកសិករដែលអ្នកចិញ្ចឹមជ្រូក សម្រាប់លោក អាន ឬទ្ធី គ្រាន់តែចំណាយប្រាក់តែទៅលើចំណីក្នុងមួយខែអស់ជាង៣ម៉ឺនដុល្លារអាមេរិក។

លោក បន្តថា កសិករចិញ្ចឹមជ្រូកនៅក្នុងប្រទេស ទិញចំណីសម្រេចពីខាងក្រុមហ៊ុន នៅពេលដែលតម្លៃជ្រូករស់នៅតំបន់ខ្លះកសិករអាចលក់បានក្នុងរង្វង់៩០០០រៀ់លក្នុងមួយគីឡូក្រាមនេះគឺកសិករមិនអាចរកផលចំណេញពីមុខរបរបានទេ ទាល់តែតម្លៃជ្រូកចាប់ពីថ្លៃ១០.០០០រៀលឡើងទៅទើបបានផលចំណេញខ្លះ។

លោកលើកឡើងថា« នៅពេលខាងមុខយើងមានគម្រោងកាត់បន្ថយជ្រូកបន្តទៀត(លក់ចេញ) ប៉ុន្តែយើងរងចំាមើលនៅថ្ងៃមុនបុណ្យភ្ជុំបិណ្ឌឬក្រោយបុណ្យភ្ជុំបិណ្ឌខែ១០ឬខែ១១បើជ្រូកមិនឡើង ឬតម្លៃវានៅទ្រឹងដដែលយើងនឹងកាត់បន្ថយទៀត។នៅវគ្គក្រោយនេះអាចកាត់មេជ្រូពូជ៧០ក្បាលក្នុងចំណោម១៥០ក្បាលនិងជ្រូកសាច់មួយចំនួន ដើម្បីយកទុនមកបង្វិលសម្រាប់ពេលខាងមុខ»៕

អត្ថបទ៖សារេត

The post កសិករចិញ្ចឹមជ្រូកនៅខាងសៀមរាប ធ្វើជ្រូកអំាងលក់​ដើម្បីទប់ខ្លួនកុំឱ្យអាជីវកម្មឈានដល់ការបិទទ្វារ appeared first on .

កសិករចិញ្ចឹមជ្រូកនៅខាងខេត្តសៀមរាប លោក អាន ឬទ្ធី បានឱ្យដឹងថាបច្ចុប្បន្ននេះកសិករចិញ្ចឹមជ្រូកលក្ខណៈគ្រួសារនិងខ្នាតតូចមានប្រហែល៦០%បានបិទទ្វារឈប់ចិញ្ចឹមជ្រូកនៅក្នុងតំបន់ ហើយក៏អត់មានកសិករណាហ៊ានចិញ្ចឹមទៀតដែរ ដោយអ្នកខ្លះបានចេញទៅធ្វើការដើម្បីបានប្រាក់ខែយកមកបង់ឱ្យខាងធនាគារនិងមីក្រូហិរញ្ញវត្ថុវិញ។

លោកបន្តថា ស្ថិតក្នុងកាលៈទេសៈតម្លៃជ្រូកដូចសព្វថ្ងៃនេះ កសិករទប់ខ្លួនមិនជាប់ទេ។ សម្រាប់អ្នកចិញ្ចឹមជ្រូកទិញកូនជ្រូកពីគេយកមកចិញ្ចឹមចាប់ពី៣០ក្បាលឡើងទៅ ដឹងថាមិនអាចរកផលចំណេញបានទេ ចៀសមិនផុតពីខាតបង់ប្រាក់នោះឡើយ។

បើតាមលោក អាន ឬទ្ធី បើកសិករចិញ្ចឹមជ្រូកចំនួន៣០ក្បាល ក្នុងមួយថ្ងៃត្រូវការចំណាយប្រាក់ទៅលើថ្លៃចំណីប្រហែល៥០ដុល្លារអាមេររិក។ដូចនេះបើក្នុងមួយខែកសិករត្រូវការចំណាយប្រាក់អស់ជាង១ពាន់ដុល្លារអាមេរិក បើ៤ខែត្រូវការចំណាយប្រាក់ជាង៥ពាន់ដុល្លារអាមេរិក។ដល់ពេលលក់ជ្រូកចេញវិញបើជ្រូកមួយក្បាលលក់បានប្រហែល១៧០ដុល្លារអាមេរិក ជ្រូក៣០ក្បាលអាចលក់បានប្រាក់ជាង៥ពាន់ដុល្លារ ដូចនេះប្រាក់បានមកពីការលក់ជ្រូកបានគ្រាន់តែទូទាត់លើថ្លៃចំណីអស់លុយល្មម រកប្រាក់ចំណេញមិនឃើញ។

លោកសង្កត់ធ្ងន់ថា« កសិករពឹងផ្អែកប្រាក់ចំណូលតែមួយមុខទៅលើមុខរបរចិញ្ចឹមជ្រូក មិនអាចទប់ខ្លួនបានទេនិងបានកំពុងជំពាក់បំណុលធនាគារនិងមីក្រូហិរញ្ញវត្ថុដោយ អ្នកខ្លះបានចេញទៅធ្វើជាពលករ កសិករខ្លះទៀតនៅដំាដំណាំក្បែរផ្ទះ ហើយអ្នកខ្លះទៀតបានចេញមកស៊ីឈ្នួលគេ ធ្វើជាកម្មករសំណង់ជាដើម»។

លោក អាន ឬទ្ធី ចាត់ទុកថាចំណេះផ្នែកហិរញ្ញវត្ថុរបស់កសិករនៅមានកម្រិត ហើយខ្ញុំមើលឃើញថាកសិករប្រកបមុខរបរតែមួយមុខលើវិស័យចិញ្ចឹមជ្រូកនេះប្រាកដជាជួបបញ្ហា យ៉ាងហោចដាច់ឆ្នំា២០២៣អាជីពចិញ្ចឹមជ្រូករបស់គាត់មិនមានលទ្ធភាពដោះបំណុលពីធនាគារឬមីក្រូហិរញ្ញវត្ថុបានទេ ព្រោះមុខរបរចិញ្ចឹមជ្រូកនេះតម្លៃជ្រូកនៅលើទីផ្សារងើបយឺតពេក៕

អត្ថបទ៖សារេត

The post ទស្សនៈ ៖ កសិករទិញកូនជ្រូកពីគេមកចិញ្ចឹម ចៀសមិនផុតពីការខាតបង់និងជំពាក់បំណុលធនាគារ appeared first on .