នៅក្នុងកិច្ចប្រជុំកំពូលសន្និសីទស្រូវអង្ករពិភពលោក ឆ្នាំ២០២៥ ដែលកម្ពុជាធ្វើជាម្ចាស់ផ្ទះ កាលពីថ្ងៃទី៨ ខែវិច្ឆិកា លោកស្រីរដ្ឋមន្ត្រី បានថ្លែងថា កិច្ចប្រជុំកំពូលសន្និសីទស្រូវអង្ករពិភពលោកឆ្នាំនេះ គឺពិតជាមានអត្ថន័យពិសេសសម្រាប់កម្ពុជា ដែលនេះមិនត្រឹមតែបង្ហាញពីភាពលេចធ្លោរបស់កម្ពុជា ក្នុងសហគមន៍ស្រូវអង្ករសកលប៉ុណ្ណោះទេ ប៉ុន្តែថែមទាំងបញ្ជាក់ជាថ្មីអំពីការប្តេជ្ញាចិត្ត របស់កម្ពុជាចំពោះនិរន្តរភាព នវានុវត្តន៍ និងកំណើនប្រកបដោយបរិយាបន្ន ក្នុងការតម្រែតម្រង់អនាគតនៃផលិតកម្មស្រូវអង្ករផងដែរ។

ក្នុងឱកាសនោះ លោកស្រីរដ្ឋមន្ត្រី បានគូសបញ្ជាក់ផងដែរថា កម្ពុជានៅតែបន្តយកចិត្តទុកដាក់ខ្ពស់ ចំពោះបញ្ហាប្រឈមនានាដែលនឹងអាចកើតមាននាពេលអនាគតដូចជា ភាពស្មុគស្មាញនៃបទប្បញ្ញត្តិនាំចូល អត្រាពន្ធគយខ្ពស់ និងបញ្ហាការដឹកជញ្ជូន ដែលបានរារាំងការចូលទៅកាន់ទីផ្សារថ្មី ប៉ុន្តែក្រសួងពាណិជ្ជកម្ម នៅតែបន្តដោះស្រាយបញ្ហាប្រឈមទាំងនេះ តាមរយៈការចរចាពាណិជ្ជកម្ម បរិវត្តកម្មឌីជីថល និងកិច្ចសន្ទនារវាងវិស័យរដ្ឋ និងឯកជន។

ទន្ទឹមនឹងនោះ លោកស្រីរដ្ឋមន្ត្រី បានអញ្ជើញអ្នកចូលរួមទាំងអស់ អ្នកវិនិយោគ និងធុរជនអន្តរជាតិ ផ្សារភ្ជាប់ទំនាក់ទំនងជាមួយស្ថាប័នសំខាន់ៗនានា ដើម្បីស្វែងយល់ពីកាលានុវត្តភាពវិនិយោគសម្រាប់ពាណិជ្ជកម្មប្រកប ដោយចីរភាព និងនវានុវត្តន៍នៅក្នុងវិស័យស្រូវអង្កកម្ពុជា។

សូមជម្រាបជូនផងដែរថា ក្រសួងពាណិជ្ជកម្មបានប្រកាសដាក់ឱ្យប្រើប្រាស់ជាផ្លូវការនូវ យុទ្ធសាស្ត្រស្តីពីការពង្រីកទីផ្សារ និងពិពិធកម្មការនាំចេញអង្ករកម្ពុជា ឆ្នាំ២០២៥-២០៣០ ដែលនឹងដើរតួនាទីជាផែនទីបង្ហាញផ្លូវ សម្រាប់ការពង្រឹងវត្តមានរបស់អង្ករកម្ពុជានៅលើឆាកអន្តរជាតិ ក្នុងគោលបំណងធ្វើពិពិធកម្មគោលដៅនាំចេញ និងបង្កើនភាពប្រកួតប្រជែង៕

The post រដ្ឋមន្ត្រីក្រសួងពាណិជ្ជកម្ម ជំរុញអ្នកវិនិយោគ និងធុរជនអន្តរជាតិ ស្វែងយល់កាលានុវត្តភាពវិនិយោគក្នុងវិស័យស្រូវអង្ករកម្ពុជា appeared first on .

លោកលើកឡើងបែបនេះនៅក្នុងពិធីប្រគល់សញ្ញាបត្រជូននិស្សិតជ័យលាភី នៃសាកលវិទ្យាល័យភូមិន្ទកសិកម្ម វិទ្យាស្ថានជាតិកសិកម្មព្រែកលៀប និងវិទ្យាស្ថានជាតិកសិកម្មកំពង់ចាមនៅថ្ងៃទី១៦ ខែកញ្ញាឆ្នាំ២០២៥។ លោកបន្តថា ថវិកាបម្រុងចំនួន១០០លានដុល្លារដែលរាជរដ្ឋាភិបាលបានបញ្ចេញ លើកលើកទី១ មានចំនួន ២៨,៥លានដុល្លារ, លើកទី២ ចំនួន ៤០លានដុល្លារ ក្នុងឆ្នាំ២០២៤, លើកទី៣មានចំនួន ៣០លាន ដុល្លារនៅដើមឆ្នាំ២០២៥ និងលើកទី៤មានចំនួន ២០លានដុល្លារ ក្នុងរដូវប្រមូលផលចាប់ពី ខែសីហា កន្លងមកនេះ ដើម្បីគាំទ្រដល់បណ្តារោងម៉ាស៊ីនកិនស្រូវក្នុងស្រុក ក្នុងលក្ខណៈជាកម្ចី បង្វិលសងវិញជាបន្តបន្ទាប់ ក្នុងការបង្កើនការប្រមូលទិញស្រូវជួយដល់បងប្អូនកសិករ ដែលកំពុងជួបបញ្ហាស្រូវធ្លាក់ថ្លៃ ដោយសារការប្រែប្រួលនៃសេដ្ឋកិច្ច និងពាណិជ្ជកម្ម ពិភពលោក ជាពិសេសការធ្លាក់ថ្លៃអង្ករលើទីផ្សារអន្តរជាតិ ព្រមទាំងកិច្ចខិតខំប្រឹងប្រែងរបស់ក្រសួង ស្ថាប័ន ពាក់ព័ន្ធ ធនាគារអភិវឌ្ឍន៍ជនបទ និងកសិកម្ម សហព័ន្ធស្រូវអង្ករកម្ពុជា ម្ចាស់រោងម៉ាស៊ីន កិនស្រូវនិងមន្ត្រីកសិកម្មឃុំទាំងអស់ ដែលបាន និងកំពុងជួយរកទីផ្សារ និងសម្របសម្រួល ការលក់ស្រូវរបស់ប្រជាពលរដ្ឋនៅទូទាំងប្រទេស។

លោករដ្ឋមន្ត្រីលើកឡើងថា រាជរដ្ឋាភិបាលកម្ពុជាតែងតែចាត់ទុកវិស័យកសិកម្ម ក្នុងការធានាសន្តិសុខស្បៀង លើកកម្ពស់ជីវភាពប្រជាពលរដ្ឋ និងរួមចំណែកដល់ការលើកស្ទួយ កំណើនសេដ្ឋកិច្ចជាតិ។ សម្តេចតេជោ បានដឹកនាំឱ្យមានកំណែទម្រង់ជាបន្តបន្ទាប់ក្នុងវិស័យកសិកម្ម ដែលជាលទ្ធផលបានប្រែក្លាយប្រទេសកម្ពុជាពីប្រទេសដែលខ្វះស្បៀង និងពឹងផ្អែកលើជំនួយស្បៀងពីបរទេស ទៅជាប្រទេសកសិកម្មរីកចម្រើន មានសន្តិសុខស្បៀងពេញលេញ មានផលិតផលកសិកម្មសម្បូរបែប និងនាំចេញកសិផលរាប់លានតោនទៅបរទេស ដែលមិនត្រឹមតែនាំមកវិញនូវរូបិយបណ្ណបរទេស ដើម្បីជួយទ្រទ្រង់កំណើនសេដ្ឋកិច្ចជាតិប៉ុណ្ណោះទេ ប៉ុន្តែថែមទាំងរួមចំណែកធានាសន្តិស្បៀងក្នុងតំបន់ និងពិភពលោកថែមទៀតផង។

ក្នុងនីតិកាលទី៧ នៃរដ្ឋសភានេះ ក្រោមការដឹកនាំដ៏ឈ្លាសវៃ ស្វាហាប់ និងប្រកបដោយ ចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត រាជរដ្ឋាភិបាលកម្ពុជា នៅតែបន្តផ្តល់អាទិភាពដល់វិស័យកសិកម្ម ជាពិសេសការធានាសន្តិសុខស្បៀងក្នុងគ្រប់កាលៈទេសៈ។ ទោះបីជាសេដ្ឋកិច្ចកម្ពុជាបានឈានដល់កម្រិត និងដំណាក់កាលថ្មីនៃការអភិវឌ្ឍ តាមរយៈការស្ទុះឡើងក្នុងវិស័យនានា ដូចជា ឧស្សាហកម្មវាយនភណ្ឌ ទេសចរណ៍ សេវាកម្ម ហិរញ្ញវត្ថុ សំណង់ ក៏ដោយ ក៏រាជរដ្ឋាភិបាលកម្ពុជានៅតែបន្តចាត់ទុកសន្តិសុខស្បៀងគឺជាមូលដ្ឋានដ៏ សំខាន់ក្នុងការធានាស្ថិរភាពសេដ្ឋកិច្ច នយោបាយ និងសង្គមដដែល៕

The post លោក ហង់ជួន ណារ៉ុន៖ រាជរដ្ឋាភិបាលបានបញ្ចេញថវិកា១០០លានដុល្លារ ដើម្បីជួយរក្សាលំនឹងថ្លៃស្រូវជូនប្រជាពលរដ្ឋ appeared first on .

របាយការណ៍ខាងលើបានបង្ហាញបន្តថា នៅឆ្នាំ២០២៤ ភាគរយអ្នកធ្វើការផ្នែកកសិកម្មមានការធ្លាក់ចុះដល់ ៣០ ភាគរយ ដែលស្ទើរតែស្ទើរទៅនឹងភាគរយរបស់អ្នកធ្វើសិប្បកម្ម និងអាជីវកម្មពាក់ព័ន្ធ (២៥,៩ ភាគរយ) ខណៈភាគរយអ្នកផ្តល់សេវាកម្ម និងលក់ បានកើនឡើងដល់ ១៩,១ ភាគរយ។

បញ្ជាក់ថា នេះ គឺជាមុខរបរជំនាញ ដែលភាគច្រើនអ្នកមានការងារបានធ្វើនៅ ក្នុងសេដ្ឋកិច្ចកម្ពុជា ហើយវាក៏បានឆ្លុះបញ្ចាំងថា ទីផ្សារការងារជំនាញនៅកម្ពុជា បានងើបឡើង ប៉ុន្តែការបណ្តុះបណ្តាលវិជ្ជាជីវៈជំនាញការងារនៅតែត្រូវការបន្ថែម ដើម្បីឆ្លើយតបទៅនឹងទីផ្សារការងារប្រកួតប្រជែងអោយ កាន់តែប្រសើរ។ ក្នុងចំណោមក្រុមមុខរបរចម្បងទាំងប្រាំបួន ក្រុមមុខរបរចំនួនបី ដែលសមាមាត្ររបស់ស្ត្រីខ្ពស់ជាង បុរស គឺរួមមាន ក្រុមមុខរបរជំនាញកសិកម្ម ព្រៃឈើ និងនេសាទ ជំនាញទាក់ទងនឹងសេវាកម្ម និងលក់ ហើយនឹងជំនាញជាស្មៀន។ ទោះបីជាក្រុមមុខរបរចំនួនពីរ មានភាពខុសគ្នាក្នុងកម្រិតទាប ក៏អាជីពផ្នែកសេវាកម្ម និងលក់ មានភាពខុសគ្នារហូតដល់ ១០,៤ ភាគរយ រវាងអ្នកធ្វើការបុរស និងស្ត្រី។

នៅក្នុងរបាយការណ៍ដដែលនេះ ក៏បានឱ្យដែរថា នៅទីប្រជុំជន ភាគច្រើននៃអ្នកមានការងារធ្វើ មានមុខរបរជាអ្នកធ្វើសិប្បកម្ម និងអាជីវកម្មពាក់ព័ន្ធ (៣០,៤ ភាគរយ) អ្នកផ្តល់សេវាកម្ម និងលក់ (២៧,៥ ភាគរយ) និងអ្នកជំនាញកសិកម្ម រុក្ខាប្រមាញ់ និង នេសាទ (១១,៩ ភាគរយ)។ ចំណែកនៅតំបន់ជនបទ កសិកម្មនៅតែដើរតួយ៉ាងសំខាន់ (៤២,០ ភាគរយ) ទោះបីជាភាគរយនៃអ្នកធ្វើកសិកម្មក្នុងប្រទេសកម្ពុជាមានការធ្លាក់ចុះគួរឱ្យកត់សម្គាល់ បន្ទាប់មកផ្លែសិប្បកម្ម (២២,៩ ភាគរយ) និងផ្នែកសេវាកម្ម និងលក់ដូរ (១៣,៤ ភាគរយ)។ បើធៀបនឹងឆ្នាំ២០១៩ អ្នកមានការងារធ្វើភាគច្រើន មានមុខរបរជំនាញកសិកម្ម ព្រៃឈើ និងនេសាទ និងអ្នកធ្វើសិប្បកម្ម និងអាជីវកម្មពាក់ព័ន្ធ ដែលមានភាគរយប្រហាក់ប្រហែលគ្នា ខណៈពេលដែលមុខរបរ ផ្សេងទៀតមានការកើនឡើង។

គួរបញ្ជាក់ដែរថា លទ្ធផលចុងក្រោយនៃជំរឿនប្រជាជនឆ្នាំ២០១៩ បានបង្ហាញឱ្យឃើញថា វិស័យកម្មន្តសាល ពាណិជ្ជកម្មលក់ដុំលក់រាយ ជួសជុលយានយន្ត និងទោចក្រយានយន្ត សំណង់ និង សេវាកម្មផ្សេងទៀត មានការកើនឡើង ក្នុងខណៈពេលដែលសមាមាត្រការងារក្នុងវិស័យកសិកម្មមានការថយចុះ ហើយនិន្នាការនេះបាននាំឱ្យរចនាសម្ព័ន្ធសេដ្ឋកិច្ចប្រទេសកម្ពុជាកំពុងតែផ្លាស់ប្តូរទៅរកឧស្សាហកម្ម ទំនើប និងសម័យភាវូបនីយកម្ម។ និន្នាការនេះក៏នៅតែបន្តរកើតមាននៅក្នុងឆ្នាំ២០២៤ លើកលែងតែ សមាមាត្រការងារក្នុងវិស័យដែលពាក់ព័ន្ធនឹងសិល្បៈ ការកំសាន្ត និងការសប្បាយប៉ុណ្ណោះ ដែលបានធ្លាក់ចុះ ។ លើសពីនេះ សមាមាត្រក្នុងវិស័យកសិកម្ម មានការថយចុះក្នុង រង្វង់ ២០,២ ភាគរយ ក្នុងរយៈ ៥ ឆ្នាំកន្លងមកនេះ។ សមាមាត្រនៃវិស័យកម្មន្តសាល បានកើនឡើងដល់ ១៧,៨ ភាគរយ បន្ទាប់មកវិស័យពាណិជ្ជកម្មលក់ដុំលក់រាយ ជួសជុលយានយន្ត និងទោចក្រយានយន្តបាន កើនដល់ ១៣,៨ ភាគរយ ហើយវិស័យសំណង់ បានកើនដល់ ៨,២ ភាគរយ៕

The post ឆ្នាំ២០២៤៖ ភាគរយអ្នកធ្វើការផ្នែកកសិកម្មធ្លាក់ចុះ ៣០% ខណៈភាគរយអ្នកផ្តល់សេវាកម្ម និងលក់ បានកើនឡើងដល់ ១៩,១% appeared first on .

នេះបើយោងតាមរបាយការណ៍របស់ជំនួយការគណៈកម្មាធិការសមាជរដ្ឋសភានិងព្រឹទ្ធសភា។ចំពោះការចូលរួមចំណែករបស់អនុវិស័យនានាក្នុងវិស័យកសិកម្ម រួមមានផ្នែកដំណាំ ៦១,៣% ផ្នែកផលិតកម្មសត្វ ១៥,៤% ផ្នែកជលផល ២០% និងផ្នែកព្រៃឈើ ៣,៣%។

របាយការណ៍ដដែលនេះ បានឱ្យដឹងថា កម្ពុជាមានផ្ទៃដីកសិកម្ម ចំនួន ១៧លានហិកតា ដោយបានបែងចែកជាផ្ទៃដីដាំដុះដំណាំ ផ្ទៃដីព្រៃ ផ្ទៃដីចិញ្ចឹមសត្វ ព្រមទាំងដែនទឹកជាតំបន់គ្រប់គ្រងជលផលទឹកសាបនិងសមុទ្រ។ ទន្ទឹមនេះ កម្ពុជាក៏មានផ្ទៃដីស្រែវស្សាប្រមាណ ៣លានហិកតា ផ្ទៃដីស្រែប្រាំងប្រមាណ ៧០ម៉ឺនហិកតា ដែលអាងពង្រីកបានរហូតដល់ជិត ៩០ម៉ឺនហិកតា ក្នុងឆ្នាំ២០២៥។

កម្ពុជាសម្រេចបានការនាំចេញផលិតផលដាំណាំគួរឧ្យកត់សម្គាល់ប្រមាណ១២លានតោន ទៅកាន់ ៩៥ប្រទេស នៅឆ្នាំ២០២៤ ដែលបាននាំមុខនូវរូបិយប័ណ្ណបរទេស ៥,៣ ប៊ីលលាន ដុល្លារ។ ទន្ទឹមនឹងនេះ អង្កផ្ការំដួលបានឈ្នះពានរង្វាន់អង្កល្អដាច់គេលើកទី៦ ក្នុងការប្រកួតប្រជែងនៅប្រទេសហ្វីលីពីន និងពានមាសអង្កក្រអួបពីប្រទេសចិនដែលមានមោទនភាពសំរាប់កម្ពុជា៕

The post វិស័យកសិកម្មបន្តចូលរួមចំណែកប្រមាណ ១៦,៧% នៃGDP appeared first on .

របាយការណ៍ទស្សនវិស័យអាស៊ីខែមេសា ឆ្នាំ២០២៥របស់ធនាគារអភិវឌ្ឍន៍អាស៊ី បានបង្ហាញថា “វិស័យកសិកម្មត្រូវបានព្យាករណ៍ថានឹងកើនឡើង១% ក្នុងឆ្នាំ២០២៤ និង១,១% ក្នុងឆ្នាំ២០២៦ ដែលជំរុញដោយតម្រូវការនាំចេញ។ កំណើននេះត្រូវបានគាំទ្របន្ថែមទៀតដោយការកើនឡើងនៃការវិនិយោគផ្ទាល់ពីបរទេសកាលពីឆ្នាំមុន កិច្ចព្រមព្រៀងពាណិជ្ជកម្មសេរីទ្វេភាគី នាពេលថ្មីៗនេះជាមួយសាធារណរដ្ឋប្រជាមានិតចិន និងសាធារណរដ្ឋកូរ៉េនិងការចូលរួមក្នុងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រោយតំបន់”។

ទាក់ទងនិងវិស័យកសិកម្មកម្ពុជានេះផងដែរ បើយោងតាមរដ្ឋមន្ត្រីកសិកម្មរុក្ខាប្រមាញ់ និងនេសាទ កន្លងទៅថ្មីៗនេះបានបង្ហាញថា វិស័យកសិកម្មកម្ពុជាសម្រេចបានលទ្ធផលគួរជាទីមោទនៈ និងបានប្រែក្លាយពីស្ថានភាពខ្វះស្បៀង មកជាការធានាបាននូវសន្តិសុខស្បៀងគ្រប់គ្រាន់ក្នុងប្រទេស និងការនាំចេញផលិតផល កសិកម្មរាប់លានតោនដែលរួមចំណែកយ៉ាងសំខាន់ ដល់ការធានាសន្តិសុខស្បៀងពិភពលោកថែមទៀតផង។

ជាក់ស្តែង ក្នុងឆ្នាំ២០២៤ វិស័យកសិកម្មបានចូលរួមចំណែកប្រមាណ ១៦,៧% នៃផលិតផលសរុបក្នុងស្រុក គិតជាតម្លៃបច្ចុប្បន្ន ជាមួយនឹងតម្លៃបន្ថែមសរុប កើនឡើងដល់ជាង ៧,៨២ពាន់លាន ដុល្លារ ក្នុងនោះ ការរួមចំណែករបស់អនុវិស័យដំណាំស្មើនឹង ៦១,៣%, អនុវិស័យផលិតកម្មសត្វ ១៥,៤%, អនុវិស័យជលផល ២០%, និងអនុវិស័យព្រៃឈើ ៣,៣%។ កម្ពុជាបាននាំចេញនូវផលិតផលដំណាំជាង ១២លានតោន ទៅកាន់ទិសដៅ ៩៥ប្រទេស គិតជាទឹកប្រាក់ប្រមាណ ៥,៣ពាន់លានដុល្លារអាមេរិក។

ទោះជាយ៉ាងនេះក្តី វិស័យកសិកម្មកម្ពុជាជួបបញ្ហាប្រឈមមួយចំនួន ដូចជា អស្ថិរភាពនៃប្រព័ន្ធផលិតកម្ម, កង្វះទីផ្សារ, អស្ថិរភាពតម្លៃ និងកង្វះវិនិយោគលើការកែច្នៃជាដើម។ល។ ដែលទាមទារឱ្យគ្រប់តួអង្គពាក់ព័ន្ធចូលរួមសិក្សាស្វែងយល់ឱ្យបានស៊ីជម្រៅ និងរួមគ្នាដោះស្រាយ តាមយន្តការ “រដ្ឋ-ឯកជន-ដៃគូអភិវឌ្ឍន៍-សហគមន៍កសិកម្ម” ដើម្បីជំរុញ និងបង្កើនល្បឿនការអភិវឌ្ឍវិស័យកសិកម្ម។ ក្នុងន័យនេះ ការសិក្សា អំពីដំណើរវិវត្តនៃវិស័យកសិកម្មកម្ពុជានាពេលកន្លងមក រួមជាមួយនឹងនិន្នាការបច្ចុប្បន្ន និងសក្តានុពល នាពេលអនាគត គឺជារឿងចាំបាច់ដែលអង្គវេទិកាត្រូវជជែកពិភាក្សា៕

The post វិស័យកសិកម្ម រំពឹងថាមានកំណើន១% ក្នុងឆ្នាំ២០២៥ និង១,១% នៅឆ្នាំ២០២៦ appeared first on .

ក្នុងជំនួបនោះ លោក ឌិត ទីណា បានស្វាគមន៍ថ្នាក់ដឹកនាំ និងក្រុមការងារ (ACIAR) ក្នុងការពិនិត្យលទ្ធភាពចូលរួមចំណែកក្នុងវិស័យកសិកម្មកម្ពុជា និងបន្តពង្រឹងកិច្ចការសហប្រតិបត្តិការនេះឱ្យកាន់តែរលូន ដើម្បីផលប្រយោជន៍របស់ប្រជាកសិករ។ លោកក៏បានលើកទឹកចិត្តដល់ក្រុមការងារ (ACIAR) ក្នុងការសិក្សាបន្ថែមពាក់ព័ន្ធនឹងការប្រើប្រាស់ថាមពល និងថាមពលកកើតឡើងវិញ ឥណទានកាបូន និងធ្យូងជីវៈ ជាដើមដោយធ្វើយ៉ាងណាមានទិន្នន័យច្បាស់លាស់ និងអាចអនុវត្តបានពិតប្រាកដ។

លោករដ្ឋមន្រ្តីកសិកម្មក៏បានគូសបញ្ជាក់ថា «កម្ពុជាបើកទ្វារស្វាគមន៍រាល់អ្នកវិនិយោគទាំងអស់ដែលមានបំណងវិនិយោគលើវិស័យកសិកម្ម ក្នុងការផលិតធាតុចូលកសិកម្ម ចំណីសត្វគ្រប់ប្រភេទ ការវិនិយោគលើថាមពល ដើម្បីអាចជួយកាត់បន្ថយថ្លៃដើមរបស់ប្រជាកសិករ ជាពិសេសការវិនិយោគលើការសិក្សាស្រាវជ្រាវគ្រប់អនុវិស័យដូចជា ផលិតកម្មសត្វ វារីវប្បកម្ម និងហេដ្ឋារចនាសម្ព័ន្ធនានាចាំបាច់»។

សូមជម្រាបជូនថា កសិកម្ម គឺជាវិស័យអាទិភាពដ៏​សំខាន់​​មួយ​របស់​កម្ពុជា​ដែល​​ចូល​រួម​ចំណែក​​ជំរុញ​កំណើន​សេដ្ឋកិច្ច​ជាតិ តាម​រយៈ​ការ​ធានាសន្តិសុខ​ស្បៀង​ ​បង្កើត​ឱកាសការងារ និងប្រាក់​ចំណូល​ទៅ​ដល់​ប្រជាពលរដ្ឋ ក៏ដូចជា​​ការ​នាំចេញ​ទៅ​ទីផ្សារ​អន្តរ​ជាតិ​​។

ការ​ពង្រីក​ការ​វិនិយោគ​លើ​វិស័យ​កសិកម្ម គឺ​ស្រប​តាម​គោល​នយោបាយ​របស់​រដ្ឋាភិបាល ជា​ពិសេស​លើ​ការ​កែច្នៃ​ផលិតផល​ប្រកប​ដោយ​គុណភាព​សម្រាប់​ការ​នាំ​ចេញ​ទៅ​កាន់​ទីផ្សារ​អន្តរជាតិ។ ទន្ទឹមនឹងនេះ រាជរដ្ឋាភិបាលកម្ពុជាតាមរយៈក្រសួងកសិកម្មតែងតែទាក់ទាញ ក៏ដូចជាលើកទឹកចិត្តដល់អ្នកវិនិយោគ ឱ្យវិនិយោគលើវិស័យកសិកម្មនេះនៅកម្ពុជាផងដែរ៕

The post កម្ពុជា នៅតែបើកចំហរទ្វារស្វាគមន៍ដល់អ្នកវិនិយោគដែលចង់វិនិយោគលើវិស័យកសិកម្ម appeared first on .

យោងតាមសេចក្ដីព្រាងច្បាប់ស្ដីពីហិរញ្ញវត្ថុសម្រាប់ការគ្រប់គ្រង ឆ្នាំ២០២៥ អនុវិស័យដំណាំ ត្រូវបានរដ្ឋាភិបាលរំពឹងថា នៅតែរក្សាកំណើនល្អ ដោយសារការកើនឡើងនូវការវិនិយោគ ទាំងក្នុងស្រុកនិងពីបរទេស លើការកែច្នៃផលិតផលកសិកម្ម ការបង្កើនការវិនិយោគសាធារណៈ និងអន្តរាគមន៍របស់ រាជរដ្ឋាភិបាល ដូចជា ការផ្តល់ហិរញ្ញប្បទានសម្បទាន ក្នុងការជំរុញផលិតកម្មក្នុងស្រុកនិងការអនុវត្ត កិច្ចព្រមព្រៀងពាណិជ្ជកម្មសេរីនានា ដែលនឹងបន្តជំរុញដល់ការនាំចេញ។

ចំណែកអនុវិស័យចិញ្ចឹមសត្វក៏ត្រូវបានព្យាករដែរថានឹងបន្តងើបសន្សឹមៗ ដោយសារវិធានអន្តរាគមន៍របស់រាជរដ្ឋាភិបាលលើ ការនាំចូលសាច់បង្កក ដែលនឹងលើកទឹកចិត្តការចិញ្ចឹមក្នុងស្រុក ខណៈអនុវិស័យនេសាទត្រូវបានព្យាករថា នឹងមានកំណើនល្អ ក្រោមការរំពឹងទុកនូវកំណើនផលចាប់ទឹកសាបដែលនឹងត្រូវបានបន្តស្តារឡើងវិញ ដោយសារការដាក់ចេញនូវគោលនយោបាយបង្ក្រាបបទល្មើសនេសាទ និងការវិនិយោគក្នុងវារីវប្បកម្ម ក្រោមការអនុវត្តវិធានការរបស់រាជរដ្ឋាភិបាល និងការគាំទ្រពីដៃគូអភិវឌ្ឍន៍ សំដៅដោះស្រាយ បញ្ហាប្រឈមជារចនាសម្ព័ន្ធ ផ្តល់ការគាំទ្រផ្នែកហិរញ្ញប្បទាននិងជំរុញការផ្សព្វផ្សាយបច្ចេកទេសនិងការប្រើប្រាស់ពូជត្រីប្រកបដោយប្រសិទ្ធភាពខ្ពស់និងគុណភាព៕

The post ឆ្នាំ២០២៥ វិស័យកសិកម្មបានត្រូវព្យាករមានកំណើន១,១ភាគរយ appeared first on .

នេះបើយោងតាមជំនួបពិភាក្សាការងាររវាងលោក យុន ហេង អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (CDC) ជាមួយគណៈប្រតិភូតំណាងក្រុមហ៊ុន SHAN CUN GROUP កាលពីថ្ងៃទី៥ ខែកញ្ញា ឆ្នាំ២០២៤។

នាឱកាសនោះ លោក យុន ហេង អគ្គលេខាធិការរងគណៈកម្មាធិការវិនិយោគកម្ពុជា បានស្វាគមន៍យ៉ាងកក់ក្តៅចំពោះវត្តមានរបស់គណៈប្រតិភូក្រុមហ៊ុន ខណៈលោកក៏បានថ្លែងអរគុណចំពោះអគ្គនាយកក្រុមហ៊ុន HONG DE SHENG (CAMBODIA) STEEL CO., LTD. ដែលជាក្រុមហ៊ុនវិនិយោគផ្នែករោងចក្រផលិតដែកនៅខេត្តកំពង់ស្ពឺ តាំងពីឆ្នាំ២០១៩ មក ហើយបានណែនាំមិត្តភក្តិជាវិនិយោគិនឱ្យមកបណ្តាក់ទុនវិនិយោគនៅកម្ពុជាជាបន្តបន្ទាប់។

ជាក់ស្តែង លោក យុន ហេង អះអាងថា ការណែនាំក្រុមហ៊ុន SHAN CUN GROUP ដែលជាក្រុមហ៊ុនមានជំនាញក្នុងវិស័យកសិកម្មនេះ ដើម្បីមកពិនិត្យលទ្ធភាពវិនិយោគលើវិស័យកសិកម្មចិញ្ចឹមសត្វនៅកម្ពុជា គឺជាសក្ខីភាពបញ្ជាក់ពីការជឿជាក់របស់អ្នកវិនិយោគ មកលើគោលនយោបាយរបស់រាជរដ្ឋាភិបាល។ជាមួយគ្នានេះ លោកបានស្វាគមន៍ ចំពោះគម្រោងវិនិយោគលើវិស័យកសិកម្មចិញ្ចឹមសត្វនេះ ដែលជាគម្រោងត្រូវទទួលបានការលើកទឹកចិត្តដោយច្បាប់ និងបានលើកទឹកចិត្តឱ្យក្រុមហ៊ុនបំពេញបែបបទ និងចាប់ផ្តើមធ្វើការវិនិយោគឱ្យបានឆាប់។

គួរបញ្ជាក់ថា ទាក់ទិននឹងគម្រោងវិនិយោគលើវិស័យកសិកម្មចិញ្ចឹមសត្វនៅកម្ពុជានេះដែរ តំណាងក្រុមហ៊ុន SHAN CUN GROUP បានបង្ហាញនូវគោលជំហរជាវិជ្ជមាន ដោយក្រុមហ៊ុនបានបញ្ជាក់ថានឹងធ្វើការសិក្សាស្វែងរកទីតាំងដែលសមស្របសម្រាប់ការវិនិយោគ និងរៀបចំបែបបទដាក់ពាក្យសុំវិនិយោគ នាពេលឆាប់ៗខាងមុខនេះ៕ អត្ថបទ៖ រង្សី

The post ក្រុមហ៊ុនធំមួយរបស់ចិន ចង់បោះទុនវិនិយោគលើវិស័យកសិកម្មចិញ្ចឹមសត្វនៅកម្ពុជា appeared first on .

នេះបើយោងតាមជំនួបរវាងសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ជាមួយលោក លី ឈូលវ៉ូ អភិបាលខេត្តឃ្យុងសាងប៊ុកដូកូរ៉េខាងត្បូង កាលថ្ងៃទី២៩ ខែកក្កដា ឆ្នាំ២០២៤។

នាឱកាសនោះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានស្នើទៅកាន់លោកអភិបាលខេត្ត ជួយជំរុញកិច្ចសហប្រតិបត្តិការក្នុងវិស័យឧស្សាហកម្ម តាមរយៈកៀរគរវិនិយោគិនមកបង្កើតរោងចក្រកែច្នៃផលិតផលកសិកម្ម រោងចក្រផលិតគ្រឿងអេឡិចត្រូនិក និងរោងចក្រផលិតគ្រឿងចក្រ នៅក្នុងប្រទេសកម្ពុជាឱ្យបានច្រើន។

សម្តេច អះអាងថា កម្ពុជា មានវត្ថុធាតុដើមច្រើន និងសុទ្ធតែមានគុណភាពខ្ពស់ ប៉ុន្តែខ្វះរោងចក្រកែច្នៃ ដែលសម្តេច យល់ឃើញថា វិនិយោគិនកូរ៉េ គួរបង្កើតរោងចក្រកែច្នៃនៅកម្ពុជា រួចនាំចេញទៅទីផ្សារកូរ៉េ និងទីផ្សារពិភពលោក។​​ ជាមួយគ្នានេះ សម្តេច ក៏បានសំណូមពរទៅលោកអភិបាលខេត្ត ជួយផ្សព្វផ្សាយពីវប្បធម៌ និងតំបន់ទេសចរណ៍កម្ពុជាទៅប្រជាជនកូរ៉េ ដើម្បីទេសចរកូរ៉េបានមកទស្សនាប្រទេសកម្ពុជាកាន់តែច្រើន។

ជាការឆ្លើយតប លោក លី ឈូលវ៉ូ បានលើកឡើងថា ចំពោះវិស័យកសិកម្មវិញ ទោះបីជាប្រទេសកូរ៉េមានការអភិវឌ្ឍដោយពឹងផ្អែកខ្លាំងលើវិស័យកសិ-ឧស្សាហកម្ម ប៉ុន្តែកូរ៉េនៅតែមានកង្វល់ចំពោះបញ្ហាអសន្តិសុខស្បៀង ដែលត្រូវគិតគូរជំរុញផលិតភាពកសិកម្ម និងការកែច្នៃ។ ក្នុងបញ្ហានេះ លោក យល់ឃើញថា ប្រសិនបើកូរ៉េ និងកម្ពុជាជំរុញកិច្ចសហប្រតិបត្តិការផលិតកម្មកសិកម្ម និងកែច្នៃស្បៀង គឺជាកត្តាល្អប្រសើរផ្តល់ផលប្រយោជន៍ឱ្យគ្នាទៅវិញទៅមក។

គួរបញ្ជាក់ដែរថា តាមរយៈជំនួបជាមួយសម្តេចតេជោនេះដែរ លោកអភិបាលខេត្តកូរ៉េខាងត្បូង ក៏បានប្តេជ្ញានឹងជំរុញកិច្ចសហប្រតិបត្តិការវប្បធម៌ និងទេសចរណ៍ដោយសារប្រទេសកូរ៉េ និងកម្ពុជា មានសក្តានុពលផ្នែកវប្បធម៌ និងបេតិកភណ្ឌពិភពលោកដូចគ្នា ដោយជំរុញការកសាងព្រលានយន្តហោះ និងភ្ជាប់ជើងហោះហើរមកកាន់តំបន់ទេសចរណ៍ក្នុងប្រទេសកម្ពុជាឱ្យកាន់តែច្រើន ដែលនឹងជួយបង្កើនចំនួនទេសចរអន្តរជាតិបន្ថែមទៀត៕ អត្ថបទ៖ រង្សី

The post កម្ពុជា ស្នើកូរ៉េមកបង្កើតរោងចក្រកែច្នៃផលិតផលកសិកម្ម និងផលិតគ្រឿងចក្រនៅកម្ពុជា appeared first on .

នេះបើតាមជំនួបសម្តែងការគួរសមរវាងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោក តាន់ ស្រ៊ី មីសែល យ៉ាវ (Tan Sri Michael Yeoh) ប្រធានវិទ្យាស្ថានយុទ្ធសាស្រ្ត KSI ប្រចាំតំបន់អាស៊ីប៉ាស៊ីហ្វិក នៅថ្ងៃទី០៨ ខែមេសា ឆ្នាំ២០២៤នាវិមានសន្តិភាព។

នៅក្នុងឱកាសនោះ លោក តាន់ ស្រ៊ី មីសែល យ៉ាវ ក៏បានគោរពជម្រាបជូនសម្តេចធិបតី អំពីការពិនិត្យលទ្ធភាពក្នុងការពង្រីកការវិនិយោគនៅប្រទេសកម្ពុជាបន្ថែម ជាពិសេសលើវិស័យសំខាន់ៗ៣ រួមមានវិស័យកសិកម្ម, ថាមពលជីវម៉ាស បច្ចេកវិទ្យាហិរញ្ញវត្ថុ និងឌីជីថល ព្រមទាំងការបង្កើតនូវ “World Digital Chamber” ។

ជាការឆ្លើយតប សម្តេចធិបតីបានគូសបញ្ជាក់ពាក់ព័ន្ធនឹងការជំរុញការវិនិយោគលើបច្ចេកវិទ្យាហិរញ្ញវត្ថុ និងវិស័យឌីជីថលថា រាជរដ្ឋាភិបាលកម្ពុជា ដែលមានធនាគារជាតិនៃកម្ពុជា ក្រសួងប្រៃសណីយ៍និងទូរគមនាគមន៍ និងក្រសួង-ស្ថាប័នពាក់ព័ន្ធ បាននិងកំពុងខិតខំជំរុញការអភិវឌ្ឍបច្ចេកវិទ្យា ដើម្បីធ្វើសមាហរណកម្មសេដ្ឋកិច្ចកម្ពុជាទៅជាសេដ្ឋកិច្ចឌីជីថល។ បន្ថែមលើនេះ សម្តេចធិបតី ក៏បានបញ្ជាក់ផងដែរថា រាជរដ្ឋាភិបាលអាណត្តិទី៧នឹងបន្តការអភិវឌ្ឍគោលនយោបាយ ដោយឈរលើស្មារតីសង្គតិភាព និងនិរន្តរភាព ដើម្បីសម្រេចបាននូវចក្ខុវិស័យឆ្នាំ២០៥០ ក្លាយជាប្រទេសមានចំណូលខ្ពស់ ដោយផ្តោតលើការអភិវឌ្ឍមូលធនមនុស្ស ដែលជាលក្ខខណ្ឌចាំបាច់មិនអាចខ្វះបានសម្រាប់ជំរុញពិពិធកម្ម និងកំណើនសេដ្ឋកិច្ចប្រកបដោយភាពធន់ ចីរភាព និងបរិយាប័ន្ន។

ទន្ទឹមនោះ រាជរដ្ឋាភិបាលកម្ពុជានឹងបន្តថែរក្សាសុខសន្តិភាព ស្ថិរភាពនយោបាយ និងការធានាដល់បរិស្ថាននៃការវិនិយោគ ព្រមទាំងរៀបចំនូវផែនការយុទ្ធសាស្រ្តផ្នែកពាណិជ្ជកម្ម ទាំងក្នុងក្របខ័ណ្ឌទ្វេភាគី និងពហុភាគី ដើម្បីធានាបាននូវកាលានុវត្តភាព និងរក្សាបាននូវភាពប្រកួតប្រជែងរបស់កម្ពុជាក្នុងតំបន់ និងពិភពលោក៕

The post វិទ្យាស្ថានយុទ្ធសាស្រ្ត KSI ពិនិត្យលទ្ធភាពពង្រីកការវិនិយោគនៅកម្ពុជាបន្ថែម ពិសេសលើវិស័យសំខាន់ៗ៤ appeared first on .