សង្គម

អ្នកបើកបរឧទ្ធម្ភាគចក្រម្នាក់ទៀត ឈ្មោះ ស៊ុន ផល្លា ត្រូវបានរកឃើញសាកសព នៅចំងាយជាង ២០០ម៉ែត្រពីកន្លែងយន្តហោះធ្លាក់

ឧកញ៉ាដែនដី — Tue, 30 Jul 2024 03:59:34 +0000

នាវេលាម៉ោងប្រមាណ ១០៖៣០នាទីព្រឹក ថ្ងៃទី៣០ ខែកក្កដា ឆ្នាំ២០២៤នេះ កងកម្លាំងរុករកបានប្រទះឃើញ សាកសពអាកាសយានិកម្នាក់ទៀត មានឈ្មោះ ស៊ុន ផល្លា ដែលត្រូវបានរកឃើញនៅចំណុចជើងភ្នំយ៉ាវយ៉ៃ ដែលមានចម្ងាយជាង២១០ម៉ែត្រ ពីចំណុចឧទ្ធម្ភាគចក្រធ្លាក់។ នេះបើតាមការបញ្ជាក់របស់ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះ នៃកងយោធពលខេមរភូមិន្ទ ដែលដឹកនាំប្រតិបត្តិការរុករកដោយផ្ទាល់។

សូមជម្រាបជូនថា ឧទ្ធម្ភាចក្រយោធា Z9 ត្រូវបានរកឃើញ នៅរសៀលថ្ងៃចន្ទទី២៩ ខែកក្កដា ឆ្នាំ២០២៤ បន្ទាប់ពីបានបាត់ដំណឹងនៅតំបន់ជួរភ្នំក្រវាញ អស់រយៈពេល១៧ថ្ងៃកន្លងមក ហើយសពអាកាយានិកម្នាក់ឈ្មោះ ខេង ឆៃយុទ្ធ ត្រូវបានរកឃើញនៅកន្លែងកើតហេតុផ្ទាល់។ ឧទ្ធម្ភាចក្រនេះ ត្រូវបានប្រទះឃើញនៅចំណុចលើខ្នងភ្នំយ៉ាវយ៉ៃ ស្ថិតនៅក្នុងឃុំថ្មដា ស្រុកវាលវែង ខេត្តពោធិ៍សាត់ ក្រោយកម្លាំងចម្រុះបានចុះប្រតិបត្តិការរុករកអស់រយៈពេល១៧ថ្ងៃ៕

The post អ្នកបើកបរឧទ្ធម្ភាគចក្រម្នាក់ទៀត ឈ្មោះ ស៊ុន ផល្លា ត្រូវបានរកឃើញសាកសព នៅចំងាយជាង ២០០ម៉ែត្រពីកន្លែងយន្តហោះធ្លាក់ appeared first on .

នយោបាយឈ្នះ-ឈ្នះ បាននាំយកសន្តិភាព និងឯកភាពជាតិទាំងស្រុងជាប្រវត្តិសាស្ត្រជូនកម្ពុជា

ឧកញ៉ាដែនដី — Thu, 29 Dec 2022 03:20:43 +0000

២៩ ធ្នូ ១៩៩៨ ដល់ ២៩ ធ្នូ ២០២២ មានរយះពេល២៤ឆ្នាំហើយ ដែលកម្ពុជាបានបិទបញ្ចប់សង្រ្គាមស៊ីវិល និងការឯកភាពជាតិទាំងស្រុងជាប្រវត្តិសាស្ត្រនៅក្នុងប្រទេស ដោយប្រើប្រាស់នយោបាយឈ្នះ-ឈ្នះ ដែលដាក់ចេញដោយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ក្នុងឳកាសខួប២៤ឆ្នាំនេះ តាមរយៈហ្វេកបុក សម្តេចតេជោ ហ៊ុន សែន បានបង្ហោះសារអបអរសាទរខួប២៤ឆ្នាំ នៃការបញ្ចប់សង្គ្រាមនៅកម្ពុជាក្រោមនយោបាយ ឈ្នះ-ឈ្នះ ។

សម្តេចតេជោ ហ៊ុន សែន បានបញ្ជាក់ថា នៅថ្ងៃទី២៩ ខែធ្នូ ឆ្នាំ២០២២នេះ គឺជាខួប២៤ឆ្នាំហើយ នៃការបញ្ចប់សង្គ្រាមនៅកម្ពុជា ក្រោមនយោបាយ ឈ្នះ-ឈ្នះ (២៩ ធ្នូ ១៩៩៨-២៩ ធ្នូ ២០២២) ដែលកម្ពុជារកបាននូវសុខសន្តិភាពពេញលេញ និងមានការឯកភាពជាតិទាំងស្រុងជាប្រវត្តិសាស្ត្រ។ ការបិទបញ្ចប់សង្គ្រាមហែកហួរ និងការបែកបាក់ជាតិនេះ បានកើតមានឡើងតាមរយៈនយោបាយឈ្នះ-ឈ្នះ។

សម្តេចតេជោ ហ៊ុន សែន បានបញ្ជាក់ទៀតថា នយោបាយ ឈ្នះ-ឈ្នះ គឺជាយុទ្ធសាស្ត្រគោលការណ៍ទាំងឡាយណា ដែលបាននាំមកនូវការធានា ដល់សន្តិសុខសង្គម ការបង្រួបបង្រួមជាតិ ឯកភាពជាតិ សនិ្តភាព ការធានាដល់បូរណភាពដែនដី អធិបតេយ្យ និងការអភិវឌ្ឍសេដ្ឋកិច្ច នយោបាយសង្គមប្រកបដោយចីរភាព។

គួរបញ្ជាក់ថា ដើម្បីបង្ហាញ និងរម្លឹកគុណដល់វីរៈភាពស្នាដៃរបស់វីរៈជន ដែលបានលះបង់បូជាជីវិត សាច់ស្រស់ ឈាមស្រស់ និងភាពឈ្លាសវៃរបស់ ថ្នាក់ដឹកនាំ ក្នុងការស្វែងរកសុខសន្តិភាពជូនប្រទេសជាតិ រាជរដ្ឋាភិបាល បានសំណង់វិមានអនុស្សាវវរីយ៍នយោបាយឈ្នះ-ឈ្នះ ដែលនិមិត្តរូប នៃសុខសន្តិភាពដែលកម្ពុជា ទទួលបានក្រោយពីបញ្ចប់សង្គ្រាមស៊ីវិលដ៏រ៉ាំរ៉ៃ ជាច្រើនទសវត្សរ៍កន្លងមក បានសាងសង់ឡើងស្ថិតនៅសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ ។

វិមាននយោបាយឈ្នះ-ឈ្នះ បានចាប់ផ្តើមសាងសង់នៅឆ្នាំ២០១៦ និងបានសម្ពោធបើកជាសាធារណៈនៅចុងខែធ្នូ ឆ្នាំ២០១៨។

ដោយឡែក កាលពីខែមករា ឆ្នាំ២០២២ រាជរដ្ឋាភិបាលកម្ពុជា បានចេញសារាចរកំណត់យកថ្ងៃទី២៩ ខែធ្នូ ជាថ្ងៃទិវានយោបាយឈ្នះ-ឈ្នះ ទៅក្នុងប្រតិទិនប្រចាំឆ្នាំ ដោយមិនតម្រូវឲ្យឈប់សម្រាកនោះឡើយ៕

The post នយោបាយឈ្នះ-ឈ្នះ បាននាំយកសន្តិភាព និងឯកភាពជាតិទាំងស្រុងជាប្រវត្តិសាស្ត្រជូនកម្ពុជា appeared first on .

ពីក្មេងកំព្រាឪពុក១រូប តស៊ូជម្នះភាពក្រខ្សត់ រៀនចប់អនុបណ្ឌិតពីថៃ ក្លាយជានាយកសាលាឯកជនមួយ

ឧកញ៉ាដែនដី — Tue, 25 Oct 2022 04:26:02 +0000

លោក ប៉ែត ផាន់និត កើតនៅក្នុងគ្រួសារក្រីក្រមួយ ដែលពេលខ្លះធ្លាប់ញ៉ាំបាយជាមួយប្រហុកទទេ ព្រោះគ្មានលុយទិញម្ហូបញ៉ាំគ្រប់គ្រាន់ ហើយលោកបានកំព្រាឪពុកតាំងពីអាយុ១៥ឆ្នាំ។ ទោះយ៉ាងណា យុវជនរូបនេះ បានខិតខំតស៊ូជម្នះភាពក្រខ្សត់ និងការមើលងាយពីអ្នកដទៃមួយចំនួន រហូតលោកអាចរៀនចប់អាហារូបករណ៍ថ្នាក់អនុបណ្ឌិតពីប្រទេសថៃ និងបានកាន់តំណែងជា «នាយកសាលា» នៅសាលារៀនខេមហ្វឺស សាខាពោធិ៍ចិនតុង នៅឆ្នាំ២០២២នេះ។

ថ្លែងប្រាប់ដល់ ឧកញ៉ា ញូស៍ លោក ប៉ែត ផាន់និត បច្ចុប្បន្នវ័យ៣១ឆ្នាំ បានរៀបរាប់ពីប្រវត្តិគ្រួសារឱ្យដឹងថា លោកមានស្រុកកំណើតនៅ ភូមិបាក់ខែង ស្រុកមុខកំពូល ខេត្តកណ្តាល និងមានបងប្អូន៥នាក់ (ប្រុស៤ ស្រី១) ហើយលោកជាកូនពៅគេ។ ឪពុករបស់លោក ជាអ្នករកត្រី និងជាអ្នកដឹកនាំក្រុមល្ខោនបាសាក់ ហើយម្តាយជាអ្នកលក់ត្រី និងធ្វើស្រែចំការ។ កាលនៅតូច គ្រួសាររបស់លោក ស្ថិតក្នុងជីវភាពក្រខ្សត់ ដោយមានផ្ទះឈើមួយ ជញ្ជាំងបាំងដោយស្លឹកត្នោត និងដើមកក់។ លុះដល់អាយុ១៥ឆ្នាំ ឪពុករបស់លោក បានលាចាកលោកទៅ ដោយសារមានជំងឺប្រចាំកាយ ហើយចាប់តាំងពីពេលនោះមក លោកគ្រួសាររបស់លោកជួបស្ថានភាពកាន់តែយ៉ាប់យ៉ឺន។

ក្រោយពេលគ្មានឪពុកជាជំហរ បូករួមទាំងគ្រួសារកំពុងខ្វះខាតទៀតនោះ បានធ្វើឱ្យបងៗរបស់លោកទាំង៤នាក់ ឈប់រៀនត្រឹមថ្នាក់បឋមសិក្សា និងខ្លះបានត្រឹមថ្នាក់ទី៧ នៅអនុវិទ្យាល័យប៉ុណ្ណោះ។ បងប្រុសច្បងរបស់លោក បានទៅធ្វើជាសន្តិសុខ និងបងៗបន្ទាប់ បានចាកចេញពីផ្ទះទៅធ្វើការងាររោងចក្រ ដើម្បីជួយផ្គត់ផ្គង់គ្រួសារ។ ចំណែករូបលោក នៅផ្ទះតែ២នាក់ម្តាយ ជួយការងារធ្វើស្រែចំការ និងឆ្លៀតពេលបន្តសិក្សាជាប្រចាំនៅសាលារដ្ឋ និងឆ្លៀតរៀនគួរអង់គ្លេសខ្លះៗនៅតាមវិទ្យាស្ថាន។ ដោយសារគ្រួសារមានជីវភាពខ្វះខាត ក៏មានអ្នកនៅក្នុងស្រុកភូមិខ្លះ បានមើលងាយ និងប្រាប់ម្តាយរបស់លោកថា មិនដឹងខំឱ្យកូនរៀនបានប្រយោជន៍អ្វី។

យ៉ាងណាក្តី ម្តាយរបស់លោកតែងតែលើកទឹកចិត្តឱ្យលោកបន្តការសិក្សាទៅទៀត ព្រោះជឿថាមានតែការសិក្សាទេ ដែលអាចកែប្រែវាសនាកូនរបស់ខ្លួនបាន។ លោក ប៉ែត ផាន់និត បានសិក្សានៅសាលាបឋមសិក្សាបាក់ខែង និងវិទ្យាល័យព្រែកលាប បន្ទាប់មកលោកបានបន្តសិក្សានៅសាកលវិទ្យាល័យន័រតុន បញ្ចប់ថ្នាក់បរិញ្ញាបត្រភាសាអង់គ្លេស នៅឆ្នាំ២០១៤។ ជីវិតជានិស្សិត រៀនផង ឆ្លៀតធ្វើការផង រហូតដល់ឆ្នាំ២០១៧ លោកបានជាប់អាហារូបណ៍ថ្នាក់បរិញ្ញាបត្រជាន់ខ្ពស់ ទៅរៀននៅប្រទេសថៃ ហើយនៅឆ្នាំ២០១៩ លោកបានបញ្ចប់ការសិក្សា និងទទួលបានសញ្ញាបត្របរិញ្ញាបត្រជាន់ខ្ពស់ ផ្នែករដ្ឋបាលអប់រំពីសាកលវិទ្យាល័យ Prince of Songkla (PSU) ក្នុងឆ្នាំ២០១៩។

ចំណែកឯបទពិសោធន៍ការងារវិញ លោក ប៉ែត ផាន់និត បានធ្វើជាគ្រូបង្រៀនភាសាអង់គ្លេស ក្រៅម៉ោង តាំងពីលោករៀននៅថ្នាក់ទី១១ រហូតដល់លោករៀននៅសាកលវិទ្យាល័យ ឆ្នាំទី៣។ លុះដល់ឆ្នាំទី៤ ឆ្នាំ២០១៤ លោកបានចូលបម្រើការងារនៅគេហទំព័រសារព័ត៌មាន Sabay។ ក្រោយបញ្ចប់ការសិក្សាពីប្រទេសថៃ លោកបានចូលបម្រើការងារនៅសាលាខេមហ្វឺស សាខាបាក់ទូក ក្នុងតួនាទីជានាយករង ប៉ុន្តែដោយសារមានវិបត្តិកូវីដ-១៩ សាលាផ្អាកដំណើរការ លោកបានទៅធ្វើការនៅសាលាឯកជនមួយទៀត។

ដោយសារស្ថានភាពកូវីដ-១៩ នៅតែអូសបន្លាយ សាលាក៏បន្តបិទ ក្រោយមកលោកក៏មកធ្វើជា Senior Program Producer ថ្នាក់ Management នៅក្រុមហ៊ុន អ្នកឧកញ៉ា គួច ម៉េងលី បានជិត១ឆ្នាំ។ បន្ទាប់មក នៅពាក់កណ្តាលឆ្នាំ២០២២ ថ្នាក់គ្រប់គ្រងជាន់ខ្ពស់របស់សាលារៀនខេមហ្វឺស បានទាក់ទងមកលោក ឱ្យធ្វើជានាយកសាខាពោធិ៍ចិនតុង ហើយលោកក៏បានព្រមព្រៀង ព្រោះលោកនៅតែស្រលាញ់ខាងវិស័យអប់រំ ជាពិសេសសាលាខេមហ្វឺស ជាកន្លែងដែលផ្តល់ឱកាសនិងជួយបណ្តុះបណ្តាលដល់លោក កាលពេលត្រឡប់មកពីប្រទេសថៃថ្មីៗផងដែរ។

សូមជម្រាបជូនថា លោក ប៉ែត ផាន់និត បានរៀបអាពាហ៍ពិពាហ៍ជាមួយភរិយា អំឡុងខែមេសា ឆ្នាំ២០១៧ ហើយរំលងបានមួយខែ ពោលគឺនៅខែឧសភា ឆ្នាំ២០១៧ លោកត្រូវបង្ខំចិត្តចាកចេញពីភរិយាទាំងអាល័យ ទៅបន្តសិក្សានៅក្រៅប្រទេស ដើម្បីអនាគតរបស់ខ្លួន អនាគតគ្រួសារ និងប្រទេសជាតិ។ ក្រោយពីភាពលះបង់ ស៊ូឃ្លាតឆ្ងាយពីគ្រួសារ ដែលមានភរិយា និងកូនប្រុសតូច មួយរយៈពេលធំ ទីបំផុតលោកអាចសម្រេចក្តីស្រមៃរបស់ខ្លួន រហូតទទួលបានការតែងតាំងជា «នាយកសាលា» នៅសាលារៀនខេមហ្វឺស សាខាពោធិ៍ចិនតុង ជាផ្លូវការ កាលពីថ្ងៃទី០៥ ខែកញ្ញា ឆ្នាំ២០២២៕

The post ពីក្មេងកំព្រាឪពុក១រូប តស៊ូជម្នះភាពក្រខ្សត់ រៀនចប់អនុបណ្ឌិតពីថៃ ក្លាយជានាយកសាលាឯកជនមួយ appeared first on .

អគារទីស្តីការក្រសួងដែនដីថ្មី ត្រៀមតុបតែងភ្លើងលម្អរបៀបជាប្រាសាទ

ឧកញ៉ាដែនដី — Wed, 31 Aug 2022 04:55:27 +0000

ក្រសួងរៀបចំដែនដី នគរូបនីយកម្ម និងសំណង់ កំពុងសិក្សានិងសហការជាមួយក្រុមហ៊ុនឯកជនមួយ ដើម្បីត្រៀមតុបតែងភ្លើងលម្អរបៀបជាប្រាសាទ ចំពោះអគារទីស្តីការថ្មីរបស់ខ្លួន ដែលមានទីតាំងនៅជិត Grand Phnom Penh ក្នុងខណ្ឌសែនសុខ រាជធានីភ្នំពេញ។

ដើម្បីសម្រេចគម្រោងខាងលើនេះ នៅព្រឹកថ្ងៃទី៣១ ខែសីហា ឆ្នាំ២០២២នេះ ឯកឧត្តមបណ្ឌិត ប៉ែន សុផល រដ្ឋលេខាធិការ ក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំពិភាក្សាស្តីពីការសិក្សាសាកល្បងលើគម្រោងប្លង់តុបតែងភ្លើងលម្អរបៀបជាប្រាសាទ ចំពោះអគារទីស្តីការក្រសួងដែនដី ដោយក្រុមហ៊ុន ប៊ីអិន ភី អ៊ុនណូ វេសិន ឯក (BNP Innovation) ដោយមានការចូលរួមពីភាគីពាក់ព័ន្ធជាច្រើននាក់។

អគារទីស្តីការក្រសួងដែនដីថ្មី ដែលដឹកនាំសាងសង់ឡើងដោយឧបនាយករដ្ឋមន្ត្រី ជា សុផារ៉ា និងស្ថាបត្យករឆ្នើម បណ្ឌិត លី រស្មី កំពុងទទួលបានការស្ញើញសរសើរយ៉ាងខ្លាំងពីសាធារណៈជនទូទៅ ដោយសារមានក្បាច់រចនាចម្រុះសម័យរួមគ្នា តាំងពីក្បាច់ខ្មែរបុរាណ ក្បាច់សម័យអង្គរ ក្បាច់សម័យក្រោយអង្គរ និងក្បាច់ខ្មែរសម័យទំនើបផងដែរ។ បច្ចុប្បន្ននេះ ជារៀងរាល់ថ្ងៃ មានភ្ញៀវទេសចរណ៍ជាតិ និងអន្តរជាតិជាច្រើន តែងទៅកម្សាន្តនៅមុខអគារនេះ ដើម្បីទស្សនាទស្សនីយភាព និងថតរូបកម្សាន្តជាអនុស្សាវរីយ៍។

គួរបញ្ជាក់ថា អគារក្រសួងរៀបចំដែនដី នគរូបនីយកម្ម និងសំណង់ ដែលជាសមិទ្ធផលថ្មីដ៏ពិសិដ្ឋនៃស្ថាបត្យកម្មរបស់ជាតិកម្ពុជា និងជាស្នាដៃផ្ទាល់របស់កូនខ្មែរ តម្លៃជាង២៨លានដុល្លារអាមេរិក បើកសម្ពោធជាផ្លូវការនៅថ្ងៃទី០៨ ខែវិច្ឆិកា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ អគារទីស្តីការក្រសួងដែនដីថ្មី សាងសង់នៅលើផ្ទៃដីទំហំ ៤,៥ហិកតាមានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ៕

The post អគារទីស្តីការក្រសួងដែនដីថ្មី ត្រៀមតុបតែងភ្លើងលម្អរបៀបជាប្រាសាទ appeared first on .

កម្ពុជា ត្រៀមបើកសាលាបង្រៀនអ្នកបើកបរយន្តហោះ «Pilot» ជាលើកដំបូង

ឧកញ៉ាដែនដី — Fri, 12 Aug 2022 02:11:47 +0000

ប្រទេសកម្ពុជា កំពុងត្រៀមខ្លួនក្នុងការបើកសាលាបង្រៀនអ្នកបើកបរយន្តហោះ (Pilot) ជាលើកដំបូង ដែលនឹងធ្វើឡើងនៅវិទ្យាស្ថានជាតិអាកាសចរស៊ីវិល ក្រោមកិច្ចសហការដៃគូជាមួយនឹងក្រុមហ៊ុនថៃ។ នេះបើតាមលោក ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន បានថ្លែងឱ្យដឹង កាលពីថ្ងៃទី១១ ខែសីហា ឆ្នាំ២០២២។

លោក ហឿន សំនៀង បានប្រាប់ដល់ ឧកញ៉ា ញូស៍ យ៉ាងដូច្នេះថា ទាក់ទងនឹងការបើកសាលាបង្រៀនអ្នកបើកបរយន្តហោះនេះ លោកបានណែនាំអ្នកវិនិយោគមកពីប្រទេសថៃ ទៅខាងវិទ្យាស្ថានជាតិអាកាសចរស៊ីវិល ដែលមានភារកិច្ចទទួលខុសត្រូវបណ្តុះបណ្តាលអ្នកបើកបរ និងអ្នកបន្តវេនលើវិស័យអាកាសចរណ៍។

លោកបានបន្តថា សម្រាប់វិទ្យាស្ថានតេជោសែន សាធារណការ និងដឹកជញ្ជូន មិនមានភារកិច្ចក្នុងការធ្វើផ្ទាល់នោះទេ ប៉ុន្តែយើងបានពង្រីកទំនាក់ទំនងសហការគ្នា សម្របសម្រួលឱ្យខាងក្រុមហ៊ុន និងអង្គភាពជំនាញពាក់ព័ន្ធបានជួបគ្នា។ ភាគីទាំងពីរបានជួបគ្នារួចហើយ ហើយពួកគេនឹងបន្តពិភាក្សាគ្នា ក្នុងរយៈពេលប៉ុន្មានថ្ងៃទៀតនេះ ដើម្បីសិក្សាពីគ្នាទៅវិញទៅមកឱ្យបានស៊ីជម្រៅ បន្ទាប់មកខាងវិទ្យាស្ថានជាតិអាកាសចរស៊ីវិល រាយការណ៍ជូនថ្នាក់ដឹកនាំ និងធ្វើការងារបន្តទៀត។

គួរបញ្ជាក់ថា កាលពីថ្ងៃព្រហស្បតិ៍ ទី១១ ខែសីហា ឆ្នាំ២០២២ ភាគីពាក់ព័ន្ធ បានចូលរួមកម្មវិធីទទួលទានអាហារសាមគ្គី ដើម្បីពិភាក្សាការងារបន្ត នៃការបើកសាលាបង្រៀនអ្នកបើកបរយន្តហោះ។ កិច្ចពិភាក្សានេះ មានការអញ្ចើញចូលរួមដោយ ឯកឧត្តម ហឿន សំនៀង នាយកវិទ្យាស្ថានតេជោសែន សាធារណការ និងដឹកជញ្ជូន, ឯកឧត្តម លឹម កៅ នាយកវិទ្យាស្ថានជាតិអាកាសចរស៊ីវិល, លោកជំទាវ Jiranunប្រធានក្រុមប្រឹក្សាធុរកិច្ចថៃប្រចាំប្រទេសកម្ពុជា ជាអ្នកសម្របសម្រួលអោយក្រុមហ៊ុន Aviation Maintenance Expertise Enterprise និង ក្រុមហ៊ុន JFT Jet ដែលតំណាងដោយលោកស្រី ខែក ខេមរ៉ាត អគ្គនាយិការ។ នេះជាជំនួបលើកទី២ បន្ទាប់ពីកិច្ចប្រជុំលើកទី១ ដែលបានប្រព្រឹត្តឡើងកាលពីប៉ុន្មានខែមុន នៅវិទ្យាស្ថានតេជោសែន សាធារណការ និងដឹកជញ្ជូន។

លោក តឹក រ៉េតសំរេច អគ្គនាយកក្រុមហ៊ុនអាកាសចរណ៍ជាតិកម្ពុជា អង្គរ អ៊ែរ ធ្លាប់បានឲ្យដឹងថា ជំនាញអ្នកបើកយន្តហោះនៅកម្ពុជា នៅមានតិចតួចណាស់ ខណៈដែលជំនាញនេះកន្លងមក ត្រូវទៅសិក្សានៅក្រៅប្រទេសដូចជាសិក្សាវគ្គមូលដ្ឋាននៅប្រទេសវៀតណាម ឬប្រទេសថៃ រួចបន្តទៅសហរដ្ឋអាមេរិក ដែលត្រូវការចំណាយច្រើនរ៉ាប់ម៉ឺនដុល្លារ និងទាមទារអ្នកមានចំណេះដឹងខ្ពស់ ទាំងភាសាអង់គ្លេស និងវិទ្យាសាស្ត្រ បូករួមទាំងតម្រូវឱ្យមានកាយសម្បទាមាំមួន ស្មារតីវាងវៃ និងភាពរហ័សរហួនខ្ពស់ ផងដែរ៕

The post កម្ពុជា ត្រៀមបើកសាលាបង្រៀនអ្នកបើកបរយន្តហោះ «Pilot» ជាលើកដំបូង appeared first on .

កម្ពុជា បានចំណូលជាង ១១លានដុល្លារ ពីការលក់កាបូន ក្នុងដែនជម្រកសត្វព្រៃ ទៅឱ្យក្រុមហ៊ុនអន្តរជាតិ

ឧកញ៉ាដែនដី — Thu, 11 Aug 2022 08:29:32 +0000

ចាប់ពីឆ្នាំ២០១៦ មកដល់បច្ចុប្បន្ន កម្ពុជាបានទទួលថវិកាចំនួន ១១,៦លានដុល្លារអាមេរិក ពីការលក់ឥណទានកាបូន ក្នុងដែនជម្រកសត្វព្រៃកែវសីមា ឧទ្យានជាតិជួរភ្នំក្រវាញខាងត្បូង និងដែនជម្រកសត្វព្រៃតាតៃ ឱ្យទៅក្រុមហ៊ុនអន្តរជាតិធំៗមានដូចជា Disney Kering Intuit និង Shall និងក្រុមហ៊ុន Gucci។ នេះបើតាមរបាយការណ៍ របស់ក្រសួងបរិស្ថាន។

ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន បានថ្លែងក្នុងសិក្ខាសាលាផ្សព្វផ្សាយស្តីពីការអភិរក្សព្រៃឈើ ក្នុងតំបន់ការពារធម្មជាតិ នារសៀលថ្ងៃពុធ ទី១០ខែសីហាឆ្នាំ២០២២ នៅទីស្តីការក្រសួងបរិស្ថាន ថា ការលក់ កាបូនរបស់កម្ពុជា គឺជាជោគជ័យក្នុងការកៀរគរធនធាន ដើម្បីគាំទ្រដល់កិច្ចខិតខំប្រឹងប្រែង ក្នុងការការពារ និងអភិរក្សធនធានធម្មជាតិ និងជីវៈចម្រុះ តាមរយៈការអនុវត្តន៍គម្រោង រេដបូក (REDD+) ដែលធានាដើមឈើឈរ ដើម្បីអាចរកចំណូលសម្រាប់ការងារអភិរក្ស និងអភិវឌ្ឍន៍។ ឯកឧត្តម សាយ សំអាល់ សង្ឃឹមថាក្រុមហ៊ុនបរទេសធំៗផ្សេងទៀត អាចទិញកាបូនថែមទៀត របស់កម្ពុជា។

ឥណទានកាបូន គឺប្រៀបដូចនឹងលិខិតអនុញ្ញាតដែលក្រុមហ៊ុននីមួយៗមានសិទ្ធិបញ្ចេញឧស្ម័នពុល (ឬកាបូនឌីអុកស៊ីត) ទៅក្នុងបរិស្ថាន។ ជាទូទៅ ឥណទានចំនួន១ គឺស្មើនឹងសិទ្ធិបញ្ចេញឧស្ម័នពុលចំនួន ១តោន ទៅក្នុងបរិស្ថាន។ ឥណទានកាបូន គឺចំនួនព្រៃឈើដែលដាំថ្មី ឬព្រៃឈើចាស់មានស្រាប់ដែលរក្សាទុក ហើយអាចស្រូបយកឧស្ម័នពុលពីបរិស្ថានបាន ១តោន។ ឧទាហរណ៍ ប្រទេស ឬក្រុមហ៊ុន A បានដាំព្រៃឈើបន្ថែមក្នុង ១ឆ្នាំ ១០ ម៉ឺនហិកតា ដែលអាចជួយស្រូបយកឧស្ម័នពុលពីបរិស្ថានបាន ១០ តោន បានន័យថា ប្រទេស ឬក្រុមហ៊ុន A នឹងមានឥណទានកាបូន ១០ឯកតា។

សូមបញ្ជាក់ថា ថវិកាដែលបានមកពីការលក់កាបូន ត្រូវបានយកទៅការពារ និងអភិរក្សធនធាន ធម្មជាតិ ពង្រឹងជីវភាពសហគមន៍ ដូចជាការអភិវឌ្ឍន៍ទេសចរណ៍ធម្មជាតិ ការចិញ្ចឹមសត្វ ការកសាងហេដ្ឋារចនាសម្ព័ន្ធ ផ្លូវថ្នល់ ទឹកស្អាត ជួយដល់សាលារៀន មធ្យោបាយរបស់មន្រ្តី ឧទ្យានុរក្ស បង្កើនប្រសិទ្ធភាពក្នុងការគ្រប់គ្រងធនធានធម្មជាតិ និងការកសាងសមត្ថភាព មន្រ្តីរាជការថ្នាក់ក្រោមជាតិ លើវិស័យបរិស្ថានថែមទៀត៕

The post កម្ពុជា បានចំណូលជាង ១១លានដុល្លារ ពីការលក់កាបូន ក្នុងដែនជម្រកសត្វព្រៃ ទៅឱ្យក្រុមហ៊ុនអន្តរជាតិ appeared first on .

ពូ ឃ្លាំង ថាកាល១០ឆ្នាំមុន ចេញ CONCERT ដំបូងៗ ហ៊ានលោតពីលើឆាក ដោយសារមូលហេតុមួយ

ឧកញ៉ាដែនដី — Wed, 10 Aug 2022 08:24:38 +0000

ពូ ឃ្លាំង តារាចម្រៀងរ៉េប និងចូលចិត្តបទញាក់កន្ត្រាក់អារម្មណ៍សប្បាយៗ ហៅថា “DJ ឃ្លាំង” បានបង្ហើបឱ្យដឹងថា កាលចេញច្រៀង Concert តាមខេត្តលើកដំបូង ជាមួយដៃគូលោក សាន ផានិត រយៈពេល ១០ឆ្នាំមុន លោកហ៊ានលោតពីលើឆាកស្តែងៗទៅកាន់ទស្សនិកជន ទាំងមិនបានគិតពីគ្រោះថ្នាក់ ដោយសារតែអារម្មណ៍រំភើបពុះកញ្ជ្រោលខ្លាំងពេក។

ម្ចាស់បទ “ជួយថែសិល្បៈដូនតា” រូបនេះ បានថ្លែងក្នុងបទសម្ភាសន៍កម្មវិធី 3Fun ថា៖ “សឹងតែមកដល់សព្វថ្ងៃនេះ មិនទាន់ឃើញស្រុកខ្មែរយើង នរណាហ៊ានធ្វើបែបនោះទេ។ តើបងប្អូនដែលឃើញ តារាស្រុកខ្មែរណា ហក់ពីលើឆាកទៅក្រោម ហើយអ្នកគាំទ្ររុញមកវិញដែរទេ? កាល១០ឆ្នាំមុន ខ្ញុំធ្វើអញ្ចឹង។ វីដេអូមាននៅក្នុង YouTube យើងអាចដាក់មើល។ ពីដំបូងខ្ញុំចង់សាក ព្រោះឃើញស្រុកគេអ្នកល្បីគេលើក ដល់ពេលលោក មិនដឹងធ្វើម៉េច គឺចង់លោតដែរ ដោយផ្តេកខ្លួនទៅ ដូចហោះមែន ហើយគេរុញយើងឡើងលើឆាកវិញ។ ប៉ុន្តែពេលហ្នឹង ដូចគេហៅថាគ្រូចូល ដោយសារតែអារម្មណ៍វារំភើបពេក”។

គួររំឭកថា DJ ឃ្លាំង ជាតារាចម្រៀងរ៉េបដ៏ល្បីល្បាញមួយរូបនៅកម្ពុជា កាលពីជាងមួយទសវត្សរ៍មុន ប៉ុន្តែក្រោយមក លោកបានបាត់មុខពីសិល្បៈអស់រយៈពេល១០ឆ្នាំ ដោយសារតែមានភារកិច្ចជួយគ្រួសារក្នុងការប្រកបមុខជំនួញ។ ទោះយ៉ាងណា កាលពីថ្ងៃទី០៦ ខែមិថុនា ឆ្នាំ២០២២ ក្នុងឱកាសខួបកំណើតកូនប្រុសរបស់លោក អាយុ៦ឆ្នាំ ពូឃ្លាំង បានប្រកាសវិលត្រឡប់មកចូលក្នុងវិថីសិល្បៈវិញ ខណៈដែលភរិយា និងកូនរបស់លោក ក៏គាំទ្រពេញទំហឹងចំពោះការសម្រេចចិត្តនេះ។ DJ ឃ្លាំង ទើបតែចេញបទថ្មីចំនួន ២បទ ដែលមានចំណងជើងថា “3 Some” និង “គ្រលាស់” ផងដែរ៕

សូមទស្សនាវីដេអូខាងក្រោម៖

The post ពូ ឃ្លាំង ថាកាល១០ឆ្នាំមុន ចេញ CONCERT ដំបូងៗ ហ៊ានលោតពីលើឆាក ដោយសារមូលហេតុមួយ appeared first on .

អភិបាលខេត្តក្រចេះ ចំណាយលុយផ្ទាល់ខ្លួន ទិញដីចែកជូនពលរដ្ឋទីទាល់ក្រ ចំនួន១៨គ្រួសារ

ឧកញ៉ាដែនដី — Mon, 08 Aug 2022 13:26:05 +0000

នៅព្រឹកថ្ងៃទី០៨ ខែសីហា ឆ្នាំ២០២២នេះ ប្រជាពលរដ្ឋទីទាល់ក្រ ចំនួន១៨គ្រួសារ ដែលរស់នៅលើដីចំណីផ្លូវ ក្នុងក្រុងក្រចេះ បានចាប់ឆ្នោតទទួលយកដី ដោយមួយគ្រួសារទទួលបានដីទំហំ ៨ x ២០ ម៉ែត្រ ដែលជាអំណោយថវិកាផ្ទាល់ខ្លួនរបស់ឯកឧត្តម វ៉ា ថន អភិបាលខេត្តក្រចេះ។

ឯកឧត្តម វ៉ា ថន អភិបាលខេត្តក្រចេះ

តាមការបញ្ជាក់ពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ បានឱ្យដឹងថា នៅព្រឹកថ្ងៃចន្ទនេះ លោកបណ្ឌិត កៅ ម៉ាឌីឡែន ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក្រចេះ បានអញ្ជេីញចាប់ឆ្នោតប្រគល់ដីជូនប្រជាពលរដ្ឋទីទាល់ក្រចំនួន ១៨គ្រួសារ ដែលសព្វថ្ងៃរស់នៅលើដីចំណីផ្លូវ ក្នុងសង្កាត់ក្រចេះ ក្រុងក្រចេះ។ ដីខាងលើនេះ ជាអំណោយដ៏ថ្លៃថ្លារបស់ឯកឧត្តម វ៉ា ថន អភិបាលនៃគណៈអភិបាលខេត្តក្រចេះ ហើយលោកចំណាយថវិកាផ្ទាល់ខ្លួនទិញជូនបងប្អូន ដោយ ១គ្រួសារ ទទួលបាន ៨x២០ម៉ែត្រ។ ដីនេះដែរ មានទីតាំងជាប់អនុវិទ្យាល័យ ហ៊ុន សែន កាប៉ូ និងជាប់ផ្លូវជាតិលេខ ៧ ស្ថិតនៅភូមិកាប៉ូ១ សង្កាត់អូរឫស្សី ក្រុងក្រចេះ ខេត្តក្រចេះ។

សូមបញ្ជាក់ថា លោក វ៉ា ថន ទទួលបានការតែងតាំងជាអភិបាលខេត្តក្រចេះ តាំងពីឆ្នាំ២០១៨ ជំនួសលោក សរ ចំរុង ដែលចូលនិវត្តន៍។ លោក វ៉ា ថន គឺជាអតីតអភិបាលស្រុកព្រែកប្រសព្វ ក្រោយមកបានឡើងទៅជាអភិបាលរងខេត្ត មុនឡើងជាអភិបាលខេត្ត។

កាលពីថ្ងៃទី១៦ ខែកុម្ភៈ ឆ្នាំ២០២២ ក្នុងឱកាសអញ្ជើញសម្ពោធដាក់ឲ្យប្រើប្រាស់ស្ពាន ៧កន្លែង ស្ថិតក្នុងខេត្តក្រចេះ និងព្រៃវែង សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងថា សម្តេចទើបតែដឹងថា វ៉ា ថន ត្រូវជាក្មួយប្រសាររបស់សម្តេច បន្ទាប់ពីឡើងកាន់តំណែងជាអភិបាលខេត្តបានប៉ុន្មានខែក្រោយមក ព្រោះម្តាយក្មេក វ៉ា ថន ជាបងប្អូនជីដូនមួយរបស់សម្តេច។ សម្តេចបានបន្តថា ការឡើងតំណែងនេះ មិនមែនបក្ខពួកនិយមទេ ព្រោះលោក វ៉ា ថន ធ្វើអភិបាលខេត្តបានប្រហែល៤ខែ ទើបដឹងថាជាក្មួយប្រសារ៕

The post អភិបាលខេត្តក្រចេះ ចំណាយលុយផ្ទាល់ខ្លួន ទិញដីចែកជូនពលរដ្ឋទីទាល់ក្រ ចំនួន១៨គ្រួសារ appeared first on .

មន្ត្រីសួនសត្វភ្នំតាម៉ៅ ច្រានចោលព័ត៌មានថា សួនសត្វភ្នំតាម៉ៅមានគម្រោងរុះរើទៅខេត្តផ្សេង

ឧកញ៉ាដែនដី — Thu, 04 Aug 2022 12:28:39 +0000

ប្រធានឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ លោក ញឹក រតនៈ បានថ្លែងបដិសេធ ច្រានចោលព័ត៌មានមិនពិតអំពីគម្រោងរុះរើសួនសត្វភ្នំតាម៉ៅទៅខេត្តផ្សេងៗ។

លោក ញឹក រតនៈ បានឱ្យដឹងថា ថ្មីៗនេះ មានការផ្សព្វផ្សាយតាមរយៈបុគ្គល និងសារព័ត៌មានមួយចំនួន បណ្ដាលឱ្យមានការភ័ន្តច្រឡំថា ឧទ្យាសួនសត្វ ភ្នំតាម៉ៅ នឹងត្រូវរុះរើ ផ្ទេរទៅកាន់ខេត្តសៀមរាប ឬខេត្ត កំពង់ឆ្នាំង ខេត្តកំពង់ស្ពឺ និងខេត្តមណ្ឌលគិរី បណ្ដាលឱ្យមានផលប៉ះពាល់ដសល់សត្វព្រៃមួយចំនួន ដែល កំពុងថែរក្សានៅក្នុងឧទ្យាន។

លោក ញឹក រតនៈបញ្ជាក់ថា ករណីនេះ ឧទ្យាសួនសត្វ មិនមានផែនការរុះរើ ឬផ្ទេរទីតាំង ទៅកាន់ខេត្តផ្សេងឡើយ។ ហើយថា សត្វព្រៃទាំងអស់ដែលកំពុងថែរក្សា នឹងមិនរងផលប៉ះពាល់ដូចការលើកឡើងនោះដែរ។

បើតាមលោក ញឹក រតនៈ ហ្វូងប្រើស រមាំង ឈ្លួស ជ្រូកព្រៃ សត្វស្លាបទាំងអស់ ត្រូវបានដោះលែងឱ្យរស់នៅក្នុងបរិវេណឧទ្យានសួនសត្វនិងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដែលមានផ្ទៃដីជាង ៤០០ ហិកតា និងមានរបងសុវត្ថិភាពព័ទ្ធជុំវិញក្នុងគោលបំណងដើម្បីបម្រើឱ្យការងារអប់រំ ការបង្កាត់ពូជ និងកាត់បន្ថយជម្លោះរវាងសត្វព្រៃ និងសហគមមូលដ្ឋាន។

សូមជំរាបផងដែរថា រាជរដ្ឋាភិបាល បានដាក់ទុនបន្ថែមសម្រាប់គម្រោងអភិវឌ្ឍន៍ឧទ្យានសួននិងមជ្ឈមណ្ឌលសង្គ្រោះសត្វព្រៃភ្នំតាម៉ៅ រួមមានគម្រោងស្ថាបនាកែលម្អគុណភាព ប្រព័ន្ធផ្លូវក្នុងឧទ្យានសួនសត្វ មានប្រវែងជាង ១៥ គីឡូម៉ែត្រ។

គម្រោងសាងសង់បន្ទប់អនាម័យចំនួន ៥ កន្លែង គម្រោងសាងសង់អគាររដ្ឋបាលមួយកន្លែងដើម្បីបម្រើឱ្យការងារប្រចាំថ្ងៃ និងគម្រោងសាងសង់មជ្ឈមណ្ឌលកម្សាន្ដដើម្បីបម្រើឱ្យសេវាកម្មទេសចរណ៍ កសាងអាងស្ដុកទឹកមួយកន្លែងដែលមានចំណុះជាង ២០ ម៉ឺនម៉ែត្រគូប ដើម្បីផ្គត់ផ្គង់ទឹកស្អាត និងតម្រូវការប្រចាំថ្ងៃរបស់ឧទ្យាសួនសត្វភ្នំតាម៉ៅ។

កសាងខ្លោងទ្វារ២កន្លែង និងដាំដើមឈើ ផ្កដាលម្អតាមដងផ្លូវជាង ១ ម៉ឺនដើម ដើម្បីបម្រើឱ្យសេវាកម្មទេសចរណ៍ចំនួន ជំរុញកំណើនសេដ្ឋកិច្ច និងចំណូលសហគមន៍ មូលដ្ឋាន និងជួយឱ្យឧទ្យានសួនសត្វ អាចប្រកួតប្រជែងបានក្នុងបរិបទសេដ្ឋកិច្ចបច្ចុប្បន្ន និងធានានិរន្តភាពការងារប្រចាំថ្ងៃរបស់ឧទ្យាសួនសត្វផងដែរ៕

សូមទស្សនាវីដេអូ៖

The post មន្ត្រីសួនសត្វភ្នំតាម៉ៅ ច្រានចោលព័ត៌មានថា សួនសត្វភ្នំតាម៉ៅមានគម្រោងរុះរើទៅខេត្តផ្សេង appeared first on .

អ្នកនៅតាមបុរី ដែលអត់មានសេវាអ៊ិនធឺណិត មានសង្ឃឹមឡើងវិញ បន្ទាប់ពីសម្តេចតេជោ ហ៊ុន សែន ចេញបទបញ្ជាមួយ

ឧកញ៉ាដែនដី — Thu, 04 Aug 2022 08:41:05 +0000

សម្រាប់អ្នកនៅតាមបុរី ក្នុងរាជធានីភ្នំពេញ ដែលកន្លងមកមានបញ្ហារអាក់រអួល ឬគ្មានសេវាទូរស័ព្ទ និងសេវាអ៊ិនធឺណិតនោះ នឹងមានសង្ឃឹមឡើងវិញ បន្ទាប់ពីសម្តេចតេជោ ហ៊ុន សែន បញ្ជាឲ្យរំលាយចោលកិច្ចសន្យាគ្រប់បុរីទាំងអស់ ដែលផ្តល់សិទ្ធិផ្តាច់មុខដល់ក្រុមហ៊ុនផ្តល់សេវាទូរស័ព្ទ និងអ៉ិនធឺណិត ចាប់ពីថ្ងៃស្អែកតទៅ។ នេះបើតាមការបញ្ជាក់ឱ្យដឹងរបស់ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍។

លោករដ្ឋមន្ត្រី បានថ្លែងក្នុងសន្និសីទសារព័ត៌មានស្តីពី «សមិទ្ធផលសម្រេចបានរយៈពេល៥ឆ្នាំ របស់ក្រសួងប្រៃសណីយ៍ និងទូរគមនាគមន៍» ដែលរៀបចំឡើងដោយអង្គភាពអ្នកនាំពាក្យរាជរដ្ឋាភិបាល នៅទីស្តីការគណៈរដ្ឋមន្ត្រី នាថ្ងៃទី០៤ ខែសីហា ឆ្នាំ២០២២ យ៉ាងដូច្នេះថា «មុនខ្ញុំមកទីនេះ សម្តេចតេជោបានបញ្ជាខ្ញុំថា រាល់កន្លែងទាំងអស់ដែលមានសិទ្ធិផ្តាច់មុខ អ៉ីធឺណិតក្នុងបុរី លុបចោលទាំងអស់ អត់មានឲ្យទៀតទេ។ សូមឲ្យប្រតិបត្តិករទាំងយល់ដឹង និងសូមឲ្យនិយ័តករទូរគមនាគមន៍ អនុវត្តប្រសាសន៍របស់ម្តេចតេជោ អត់មានត្រូវឲ្យផ្តាច់មុខទៀត ប្រតិបត្តិករត្រូវចូលប៉ុន្មានចូលទៅ»។

«ក្រោយទទួលប្រសាសន៍ដឹកនាំដ៏ខ្ពង់ខ្ពស់ របស់សម្តេចតេជោ ក្រសួង និងនិយ័តករទូរគមនាគមន៍ គឺត្រូវតែរំលាយចោលនូវរាល់ភាពផ្តាច់មុខទាំងអស់ អត់មាននរណាមួយមានសិទ្ធិផ្តាច់មុខក្នុងការរកស៊ី ក្នុងបុរីតទៅទៀតទេ ហើយការអនុវត្តន៍ចាប់ពីថ្ងៃស្អែកនេះតទៅ»។ លោក ជា វ៉ាន់ដេត បានលើកឡើងបន្ថែម។

លោករដ្ឋមន្ត្រី ក៏បានឱ្យដឹងផងដែរ បច្ចុប្បន្ននេះក្រុមការងាររបស់ក្រសួង បានធ្វើការចុះស្រង់ទិន្នន័យតាមបុរីជាង ១០០បុរីក្នុងរាជធានីភ្នំពេញ ដែលមានបុរីខ្លះផ្តល់សិទ្ធិផ្តាច់មុខ ដល់ក្រុមហ៊ុនផ្គត់ផ្គង់សេវាអ៉ិនធឺណិត ដែលនាំឲ្យអ្នកប្រើប្រាស់មានការលំបាក ក្នុងការប្រើប្រាស់ ពោះគ្មានជំរើស។ ជាមួយគ្នានេះ ក្រុមការងាររបស់ក្រសួង បានចុះធ្វើការតេស្តសេវាទូរស័ព្ទ នៅក្នុងបុរីបានចំនួន៦០បុរីរួចហើយ នៅតែចំនួន៤០បុរីទៀតប៉ុណ្ណោះ។ យ៉ាងណាមិញ ដើម្បីដោះស្រាយបញ្ហាសេវាទូរស័ព្ទ និងអ៉ីធឺណិតនៅតាមបុរី ក្រសួងបានសម្រេចជ្រើសរើសយកបុរី ប៉េងហួត ជាគំរូមុនគេ បន្ទាប់មកទើបដោះស្រាយបុរីផ្សេងៗទៀត៕

The post អ្នកនៅតាមបុរី ដែលអត់មានសេវាអ៊ិនធឺណិត មានសង្ឃឹមឡើងវិញ បន្ទាប់ពីសម្តេចតេជោ ហ៊ុន សែន ចេញបទបញ្ជាមួយ appeared first on .