ពិព័រណ៍រយៈពេលពីរថ្ងៃដែលមានស្តង់ទំនិញចំនួន៧៥នេះ រៀបចំដោយបណ្តាញសហគ្រិនស្ត្រីកម្ពុជា (CamWEN) ដោយមានការគាំទ្រពីមជ្ឈមណ្ឌលពាណិជ្ជកម្មអន្តរជាតិ កម្មវិធី SheTrades និងស្ថាប័នអភិវឌ្ឍន៍អន្តរជាតិ( UK International Development )។

ពិព័រណ៍នេះជាវេទិកាពាណិជ្ជកម្មនិងការវិនិយោគរបស់ចក្រភពអង់គ្លេសនិងព្រះរាជាណាចក្រកម្ពុជា និងដើម្បីពង្រឹងទំនាក់ទំនងពាណិជ្ជកម្មទ្វេភាគី។ព្រឹត្តិការណ៍មួយនេះ បានបង្ហាញពីការប្តេជ្ញាចិត្តរបស់ចក្រភពអង់គ្លេសក្នុងការជំរុញគាំទ្រទៅដល់សហគ្រិនស្ត្រីនិងពង្រឹងទំនាក់ទំនងពាណិជ្ជកម្ម ឱ្យកាន់តែរឹងមាំនៅក្នុងប្រទេសកម្ពុជា។

ក្នុងពិធីបើកពិព័រណ៍នាព្រឹកថ្ងៃទី១៨ខែវិច្ឆិកា លោកស្រីរដ្ឋមន្ត្រីពាណិជ្ជកម្ម បានថ្លែងថា៖ព្រឹត្តិការណ៍ពិព័រណ៍នេះមានគោលបំណងជំរុញ ការនាំចេញផលិតផល វាយនភណ្ឌ សម្លៀកបំពាក់ និងស្បែកជើងទៅកាន់ចក្រភពអង់គ្លេស មិនត្រឹមតែតាមរយៈការតាំងបង្ហាញប៉ុណ្ណោះទេ ប៉ុន្តែថែមទាំងមានការបង្កើតបណ្តាញទំនាក់ទំនងជាមួយនឹងអ្នកបញ្ជាទិញសំខាន់ៗរបស់ចក្រភពអង់គ្លេស លើផលិតផលទាំងនោះផងដែរ។

លោកស្រី ចម និមល បានបញ្ជាក់ថា៖« ឧស្សាហកម្មវាយនភណ្ឌ សម្លៀកបំពាក់ និងស្បែកជើង គឺជាវិស័យអាទិភាព របស់កម្ពុជា ហើយបានរួមចំណែកយ៉ាងសំខាន់ ក្នុងការអភិវឌ្ឍន៍សេដ្ឋកិច្ច និងសង្គម។ រាជរដ្ឋាភិបាលកម្ពុជាយល់យ៉ាងច្បាស់នូវភាពប្រកួតប្រជែងខ្ពស់នៃឧស្សាហកម្មនេះ និងបានដាក់ចេញនូវ យុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២២-២០២៧ ដើម្បីជាផែនទីក្នុងការអភិវឌ្ឍវិស័យនេះទៅជាឧស្សាហកម្ម ដែលមាន ចីរភាពបរិស្ថាន មានភាពធន់ មានតម្លៃបន្ថែមខ្ពស់ ផ្តោតលើផលិតផលថ្លៃខ្ពស់និងមានលក្ខណៈពិសេស»។

លើសពីនេះ ដើម្បីបង្កើនភាពប្រកួតប្រជែង ស្របពេលដែលធានាឱ្យបាននូវលក្ខខណ្ឌការងារសមស្របក្នុងវិស័យវាយនភណ្ឌ និងកាត់ដេរ ក្នុងឆ្នាំ២០០១ កម្ពុជាបានចូលរួមក្នុងគម្រោងរោងចក្រកាន់តែប្រសើរនៅកម្ពុជា (BFC) របស់អង្គការអន្តរជាតិខាងការងារ (ILO) ដែលធ្វើការវាយតម្លៃលើលក្ខខណ្ឌការងារដោយផ្អែកលើច្បាប់ ការងារកម្ពុជា ច្បាប់ទាក់ទងនឹងការងារផ្សេងៗ និងបទដ្ឋានការងារគោលដែលទទួលស្គាល់ ជាលក្ខណៈអន្តរជាតិ។

ជាមួយនឹងកិច្ចខិតខំប្រឹងប្រែងទាំងនេះ លោកស្រីរដ្ឋមន្ត្រីពាណិជ្ជកម្មជម្រាបជូនថា គិតត្រឹម ១០ខែឆ្នាំ២០២៤ ការនាំចេញសរុបរបស់កម្ពុជាឈានដល់ ៤៥.៥ ប៊ីលានដុល្លារ ដែលក្នុងនោះការនាំចេញវាយនភណ្ឌមានប្រមាណ ៤០៦លានដុល្លារ (កើនឡើង ១៤.៤៧%) ការនាំចេញសម្លៀកបំពាក់ឈានដល់ ៨ប៊ីលានដុល្លារ (ការកើនឡើង២៣.៦៦%) និងការនាំចេញស្បែកជើង ១.៣ ប៊ីលានដុល្លារ (កើនឡើង ២២.៣៣%)។ លោកស្រីបានធ្វើការកំណត់សម្គាល់ថាភាគច្រើន [ប្រមាណ៨០%] នៃនិយោជិតនៅក្នុងវិស័យទាំង នោះគឺជាស្ត្រី។ ដូចនេះហើយស្ត្រីមានតួនាទីសំខាន់ខ្លាំងណាស់ក្នុងការចូលរួមក្នុងកម្មវិធី អភិវឌ្ឍសេដ្ឋកិច្ចជាតិរបស់រាជរដ្ឋាភិបាល។កម្ពុជា និងចក្រភពអង់គ្លេសមានទំនាក់ទំនងយ៉ាងជិតស្និទ្ធលើគ្រប់វិស័យ ដែល មិត្តភាពដ៏រឹងមាំនេះត្រូវថែរក្សាតាមរយៈកិច្ចសហប្រតិបត្តិការជិតស្និទ្ធ ជាពិសេសក្នុងវិស័យ ពាណិជ្ជកម្ម និងវិនិយោគ។

លោកស្រីបណ្ឌិត អេង លីគង់ ប្រធានបណ្តាញសហគ្រិនស្រ្តីកម្ពុជា(CamWen) និងជាប្រធានបណ្តាញសហគ្រិនស្ត្រីអាស៊ាន(AWEN) បានថ្លែងថា៖បេសកកម្មពាណិជ្ជកម្មរបស់ចក្រភពអង់គ្លេស ដែលជាផ្នែកមួយនៃមូលនិធិរបស់រដ្ឋាភិបាលចក្រភពអង់គ្លេស បានរួមចំណែកជាកិច្ចសហប្រតិបត្តិការទៅដល់ចក្រភពអង់គ្លេស-អាស៊ាន ស្ដីពីការពង្រឹងផ្នែកសេដ្ឋកិច្ចរបស់ស្រ្តី ដោយ នឹងផ្សាភ្ជាប់ សហគ្រិនស្ដ្រីមកពីអាស៊ាន ជាមួយនឹងអតិថិជនមកពីចក្រភពអង់គ្លេស ។ ការរៀបចំពិព័រណ៍មួយនេះ មានការរួមសហការជាដៃគូជាមួយ មជ្ឈមណ្ឌលពាណិជ្ជកម្មអន្តរជាតិ (ITC) និងបណ្តាញសហគ្រិនស្ត្រីកម្ពុជា (CamWEN) ដោយគំនិតផ្ដួចផ្ដើមមួយនេះ នឹង មានការចូលរួមពីអាជីវកម្មផ្សេងៗមកពីបណ្ដាលសហគ្រិនស្រ្តី។មិនត្រឹមតែប៉ុណ្ណោះ កម្មវិធីមួយនេះ នឹងបន្តប្រារព្ធធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី នៅពេលក្រោយ។

លោកស្រីបណ្ឌីតបានលើកឡើងទៀតថា៖វេទិកាពាណិជ្ជកម្ម និងវិនិយោគរួមកម្ពុជា (JTIF) បានប្រារព្ធធ្វើឡើងមួយសប្តាហ៍មុន ដោយនាំយកវិស័យសាធារណៈ និងវិស័យឯកជនរបស់ចក្រភពអង់គ្លេស និងកម្ពុជា ដើម្បីធ្វើការពិភាក្សាអំពីវិធីសាស្រ្តក្នុងការសម្រេចបាននូវកំណើនប្រកបដោយចីរភាព តាមរយៈពាណិជ្ជកម្ម និងការវិនិយោគ នៅក្នុងអំឡុងពេល ដែលអាចប្រឈមនឹងវិបត្តិផ្សេងៗក្នុងសកលលោក។នៅក្នុងប្រទេសកម្ពុជា បេសកកម្មពាណិជ្ជកម្ម នឹងជួយសម្រួលឱកាសទៅក្រុមហ៊ុនរបស់ចក្រភពអង់គ្លេស ដែលដឹកនាំដោយស្ត្រី និងក្រុមហ៊ុនមកពីឥណ្ឌូនេស៊ី ក្នុងវិស័យដូចជា វាយនភណ្ឌ និងសម្លៀកបំពាក់ វិស័យសិប្បកម្ម និងស្បែកជើង។ ព្រមជាមួយគ្នានេះដែរ នឹងមានការចូលរួមពីក្រុមហ៊ុនចក្រភពអង់គ្លេសចំនួន ៨និងអាជីវកម្មដែលដឹកនាំដោយស្ត្រីកម្ពុជាចំនួន ៧៥។ បេសកកម្មនេះ មានគោលបំណងពង្រឹងទំនាក់ទំនងពាណិជ្ជកម្ម និងជំរុញគាំទ្រទៅដល់ស្ត្រីក្នុងវិស័យអាជីវកម្ម នៅទូទាំងចក្រភពអង់គ្លេស និងអាស៊ាន ដែលជាផ្នែកមួយនៃមូលនិធិរដ្ឋាភិបាលចក្រភពអង់គ្លេស ទៅដល់កម្មវិធី SheTrades នៅក្នុងអាស៊ាន។

លោកស្រីបណ្ឌិតបានបន្តថាអាជីវកម្មដែលដឹកនាំដោយស្ត្រីកម្ពុជា នឹងទទួលបានឱកាសជួបផ្ទាល់ជាមួយគណៈប្រតិភូចក្រភពអង់គ្លេសផងដែរ។ នៅថ្ងៃទីពីរ ក្រុមហ៊ុនមកពីចក្រភពអង់គ្លេស នឹងធ្វើទស្សនកិច្ចទៅតាមកន្លែងអាជីវកម្ម ដែលដឹកនាំដោយស្រ្តីនៅក្នុងវិស័យវាយនភណ្ឌ និងសម្លៀកបំពាក់ វិស័យសិប្បកម្ម និងវិស័យស្បែកជើង ទូទាំងរាជធានីភ្នំពេញ ព្រមទាំងតំបន់ជុំវិញ ដើម្បីពិភាក្សាបន្ថែមអំពីអាជីវកម្ម។ព្រឹត្តិការណ៍មួយនេះ បានសបញ្ជាក់ពីការប្តេជ្ញាចិត្តរបស់ចក្រភពអង់គ្លេសក្នុងការជំរុញគាំទ្រទៅដល់សហគ្រិនស្ត្រីនិងពង្រឹងទំនាក់ទំនងពាណិជ្ជកម្ម ឱ្យកាន់តែរឹងមាំនៅក្នុងប្រទេសកម្ពុជា។

លោក Dominic Williams MBE ឯកអគ្គរាជទូតអង់គ្លេសប្រចាំកម្ពុជា មានប្រសាសន៍ថា៖“នេះជាឱកាសដ៏អស្ចារ្យមួយក្នុងការលើកស្ទួយសមភាពយេនឌ័រ ហើយខ្ញុំ ក៏លើកទឹកចិត្តឱ្យអ្នកទាំងអស់គ្នាចូលរួមសហការដូចគ្នាដែរ។ប្រសើរជាងនេះទៅទៀត វាពិតជាសំខាន់ក្នុងការបោះជំហានទៅមុខនិងផ្ដល់ការគាំទ្រទៅដល់ស្រ្តីទាំងអស់ដែលបានធ្វើរឿងដ៏អស្ចារ្យគ្រប់កាលៈទេសៈនៅក្នុងជីវិត។ ដោយហេតុនេះហើយ ខ្ញុំពិតជាមានសេចក្ដីសោមនស្សយ៉ាងក្រៃលែង ដែលស្ថានទូតអង់គ្លេស កំពុងចូលរួមចំណែកសហការ ដោយផ្ដល់ឱកាសជូនទៅដល់ សហគ្រាសធុនតូច និងមធ្យម ដែលដឹកនាំដោយស្ត្រី តាមរយៈវេទិកាដាក់តាំងបង្ហាញផលិតផលទៅកាន់អ្នកវិនិយោគទុន ដែលបានធ្វើដំណើរពីចក្រភពអង់គ្លេស ក្នុងគោលបំណងនាំយកផលិតផលពីប្រទេសកម្ពុជា ចូលទៅក្នុងទីផ្សារចក្រភពអង់គ្លេស»។

លោកឯកអគ្គរាជទូតសង្ឃឹមថា៖បេសកកម្មពាណិជ្ជកម្មមួយនេះ នឹងរួមចំណែកជួយទៅដល់អាជីវកម្មដែលដឹកនាំដោយស្ត្រី ទទួលបានកំណើនបា្រក់ចំណូល និងរីកចម្រើន ព្រមទាំងបើកឱកាសទៅដល់អតិថិជនរបស់ចក្រភពអង់គ្លេស បានជាវផលិត ផលល្អៗពីប្រទេសកម្ពុជា។

អ្នកឧកញ៉ា លី ឃុនថៃ ប្រធានសហព័ន្ធអ្នកវិនិយោគកម្ពុជា បានលើកឡើងថា៖ ពិព័រណ៍ពាណិជ្ជកម្មអន្តរជាតិនេះ នឹងជួយជំរុញឱ្យវិស័យផលិតផលនៅកម្ពុជា ក៏ដូចជាផលិតផលស្បែកជើង ផលិតផលធ្វើដំណើរ កាបូប វ៉ាលីស ទទួលបានការចាប់អារម្មណ៍ពីវិនិយោគិនអង់គ្លេសពីព្រោះ ក្រុមហ៊ុនអង់គ្លេសជាង១០បានចូលរួមពិព័រណ៍ពាណិជ្ជកម្មជាពិសេសក្រុមហ៊ុនបញ្ជាទិញ។

អ្នកឧកញ់ា បានបន្តថា៖ ឆ្លងកាត់ពិព័រណ៍នេះក្រុមហ៊ុនអង់គ្លេស រំពឹងចាប់អារម្មណ៍ខ្ពស់ក្នុងការបញ្ជាទិញទំនិញពីកម្ពុជាដូចជា ស្បែកជើង កាបូប ផលិតផលធ្វើដំណើរ ហើយសង្ឃឹមថាការបញ្ជាទិញនឹងកើនឡើង ជាពិសេសរំពឹងថាការនាំចេញទំនិញពីកម្ពុជាទៅអង់គ្លេនិងសហរដ្ឋអាមេរិក នឹងកើនឡើង។

ឯកអគ្គរដ្ឋទូតចក្រភពអង់គ្លេសប្រចាំអាស៊ាន លោកស្រី Sarah Tiffin មានប្រសាសន៍លើកឡើងថា៖“ការជំរុញគាំទ្រទៅដល់សហគ្រិនស្រ្តី គឺជាផ្នែកមួយដ៏សំខាន់ សម្រាប់កំណើនសេដ្ឋកិច្ច និងការអភិវឌ្ឍប្រកបដោយចីរភាព។ បេសកកម្មពាណិជ្ជកម្មចក្រភពអង់គ្លេស-អាស៊ាន បានផ្ដល់នូវវេទិកាមួយសម្រាប់អាជីវកម្មដែលដឹកនាំ ដោយស្ត្រី ដើម្បីផ្សារភ្ជាប់ទំនាក់ទំនង រួមសហការ និងរីកចម្រើនក្នុងទីផ្សារអាជីវកម្មថ្មី។ ពួកយើង ប្ដេជ្ញាគាំទ្រទៅដល់សហគ្រិន ដែលបានរួមចំណែកក្នុងការរីកលូតលាស់ និងភាពរឹងមាំ នៃសេដ្ឋកិច្ចរបស់ចក្រភពអង់គ្លេស និងអាស៊ាន។ បេសកកម្មមួយនេះ មិនត្រឹមតែពង្រឹងទៅដល់ទំនាក់ទំនងពាណិជ្ជកម្មប៉ុណ្ណោះទេ ប៉ុន្តែវាបានឆ្លុះ បញ្ចាំងពីការរួមប្ដេជ្ញាចិត្តជាមួយគ្នា ក្នុងការបង្ហាញនូវសមភាពយេនឌ័រ និងការពង្រឹងសេដ្ឋកិច្ចផងដែរ”។

គួររំលឹកថា៖កាលពីដើមខែនេះ កម្មវិធី SheTrades ក្នុងតំបន់អាស៊ាន ក៏បានរៀបចំសិក្ខាសាលាមួយជាមួយបណ្តាញសហគ្រិនស្ត្រីអាស៊ាន(AWEN) នៅរាជធានីភ្នំពេញ ដើម្បីពង្រឹងសមត្ថភាពសហគ្រិនស្រ្តីនៅក្នុងតំបន់ និងបង្កើតចក្ខុវិស័យ ជាយុទ្ធសាស្ត្រ ដើម្បីគាំទ្រដល់សហគ្រិនស្ត្រីនៅក្នុងតំបន់អាស៊ាន តាមរយៈពាណិជ្ជកម្មនាពេល ១០ ទៅ ២០ ឆ្នាំខាងមុខ។បន្ទាប់ពីទីក្រុងភ្នំពេញ បេសកកម្មពាណិជ្ជកម្មរបស់ចក្រភពអង់គ្លេស-អាស៊ាន នឹងបន្តដំណើរទៅកាន់ទីក្រុងហ្សាកាតា ប្រទេសឥណ្ឌូនេស៊ី ដែលគណៈប្រតិភូចក្រភពអង់គ្លេស នឹងបន្តស្វែងរកឱកាសរួមសហការជាមួយនឹងអាជីវកម្មថ្មីៗពីសហគ្រិនស្រ្តី របស់ប្រទេសដែលជាសមាជិកអាស៊ាន៕ដោយៈសុភក្ត្រា

The post “ពិព័រណ៍ពាណិជ្ជកម្មអន្តរជាតិកម្ពុជា” ជំរុញការនាំចេញផលិតផលវាយនភណ្ឌ សម្លៀកបំពាក់ និងស្បែកជើងទៅកាន់ចក្រភពអង់គ្លេស appeared first on .

លោកស្រី ចម និម្មល រដ្ឋមន្ត្រីក្រសួងពាណិជ្ជកម្មបានថ្លែងដូច្នេះក្នុងពិធីបើកពិព័រណ៍ “សួស្តីឥណ្ឌូនេស៊ី”នាព្រឹកថ្ងៃសុក្រទី១៣ ខែកញ្ញា ឆ្នាំ២០២៤ នៅមជ្ឈមណ្ឌលសន្និបាត និងពិព័រណ៍កោះពេជ្រ។

លោកស្រីរដ្ឋមន្ត្រី បានមានប្រសាសន៍លើកឡើងថាពិព័រណ៍នេះ ជាព្រឹត្តិការណ៍ដ៏សំខាន់មួយដែលបានរៀបចំឡើងនៅក្រុងភ្នំពេញតាំងពីឆ្នាំ២០០៦មក។នៅឆ្នាំ២០២៤នេះជាខួបទី១៥នៃការរៀបចំព្រឹត្តិការណ៍ពិព័រណ៍និងជាខួបទី៦៥នៃទំនាក់ទំនងការទូតរវាងកម្ពុជានិងឥណ្ឌូនេស៊ី។

លោកស្រី ក៏បានលើកទឹកចិត្តដល់វិស័យឯកជន ឱ្យចូលរួមនិងរៀបចំព្រឹត្តិការណ៍បែបនេះឱ្យបានញឹកញាប់ទាំងនៅក្នុងប្រទេសកម្ពុជា និងក្នុងប្រទេសឥណ្ឌូនេស៊ី ដើម្បីស្វែងរកសក្តានុពល ឱកាសថ្មីៗ និងបង្កើតភាពជាដៃគូថ្មី។

លោកស្រីរដ្ឋមន្ត្រី បានបង្ហើបជូនថាចុងឆ្នាំនេះ ក្រសួងពាណិជ្ជកម្មនឹងរៀបចំព្រឹត្តិការណ៍ពិព័រណ៍ប្រចាំឆ្នាំមួយគឺ “ពិព័រណ៍ផលិតផលខ្មែរ និងទំនិញនាំចេញ-នាំចូល(CIEGE) លើកទី១៧”ដែលនឹងប្រព្រឹត្តទៅចាប់ពីថ្ងៃទី១៣-១៦ ខែធ្នូ ឆ្នាំ២០២៤ នៅភ្នំពេញ។

ព្រឹត្តិការណ៍ “សួស្តីឥណ្ឌូនេស៊ី” នឹងមាននូវសកម្មភាពសំខាន់ៗជាច្រើនដូចជា៖ ការតាំងបង្ហាញនិងលក់ផលិតផល ការផ្សព្វផ្សាយទេសចរណ៍ ពិព័រណ៍កម្មវិធីអប់រំ ការសម្តែងសិល្បៈវប្បធម៌ ជំនួបផ្គូផ្គងអាជីវកម្ម ការជំរុញការវិនិយោគ ពិធីបុណ្យម្ហូប និងកម្មវិធីជជែកដេញដោល ព្រមទាំងមានស្តង់ចូលរួមជាង ១០០ ដោយដាក់តាំងបង្ហាញផលិតផលនិងសេវាកម្ម ដែលនឹងចូលរួមចំណែកក្នុងការបង្កើនទំហំពាណិជ្ជកម្ម និងបន្ថែមតម្លៃដល់កិច្ចសហប្រតិបត្តិការរវាងកម្ពុជា-ឥណ្ឌូនេស៊ីរួមបញ្ចូលទាំងទេសចរណ៍ការផ្លាស់ប្តូរវប្បធម៌និងការវិនិយោគ៕

The post រដ្ឋមន្ត្រីពាណិជ្ជកម្ម៖ ទំហំពាណិជ្ជកម្មកម្ពុជា ឥណ្ឌូនេស៊ី ឆ្នាំ២០២៤ រំពឹងកើនឡើងលើស២០២៣ appeared first on .

នៅ​ក្នុង​បទសម្ភាស​មួយ​ជាមួយ​ទូរទស្សន៍​ជាតិ​កម្ពុជា ទទក នៅ​ព្រឹក​ថ្ងៃ​សុក្រ​នេះ លោក​ស្រី​ ចម និម្មល បញ្ជាក់​ថា កិច្ច​ព្រម​ព្រៀង​ CLV DTA ដែលចាប់់ផ្តើមតាំងពីឆ្នាំ១៩៩៩ រយៈពេល២៥ឆ្នាំមកនេះ និងមានកិច្ចប្រជុំកំពូល​ចំនួន ១១ដង ​មិន​មែន​ជាការ​ដាក់​ហ៊ុន​ទឹកដី ឬ​ដោះ​ដូរ​ទឹកដី​នេះ ហើយ​ប្រទេស​នីមួយៗ​មាន​ឯករាជ្យ​ និង​ម្ចាស់​ការ​ដោយ​ខ្លួន​ឯង​ក្នុង​ការ​អភិវឌ្ឍ។ លើស​ពី​នេះ​ទៀត ​រាល់​ការ​អភិវឌ្ឍ​នៅ​ក្នុង​តំបន់​នេះ​ធ្វើ​ឡើង​រៀងៗ​ខ្លួន ដោយ​កម្ពុជា​មាន​កញ្ចប់​ថវិកា​ជាតិ​សម្រាប់​អភិវឌ្ឍ​ ដូចជា​មូលនិធិ​ឃុំ​សង្កាត់​ជាដើម។ កិច្ចព្រមព្រៀងនេះ គឺជាការតភ្ជាប់​សេដ្ឋកិច្ច បង្កើនទំហំពាណិជ្ជកម្ម និងកសិ-ពាណិជ្ជកម្ម នៃប្រទេសទាំងបី។

សូមទស្សនាវីដេអូលម្អិតបន្ថែមខាងក្រោម៖

The post លោកស្រី ចម និម្មល៖ តំបន់ត្រីកោណអភិវឌ្ឍន៍ CLV-DTA គឺជាការតភ្ជាប់សេដ្ឋកិច្ច បង្កើនទំហំពាណិជ្ជកម្ម និងកសិ-ពាណិជ្ជកម្ម appeared first on .

ថ្លែងសុន្ទរកថាក្នុងពិធីបើកសម្ពោធ “ពិព័រណ៍ពាណិជ្ជកម្មអន្តរជាតិកម្ពុជាឆ្នាំ២០២៤” ក្រោមអធិបតីភាព លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នៅថ្ងៃទី១០ ខែឧសភា ឆ្នាំ២០២៤ លោកស្រី ចម និម្មល បានឲ្យដឹងថា ក្នុងរយៈពេល ៤ ខែដើមឆ្នាំ២០២៤ នេះ ទំហំពាណិជ្ជកម្មរបស់កម្ពុជាសម្រេចបានជាង ១៦ ៩១៣ លានដុល្លារ មានកំណើនប្រមាណជិត ១២%។

លោកស្រីបន្តថា ដោយក្នុងនោះ ការនាំចេញមានមានទំហំទឹកប្រាក់ ប្រមាណ ៨ ប៊ីលានដុល្លារ កើនឡើងប្រមាណជិត ១២% ដែលការណ៍នេះ បានបញ្ជាក់ពីថាមវន្តពាណិជ្ជកម្មរបស់កម្ពុជាដែលមានកំណើននិងបានដើរតួនាទី យ៉ាងសំខាន់ក្នុងសកម្មភាពសេដ្ឋកិច្ចជាតិ។

នាឱកាសនោះ លោកស្រី ក៏បានបង្ហាញពីការប្តេជ្ញាចិត្តរបស់ក្រសួងពាណិជ្ជកម្មក្នុងការជំរុញកំណើនវិស័យពាណិជ្ជកម្ម ដោយបានកែប្រែបញ្ហាប្រឈមឱ្យទៅជាឱកាស តាមរយៈការធ្វើកំណែទម្រង់ស៊ីជម្រៅលើគ្រប់ផ្នែក ការកាត់បន្ថយចំណាយ និងការពង្រឹងភាពប្រកួតប្រជែងនៃទំនិញនាំចេញរបស់កម្ពុជាទៅកាន់ទីផ្សារអន្តរជាតិ ដើម្បីបង្កលក្ខណៈងាយស្រួល និងបង្កើតបរិយាកាសអំណោយផលដល់ការធ្វើធុរកិច្ចនិងវិនិយោគនៅកម្ពុជា។

បើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា រយៈពេល៤ខែ ឆ្នាំ២០២៤នេះ កម្ពុជាបាននាំចេញទំនិញសំខាន់ៗ គិតជាទឹកប្រាក់ប្រមាណជាង៨ពាន់លានដុល្លារ កើនឡើង១៥.២% ខណៈការនាំចូលមានជាង ៨.៦ពាន់លានដុល្លារ កើនឡើង៩.៣% បើធៀបនឹងរយៈពេលដូចគ្នា កាលពីមុន។

ទំនិញសំខាន់ៗ ដែលកម្ពុជា បាននាំចេញច្រើនជាងគេ រួមមាន សម្លៀកបំពាក់ គ្រឿងបន្ទាប់បន្សំធ្វើឡើងពីក្រណាត់ ផ្លែឈើ ម៉ាស៊ីន និងឧបករណ៍អគ្គិសនី, ស្បែកជើង, កៅស៊ូ រួមនឹងទំនិញសំខាន់ៗផ្សេងទៀត។

របាយការណ៍បានបញ្ជាក់ទៀតថា ប្រទេសដែលកម្ពុជា បាននាំចេញទៅច្រើនជាងគេ គឺសហរដ្ឋអាមេរិក វៀតណាម ចិន ជប៉ុន ថៃ កាណាដា អង់គ្លេស អាល្លឺម៉ង់ អេស្ប៉ាញ ហូឡង់ បារាំង ហុងកុង និងបណ្តាប្រទេសដៃគូពាណិជ្ជកម្ម សំខាន់ៗមួយចំនួនទៀតផងដែរ៕

The post ទំហំពាណិជ្ជកម្មកម្ពុជាសម្រេចបានជាង ១៦ពាន់លានដុល្លារ ក្នុងរយៈពេល៤ខែ ឆ្នាំនេះ appeared first on .

ថ្លែងនៅក្នុង ពិធីសម្ពោធពិព័រណ៍រថយន្ត (Auto Show) លើកទី១ ឆ្នាំ២០២៤ នៅថ្ងៃទី២៧ មេសានេះ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មបានគូសបញ្ជាក់ថាមានក្រុមហ៊ុនចំនួន ៥ កំពុងរៀបចំរចនាសម្ព័ន្ធផលិតកម្ម ត្រៀមបើកដំណើរការរោងចក្រដំឡើងរថយន្តនៅកម្ពុជា ក្នុងនោះមានក្រុមហ៊ុន HGB Motors Assembly, ក្រុមហ៊ុន EM Automotive, ក្រុមហ៊ុន GTV Motor, ក្រុមហ៊ុន TOYOTA, និងក្រុមហ៊ុន China Matrix Technology ។

បើយោតាមលោកជំទាវរដ្ឋមន្ត្រី ការរៀបចំព្រឹត្តិការណ៍ដ៏ធំជាលើកទី១នេះឡើង ដែលនេះមិនត្រឹមតែជាវេទិការពិព័ណ៍តាំងបង្ហាញឱ្យឃើញពីការច្នៃប្រឌិត នវានុវឌ្ឍន៍ និងភាពទំនើបនៃរថយន្តប៉ុណ្ណោះទេ ប៉ុន្តែថែមទាំងជាសក្ខីភាពបញ្ជាក់យ៉ាងច្បាស់ពីភាពរីកចម្រើននៃវិស័យយានយន្តលើទីផ្សារដែលកំពុងមានសម្ទុះយ៉ាងឆាប់រហ័សក្នុងព្រះរាជាណាចក្រកម្ពុជា ផងដែរ។

លោកជំទាវលើកឡើងថា ក្រសួងពាណិជ្ជកម្ម ក្នុងការចូលរួមលើកកម្ពស់វិស័យធុរកិច្ច និងវិនិយោគនៅកម្ពុជា តាមរយៈការរៀបចំកសាងលិខិតបទដ្ឋានគតិយុត្តិឱ្យស្របតាមបរិបទបទថ្មី សំដៅជួយសម្រួលដល់វិស័យឯកជន, ការដាក់ឱ្យដំណើរការនូវប្រព័ន្ធស្វ័យប្រវត្តិកម្ម, ការដាក់ឱ្យដំណើរការមជ្ឍមណ្ឌលទំនាក់ទំនងរវាងសាធារណៈជន និងមន្រ្តីផ្តល់សេវា ដោយឥតគិតថ្លៃ, ព្រមទាំងការជំរុញការយកចិត្តទុកលើការពង្រឹងការការពារកម្មសិទ្ធិបញ្ញានៅកម្ពុជា សំដៅការពារ និងលើកកម្ពស់ការធ្វើធុរកិច្ចដោយស្មោះត្រង់ ប្រកបដោយភាពប្រកួតប្រជែង ផងដែរ។

លោកជំទាវលើកទឹកចិត្តដល់ធុរជន និងដៃគូរវិនិយោគ ពិចារណាក្នុងការបណ្តាក់ទុនរកស៊ីឱ្យកាន់តែទូលំទូលាយ និងការបង្កើតមូលដ្ឋានផលិតកម្មនៅកម្ពុជា ដើម្បីទាញយកអត្ថប្រយោជន៍ជាច្រើនដែលកម្ពុជាកំពុងមាន រួមមាន កិច្ចព្រមព្រៀងពាណិជ្ជកម្មអាស៊ានបូក និងប្រព័ន្ធអនុគ្រោះពន្ធដែលកម្ពុជាទទួលបានពីប្រទេសអភិវឌ្ឍន៍ កិច្ចព្រមព្រៀងពាណិជ្ជសេរី និងក្របខណ្ឌនៃកិច្ចសម្រួលពាណិជ្ជកម្មនិងវិនិយោគថ្នាក់ជាតិ ព្រមទាំងមកវិនិយោគលើការបង្កើតរោងចក្រផលិតរថយន្ត សម្រាប់ផ្គត់ផ្គង់ទីផ្សារក្នុងស្រុក និងនាំចេញ ពិសេសការវិនិយោគលើរថយន្តអគ្គិសនី (Electric Vehicles)៕តាកែវ

The post ក្រុមហ៊ុនចំនួន៥ត្រៀមបើកដំណើរការរោងចក្រដំឡើងរថយន្តនៅកម្ពុជា appeared first on .

នៅក្នុងជំនួបនោះ លោកJonathan K.S. Choi បានលើកឡើងពីគោលបំណងរបស់ខ្លួន និងគណៈប្រតិភូទាំងអស់ពីការវិនិយោគលើវិស័យនានាជាច្រើនក្នុងប្រទេសកម្ពុជា រួមមាន វិស័យឌីជីថល ឡូជីស្ទីក ថាមពល អចលនទ្រព្យ ផលិតកម្មលើការកែច្នៃជាដើម។

ស្របពេលជាមួយគ្នានេះ គណៈប្រតិភូជាវិនិយោគិន ក៏បានស្នើសុំការបញ្ជាក់ចំពោះលក្ខខណ្ឌនៃការធ្វើពាណិជ្ជកម្មមួយចំនួនក្នុងប្រទេសកម្ពុជាផងដែរ។

នាឱកាសនោះ លោកស្រី ចម និម្មល បានបង្ហាញនូវការសាទរ និងគាំទ្រចំពោះគោលបំណងជំរុញកំណើននៃការធ្វើពាណិជ្ជកម្ម និងវិនិយោគទ្វេភាគី បន្ថែមទៀត។ ស្របពេលជាមួយគ្នានេះ លោកស្រីក៏បានណែនាំដល់ភាគីក្រុមហ៊ុន ក្នុងការទំនាក់ទំនង និងសិក្សាលើគម្រោងដែលបានលើកឡើងពីខាងដើមនេះ ជាមួយក្រសួង-ស្ថាប័នពាក់ព័ន្ធ ដើម្បីសម្រេចបាននូវលទ្ធផលប្រកបដោយប្រសិទ្ធភាព។ហើយក្រសួងពាណិជ្ជកម្មរីករាយក្នុងការសហការ និងជួយសម្របសម្រួលជូនដល់វិនិយោគិនទាំងឡាយ ក្នុងក្របខណ្ឌពាណិជ្ជកម្ម ដើម្បីជំរុញកិច្ចសហប្រតិបត្តិការបានកាន់តែច្រើនឡើងបន្ថែមទៀត៕

The post គណៈប្រតិភូមកពីប្រទេសចិនជាង ៦០រូប ចាប់អារម្មណ៍ការវិនិយោគនៅកម្ពុជា appeared first on .

គម្រោងជំរុញទីផ្សារសម្រាប់កសិកម្មខ្នាតតូច (AIMS) នៃក្រសួងពាណិជ្ជកម្ម និងក្រុមហ៊ុនប្រមូលទិញបន្លែទាំង ៥ រួមមាន៖ ១). ក្រុមហ៊ុនខេមបូឌាន ស្តេនដាត ឌីវេឡុបមិន & សឹបផ្លាយ ឯ.ក (CSDS) ២). ខេម អេហ្គ្រី ឡាឡា (CAM AGRI LALA) ៣). ផ្សារកូនកាំបិត ៤). ផ្សារខ្មែរ បន្លែធម្មជាតិ ៥). ផ្សារស្នាដៃម៉ែ។

លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងថា ក្រសួង-ស្ថាប័នពាក់ព័ន្ធ វិស័យឯកជន និងបងប្អូនប្រជាកសិករខ្មែរយើង នឹងចូលរួមចំណែកដោយផ្ទាល់ក្នុងការលើកកម្ពស់កេរិ៍តឈ្មោះផលិតផលផលិតក្នុងស្រុក ការបង្កើនសមត្ថភាពប្រកួតប្រជែង និងការធ្វើពាណិជ្ជូបនីយកម្មកសិកម្មស្របតាមនិន្នាការគុណភាពនៅលើទីផ្សារ ដែលអាចទទួលបានសេដ្ឋកិច្ចមាត្រដ្ឋាន និងឧត្តមប្រយោជន៍ប្រកួតប្រជែង ដែលមានតម្លៃបន្ថែមខ្ពស់។

ជាមួយគ្នានេះ លោកស្រីរំពឹងថាក្នុងក្របខ័ណ្ឌកិច្ចសហប្រតិបត្តិការជំរុញការប្រមូលទិញបន្លែនេះ នឹងជំរុញបន្ថែមនូវការធ្វើបរមភាវូបនីយកម្ម ការធ្វើទីផ្សារបន្លែនៅកម្ពុជា ដែលជាយន្តការមួយដ៏សំខាន់នៃគោលនយោបាយយុទ្ធសាស្រ្តអភិវឌ្ឍន៍ជាតិ ដើម្បីពង្រឹងបុរេលក្ខខណ្ឌចាំបាច់នានា ក្នុងទិសដៅទ្រទ្រង់នូវគោលដៅអភិវឌ្ឍន៍កម្ពុជាប្រកបដោយចីរភាព។

លោកស្រីគូសបញ្ជាក់ថា “ការប្រមូលទិញបន្លែរបស់សហគ្រាសទាំង៥ គឺស្មើនឹងប្រមាណ ២៤% នៃបរិមាណលក់ជាក់ស្តែងរបស់កសិករក្រោមគម្រោង AIMS ជាមធ្យមក្នុងមួយឆ្នាំ។ ការណ៍នេះមានន័យថា កសិករក្រោមគម្រោង AIMS នឹងអាចបង្កើនការផ្គត់ផ្គង់ក្នុងស្រុករបស់ខ្លួនរហូតដល់ជាង ៣ម៉ឺនតោន ជាមធ្យម ក្នុងមួយឆ្នាំ”។

បន្ថែមទៀតនោះ លោកស្រីរដ្ឋមន្ត្រីបានបង្ហាញក្តីរំពឹងថា “ការចុះអនុស្សរណៈនេះ នឹងក្លាយជាគន្លឹះនាំមុខដ៏ចម្បងមួយក្នុងការបង្កើតកាលានុវត្តភាព សម្រាប់វិស័យកសិ-ពាណិជ្ជកម្ម ដែលអាចលើកស្ទួយដល់សុខុមាលភាពរបស់ប្រជាពលរដ្ឋកម្ពុជា ស្របតាមគោលដៅអភិវឌ្ឍន៍របស់គម្រោង AIMS ក្នុងការបង្កើនវិបុលភាព និងប្រាក់ចំណូលរបស់គ្រួសារកសិករខ្នាតតូច ដោយអនុវត្តគោលការណ៍អភិក្រមនៃការបង្កើតយន្តការបញ្ជ្រាបផលិតផលបន្លែក្នុងស្រុក ប្រកបដោយគុណភាព សុវត្ថិភាព និរន្តរភាព ព្រមទាំងប្រកបដោយអាហារូបត្ថម្ភ និងធានាបាននូវសន្តិសុខស្បៀងសម្រាប់អ្នកប្រើប្រាស់”៕

The post ក្រសួងពាណិជ្ជកម្ម ចុះ MoU ជាមួយក្រុមហ៊ុនចំនួន៥ ប្រមូលទិញបន្លែពីកសិករប្រមាណ ៣ម៉ឺនតោនក្នុងមួយឆ្នាំ appeared first on .

ក្នុងជំនួបរយៈពេលខ្លីនេះ លោកស្រី ចម និម្មល និងលោក លោក Matthew Stephenson បានពិភាក្សាការងារអំពីការពង្រឹង និងពង្រីកកិច្ចសហប្រតិបត្តិការរវាងប្រទេសកម្ពុជា និងវេទិកាសេដ្ឋកិច្ចពិភពលោក ដែលភាគីទាំងពីរបានជជែករំលឹកអំពីកិច្ចសហប្រតិបត្តិក្នុងការបង្កើតប្រព័ន្ធទិន្នន័យ ស្តីពីសន្ធានកម្មខ្សែច្រវាក់ផ្គត់ផ្គង់ សំដៅផ្តល់ កិច្ចសម្រួលវិនិយោគសម្រាប់អភិវឌ្ឍន៍ចីរភាព (SD2) សហការរៀបចំព្រឹត្តិការណ៍ផ្សេងៗនៅ អង្គការពាណិជ្ជកម្មពិភពលោក និងនៅកម្ពុជា។

នៅក្នុងជំនួបនេះដែរ ភាគីទាំងពីរក៏បានពិភាក្សាអំពីកិច្ចគាំទ្ររបស់វេទិកាសេដ្ឋកិច្ចពិភពលោក ដល់ការជំរុញការវិនិយោគបន្ថែមទៀតនៅក្នុងវិស័យមួយចំនួន រួមទាំងការរៀបចំវេទិកាកសិ-ចំណីអាហារក្នុងតំបន់ ឬទម្រង់ផ្សេងទៀតនៃព្រឹត្តិការណ៍ដែលប្រមូលផ្តុំតួអង្គទាំងអស់នៅក្នុងឧស្សាហកម្មកសិ-ចំណីអាហារ។

កិច្ចប្រជុំប្រចាំឆ្នាំលើកទី៥៤ នៃវេទិកាសេដ្ឋកិច្ចពិភពលោកឆ្នាំនេះ ធ្វើឡើងក្រោមមូលបទ «ការកសាង ឡើង វិញនូវទំនុកចិត្ត» ដោយផ្តោតលើគោលការណ៍ជាមូលដ្ឋានដែលជំរុញឱ្យមានទំនុកចិត្ត រួមទាំងតម្លា ភាព សង្គតិភាព និងគណនេយ្យភាព។ ក្នុងកិច្ចប្រជុំនេះថ្នាក់ដឹកនាំពិភពលោក និងនាយកប្រតិបត្តិក្រុមហ៊ុនធំៗ ព្រមទាំងប្រធានអង្គការអន្តរជាតិ សំខាន់ៗ ថ្នាក់ដឹកនាំសង្គមស៊ីវិល តំណាងយុវជន សហគ្រិនសង្គម និងអង្គភាពសារព័ត៌មាននានា នឹង ចូល រួមក្នុងកិច្ចប្រជុំនេះ៕

The post តើរដ្ឋមន្រ្តីស្រ្តីវ័យក្មេងកម្ពុជា ជជែករឿងរ៉ាវការងារអ្វីខ្លះជាមួយប្រធានផ្នែកវិនិយោគ និងសេវាកម្មនៃវេទិកាសេដ្ឋកិច្ចពិភពលោក? appeared first on .

ថ្លែងក្នុងពិធីបើកសន្និបាត បូកសរុបការងារពាណិជ្ជកម្មឆ្នាំ២០២៣ និងទិសដៅអនុវត្តការងារពាណិជ្ជកម្ម ឆ្នាំ២០២៤របស់ក្រសួងពាណិជ្ជកម្ម នៅថ្ងៃទី២១ ខែធ្នូ ឆ្នាំ២០២៣នេះ លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម បានឱ្យដឹងថា  ទំហំពាណិជ្ជកម្មអន្តរជាតិ ក្នុងរយៈពេល១១ខែ ឆ្នាំ២០២៣នេះ សម្រេចបានជាង ៤៣ពាន់លានដុល្លារ ដោយការនាំចេញមានចំនួន២១ពាន់លានដុល្លារ កើនឡើង ៤.០៨%។

ក្នុងនោះ ទំហំពាណិជ្ជកម្មរបស់កម្ពុជា ជាមួយនឹងបណ្តាប្រទេសហត្ថលេខីនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) មានប្រមាណ ២៦.៥៧ ពាន់លានដុល្លារ ដែលការនាំចេញមានទំហំ ៧.២១ ពាន់លានដុល្លារ គឺកើនឡើង ២៧.២៩%។

លោកស្រី បានបន្តថា ទីផ្សារ RCEP គឺជាទីផ្សារដ៏សំខាន់មួយសម្រាប់កម្ពុជា ដែលមានចំណែកប្រមាណ ៦១.០៦% នៃទំហំពាណិជ្ជកម្មសរុបរបស់កម្ពុជា។

សូមបញ្ជាក់ថា កិច្ចព្រមព្រៀង RCEP បានចូលជាធរមាន នៅថ្ងៃទី១ ខែមករា ឆ្នាំ២០២១ មានការចូលរួមប្រទេសចំនួន១៥ រួមមានប្រទេសជាសមាជិកអាស៊ានទាំង១០ និងដៃគូពាណិជ្ជកម្មសេរី ចំនួន៥ទៀត មានអូស្ត្រាលី ចិន ជប៉ុន កូរ៉េខាងត្បូង និងណូវែលហ្សេឡង់ ដែលបានចាប់ផ្តើមបង្កើតដំបូងនៅឆ្នាំ២០១២ នៅភ្នំពេញ។ 

គួរឱ្យដឹងផងដែរថា ទំហំពាណិជ្ជកម្មអន្តរជាតិរបស់កម្ពុជា ក្នុងរយៈពេល ១១ខែ ដើមឆ្នាំ២០២៣ មានទំហំទឹកប្រាក់ ៤៣ ៥១៥,៨៦លានដុល្លារ ដែលក្នុងនោះការនាំចេញសរុបមាន ២១ ៩៩២,៤០លានដុល្លារ កើនឡើង ៤,០៨% បើប្រៀបធៀបនឹងការនាំចេញ រយៈពេល១១ខែ ឆ្នាំ២០២២៕

The post ទំហំពាណិជ្ជកម្មកម្ពុជា និងRCEP សម្រេចបានជាង ២៦ពាន់លានដុល្លារ ក្នុងរយៈពេល១១ខែ appeared first on .

ក្នុងពិធីបិទ វេទិកាធុរកិច្ចសំបុកត្រចៀកកាំកម្ពុជា និងបើក កម្មវិធីរាត្រីស្រមោសរត្រចៀកកាំកម្ពុជា កាលពីថ្ងៃទី២៥ខែតុលាឆ្នាំ២០២៣ លោកស្រី ចម និម្មល រដ្ឋមន្ត្រីក្រសួងពាណិជ្ជកម្ម បានជំរុញ និងលើកទឹកចិត្ត ដល់សមាគមអ្នកផលិត អ្នកនាំចេញ និងអ្នកពាក់ព័ន្ធក្នុងវិស័យសំបុកត្រចៀកកាំកម្ពុជា បន្តសហការនិងចាប់ដៃគ្នាជាមួយពាណិជ្ជករផ្គត់ផ្គង់សំបុកត្រចៀកកាំធំៗដូចជា ឥណ្ឌូនេស៊ី ម៉ាឡេស៊ី និងថៃ ដើម្បីបន្តពង្រឹងគុណភាព បង្កើនបរិមាណផលិត ការធានាបាននូវសិ្ថរភាពនៃការផ្តត់ផ្តង់ និងការបំពេញបានតាមលក្ខខណ្ឌ និងនីតិវិធីតម្រូវនានាសម្រាប់ការនាំចេញទៅទីផ្សារអន្តរជាតិ។ 

ប្រធានសមាគមអ្នកផលិត និងនាំចេញសំបុកត្រចៀកកាំកម្ពុជា លោកស្រី វ៉ា សុជិន មានប្រសាសន៍ថា«វេទិកាធុរកិច្ចសំបុកត្រចៀកកាំកម្ពុជាគឺជាវេទិកាលើកដំបូង អាចនិយាយបានថា ជាព្រឹត្តិការណ៍ប្រវត្តិសាស្រ្តមួយសម្រាប់វិស័យត្រចៀកកាំកម្ពុជា ដែលត្រូវបានផ្តួចផ្តើមឡើងដោយសមាជិក សមាជិកានៃសមាគមអ្នកផលិត និងនាំចេញសំបុកត្រចៀកកាំកម្ពុជា ដើម្បីផ្សព្វផ្សាយពីវិស័យសំបុកត្រចៀកកាំកម្ពុជា ឱ្យកាន់តែទូលំទូលាយទៅកាន់ទីផ្សារក្នុងស្រុក និងអន្តរជាតិ, កសាងទំនាក់ទំនងរវាងពាណិជ្ជករក្នុងស្រុក និងអន្តរជាតិ ដើម្បីឈានដល់ការធ្វើពាណិជ្ជកម្មជាមួយគ្នាប្រកបដោយទំនុកចិត្ត បង្កើតឱកាសឱ្យវិស័យពាក់ព័ន្ធចូលរួមគាំទ្រ និងទទួលបានផលប្រយោជន៍ តាមរយៈការបង្ហាញនូវផលិតផល និងសេវាកម្មរបស់ខ្លួន និងស្វែងរកការគាំទ្រពីរាជរដ្ឋាភិបាល និងភាគីពាក់ព័ន្ធ ដើម្បីសម្របសម្រួលក្នុងការនាំចេញ នាំចូលផលិតផលត្រចៀកកាំដោយស្របច្បាប់»។

គួរបញ្ជាក់ផងដែរថា វេទិកានេះមានការចូលរួមពីសមាគមត្រចៀកកាំមកពីប្រទេសកម្ពុជា ថៃ វៀតណាម ម៉ាឡេស៊ី និងចិន ក្នុងគោលបំណងជំរុញការនាំចេញសំបុកត្រចៀកកាំកម្ពុជា ដោយផ្តល់ឱកាសជូនអាជីវករ និងពាណិជ្ជករជាតិ និងអន្តរជាតិក្នុងវិស័យសំបុកត្រចៀកកាំ ដើម្បីពង្រឹងនិងពង្រីកកិច្ចសហប្រតិបត្តិការពាណិជ្ជកម្ម ស្វែងរកដៃគូអាជីវកម្ម និងបង្កើនការនាំចេញសំបុកត្រចៀកកាំកម្ពុជាទៅកាន់ទីផ្សារអន្តរជាតិ តាមរយៈវេទិកាធុរកិច្ចដ៏សំខាន់នេះ៕ អត្ថបទ៖សារេត

The post ៤ប្រទេសមកចូលរួមវេទិកាធុរកិច្ចសំបុកត្រចៀកកាំកម្ពុជា ផ្តល់ឱកាសដល់អ្នករកស៊ីកសាងទំនាក់ទំនងធ្វើពាណិជ្ជកម្មរួមគ្នា appeared first on .