លោកស្រី ជា សិរី ត្រូវបានព្រះមហាក្សត្រតែងតាំងជាអគ្គទេសាភិបាលធនាគារជាតិនៃកម្ពុជា កាលពី​ថ្ងៃទី​២៩ ខែ​កក្កដា ឆ្នាំ២០២៣ ជំនួសលោក ជា ចាន់តូ ដែលជាឪពុកបង្កើតបន្ទាប់ពីកាន់តំណែងអស់រយៈពេល​ប្រមាណ ២៥​ឆ្នាំ​មក​ហើយ បើ​គិត​ចាប់តាំងពី​ឆ្នាំ​១៩៩៨ មក​ដល់​ពេល​បច្ចុប្បន្ន។

មុន​ទទួល​បាន​តួនាទី​ជា​អគ្គទេសាភិបាល​នេះ លោក ជា ចាន់តូ ធ្លាប់​ទទួល​ខុសត្រូវ​ធំ​នៅ​ធនាគារ​កណ្តាល ក្នុង​តួនាទី​ជា​នាយក​ធនាគារ​ជាតិ​នៃ​កម្ពុជា ពី​ឆ្នាំ​១៩៧៩ ដល់​ឆ្នាំ​១៩៨១។ បន្ទាប់​មក លោក​ត្រូវ​បាន​តែងតាំង​ជា​ទេសាភិបាល​រង​នៃ​ធនាគារ​ជាតិ​នៃ​កម្ពុជា ពី​ឆ្នាំ​១៩៨១ ដល់​ឆ្នាំ​១៩៨៦។ នៅ​ក្នុង​ឆ្នាំ​១៩៨៦ លោក ជា ចាន់តូ ក៏​បាន​បម្រើ​ការ​ជា​អនុរដ្ឋមន្ត្រី​ទី​មួយ​នៅ​ក្រសួង​ផែនការ។ មិន​តែប៉ុណ្ណោះ លោក​ក៏​ធ្លាប់​ជា​សមាជិក​សភា​ចន្លោះ​ឆ្នាំ​១៩៩៣ ដល់​ឆ្នាំ​១៩៩៨ ផង​ដែរ។

ក្រោយចាកចេញពីតំណែងអគ្គទេសាភិបាល​ធនាគារ​ជាតិ​នៃ​កម្ពុជា កាលពីខែកក្កដាកន្លងទៅ លោក ជា ចាន់តូ ត្រូបានតែងតាំងជា​អគ្គទេសាភិបាល​កិត្តិយស​ធនាគារ​ជាតិ​នៃ​កម្ពុជា។ កាលពីថ្ងៃទី១១ ខែធ្នូ ឆ្នាំ២០២៣ ធនាគារជាតិនៃកម្ពុជា រៀបចំកម្មវិធីលៀងសាយភោជនធនាគារិកប្រចាំឆ្នាំ២០២៣។

នៅក្នុងពិធីនេះ សមាគមធនាគារនៅកម្ពុជា សមាគមមីក្រូហិរញ្ញវត្ថុកម្ពុជា និងសមាគមសហព័ន្ធហិរញ្ញវត្ថុ និងបច្ចេកវិទ្យានៃកម្ពុជា តំណាងឱ្យគ្រឹះស្ថានធនាគារនិងហិរញ្ញវត្ថុ បានប្រគល់ស្លាកថ្លែងអំណរគុណជូនលោក ជា ចាន់តូ អគ្គទេសាភិបាលកិត្តិយស ចំពោះវីរៈភាពដឹកនាំនៃការកសាងប្រព័ន្ធធនាគារនៅកម្ពុជាចាប់តាំងពីប្រព័ន្ធធនាគារមួយថ្នាក់ (Mono-Banking) ទៅជាប្រព័ន្ធធនាគារពីរថ្នាក់( Two-tier Banking) ពីការវិនិយោគដោយរដ្ឋ មកជាការវិនិយោគឯកជន ទាំងក្នុងស្រុក និងបរទេស។

ក្នុងវីដេអូឃ្លីបដែលផលិតឡើងដើម្បីថ្លែងអំណរគុណលោក ជា ចាន់តូ អ្នកឧកញ៉ា ពុង ឃាវសែ ម្ចាស់ធនាគារ កាណាឌីយ៉ា បានគូសបញ្ជាក់ថា លោកអគ្គទេសាភិបាលកិត្តិយសបានខិតខំប្រែងតស៊ូលះបង់កម្លាំងកាយចិត្តក្នុងការដឹកនាំប្រកបដោយគតិបណ្ឌិត និងចក្ខុវិស័យវែងឆ្ងាយលើកស្ទួយ និងអនុវត្តវិស័យធនាគារ និងហិរញ្ញវត្ថុឲ្យមានការរីកចម្រើនយ៉ាងខ្លាំងនិងប្រកបដោយភាពធន់ក្នុងពេលជាង២ទស្សវត្សរ៍មកនេះ ហើយអ្នកឧកញ៉ានឹងចង់ចាំជានិច្ចនូវគុណបំណាច់និងស្នាដៃដឹកនាំកន្លងមកលោក ជា ចាន់តូ។

សម្រាប់អ្នកឧកញ៉ា លាង ម៉េង ប្រធានក្រុមប្រឹក្សាភិបាលធនាគារ ជីប ម៉ុង មានប្រសាសន៍ថា លោក ជា ចាន់តូ ជាឥស្សរជនកំពូលមួួយដែលបានកសាងប្រវត្តិសាស្រ្តថ្មីសម្រាប់ប្រព័ន្ធធនាគារ។ អ្នកឧកញ៉ាបន្តថា ក្រោមការដឹកនាំរបស់អគ្គទេសាភិបាលកិត្តិយសធនាគារជាតិនៃកម្ពុជាជាង២ទស្សវត្សរ៍មកនេះ ធនាគារជាតិនៃកម្ពុជា ដើរតួនាទីយ៉ាងសំខាន់ ជាអាណាព្យាបាលដឹកនាំវិស័យធនាគារ និងគ្រឹះស្ថានហិរញ្ញវត្ថុកាន់តែរឹងមាំ, ហិរញ្ញវត្ថុផ្នែកបច្ចេកវិទ្យាទំនើប និងផ្នែកធនធានមនុស្សដ៏សំបូរបែប។

លោក អ៊ិន ចាន់នី នាយកប្រតិបត្តិធនាគារ អេស៊ីលីដា លើកឡើងថា លោក ជា ចាន់តូ បានបន្សល់ទុកនៅស្នាដៃជាច្រើន ជាពិសេសដាក់ចេញនូវគោលនយោបាយ បទបញ្ញប្បតិ្តលើកកម្ពស់បរិយាបន្នហិរញ្ញវត្ថុ យកចិត្តទុកដាក់លើការបណ្តុះបណ្តាលសាធារណៈជនស្តីពីហិរញ្ញវត្ថុ ពង្រឹងតួនាទីធនាគារកណ្តាលដែលជាស្ថាប័នអាណាព្យាបាលធ្វើឲ្យស្ថាប័នហិរញ្ញវត្ថនៅក្រោមអាណាព្យាបាលរឹងមាំ ជាពិសេសភាពរាំងនៅក្នុងដើមទុនចាប់ពី ៥០ពាន់លានរៀលរហូតដល់ទៅ ៣០០ពាន់លានរៀល។

លោកសង្កត់ធ្ងន់ថា ដើមទុនហ្នឹងហើយដែលធ្វើឲ្យស្ថាប័នហិរញ្ញវត្ថុទាំងអស់មានភាពរឹងមាំ ជាពិសេសនៅពេលដែលយើងជួបវិបត្តិហិរញ្ញវត្ថុឆ្នាំ២០០៨ គ្មានស្ថាប័នធនាគារនៅកម្ពុជាណាមួយដួរលំនោះទេ។ លើសពីនេះ លោក អ៊ីន ចាន់នី ក៏បានគូសបញ្ជាក់បន្ថែមថា លោក ជា ចាន់តូ បានចូលរួមដឹកនាំធ្វើឲ្យស្ថេរភាពអត្រាប្តូរប្រាក់ទៅ ៤,០០០រៀល ទៅ៤,១០០រៀលក្នុងរយៈពេល ៣០ឆ្នាំ ចំណែកអតិផរណាមិនលើស ៣-៣.៥% នោះទេ ទាំងអស់នេះហើយជាស្នាដៃដ៏មានសារៈសំខាន់របស់លោក ជា ចាន់តូ ដែលបានបន្សល់ទុក។

ជាមួយគ្នានេះដែរ លោក ហ្គី អានវ៉ានិត ប្រធានក្រុមប្រឹក្សាភិបាលធនាគារពាណិជ្ជក្រៅប្រទេសនៃកម្ពុជា FTB បានរំលេចពីស្នាដៃរបស់លោក ជា ចាន់តូ យ៉ាងដូច្នេះថា ក្រោមដឹកនាំដោយអគ្គទេសាភិបាលកិត្តិយសធនាគារជាតិនៃកម្ពុជា ស្ថាប័នហិរញ្ញវត្ថុនៅកម្ពុជាបានសម្រេចនូវកិច្ចការចម្បងដ៏ធំមួយ គឺគោលការណ៍ហិរញ្ញវត្ថុប្រកបដោយចីរភាពទាំង ៩ ។

លោកបន្តថា ការអនុវត្តគោលការណ៍នេះបានជម្រុញឲ្យស្ថាប័នហិរញ្ញវត្ថុជាច្រើនបង្កើតនូវគោលការណ៍គ្រប់គ្រងហានិភ័យបរិស្ថាន និងសង្គម ដើម្បីទាក់ទាញអ្នកវិនិយោគិនបរទេស និងស្ថាប័នហិរញ្ញវត្ថុអន្តរជាតិ ពិសេសផ្នែកឥណទាន, ការបោះមូលបត្របៃតង់ និងការកម្ចីគិតគូរដល់បរិស្ថាន និងសង្គម ព្រមទាំងការកសាងធនធានមនុស្សអនុលោមតាមគោលការណ៍ហិរញ្ញវត្ថុទាំង ៩។ ជាមួយគ្នានេះលោកបានស្តែងនូវការកោតសរសើរចំពោះលោក ជា ចាន់តូ ដែលបានជួយជម្រុញទំនើបកម្ម និងជួយវិស័យធនាគារ និងហិរញ្ញវត្ថុឲ្យទទួលបាននូវការទុកចិត្តទាំងក្នុងប្រទេស និងក្រៅប្រទេស។

ដោយឡែក នាយកប្រតិបត្តិនៃធនាគារ ABA លោក Ashikhanov Askhat បានគូសបញ្ជាក់បន្ថែមថា អំឡុងពេលដឹកនាំធនាគារជាតិនៃកម្ពុជារបស់លោក ជា ចាន់តូ លោកបានតាំងផ្តើមអភិវឌ្ឍន៍វិស័យហិរញ្ញវត្ថុទំនើបនៅកម្ពុជា និងវឌ្ឍនភាពនៃការទូទាត់ប្រាក់រៀល ក្នុងទម្រង់ឌីជីថលតាមរយៈបាគង ដែលជម្រុញកិច្ចសហប្រតិបត្តិការតាមបណ្តាធនាគារនានា។

លោកបន្ថែមទៀតថា ការលះបង់ដ៏ធំធេងរបស់លោក ជា ចាន់តូ ចំពោះឌីជីថលូបនីយកម្មសម្រាប់វិស័យនេះ និងការលើកកម្ពស់ប្រាក់រៀលបាននាំមកនូវសន្ទុះកំណើននៅក្នុងគ្រឹះស្ថានហិរញ្ញវត្ថុដែលជាឧត្តមប្រយោជន៍បំផុតចំពោះបរិយាបន្នហិរញ្ញវត្ថុ និងការប្រតិបត្តិឌីជីថល។ បើតាម CEO ធនាគារ ABA បច្ចុប្បន្នប្រជាជនកម្ពុជារាប់លាននាក់កំពុងចាប់យកជំនាន់ឌីជីថល និងប្រើប្រាស់រូបិយប័ណ្ណជាតិជាមួយបច្ចេកវិទ្យាដោយមោទនភាព។

ថ្លែងក្នុងពិធីលៀងសាយភោជនធនាគារិកប្រចាំឆ្នាំ២០២៣ នៅចំពោះមុខម្ចាស់ធនាគារជាច្រើន និងភ្ញៀវនានាដែលបានចូលរួមលោក ជា ចាន់តូ អគ្គទេសាភិបាលធនាគារជាតិនៃកម្ពុជា បានមានប្រសាសន៍ថា៖ «ការអភិវឌ្ឍរីកចម្រើននៃសេដ្ឋកិច្ចជាតិ និយាយជារួម និងប្រព័ន្ធធនាគារនៅកម្ពុជា និយាយដោយឡែក គឺអាស្រ័យលើប្រទេសជាតិមានសុខសន្តិភាពពេញលេញ និងស្ថិរភាពនយោបាយក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន អគ្គមគ្គទេសក៍ដ៏ឆ្នើមនៃនយោបាយឈ្នះ-ឈ្នះ»៕

The post ក្រោយចាកចេញពីតំណែងអគ្គទេសាភិបាលធនាគារជាតិនៃកម្ពុជា តើអ្នកឧកញ៉ា និងម្ចាស់ធនាគារធំៗក្នុងស្រុកនិយាយអ្វីខ្លះពីលោក ជា ចាន់តូ? appeared first on .

លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា មានប្រសាសន៍ថា «ចំពោះប្រាក់រៀលយើងដាក់នៅតាមម៉ាស៊ីនATM ជាង១ពាន់គ្រឿង ប្រាក់រៀលរបស់យើងមាននៅគ្រប់ម៉ាស៊ីនទំាងអស់សម្រាប់គំាទ្រដល់ការប្រើប្រាស់របស់ប្រជាពលរដ្ឋ។ សព្វថ្ងៃនេះការប្រើប្រាស់ម៉ាស៊ីនATM ជាចំណែកមួយថែមទៅលើអេស៊ីលី Mobile App ដែលសាធារណៈបានប្រើប្រាស់យ៉ាងទូលំទូលាយ ហើយការទូទាត់ផ្សេងៗវាមិនសូវចំាបាច់ទៅដកលុយពីម៉ាស៊ីនATMទេគឺយើងប្រើអេស៊ីលីដា Mobile App បានគ្រប់បណ្តាញទំាងអស់»។

លោកបណ្ឌិតសង្កត់ធ្ងន់ថា «ចំពោះប្រាក់រៀលយើងមិនឱ្យមានការខ្វះសាច់ប្រាក់នៅតាមម៉ាស៊ីន ATMនោះទេ យើងមានបុគ្គលិកប្រចំាការរហូត ដូចនេះសូមប្រជាពលរដ្ឋកុំមានការព្រួយបារម្ភថាខ្វះលុយរៀលសម្រាប់ការទូទាត់»។

យោងតាមលោកបណ្ឌិត អ៊ិន ចាន់នី សម្រាប់ធនាគារអេស៊ីលីដា គិតត្រឹមខែមីនាឆ្នំា២០២២ប្រាក់បញ្ជើសន្សំរបស់ធនាគារ ៥.៧២៤លានដុល្លារអាមេរិកក្នុងនោះមានប្រាក់រៀលខ្មែរ១.០៧៧លានដុល្លារអាមេរិកស្មើនិង១៨,៨២%នៃប្រាក់បញ្ជើសរុប រីឯឥណទានយើងមាន ៥.៦០០លានដុល្លារអាមេរិក,ឥណទានជាប្រាក់រៀលមានជាង៨០៨លានដុល្លារអាមេរិកស្មើនិងជាង១៤%នៃឥណទានសរុប។

ចំណែកប្រាក់បញ្ជើសន្សំនៅក្នុងឆ្នំា២០២៣, បើគិតត្រឹមបំណាច់ខែមីនាឆ្នំា២០២៣មាន ៦.៦០៦លានដុល្លារអាមេរិក ក្នុងនោះប្រាក់បញ្ជើសន្សំជាប្រាក់រៀលមានជាង ១.៥១២លានដុល្លារអាមេរិកស្មើនិង២២,៨៩% មានន័យថាប្រាក់បញ្ជើសន្សំមានចំនួនច្រើនជាងឆ្នំា២០២២, ចំណែកឥណទានយើងមាន៦៤០០លានដុល្លារអាមេរិក, ឥណទានជាប្រាក់រៀល៩៤៧លានដុល្លារអាមេរិកស្មើនិង១៤,៧៩%នៃឥណទានសរុប។

លោកបណ្ឌិត បន្តថា «បើយោងតាមតួរលេខទំាង២ខាងលើក្នុងរយៈពេលដូចគ្នាក្នុងឆ្នំា២០២២តម្រូវការនៃការប្រើប្រាស់ប្រាក់រៀលជាឥណទានក៏ដូចជាប្រាក់បញ្ជើសន្សំមានចំនួនកើនខុសគ្នាច្រើន»៕ សារេត

The post ធនាគារក្នុងស្រុកមួយដាក់បញ្ចូលប្រាក់រៀលក្នុងម៉ាស៊ីនATMជាង១ពាន់គ្រឿងដើម្បីគំាំទ្រដល់ការប្រើប្រាស់របស់ពលរដ្ឋ appeared first on .

លោកបណ្ឌិត គី សេរីវឌ្ឍន៍ ប្រធានវិទ្យាស្ថានសិក្សាចិននៃរាជបណ្ឌិត្យសភាកម្ពុជា មានប្រសាសន៍ថា ចំពោះបញ្ហាដួលរលំធនាគារធំៗរបស់សហរដ្ឋអាមេរិកគឺជាការដួលរំលំនៃវិស័យធនាគារឯកជនផ្ទាល់ខ្លួនវាមិនមែនប្រព័ន្ធហិរញ្ញវត្ថុរបស់សហរដ្ឋអាមេរិកនោះទេ។

លោកបណ្ឌិត មានប្រសាសន៍ថា៖ «យើងឃើញថា នៅពេលបច្ចុប្បន្ននេះ ធនាគារកណ្តាលរបស់សហរដ្ឋអាមេរិក មិនទាន់ធ្វើអន្តរាគមន៍ណាមួយចូលទៅជួយធនាគារ ដែលបានដួលរលំនៅឡើយទេ។ គេកំពុងតែធ្វើការស៊ើបអង្កេត ហើយមូលហេតុធនាគារទាំងនេះដួលរលំ ព្រោះតែវិបត្តិនៃ Cryptocurrency វាឡើងដល់កម្រិតខ្ពស់ពេកហើយវាជាប់គាំង ។ អុីចឹង កត្តានេះគឺជាមូលហេតុមួយធ្វើឱ្យដួលរលំធនាគារឯកជន វាមិនជាប់ពាក់ព័ន្ធទៅ នឹងប្រព័ន្ធហិរញ្ញវត្ថុរបស់ធនាគារធំៗផ្សេងទៀតនោះទេ ។ ម្លោះហើយ បញ្ហាដែលកើតឡើងដោយសារវិបត្តិនៃ Cryptocurrencyវាមិនមានផលប៉ះពាល់មកដល់ប្រព័ន្ធធនាគារនៅកម្ពុជាទេ ខណៈនៅកម្ពុជាយើងមិនបានប្រើប្រាស់ Cryptocurrency»។

ផ្ដល់បទសម្ភាសន៍ជាមួយ Oknha News ផ្ទាល់ លោកបណ្ឌិត អុិន ចាន់នី ប្រធាននាយកប្រតិបត្តិនៃធនាគារអេស៊ីលីដា មានប្រសាសន៍ថា បញ្ហាធនាគារមួយចំនួនដួលរលំនៅសហរដ្ឋអាមេរិកនេះ គ្មានពាក់ព័ន្ធទាល់តែសោះ និងប្រព័ន្ធធនាគារនៅកម្ពុជា ព្រោះធនាគារនៅកម្ពុជា ស្ថិតនៅក្រោមច្បាប់និយ័តកម្មស្តីពីការគ្រប់គ្រងធនាគារនិងហិរញ្ញវត្ថុនៅកម្ពុជា ដែលមានស្ថាប័នធនាគារជាតិនៃកម្ពុជា ជាអាណាព្យាបាល។ យើងមានបទប្បញ្ញត្តិប្រុងប្រយ័ត្នតឹងរឹង និងរឹងមាំ ដែលធនាគារ និងគ្រឹះស្ថានមីក្រូហិរញ្ញវត្ថុទាំងអស់ បានអនុវត្តយ៉ាងខ្ជាប់ខ្ជួន ទៅតាមប្បញ្ញត្តិច្បាប់នៃធនាគារជាតិនៃកម្ពុជា។

លោកបណ្ឌិត បញ្ជាក់ថា៖ «អុីចឹងសូមបញ្ជាក់ម្តងទៀតថា ការដួលរលំធនាគារមួយចំនួននៅសហរដ្ឋអាមេរិកនេះ គឺគ្មានពាក់ព័ន្ធជាមួយកម្ពុជាទេ ព្រោះសេវាកម្មធនាគារដែលផ្តល់ជូនពលរដ្ឋនៅពេលសព្វថ្ងៃនេះដូចជា ការប្រមូលប្រាក់បញ្ញើសន្សំ,ប្រាក់កម្ចី និងផ្តល់មធ្យោបាយទូទាត់ ទាំងនេះ ធ្វើនៅតែនៅកម្ពុជាទេ។ អុីចឹង មិនមែនធនាគារនៅក្នុងស្រុកប្រមូលប្រាក់បញ្ញើសន្សំពីក្នុងស្រុកយកទៅធ្វើអាជីវកម្មនៅបរទេស គ្មានទាល់តែសោះ គឺសម្រាប់តែផ្តល់សេវាកម្មនៅកម្ពុជា»។

លោកបណ្ឌិតលើកឡើងថា សម្តេចតេជោហ៊ុនសែន នាយករដ្ឋមន្ត្រី លោកក៏ទើបតែបានអំពាវនាវដល់ប្រជាពលរដ្ឋកម្ពុជាកាលថ្មីៗនេះ ពិតជាមានសារៈសំខាន់ណាស់ គឺជាសេចក្តីអំពាវនាវដ៏ថ្លៃថ្លា ពិសេសអតិថិជនរបស់គ្រឹះស្ថានធនាគារ និងហិរញ្ញវត្ថុ ត្រូវតោងគិតថា អ្វីដែលយើងកំពុងតែប្រើប្រាស់សេវាហិរញ្ញវត្ថុនៅកម្ពុជា គឺមានសុវត្ថិភាពខ្ពស់ ស្ថិតនៅក្រោមច្បាប់ដែលគ្រប់គ្រងដោយធនាគារជាតិនៃកម្ពុជា ហើយមូលនិធិដែលវិស័យធនាគារ និងហិរញ្ញវត្ថុបានប្រមូលបាន គឺវិនិយោគនៅក្នុងស្រុក មិនបានយកទៅវិនិយោគនៅខាងក្រៅប្រទេសនោះទេ។ ដូចនេះ មិនគួរគម្បីប្រជាពលរដ្ឋ ក៏ដូចជាអតិថិជនរបស់ធនាគារមានការភ័យព្រួយ។

ជុំវិញការបកស្រាយពីអ្នកជំនាញក្នុងវិស័យធនាគារ និងហិរញ្ញវត្ថុ ដែលកំពុងក្លាយជាប្រធានបទរសើបនេះដែរ អ្នកនាំពាក្យរបស់សមាគមមីក្រូហិរញ្ញវត្ថុកម្ពុជា ក៏បានថ្លែងអណរគុណទៅប្រមុខរាជរដ្ឋាភិបាលកម្ពុជា ដែលបានចេញមុខមកបកស្រាយ និងបង្ហាញអំពីស្ថានភាពពិតជាក់ស្តែងរបស់វិស័យហិរញ្ញវត្ថុនៅកម្ពុជា។

លោក កាំង តុងងី អ្នកនាំពាក្យរបស់សមាគមមីក្រូហិរញ្ញវត្ថុកម្ពុជាបានឱ្យដឹងថា នៅប៉ុន្មានថ្លៃកន្លងមកនេះយើងឃើញថាសាធារណជនទទួលបានព័ត៌មាន ពីបណ្តាញផ្សព្វផ្សាយនានានៅក្នុងសង្គម ហើយមានប្រជាពលរដ្ឋខ្លះ មានការបារម្ភ ថាតើការដួលរលំធនាគារនៅសហរដ្ឋអាមេរិកនេះ វាអាចដូចទៅនិងឆ្នាំ២០០៨ ដែលវារាលដាលទៅជាវិបត្តិសកលដែរ ឬក៏ទេ?

លោកលើកឡើងថា ការចេញមុខមកធានារបស់សម្តេចតេជោហ៊ុនសែន វាមានតួនាទីសំខាន់ណាស់ដើម្បីសាងនៅទំនុកចិត្តនិងកសាងនៅស្ថិរភាពរបស់វិស័យយើង ពីព្រោះនៅប្រទេសណាក៏ដូចគ្នាទេវិស័យធនាគារ និងហិរញញវត្ថុយើងពឹងច្រើនទៅលើការដាក់បញ្ញើរបស់ប្រជាពលរដ្ឋ អុីចឹងកាលណាប្រជាពលរដ្ឋអត់មានទំនុកចិត្ត ហើយពេលខ្លះគាត់មានការភ័យស្លន់ស្លោរនៅពេលរឿងការពិតវាមិនអាចកើតឡើង វាក៏អាចធ្វើឱ្យប៉ះពាល់អវិជ្ជមានមកលើវិស័យហិរញ្ញវត្ថុដែរ ។ ដូចយើងបានដឹងហើយថា វិស័យហិរញ្ញវត្ថុកាលណាវាប៉ះពាល់ វានឹងរាលដាលទៅដល់វិស័យផ្សេងទៀតដែរ។

លោក កាំង តុងងី បញ្ជាក់ថា៖ «បើយើងមើលឱ្យលម្អិតវិបត្តិនៃការដួលរំលំធនាគារនៅសហរដ្ឋអាមេរិកនេះមិនអាចជះឥទ្ធិពលមកលើវិស័យហិរញ្ញវត្ថុនៅកម្ពុជាបានទេ ដោយសារធនារគារនៅសហរដ្ឋអាមេរិក២ឬ៣ បានដួលរលំនេះ សុទ្ធតែជាប់ពាក់ព័ន្ធជាមួយនិងCryptocurrency ពាក់ព័ន្ធ និងការវិនិយោគស្តុក និងបច្ចេកវិទ្យាជាដើម។ ចំណែកនៅកម្ពុជាCryptocurrency មិនត្រូវបានទទួលស្គាល់ទេ គឺយើងចាត់ទុកថាវាខុសច្បាប់ ហើយដោយឡែកនៅកម្ពុជា ធនាគារអត់អាចវិនិយោគដូចនៅសហរដ្ឋអាមេរិកបានទេ»។

គួររំឭកដែរថា កាលពីព្រឹកថ្ងៃទី១៦ ខែមីនា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអំពាវនាវដល់បងប្អូនប្រជាពលរដ្ឋ ដែលបានដាក់ប្រាក់បញ្ញើតាមប្រព័ន្ធធនាគារនៅកម្ពុជា កុំមានការភ័យស្លន់ស្លោ រឿងធនាគារពាណិជ្ជចំនួន ២របស់អាមេរិកដួលរលំ ព្រោះមិនប៉ះពាល់ប្រព័ន្ធធនាគារកម្ពុជាទេ។

សម្តេចតេជោបញ្ជាក់ថា៖ «ការភ័យស្លន់ស្លោរត់ទៅដក ប្រាក់ចេញពីប្រព័ន្ធធនាគារមុនកាលកំណត់ គឺជាការខាងបង់ប្រយោជន៍ របស់បងប្អូនទៅវិញ ព្រោះតែខាតបង់ការប្រាក់ ដែលព្រមព្រៀងជាមួយធនាគារ។»

ជាមួយគ្នានេះ សម្តេចតេជោ ហ៊ុន សែន បានអំពាវនាវដល់បងប្អូនប្រជាពលរដ្ឋ ជឿទុកចិត្តសមត្ថភាពគ្រប់គ្រងរបស់រាជរដ្ឋាភិបាល លើវិស័យហិរញ្ញវត្ថុ និងធនាគារនៅកម្ពុជា មានភាពរឹងមាំ មិនមានផលប៉ះពាល់អ្វីនោះឡើយ។ អត្ថបទ៖សារេត

The post អ្នកជំនាញ៖ បញ្ហាធនាគារមួយចំនួនដួលរលំនៅសហរដ្ឋអាមេរិកនេះ គ្មានពាក់ព័ន្ធទាល់តែសោះ ជាមួយប្រព័ន្ធធនាគារនៅកម្ពុជា appeared first on .

កាលពីចុងខែធ្នូ ឆ្នាំ២០១៧ ធនាគារ​ អេស៊ីលីដា ទទួល​បានអាជ្ញាប័ណ្ណ​ពី​រដ្ឋាភិបាល​​ឡាវ ដើម្បី​បង្កើត​សាខា​បុត្រសម្ព័ន្ធ​ធនាគារ​ពាណិជ្ជ​នៅ​ក្ក្នុងទីក្រុងវៀងច័ន្ទ។ នេះ​ជា​លើក​ទី១ហើយ​ដែល​ត្រូវ​បាន​គេ​ដឹង​ថា ក្រុមហ៊ុន​​កម្ពុជា បាន​ធ្វើ​ការវិនិយោគ​ជា​ផ្លូវ​ការ​ទៅ​ក្រៅ​ប្រទេសផ្នែកធនាគារ និងហិរញ្ញវត្ថុ ។

ធនាគារបង្កើតឡើងដោយកូនខ្មែរសុទ្ធសាធ បណ្ឌិត អ៉ិន ចាន់នី នៅក្រៅប្រទេសមូយនេះ មាន​ឈ្មោះ​ថា ធនាគារ អេស៊ីលីដា ឡាវ ACLEDA Bank Lao Ltd. (ABL) ចាប់​ផ្តើម​បើក​ទ្វារ​ដំណើរការ​នៅ​ទីក្រុង​វៀង​ច័ន្ទ នា​ពាក់​កណ្តាល​ឆ្នាំ​២០០៨កន្លងទៅ។ ធនាគារ​នេះបង្កើត​ឡើង​ក្នុង​ទម្រង់​ជា​ក្រុមហ៊ុន​សាជីវកម្ម​ដាច់​ដោយ​ឡែក​មួយ ដែល​បាន​បង្កើត​និង​ចុះបញ្ជី​តាម​ច្បាប់​របស់​​ឡាវ ដោយ​មាន​ភាគហ៊ុនិក​សំខាន់ៗ​ចូល​រួម​ ដូច​ជា ធនាគារ​អេស៊ីលីដា ភីអិលស៊ី កាន់​កាប់​ភាគហ៊ុន​ចំនួន ៤៧,៥% និង​ភាគហ៊ុន​ដែល​នៅ​សល់​កាន់​កាប់​ដោយ​ស្ថាប័ន​ធំៗ​៣​ របស់​ប្រទេស​ហូល្លង់​គឺ ធនាគារ​អភិវឌ្ឍន៍​ហូល្លង់ (FMO) មាន​ភាគហ៊ុន​ចំនួន ៣០% និង​ភាគហ៊ុន​ចំនួន ២២,៥% ដែល​នៅ​សល់ កាន់​កាប់​តាម​ចំណែក​ភាគហ៊ុន​ស្មើៗ​គ្នា​ដោយ​ក្រុម​ធនាគារ​ឯកជន​ហូល្លង់ (Triodos Group) រួម​មាន Stichting Triodos Doen និង Triodos Fair Share Fund ។

ចំណែកដើមទុន​ដែល​បាន​ចុះ​បញ្ជី​មាន​ចំនួន ១០០​ពាន់​លាន​គីប (Kip) (ប្រហែល​១០,៥​លាន​ដុល្លារ​អាមេរិក) ដោយ​ធ្វើ​ការ​ទូទាត់​តាម​តម្លៃ ១០.០០០គីប (Kip) ក្នុង​មួយ​ភាគហ៊ុន សមាមាត្រ​ទៅ​នឹង​ភាគហ៊ុន​របស់​ភាគហ៊ុនិក​នីមួយៗ។

ជាមួយនឹងការបើកដំណើរការសាខាបុត្រសម្ព័ន្ធនៅប្រទេសឡាវ នាគ្រានោះ លោក វ៉ាន់ សារឿន ត្រូវ​បាន​តែង​​តាំង​ជា​អគ្គនាយក ធនាគារ​អេស៊ីលីដាឡាវ ដែលមាន​បទពិសោធន៍១៥​ឆ្នាំក្នុងវិស័យធនាគារ និងហិរញ្ញវត្ថុ។

សូមបញ្ជាក់ថា ត្រឹមឆ្នាំ២០២២នេះ ធនាគារ អេស៊ីលីដា ជាធនាគារពាណិជ្ជខ្មែរដ៏ធំជាងគេ មានអាយុ ៣០ឆ្នាំហើយដែលបាននិងកំពុងចាក់ឫសយ៉ាងជ្រៅ និងរឹងមាំ នៅក្នុងវិស័យធនាគារ និងហិរញ្ញវត្ថុនៅកម្ពុជា។

ធនាគារ អេស៊ីលីដា ក៏ជាធនាគារពាណិជ្ជខ្មែរដំបូងគេ ដែលបានចុះបញ្ជីលក់មូលបត្រកម្មសិទ្ធិក្នុងក្រុមហ៊ុនផ្សារមូលបត្រកម្ពុជា និងជាធនាគារខ្មែរទីមួយដែលបានវិនិយោគក្រុមហ៊ុនបុត្រសម្ព័ន្ធ ជាធនាគារ នៅប្រទេសឡាវ និងជាស្ថាប័នមីក្រូហិរញ្ញវត្ថុ នៅប្រទេសមីយ៉ាន់ម៉ា ផងដែរ៕

The post តើបណ្ឌិត អ៉ិន ចាន់នី ពង្រីកអេស៊ីលីដាទៅឡាវ ប្រើដើមទុនប៉ុន្មាន? នរណាចូលហ៊ុនខ្លះ? appeared first on .

សំណង់​អគារការិយាល័យ​កណ្តាល ដែលជាកន្លែងស្នូលធំធ្វើការរបស់បណ្ឌិត អ៉ិន ចាន់នី ប្រធានអគ្គនាយកប្រតិបត្តិ អេស៊ីលីដា ចាប់​ផ្តើមសាងសង់​ក្នុង​ខែ​មករា ឆ្នាំ​២០១៣ ដែល​មាន​កម្ពស់ ២០ជាន់ និង​អគារ​ក្រោមដី​ចំនួន ៤ជាន់ មាន​ផ្ទៃក្រឡា​បម្រើ​ការងារ​សរុប​ចំនួន ៤៣.០០០ ម៉ែត្រការ៉េ ហើយយចាយថវិកា​ចំនួនប្រមាណ ៧៦.៦៩៥.២២៤ ដុល្លារ​អាមេរិក។

អគារការិយាល័យ​កណ្តាល​នេះ គូស​ប្លង់​​ដោយ​ក្រុមហ៊ុន Aedas មាន​មូលដ្ឋាននៅ​ទីក្រុង​ហុងកុង និង​ក្រុមហ៊ុន iLi Consulting Engineers Mekong Ltd. ជា​ទីប្រឹក្សា​បច្ចេកទេស​ផ្នែក​វិស្វកម្ម, Optima Consultant Ltd. ជា​ទីប្រឹក្សា​បច្ចេកទេស​ផ្នែក​មេកានិក អគ្គិសនី និង​ប្រព័ន្ធ​បណ្តាញ​ទឹក និង BK Asia Pacific ជា​ទីប្រឹក្សា​ផ្នែក​គ្រប់គ្រង​ចំណាយ។

អគារ​នេះសាងសង់ដោយ​ក្រុមហ៊ុន HYUNDAI Eengineering Co., Ltd. ប្រើប្រាស់​រយៈពេល​សាងសង់​ចំនួន ៣៤ខែ បំពាក់​ទៅ​ដោយ​ឧបករណ៍​​សម្ភារ​ការិយាល័យ​ទំនើប និង​ទាន់សម័យ ព្រមទាំង​មានប្រព័ន្ធ​ការពារ​សន្តិសុខ ការសន្សំសំចៃ​ថាមពល​ប្រើប្រាស់ ការបង្ការ​អគ្គិភ័យ បណ្តាញ​ត្រួតពិនិត្យ និង​ប្រព័ន្ធ​ទូរគមនាគមន៍ ហើយនិង​ប្រព័ន្ធ​គាំទ្រ​បច្ចេកវិជ្ជា​ព័ត៌មាន រួមទាំង​មានកន្លែង​សម្រាប់​ចតយានយន្ត​គ្រប់ប្រភេទ​ចំនួន ១.២៣៩ គ្រឿង និងមាន​អាហារដ្ឋាន​សម្រាប់​បុគ្គលិក​ដែលប្រកបដោយ​ផាសុកភាព​ខ្ពស់៕

The post តើបណ្ឌិត អ៉ិន ចាន់នី ចាយលុយអស់ប៉ុន្មានសង់អគារការិយាល័យកណ្តាល ធនាគារ អេស៊ីលីដា? appeared first on .

ធនាគារជាតិ​នៃ​កម្ពុជា​ ឱ្យ​ដឹង​ថា អតិផរណា​បាន​កើនឡើង​ដល់​ទៅ ៧,២ ភាគរយ ដែល​ជា​ការ​កើនឡើង​មួយ​ខ្ពស់​មិន​ធ្លាប់​មាន​។ ការ​កើនឡើង​អតិថរណា ធនាគារជាតិគូសបញ្ជាក់ថាបណ្ដាល​មកពី​វិបត្តិ​សង្គ្រាម​រវាង​រុស្សី​និង​អ៊ុយក្រែន ដែល​ជះឥទ្ធិពល​លើ​តម្លៃ​ប្រេង​ឥន្ធនៈ និង​ម្ហូបអាហារ​ពិភពលោក​។

នៅចំពោះមុខអតិផរណា មន្រ្តីក្រសួងសេដ្ឋកិច្ចនិងហិរញ្ញវត្ថុបានលើកឡើងជាសាធារណៈក្នុងសន្និសីទកាសែតនៅថ្ងៃទី២ ខែកក្កដាថា រដ្ឋាភិបាលត្រៀមបញ្ចេញកញ្ចប់ថវិកាដោះស្រាយបញ្ហានេះ។ គម្រោងនៃការបញ្ចេញកញ្ចប់ថវិកាដោះស្រាយបញ្ហាអតិផរណា ស្ថិតក្នុងកញ្ចប់តែមួយនៃការផ្ដល់ប្រាក់ឧបត្ថម្ភជូនពលរដ្ឋក្រីក្រនៅក្នុងបរិបទកូវីដ១៩។

លោក មាស សុខសេនសាន អ្នកនាំពាក្យក្រសួងសេដ្ឋកិច្ចនិងហិរញ្ញវត្ថុ គូសបញ្ជាក់ថា អន្តរាគមន៍នេះធ្វើឡើងនៅក្នុងបរិបទកម្ពុជាប្រឈមនឹងរលកឆ្លងទីពីរនៃជំងឺកូវីដ១៩ ដែលជះឥទ្ធិលពលខ្លាំងដល់អតិផរណារបស់ប្រជាជនក្រីក្រ។

ជុំបញ្ហាព្រួយបារម្ភពីរឿងអតិផរណាកើនឡើងនេះ បណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ក្នុងវេទិកាជំនួបពិភាក្សាជាមួយអ្នកជំនួញនៅប្រទេសកម្ពុជា នាព្រឹកថ្ងៃទី២៦ ខែសីហានេះ បានពន្យល់ថា អតិផរណាឆ្នាំនេះមានត្រឹមតែ ៥ ឬខែខ្លះជាង ៩ ភាគរយ តែមិនខ្ពស់ដូចឆ្នាំ២០០៨ ដែលមានរហូតដល់ទៅ ១៨,៧៥ភាគរយនោះទេ។ ប៉ុន្តែពេលនោះរាជរដ្ឋាភិបាលបានដោះស្រាយបានយ៉ាងល្អ។

លោកថា បញ្ហាអតិផរណានេះគឺបណ្តាលមកពីតម្លៃប្រេងឡើងថ្លៃដែលធ្វើឱ្យការដឹកជញ្ជួន ការផលិត និងទំនិញបានឡើងថ្លៃ ដែលបញ្ហានេះបណ្តាលមកពីកក្តាខាងក្រៅ។ ប៉ុន្តែនៅពេលដែលប្រេងចុះថ្លៃ អតិផរណាក៏ចុះតាមនឹងដែរ។

របាយការណ៍​ធនាគារ​ជជាតិនៃកម្ពុជា​ឱ្យ​ដឹង​ថា កំណើន​អតិផរណា​នេះ​កើតឡើង​ស្របពេល​ប្រទេស​មួយចំនួន​នៅក្នុង​ពិភពលោក​កំពុង​ជួប​បញ្ហា​នេះ​ដែរ។

អ្នកជំនាញ​សេដ្ឋកិច្ច​នៃ​រាជបណ្ឌិត្យ​​សភា​កម្ពុជា បណ្ឌិត គី សេរី​វឌ្ឍ បានឲ្យដឹងដែរថា ចំពោះ​ការ​​កើនឡើង​នៃ​អតិផរណា ដោយ​​សារ​តម្លៃ​ប្រេងឥន្ធនៈ​ឡើងថ្លៃ​នេះ​នៅមាន​តិចតួច​នោះទេ អ្វីដែល​គួរឱ្យ​បារម្ភ​ជាងនេះទៀត​នោះ គឺ​ការផ្គត់ផ្គង់​អគ្គិសនី​នៅ​កម្ពុជា ដោយសារតែ​រោងចក្រ​អគ្គិសនី​មួយចំនួន​នៅ​ប្រើ​ប្រេងឥន្ធនៈ​នៅឡើយ ដែល​ធ្វើឱ្យ​រដ្ឋាភិបាល​ត្រូវ​ចេញ​ខាត​ថ្លៃ​ប្រេង ដើម្បី​ធ្វើយ៉ាងណា​ឱ្យមាន​ស្តុក​គ្រប់គ្រាន់​សម្រាប់​ការ​​ផលិត​អគ្គិសនី ដើម្បី​រក្សា​ថ្លៃ​អគ្គិសនី​មិនឱ្យ​កើនឡើង​។

ទន្ទឹមនឹងនេះ បណ្ឌិត គី សិរីវឌ្ឍ ស្នើឲ្យប្រជាពលរដ្ឋចូលរួមកាត់បន្ថយការប្រើប្រាស់ ជាពិសេសពាក់ព័ន្ធប្រេងឥន្ទនៈដែលជាដើមហេតុធ្វើឲ្យថ្លៃប្រេងមានការកើនឡើង បើទោះបីមួយរយៈចុងក្រោយនេះតម្លៃប្រេងបានធ្លាក់ចុះក៏ដោយ នៅតែមានភាពមិនប្រាកដប្រជាច្បាស់នៅឡើយ។

យ៉ាងណា អ្នកជំនាញក្នុងវិស័យធនាគារ និងហិរញ្ញវត្ថុ បណ្ឌិត អ៊ិន ចាន់នី គូសបញ្ជាក់ថា រាជរដ្ឋាភិបាលកម្ពុជាមានវិធានការគ្រប់គ្រាន់ក្នុងការដោះស្រាយ និងទប់ទល់បញ្ហាអតិផរណានេះប្រកបដោយប្រសិទ្ធភាពខ្ពស់។ លោកអះអាងថា កម្លាំងលូតលាស់សេដ្ឋកិច្ចប្រទេសកម្ពុជានៅតែខ្លាំង ពិសេសឆ្នាំ២០២២ និងបន្តរីកចម្រើនដល់ឆ្នាំ២០២៧ខាងមុខ។

លោកបន្តថា ការរីកលូតលាស់សេដ្ឋកិច្ចខ្លាំងនេះដោយសារតែកម្ពុជាមានហេដ្ឋារចនាសម្ព័ន្ធសំខាន់ៗច្រើនដូចជាផ្លូវគមនាគមន៍ ផ្លូវល្បឿនលឿន ផ្លូវក្រវ៉ាត់ទីក្រុង និងផ្លូវសំខាន់ផ្សេងៗទៀត ព្រមទាំងមានព្រលានយន្តហោះថ្មីកំពុងសាងសង់ដែលជួយសម្រួលក្នុងការដឹកជញ្ជួនទំនិញផ្សេងៗ។

បណ្ឌិត អ៊ិនចាន់នី បានបន្តទៀតថា ក្រៅពីនេះកម្ពុជាមានកម្លាំងពលកម្មវ័យក្មេងច្រើនជាង ៦៧ ភាគរយ និងមានច្បាប់វិនិយោគថ្មីដែលបានជួយសម្រួល និងលើកទឹកចិត្តដល់អ្នកវិនិយោគបរទេសមកបណ្តាក់ទុនកាន់តែច្រើនថែមទៀត។

ក្រសួង​សេដ្ឋកិច្ច​ បានព្យាករណ៍​ថា ​សេដ្ឋកិច្ច​កម្ពុជា​ក្នុង​ឆ្នាំ២០២២នេះ​ នឹង​ស្ទុះងើបឡើង​ក្នុង​អត្រា៥.៦%​ និងវិល​ទៅរក​កំណើន​សេដ្ឋកិច្ច​ប្រមាណ៧% ​ក្នុង​ឆ្នាំ២០២៤​ខាងមុខ។​ ការព្យាករ​កំណើន​នេះ ​ដោយផ្អែក​ថា​ កម្ពុជា​បានបើក​ដំណើរការ​សេដ្ឋកិច្ច​សង្គម​ឡើងវិញ​ អត្រាចាក់វ៉ាក់សាំង​ក៏កាន់តែខ្ពស់​ និង​ទំហំនាំចេញ​របស់​កម្ពុជា​មានការកើន​ឡើង​ជាលំដាប់​ បើទោះបី​ស្ថិត​នៅក្នុង​បរិបទ​ជំងឺកូវីដ​១៩ក៏ដោយ។​

បើតាម របាយការណ៍របស់ក្រសួងសេដ្ឋកិច្ច ក្តីរំពឹងចំពោះកំណើនសេដ្ឋកិច្ចឆ្នាំ២០២២ខាងដើមនេះ គឺមានការចូលរួមចំណែកពីវិស័យជំរុញកំណើនសេដ្ឋកិច្ចសំខាន់ៗមួយចំនួនដូចជា៖ វិស័យកសិកម្ម វិស័យកាត់ដេរ វិស័យកម្មន្តសាលមិនមែនកាត់ដេរ វិស័យអចលនទ្រព្យ វិស័យសណ្ឋាគារ និងភោជនីយដ្ឋាន វិស័យសំណង់ វិស័យដឹកជញ្ចូន និងគមនាគមន៍ និងការលក់ដុំ រាយជាដើម៕

The post អ្នកជំនាញពន្យល់ពីបញ្ហាអតិផរណាកើនឡើង ដែលជាក្តីព្រួយបារម្ភរបស់វិនិយោគិន appeared first on .

លើកឡើងក្នុងកិច្ចប្រជុំផ្គូផ្គងអាជីវកម្មកសិកម្ម អេស៊ីលីដា ដែលមានការចូលរួមពីវិនិយោគិនក្នុងស្រុក និងបរទេស ដើម្បីបង្កើតបណ្តាញអាជីវកម្មទូលំទូលាយ និងឱកាសដើម្បីវិនិយោគលើវិស័យកសិកម្មនៅកម្ពុជា នៅថ្ងៃទី២១ ខែកក្កដានេះ បណ្ឌិត អ៊ិន ចាន់នី ប្រធាននាយកគ្រប់គ្រងធនាគារ អេស៊ីលីដា ភីអិលស៊ី បានឱ្យដឹងថា៖ «ដើម្បីចូលរួមជាមួយរដ្ឋាភិបាល ក្នុងការលើកកម្ពស់វិស័យកសិកម្ម ដើម្បីរួមចំណែកដល់កំណើនសេដ្ឋកិច្ច គិតត្រឹមខែមិថុនា ឆ្នាំ២០២២ ធនាគារអេស៊ីលីដា បានផ្តល់ប្រាក់កម្ចីយ៉ាងច្រើនដល់វិស័យកសិកម្មជាមួយនឹងចំនួនទឹកប្រាក់ចំនួន ១.២១ ពាន់លានដុល្លារអាមេរិក ស្មើនឹង ២០.៧៥% នៃផលប័ត្រប្រាក់កម្ចីសរុប របស់ធនាគារ»។

លោកគូសបញ្ជាក់ថា វិស័យកសិកម្មបានដើរតួនាទីយ៉ាងសំខាន់ក្នុងការជំរុញ និងការចូលរួមចំណែកយ៉ាងច្រើន ដល់ការអភិវឌ្ឍន៍សេដ្ឋកិច្ចសង្គម និងផ្តល់ការងារដល់កម្លាំងពលកម្មភាគច្រើននៅកម្ពុជា។ នាពេលនេះ វិស័យកសិកម្មបានដើរតួនាទីយ៉ាងសំខាន់ ក្នុងការធានាសន្តិសុខស្បៀង និងផលិតផលអាហារូបត្ថម្ភ ប្រកបដោយនិរន្តរភាពសម្រាប់ទាំងប្រទេសកម្ពុជា និងប្រទេសដទៃទៀតក្នុងពិភពលោក។

សូមជម្រាបថា គិតត្រឹមខែមីនា ឆ្នាំ២០២២ ធនាគារអេស៊ីលីដា បានផ្តល់ប្រាក់កម្ចីជាង ៣៤% ដល់វិស័យកសិកម្មនៃវិស័យធនាគារនៅកម្ពុជា។ ដោយមើលឃើញថា ធនាគារបានផ្តល់ប្រាក់កម្ចីយ៉ាងច្រើន ដល់វិស័យកសិកម្ម, អង្គការ JICA និង SMBC បានផ្តល់ប្រាក់កម្ចីសហហិរញ្ញប្បទានចំនួន ១៣៥ លានដុល្លារដល់ធនាគារអេស៊ីលីដា សម្រាប់ផ្តល់កម្ចីបន្ថែមដល់វិស័យកសិកម្មនៅកម្ពុជា។

បន្ថែមទៀតនោះ ធនាគារ អេស៊ីលីដា និងធនាគារគ្រប់គ្រងដោយរដ្ឋ ធនាគារកសិកម្ម និងអភិវឌ្ឍន៍ជនបទ (ARDB) បានផ្តល់កម្ចីសហហិរញ្ញប្បទាន ដល់វិស័យកសិកម្មស្មើៗគ្នាក្នុងចំនួនទឹកប្រាក់រហូតដល់ ៤០លានដុល្លារអាមេរិក។ អនុវត្តតាមគម្រោងសហហិរញ្ញប្បទានទាំងនេះ វានឹងអាចឱ្យធនាគារផ្តល់ប្រាក់កម្ចីកាន់តែច្រើន ដល់វិស័យកសិកម្មនៅក្នុងឧស្សាហកម្ម៕

The post ត្រឹមពាក់កណ្តាលឆ្នាំនេះ អេស៊ីលីដា ផ្តល់ប្រាក់កម្ចី ១.២១ពាន់លានដុល្ការ ដើម្បីជំរុញវិស័យកសិកម្ម appeared first on .

The post ធនាគារ អេស៊ីលីដា ឧបត្ថម្ភទឹកប្រាក់ ៨០០លានរៀល ជូនកាកបាទក្រហមកម្ពុជា appeared first on .

សូមចុច Subscribe Telegram oknha_news ដើម្បីទទួលបានព័ត៌មានគ្រប់​សកម្មភាព​ឧកញ៉ា​ អាជីវកម្ម ចែក​រំលែក ជោគជ័យ

ប្រជាជនជាច្រើនបានស្គាល់ធនាគារ អេស៊ីលីដា ដែលជាធនាគារដ៏ចំណាស់ក្នុងស្រុក និងមានសាខារាប់រយនៅកម្ពុជា។ ប៉ុន្ដែ មានមនុស្សមិនច្រើនទេ ដែលបានដឹងថា តើនរណាដែលនៅពីក្រោយភាពជោគជ័យដ៏អស្ចារ្យរបស់ធនាគារ អេស៊ីលីដា?

លោកបណ្ឌិត អ៊ិន ចាន់នី ជាជន​ជាតិ​ខ្មែរ កើត​ក្នុង​ខែ​មិថុនា ឆ្នាំ១៩៦០ មានស្រុកកំណើតនៅខេត្តព្រៃវែង និងមានឪពុកជាមន្ត្រីយោធាចូលនិវត្តធ្វើការងារជាចារកិច្ច។ លោកបានទទួលអាហារូបករណ៍ទៅសិក្សានៅអាមេរិក មុខជំនាញ «ហិរញ្ញវត្ថុសម្រាប់អភិវឌ្ឍន៍សហគ្រាស» នៅសាកលវិទ្យាល័យ Harvard ដ៏ល្បីរបស់ពិភពលោក ខណៈដែលលោកធ្វើជាគ្រូបង្រៀន។ ឆ្នាំបន្ទាប់លោកក៏បានធ្វើការងារក្នុងវិស័យហរិញ្ញវត្ថុជាមួយអង្គការពលកម្មអន្តរជាតិ ហៅកាត់ថា ILO និងកម្មវិធីអភិវឌ្ឍន៍របស់អង្គការសហប្រជាជាតិ ហៅកាត់ថា UNDP។

លោក អ៊ិន ចាន់នី ជា​ប្រធាន​នាយក​ប្រតិបត្តិ របស់​ធនាគារ អេស៊ីលីដា ភីអិលស៊ី ដែលបាន​បង្កើត​ឡើង​នៅ​ក្នុង​ឆ្នាំ​២០០០ ។ លោកបណិ្ឌត​បានចូលរួម​ក្នុង​ក្រុមប្រឹក្សាភិបាល​របស់​ធនាគារ អេស៊ីលីដា ​នៅ​ខែកញ្ញា ឆ្នាំ​២០១៤ ។ បណ្ឌិត អ៊ិន ចាន់នី ជា​សហស្ថាបនិក​របស់​សមាគម​ទីភ្នាក់ងារ​អភិវឌ្ឍ​ន៍​សេដ្ឋកិច្ច​កម្ពុជា (​អេស៊ីលីដា) តាំង​ពីខែ​មករា ឆ្នាំ១៩៩៣ ។ ក្នុង​តួនាទីជាប្រធាន​នាយក​ប្រតិបត្តិ លោក​បណ្ឌិត​ជា​អ្នកដឹក​នាំគណៈកម្មាធិការ​ប្រតិបត្តិ ទទួល​ខុស​ត្រូវ​រៀបចំ​ផែនការ​យុទ្ធសាស្ត្រ​រួម និង​ដំណើរ​ការងារ​អាជីវកម្មប្រចាំថ្ងៃ​របស់​ធនាគារ អេស៊ីលីដា ព្រម​ទាំង​ប្រតិបត្តិផែនការ​អាជីវកម្ម ។ លោកបណ្ឌិត​ទទួល​ខុស​ត្រូវ​ផ្ទាល់​ចំពោះ​ក្រុម​ប្រឹក្សា​ភិបាល ។

ទំនួល​ខុស​ត្រូវ​ផ្សេងទៀត​របស់​លោក​បណ្ឌិត រួម​មាន ជាប្រធាន​ក្រុមប្រឹក្សាភិបាល​ធនាគារ អេស៊ីលីដា ឡាវ និង​ស្ថាប័ន​មីក្រូ​ហិរញ្ញវត្ថុ អេស៊ីលីដា មីយ៉ាន់ម៉ា ព្រមទាំង​ជា​តំណាង​ភាគទុនិក​របស់​ធនាគារ អេស៊ីលីដា ឡាវ, អេស៊ីលីដា ស៊ីឃ្យួរឹធី ភីអិលស៊ី, វិទ្យាស្ថាន ពាណិជ្ជសាស្ត្រ អេស៊ី​លីដា, និង​ស្ថាប័ន​មីក្រូហិរញ្ញវត្ថុ អេស៊ីលីដា មីយ៉ាន់ម៉ា ។ លោក​បណ្ឌិត​ក៏​ជា​ប្រធាន​ក្រុម​ប្រឹក្សាភិបាល​របស់​អេស៊ីលីដា ហ្វាយណាន់ហ្សល់ ត្រាស់ ។

បណ្ឌិត អ៊ិន ចាន់នី កាន់តួនាទីជាច្រើន ដូចជា​សមាជិក​ក្រុមប្រឹក្សាភិបាល​របស់ Entrepreneurship Development Fund (EDF) ជា​បរធន​បាល​កិច្ច​បង្កើត​ដោយ​រាជរដ្ឋាភិបាល​កម្ពុជា ។ លោក​បណ្ឌិត​ក៏​ជា​ប្រធាន​សមាគម​ធនាគារ​នៅ​កម្ពុជា ។ លោក​បណ្ឌិត​ជា​អ្នក​តំណាង​របស់​ធនាគារ អេស៊ីលីដា ភីអិលស៊ី ដែល​ជា​សមាជិក​របស់​វេទិកា​សេដ្ឋកិច្ច​ពិភព​លោក ។

លោក​បណ្ឌិត ចាន់នី បាន​ប្រែក្លាយ​ធនាគារ​អេស៊ីលីដា​ដែល​ធ្លាប់ជា​អង្គការ​ក្រៅ​រដ្ឋាភិបាល​ដែល​ផ្តោតលើ​មីក្រូហិរញ្ញវត្ថុ​ឲ្យ​ក្លាយ​ទៅ​ជា​ធនាគារ​លំដាប់​កំពូល​មួយ​នៅ​កម្ពុជា​ដែល​មាន​ចំណែក​ទីផ្សារ​ធំជាងគេ ទាំង​ឥណទាន ប្រាក់​បញ្ញើ​សន្សំ ដែល​មាន​ចំណែក​ទីផ្សារ​ជិត​ ៥០% ​។ នៅ​ដំណាច់​ខែកុម្ភៈ​ឆ្នាំ​ ២០២០ ធនាគារ អេស៊ីលីដា ភី អិលស៊ី មាន​អតិថិជន​ឥណទាន​ចំនួន​ ៤០៥ ៦២០ និង​ប្រាក់​បញ្ញើ​មាន​ចំនួន ២ ៣៦៦ ៦១១ គណនី​។

លោកបណ្ឌិត អ៊ិន ចាន់នី បានឲ្យតំបូន្មានថា៖  អ្វីដែលខ្ញុំធ្វើកើតនេះ គឺដោយសារ ខ្ញុំចូលចិត្តស្តាប់ ខ្ញុំស្តាប់ត្រូវ ខ្ញុំគិតត្រូវ សម្រេចចិត្តត្រូវ និងខ្ញុំយកមកអនុវត្តន៍ត្រូវ។ លោកបន្តថា ខ្ញុំមានចរិតមួយ គឺស្តាប់អ្នកនៅជុំវិញខ្លួន។ ពេលគេឲ្យយោបល់មកខុសក៏ដោយ ត្រូវក៏ដោយ ខ្ញុំស្តាប់សិន ខ្ញុំគិតហើយ បានខ្ញុំឲ្យយោបល់ទៅវិញ។ បើខ្ញុំមិនអាចធ្វើបាន ខ្ញុំពន្យល់ បើខ្ញុំធ្វើបាន ខ្ញុំទទួលយក។ ខ្ញុំឲ្យតម្លៃខ្ពស់លោកអ្នកឲ្យយោបល់៕

សូមចុចអានអត្ថបទខាងក្រោម៖

The post ទម្រាំដឹកនាំធនាគារទទួលបានជោគជ័យដ៏អស្ចារ្យ ប្រវត្តិ CEOអេស៊ីលីដា មិនធម្មតានោះទេ appeared first on .

សូមចុច Subscribe Telegram oknha_news ដើម្បីទទួលបានព័ត៌មានគ្រប់​សកម្មភាព​ឧកញ៉ា​ អាជីវកម្ម ចែក​រំលែក ជោគជ័យ

អេស៊ីលីដា បន្តសកម្មភាពរបស់ខ្លួនឥតឈប់ឈរជាមួយនិងការ​ជួយ​ជ្រោមជ្រែង​ពី​ស្ថាប័ន​មួយ​ចំនួន​ដូចជា USAID កម្មវិធី​អភិវឌ្ឍន៍​វិស័យ​ឯកជន​តំបន់​ទន្លេ​មេគង្គ (MPDF/IFC) និង​UNDP ខណៈអង្គការក្រៅរដ្ឋាភិបាលមួយនេះទទួល​បាន​អាជ្ញាប័ណ្ណ​ជា​ធនាគារ​ឯកទេស នៅ​ក្នុង​ខែ​តុលា ឆ្នាំ​២០០០ ដែលជាសមិទ្ធផលជោគជ័យថ្មីបន្ថែមទៀត។

បន្ទាប់​ពី​បង្កើន​ដើម​ទុន​របស់​ខ្លួន​មួយ​ទ្វេរ​ជា​បី ឡើង​ដល់ ១៣​លាន​ដុល្លារ​អាមេរិក ធនាគារ​អេស៊ីលីដា បាន​ទទួល​អាជ្ញាប័ណ្ណ​ជា​ធនាគារ​ពាណិជ្ជ នៅ​ថ្ងៃ​ទី​០១ ខែ​ធ្នូ ឆ្នាំ​២០០៣ ហើយ​ត្រូវ​ប្តូរ​ឈ្មោះ​មក​ជា “ធនាគារ អេស៊ីលីដា ភីអិលស៊ី” ។

​នៅឆ្នាំ​២០១៩ ធនាគារ អេស៊ីលីដា ភីអិលស៊ី មាន​ទ្រព្យ​សកម្ម​សរុប ៦.១៧៥ លាន​ដុល្លារ​អាមេរិក ព្រមទាំង​កាន់​កាប់​ទីផ្សារ​បាន​ប្រមាណ ១៤,៣% នៃ​ទំហំ​ទ្រព្យ​សកម្ម​សរុប, ១៤,៨% (សមតុល្យ​ឥណទាន) និង ៤៥,៨% (ចំនួន​អតិថិជន) នៃ​ទំហំ​ទីផ្សារ​ឥណទាន​សរុប, និង ១៦,៥% (សមតុល្យ​ប្រាក់​បញ្ញើ) និង ៤៨,២% (ចំនួន​គណនី) នៃ​ទំហំ​ទីផ្សារ​ប្រាក់​បញ្ញើ​សរុប នៅ​ក្នុង​វិស័យ​ធនាគារ​នៅ​ក្នុង​ប្រទេស​កម្ពុជា (មិន​រាប់​បញ្ចូល​ស្ថាប័ន​មីក្រូហិរញ្ញវត្ថុ និង​អង្គការ​ក្រៅ​រដ្ឋាភិបាល) ។

នេះបើយោងតាមគេហទំព័ររបស់ធនាគារ អេស៊ីលីដា គិតមកដល់ពេលបច្ចុប្បន្ន ធនាគារដែលឈានមុខគេនៅកម្ពុជាមួយនេះ មាន​សមតុល្យ​ឥណទាន​សរុប​ប្រមាណ ៤៣១៥,២៩​លាន​ដុល្លារ​អាមេរិក នៅ​លើ​ដៃ​អតិថិជន​ជាង ៤១៧.៦៦៨​នាក់ ដែល​ក្នុង​នោះ​មាន ៥៥% ជា​ស្ត្រី ។ ធនាគារ​មាន​បុគ្គលិក​សរុប ១២.១៦៦នាក់ កំពុង​បម្រើ​ការងារ​នៅ​ក្នុង ២៦២​សាខា ដែល​គ្របដណ្តប់​គ្រប់​ខេត្ត-​រាជធានី​នៃប្រទេសកម្ពុជា។

សូមជម្រាបជូនលោកអ្នកនាងដែលថា ក្រៅ​ពី​សេវា​ឥណទាន និង​សេវា​បញ្ញើ-សន្សំ ធនាគារ អេស៊ីលីដា មាន​បម្រើ​ជូន​នូវ​សេវា​ផ្ទេរ​ប្រាក់​ក្នុង និង​ក្រៅ​ប្រទេស​តាម​រយៈ Western Union និង SWIFT (សង្គម​ជុំវិញ​ពិភពលោក​សម្រាប់​ទូរគមនាគមន៍​ហិរញ្ញវត្ថុ​អន្តរជាតិ) ។ មិនតែប៉ុណ្ណោះក៏មានសេវាប័ណ្ណ ​សេវា​ឌីជីថល សេវា​ហិរញ្ញប្បទាន​ពាណិជ្ជកម្ម និង សេវា​ចាត់ចែង​សាច់​ប្រាក់ និង​សេវា​ធនាគារ​ដទៃ​ជា​ច្រើន​ទៀត៕ សូមតាមបន្តជាមួយគេហទំព័រឧកញ៉ាញូស៍ នៅពេលបន្ទាប់…….!

The post សាវតាមុនវិវឌ្ឍន៍មកជា “ធនាគារអេស៊ីលីដា” ដែលមាន​ទ្រព្យ​សកម្ម​សរុប ៦.១៧៥ លាន​ដុល្លារ​អាមេរិក appeared first on .