លោក ម៉ឹង ពន្លក

កូនប្រុសពៅម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់បរិញ្ញាបត្រ ពីប្រទេសអង់គ្លេស

ឧកញ៉ាដែនដី — Thu, 18 Jul 2024 04:55:16 +0000

លោក ផន មុតច័ន្ទឧត្តម ហៅ Erich ដែលជាកូនប្រុសពៅរបស់លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស បានទទួលសញ្ញាបត្រថ្នាក់បរិញ្ញាបត្រវិទ្យាសាស្ត្រ ផ្នែកទីផ្សារពាណិជ្ជកម្ម (Business with Marketing) ពីសាកលវិទ្យាល័យ City University of London នៅទីក្រុងឡុងដ៍ ប្រទេសអង់គ្លេស។

លោកស្រី ខៀវ សស៊ីលៀប បានបង្ហោះសារអបអរសាទរកូនប្រុសពៅ នៅទំព័រហ្វេសប៊ុក កាលពីថ្ងៃទី១៧ ខែកក្កដា ជាភាសាអង់គ្លេស ដែលមានន័យជាភាសាខ្មែរយ៉ាងដូច្នេះថា៖ “Erich ជាទីស្រឡាញ់របស់ម៉ាក់! មិនមានពាក្យអ្វីគ្រប់គ្រាន់ដើម្បីពិពណ៌នាពីអ្វីដែលយើងទាំងអស់គ្នាមានមោទនភាពចំពោះកូននោះទេ។ សូមឈរនៅទីខ្ពស់ ទោះបីជាអ្នកធ្លាក់ចុះ ហើយនៅពេលអ្នកភ័យខ្លាចខ្លាំង សូមបន្តសម្លឹងទៅខាងមុខ និងមើលទៅខាងស្តាំក្បែរអ្នក យើងទាំងអស់គ្នានឹងតែងតែនៅទីនោះជាមួយកូន។ កុំភ្លេចថា កូនក្លាហានជាងអ្វីដែលកូនមានជំនឿ ខ្លាំងជាងអ្វីដែលកូនមានអារម្មណ៍ និងមានក្តីស្រឡាញ់លើសពីអ្វីដែលកូនធ្លាប់ដឹង។ ម៉ាក់ប៉ា និងបងប្រុស ស្រឡាញ់កូនខ្លាំងបំផុត”។

សាកលវិទ្យាល័យ City University of London ជាប្រភេទសាកលវិទ្យាល័យបែបស្រាវជ្រាវសាធារណៈ ដែលបានបង្កើតឡើង តាំងពីឆ្នាំ១៨៩៤។ City University of London ធ្លាប់បានជាប់ឈ្មោះជាសាកលវិទ្យាល័យបែបស្រាវជ្រាវល្អបំផុត លំដាប់ទី៥ ក្នុងចំណោមសាកលវិទ្យាល័យចំនួន ១៦៨ ក្នុងប្រទេសអង់គ្លេស កាលឆ្នាំ២០១៩។

សូមជម្រាបថា លោក ផន មុតច័ន្ទឧត្តម ហៅ Erich ជាកូនប្រុសរបស់លោកឧត្តមសេនីយ៍ទោ ម៉ឹង ពន្លក អគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ និងលោកស្រី ខៀវ សស៊ីលៀប ហើយត្រូវជាប្អូនប្រុសរបស់លោក ផន មុតសុក្រឆពណ្ណ ហៅ Richie ដែលទើបបានទទួលសញ្ញាបត្រថ្នាក់អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល ពីសាកលវិទ្យាល័យ King’s College London នៅទីក្រុងឡុងដ៍ ប្រទេសអង់គ្លេស កាលខែមករា ឆ្នាំ២០២៤ ផងដែរ៕

The post កូនប្រុសពៅម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់បរិញ្ញាបត្រ ពីប្រទេសអង់គ្លេស appeared first on .

កូនប្រុសម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់អនុបណ្ឌិត ពីប្រទេសអង់គ្លេស

ឧកញ៉ាដែនដី — Fri, 19 Jan 2024 02:16:57 +0000

លោក ផន មុតសុក្រឆពណ្ណ ហៅ Richie ដែលជាកូនប្រុសរបស់លោកស្រី ខៀវ សស៊ីលៀប ស្ថាបនិកា និងអគ្គនាយិកាក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស បានទទួលសញ្ញាបត្រថ្នាក់អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល (International Businesses and Global Management) ពីសាកលវិទ្យាល័យ King’s College London នៅទីក្រុងឡុងដ៍ ប្រទេសអង់គ្លេស។

លោកស្រី ខៀវ សស៊ីលៀប បានបង្ហោះសារអបអរសាទរកូនប្រុស នៅទំព័រហ្វេសប៊ុក កាលពីថ្ងៃទី១៨ ខែមករា ឆ្នាំ២០២៤ ជាភាសាអង់គ្លេស ដែលមានន័យជាភាសាខ្មែរយ៉ាងដូច្នេះថា៖ “កូនបានផ្តល់ហេតុផលជាច្រើន ដើម្បីឱ្យម៉ាក់មានមោទនភាពយ៉ាងខ្លាំង ដែលមានកូនជាកូនម៉ាក់។ រឿងដែលមានមោទនភាពបំផុតរបស់ម៉ាក់ គឺការប្រាប់ដល់អ្នករាល់គ្នាថា អ្នកគឺជាកូនប្រុសរបស់ម៉ាក់។ សូមអបអរសាទរ សម្រាប់សមិទ្ធផលដ៏ពិសេសនេះ, អនុបណ្ឌិត ផ្នែកអាជីវកម្មអន្តរជាតិ និងការគ្រប់គ្រងសកល នៅ King College។ កូនបានខិតខំប្រឹងប្រែងខ្លាំងណាស់។ ម៉ាក់និងប៉ា នឹងបន្តញញឹមមើលកូនដើរឆ្លងកាត់ជំហានជាបន្តបន្ទាប់ក្នុងជីវិតរបស់កូន។ ប៉ាម៉ាក់ស្រលាញ់កូនជារៀងរហូត”។

សាកលវិទ្យាល័យ King’s College London ជាសាកលវិទ្យាល័យដ៏ចំណាស់មួយរបស់ប្រទេសអង់គ្លេស ដែលបានបង្កើតឡើងតាំងពីឆ្នាំ១៨២៩។ King’s College London បានជាប់ឈ្មោះជាសាកលវិទ្យាល័យបែបស្រាវជ្រាវល្អបំផុត លំដាប់ទី៦ ក្នុងប្រទេសអង់គ្លេស កាលឆ្នាំ២០២១ និងចំណាត់ថ្នាក់សាកលវិទ្យាល័យល្អបំផុត លេខរៀងទី៣៥ នៅលើពិភពលោក ក្នុងឆ្នាំ២០២៣។ សាកលវិទ្យាល័យនេះ បានបណ្តុះបណ្តាលនិស្សិតប្រមាណជាង ២៥ម៉ឺននាក់ នៅជុំវិញពិភពលោក។

គួររំឭកថា លោក ផន មុតសុក្រឆពណ្ណ កូនប្រុសរបស់លោកឧត្តមសេនីយ៍ទោ ម៉ឹង ពន្លក អគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ និងលោកស្រី ខៀវ សស៊ីលៀប បានរៀបអាពាហ៍ពិពាហ៍ដ៏ធំជាមួយកញ្ញា តាំង ប៉ោហ្គិច ហៅ Jade កាលពីថ្ងៃទី០១ ខែតុលា ឆ្នាំ២០២៣។ ពិធីមង្គលអាពាហ៍ពិពាហ៍ត្រកូលអភិជននាពេលនោះ មានការអញ្ជើញចូលរួមដ៏ខ្ពង់ខ្ពស់ ពីប្រមុខថ្នាក់ដឹកនាំកំពូលៗរបស់រាជរដ្ឋាភិបាល និងអ្នកឧកញ៉ា គិត ម៉េង អ្នកឧកញ៉ា ភាព ហៀក អ្នកឧកញ៉ា លាង ម៉េង អ្នកឧកញ៉ា សំ អាង អ្នកឧកញ៉ា ហ៊ុន តូ រួមទាំងអ្នកឧកញ៉ា ឧកញ៉ា និងអ្នកមុខអ្នកការលើវិស័យជំនួញផ្សេងៗជាច្រើនរូបទៀតផងដែរ៕

The post កូនប្រុសម្ចាស់ក្រុមហ៊ុន ហនុមាន ទទួលសញ្ញាបត្រថ្នាក់អនុបណ្ឌិត ពីប្រទេសអង់គ្លេស appeared first on .

លោក ម៉ឹង ពន្លក កូនប្រុសនាយឧត្តមសេនីយ៍ ម៉ឹង សំផន ឡើងជាអគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ

ឧកញ៉ាដែនដី — Thu, 03 Aug 2023 03:43:50 +0000

លោកឧត្តមសេនីយ៍ទោ ម៉ឹង ពន្លក កូនប្រុសរបស់នាយឧត្តមសេនីយ៍ ម៉ឹង សំផន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការ ក្រសួងការពារជាតិ ត្រូវបានព្រះករុណា ព្រះបាទសម្ដេច ព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា ត្រាស់បង្គាប់តែងតាំងមុខតំណែងជា អគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ នៅថ្ងៃទី០២ ខែសីហា ឆ្នាំ២០២៣។

លោកឧត្តមសេនីយ៍ទោ ម៉ឹង ពន្លក ទទួលបានការតែងតាំងមុខតំណែងខាងលើនេះ គឺជំនួសនាយឧត្តមសេនីយ៍ ស៊ុំ សំណាង ដែលត្រូវបានតែងតាំងជារដ្ឋលេខាធិការក្រសួងការពារជាតិ។ មុនទទួលបានតំណែង អគ្គនាយក លោកឧត្តមសេនីយ៍ទោ ម៉ឹង ពន្លក ជាអគ្គនាយករង នៃអគ្គនាយកដ្ឋានភស្ដុភារ ហរិញ្ញវត្ថុ ក្រសួងការពារជាតិ ដែលសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានចេញអនុក្រឹត្យតែងតាំង កាលពីថ្ងៃទី១០ ខែសីហា ឆ្នាំ២០២២។

សូមជម្រាបថា លោកឧត្តមសេនីយ៍ទោ ម៉ឹង ពន្លក ជាកូននាយឧត្តមសេនីយ៍ ម៉ឹង សំផន រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការ ទទួលបន្ទុកការងារភស្តុភារហិរញ្ញវត្ថុ ជាប្រធានក្រុមការងារកែទម្រង់ការគ្រប់គ្រងហិរញ្ញវត្ថុសាធារណៈ និងជាប្រធានក្រុមការងារអនុវត្ដ គម្រោងប្រព័ន្ធបច្ចេកវិទ្យាព៌តមាន សម្រាប់ការគ្រប់គ្រងហិរញ្ញវត្ថុសាធារណៈ ក្រសួងការពារជាតិ ខណៈដែលបងប្រុសរបស់លោកក៏សុទ្ធសឹងជាថ្នាក់ដឹកនាំជាន់ខ្ពស់ផងដែរ ក្នុងនោះលោក ម៉ឹង មករា ជារដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងឧត្តមសេនីយ៍ឯក ម៉ឹង កុម្ភៈ ជាអនុរដ្ឋលេខាធិការក្រសួងការពារជាតិ៕

The post លោក ម៉ឹង ពន្លក កូនប្រុសនាយឧត្តមសេនីយ៍ ម៉ឹង សំផន ឡើងជាអគ្គនាយក នៃអគ្គនាយកដ្ឋានភស្ដុភារ ហិរញ្ញវត្ថុ ក្រសួងការពារជាតិ appeared first on .