សេចក្តីជូនដំណឹងដដែលបានបញ្ជាក់ថា “ចាប់ពីថ្ងៃទី១៣ ខែមីនា ឆ្នាំ២០២៥តទៅ ប្រព្រឹត្តកម្មលើការនាំចូលមុខទំនិញគ្រឿងក្នុងសត្វជ្រូកបង្កកខាងលើ ត្រូវអនុលោមតាមបញ្ញត្តិអនុក្រឹត្យលេខ ៣៧០ អនក្រ.បក ចុះថ្ងៃទី២៨ ខែធ្នូ ឆ្នាំ២០២៣ ស្តីពីការដាក់ឱ្យប្រើប្រាស់បញ្ជីទំនិញហាមឃាត់ និងទំនិញជាប់កម្រិតកំណត់ជាធរមានវិញ ”។

លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា ពាក់ព័ន្ធនិងការបិទផ្អាកមិនឱ្យនាំចូលជាបណ្តោះអាសន្ននៅគ្រឿងក្នុង និងបំណែកសាច់បង្កកអស់រយៈពេលមួយឆ្នាំ បានចូលមកដល់ថ្ងៃផុតកំណត់នៅថ្ងៃទី១២ ខែមីនា ឆ្នាំ២០២៥នេះ ហើយចាប់ពីថ្ងៃទី១៣ ខែមីនាតទៅនិងបើកឱ្យនាំចូលវិញនៅបំណែកគ្រឿងក្នុងនិងបំណែកសាច់បង្កកហាមឃាត់នេះ ប៉ុន្តែមិនអាចនាំចូលបានដោយសេរីនោះទេ បើចង់នាំចូលទាល់តែស្នើសុំផ្ទាល់មកក្រសួងកសិកម្ម រុក្ខាប្រមាញ់ និងនេសាទ ដែលជាអ្នកអនុញ្ញាត។

លោកបន្តថា “ខ្ញុំសង្ឃឹមជឿជាក់ថា រាជរដ្ឋាភិបាលនឹងគាំទ្រដល់វិស័យចិញ្ចឹមសត្វ ព្រោះវិស័យមួយនេះវាជួយឱ្យកសិករក្នុងស្រុករាប់ម៉ឺនគ្រួសារទទួលបានអត្ថប្រយោជន៍ ដោយសារនៅក្នុងវិស័យចិញ្ចឹមសត្វត្រូវការចំណីជាង១លានតោនក្នុងមួយឆ្នាំ”។

ទាក់ទងនិងវិស័យចិញ្ចឹមសត្វនៅប៉ុន្មានឆ្នាំចុងក្រោយនេះ បើយោងតាមមន្ត្រីជំនាញរបស់អគ្គនាយកដ្ឋានសុខភាពសត្វ និងផលិតកម្មសត្វធ្លាប់បានឱ្យដឹងថា ក្នុងរយៈពេល៥ឆ្នាំចុងក្រោយនេះ ផលិតកម្មសត្វសរុបមានអត្រាកំណើនមធម្យប្រចាំឆ្នាំកើនឡើង៥,៧%ក្នុងមួយឆ្នាំ ហើយក្នុងនោះផលិតកម្មសត្វលក្ខណៈគ្រួសារមានអត្រាកំណើនមធ្យមប្រចាំឆ្នាំកើនឡើង២,៨%ក្នុងមួយឆ្នាំ, ផលិតសត្វលក្ខណៈពាណិជ្ជកម្មមានអត្រាកំណើនជាមធ្យមប្រចាំឆ្នាំកើនឡើង១១,២%ក្នុងមួយឆ្នាំ។

នៅឆ្នាំ២០២៤ ប្រៀបធៀបនឹងឆ្នាំ២០២៣ ផលិតកម្មសត្វសរុបមានអត្រាកំណើន៤,១% ក្នុងនោះផលិតកម្មសត្វលក្ខណៈគ្រួសារមានអត្រាកំណើន១,៧% និងផលិតកម្មសត្វលក្ខណៈពាណិជ្ជកម្មមានអត្រាកំណើន៧,៥%៕SL

The post ការលើកទឹកចិត្តរបស់រាជរដ្ឋាភិបាលលើការហាមឃាត់ការនាំចូលជាបណ្តោះអាសន្នគ្រឿងក្នុង និងបំណែកសាច់សត្វបង្កកចូលថ្ងៃផុតកំណត់ appeared first on .

សេចក្តីប្រកាសជូនដំណឹងខាងលើ បានឱ្យដឹងថា ក្នុងគោលបំណងពង្រឹងប្រសិទ្ធភាពនៃការគ្រប់គ្រងការនាំចូលមុខទំនិញសាច់បង្កក រាជរដ្ឋាភិបាលបានកំណត់ក្រុមហ៊ុនមានគុណវុឌ្ឍិនាំចូលមុខទំនិញសាច់បង្កកចំនួន២០បន្ថែមទៀត ដែលគិតត្រឹមថ្ងៃទី២០ ខែកញ្ញា ឆ្នាំ២០២៤នេះ មានចំនួនក្រុមហ៊ុនមានគុណវុឌ្ឍិសរុបកើនឡើងដល់៤០ក្រុមហ៊ុន។

សូមបញ្ជាក់ថា ក្រុមហ៊ុនទាំង៤០ ដែលមានសិទ្ធនាំចូលសាច់បង្កកនោះ មានទីតាំងនៅរាជធានីភ្នំពេញ ខេត្តកណ្តាល  ខេត្តសៀមរាប និងខេត្តព្រះសីហនុ។

សូមជម្រាបជូនផងដែរថា កម្ពុជាសម្រេចបន្តហាមឃាត់ការនាំចូលថ្លើម ភាគបំណែកសាច់ និងគ្រឿងក្នុងជ្រូកបង្កករយៈពេល ៦ខែថែមទៀត គឺចាប់ពីថ្ងៃទី១២ ខែកញ្ញា ឆ្នាំ២០២៤ ដល់ថ្ងៃទី១២ ខែមីនា ឆ្នាំ២០២៥។ តែយ៉ាងណាវិធានការបន្តហាមឃាត់នេះ មិនអនុវត្តចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ ដែលនាំចូលទំនិញ សម្រាប់ប្រើប្រាស់ជាធាតុចូលផលិតកម្ម សម្រាប់នាំចេញឡើយ៕

The post គិតមកដល់ពេលនេះ ក្រុមហ៊ុនដែលមានសិទ្ធិនាំចូលសាច់បង្កក ចូលកម្ពុជា ឡើងដល់៤០ក្រុមហ៊ុន appeared first on .

លោកស្រ៊ុន ពៅ ប្រធានសមាគអ្នកចិញ្ចឹមសត្វកម្ពុជា បានឱ្យដឹងថា «នៅក្នុងមួយសប្តាហ៍ដំបូងនេះ ហាក់មិនទាន់មានអ្វីប្រែប្រួលនោះទេមិនថាតម្លៃក៏ដូចជាតម្រូវការជ្រូករស់នៅលើទីផ្សារ ហើយសមាគមអ្នកចិញ្ចឹមសត្វកំពុងធ្វើការតាមដាន ហើយបាននិងកំពុងធ្វើលិខិតដាក់ស្នើទៅរាជរដ្ឋាភិបាលឱ្យមានការត្រួតពិនិត្យសាច់បង្កកបន្ថែម ព្រោះយើងសង្ឃឹមថាដល់ចូលខែមេសាខាងមុខនេះ តម្លៃជ្រូករស់លក់នៅលើទីផ្សារកសិករអាចទទួលយកបាន»។

បើតាមប្រធានសមាគមខាងលើរូបនេះ លិខិតគ្រោងដាក់ស្នើសុំទៅរាជរដ្ឋាភិបាល សមាគមកំពុងតែរៀបចំ ហើយនៅថ្ងៃស្អែកបើរួចរាល់នឹងយកទៅដាក់ជូនស្ថាប័នដែលពាក់ព័ន្ធ ដូចជាក្រសួងពាណិជ្ជកម្ម ក្រសួងកសិកម្ម រុក្ខាប្រមាញ់និងនេសាទ , ក.ប.ក.ក៏ដូចជាខាងផ្នែកពេទ្យសព្វជាដើម។

លោកស្រ៊ុន ពៅ សង្កត់ធ្ងន់ថា «លិខិតស្នើសុំរបស់សមាគមទោះបី មិនទាន់ធ្វើរួចរាល់ តែកាលពីប្រជុំនៅថ្ងៃសុក្រកន្លងមកនេះបានសម្រេចថា សុំឱ្យស្ថាប័នមានសមត្ថកិច្ចធ្វើការត្រួតពិនិត្យឱ្យបានម៉ាត់ចត់ទំាងនៅខាងព្រំដែន ទីផ្សារ និងនៅតាមឃ្លំាងស្តុកសាច់បើរកឃើញសាច់ដែលគ្មានគុណភាពសូមកំម្ទេចចោល»៕តាកែវ

The post តម្លៃជ្រូករស់នៅលើទីផ្សារមិនទាន់មានការប្រែប្រួលបន្ទាប់ហាមមិនឱ្យនាំចូលសាច់បង្កកចាប់ពីថ្ងៃទី១២ ខែមីនា appeared first on .

យោងតាមប្រធានក្រុមប្រឹក្សាភិបាលនៃសមាគមអ្នកចិញ្ចឹមសត្វកម្ពុជាបានឱ្យដឹងថា បន្ទាប់ពីជួបពិភាក្សាជាមួយគ្នានៅថ្ងៃទី៩ ខែមករា ដល់ថ្ងៃទី២៩នេះ ខាងក្រុមហ៊ុននាំចូលសាច់បង្កកទិញជ្រូកក្នុងស្រុកសម្រាប់កែច្នៃលក់បន្តមិនទាន់មានការកើនឡើងនោះទេ ដោយសារខាងក្រុមហ៊ុនធ្លាប់តែរកស៊ីលក់សាច់បង្កក។ ដូចនេះក្រុមហ៊ុនត្រូវការពេលវេលាដើម្បីស្គាល់ពីទីផ្សារ។

លោក លី ឡាវីល ប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា បញ្ជាក់ថា ក្នុងរយៈពេល២០ថ្ងៃកន្លងមកនេះ ក្រុមហ៊ុននាំចូលសាច់បង្កកពីខាងក្រៅ ទិញជ្រូកក្នុងស្រុកតាមរយៈការសម្របសម្រួលពីសមាគមនេះមិនទាន់បាន១០ក្បាលទេនៅក្នុងមួយថ្ងៃ ហើយតម្លៃជ្រូកឃើញថាបានងើបឡើងវិញបានខ្លះក្រោយពីមិនមានចំណាត់ការនាំចូលសាច់បង្កកពីខាងក្រៅបន្ថែម។

លោកបន្តថា «តម្លៃជ្រូករស់បានឡើងថ្លៃពី៦ពាន់រៀលដល់ប្រមាណ៨ពាន់រៀលក្នុងមួយគីឡូក្រាម ហើយបើក្រុមហ៊ុនលក់សាច់បង្កករបស់ខ្លួនអស់ តម្លៃវានឹងឡើងថ្លៃបន្ថែមទៀត ដោយសារពួកគាត់អត់បាននាំចូលបន្ថែម ព្រោះរាជរដ្ឋាភិបាលសម្រេចផ្អាកមិនឱ្យនាំចូលរយៈពេល៦ខែ»។

បើតាមប្រធានក្រុមប្រឹក្សាភិបាលសមាគមអ្នកចិញ្ចឹមសត្វកម្ពុជា ថាតម្លៃជ្រូកទោះបីបានឡើងដល់៨ពាន់រៀលក្នុងមួយគីឡូក្រាមមែន ប៉ុន្តែតម្លៃនេះវាមិនទាន់ជួយឱ្យអ្នកចិញ្ចឹមជ្រូកក្នុងស្រុករួចខ្លួនទេ បានត្រឹមតែធ្វើឱ្យកសិករខាតបង់ប្រាក់ច្រើនដូចពេលមុនៗ។

លោកលើកឡើងថា« នៅក្នុងរយៈពេល២ខែទៀត យើងក៏អត់ទាន់ហ៊ានធ្វើការប៉ាន់ស្មានថាតម្លៃជ្រូករស់អាចឡើងថ្លៃបានប៉ុន្មានដែរ ប៉ុន្តែតម្លៃយើងសង្កេតឃើញថាចាប់ផ្តើមល្អប្រសើរមកវិញ មិនធ្វើឱ្យកសិករខាងបង់ប្រាក់ច្រើនដូចពេលមុនពេកទេ ដោយសារស្តុកសាច់ចាស់របស់គាត់នៅមានចំនួនច្រើន។ តែយើងសង្ឃឹមថាចំណាត់ការរបស់រាជរដ្ឋាភិបាលនឹងជួយ ឱ្យកសិករអាចលក់ជ្រូករបស់ខ្លួនបានដល់ថ្លៃដើមផលិត មិនឱ្យខាតបង់ទៀតទេ»៕ តាកែវ

The post ក្រុមហ៊ុននាំចូលសាច់បង្កក ទទួលទិញសាច់ជ្រូកក្នុងស្រុកនៅមានចំនួនតិចតួចក្នុងមួយថ្ងៃ appeared first on .

យោងតាមសេចក្តីថ្លែងការណ៍ពីសមាគមអ្នកចិញ្ចឹមសត្វកម្ពុជា កាលពីថ្ងៃទី៦ ខែធ្នូ ឆ្នាំ២០២៣ បានលើកឡើងថា អាជ្ញាធរជំនាញពេលថ្មីនេះ បានចុះត្រួតពិនិត្យទីតាំងស្តុកសាច់សត្វបង្កកមួយកន្លែងនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ដោយបានរកសាច់បង្កកពុំមានឯកសារបញ្ជាក់ច្បាស់លាស់ចំនួនជិត៤០០តោន ដែលរួមមានចុងសា្លបមាន់ គូទមាន់ សាច់មាន់កិន កោះមាន់ ជើងមាន់ សាច់ជ្រូក( មកពីប្រទេសស៊ីល  អ៊ីតាលី អាឡឺម៉ង់) ត្រចៀកជ្រូក សាច់ក្របី កន្សោមដោះក្របី ស្បូនជ្រូកនិងស្បែកជ្រូក។

 អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែបន្លំ ហៅកាត់ថា(ក.ប.ប) នៃក្រសួងពាណិជ្ជកម្ម កន្លងមកក៏បានចុះត្រួតពិនិត្យតាមឃ្លាំជាប្រចាំ និងបានរកឃើញមានសាច់បង្កកជាច្រើនប្រភេទមានគុណភាពទាប និងមិនមានលក្ខណៈស្របច្បាប់ជាច្រើនតោន ដែលបាននាំចូលមកលក់នៅក្នុងប្រទេសកម្ពុជា។

ផ្អែកលើលទ្ធផលនៃកិច្ចខិតខំប្រឹងបែងរបស់មន្ត្រីជំនាញខាងលើ,សមាគមអ្នកចិញ្ចឹមសត្វកម្ពុជា មានសេចក្តីត្រេកអរជាពន់ពេក និងសូមថ្លែងអំណរគុណដ៏ជ្រាលជ្រៅ ហើយសូមប្រកាសគាំទ្រយ៉ាងពេញទំហឹងចំពោះចំណាត់ការដ៏មានសារសំខាន់ទាំងនោះ ពីព្រោះផលិតផលបង្កកភាគច្រើននៅប្រទេសដើមគេទុកសម្រាប់ផលិតចំណីសត្វតែប៉ុណ្ណោះ ហើយការនាំចូលមកលក់នៅក្នុងប្រទេសកម្ពុជា ដោយគ្មានឯកសារបញ្ជាក់ច្បាស់លាស់និងស្របតាមបទបញ្ញតិច្បាប់គឺពិតជាប្រឈមនឹងហានិភ័យខ្ពស់ដល់សុខភាពប្រជាពលរដ្ឋទូទៅ ការឆ្លងរាលដាលជំងឺសត្វ ជាពិសេសផលិតផលបង្កកទាំងនោះនឹងត្រូវដាក់លក់ក្នុងតម្លៃយ៉ាងថោកលើទីផ្សារដែលនិងបំផ្លាញទីផ្សារនិងផ្តួលទីផ្សារសាច់សត្វរស់នៅក្នុងស្រុកយ៉ាងធ្ងន់ធ្ងរទៀតផង។

តែទន្ទឹមនិងនេះ សមាគមអ្នកចិញ្ចឹមសត្វកម្ពុជា ក៏បានអំពាវនាវយ៉ាងទទួចដល់អាជីករនាំចូលសាច់បង្កកទាំងអស់ សូមគិតដល់សុខភាពសាធារណៈជាចម្បង និងសូមគិតដល់មោទនភាពជាតិដោយចូលរួមលើកកម្ពស់ ឬមិនបង្កបញ្ហាដល់វិស័យចិញ្ចឹមសត្វក្នុងស្រុក និងមានសំណូមពរដល់បងប្អូនជនរួមជាតិ មេត្តាពិចារណាឱ្យបានដឹតដល់មុននឹងសម្រេចចិត្តទិញសាច់បង្កកដែលអត់មានប្រភពមកបរិភោគក្នុងគ្រួសារ ឬនាំសមាជិកក្រុមគ្រួសារមិត្តភក្តិទៅបរិភោគនៅកន្លែងលក់នានាដែលមានតម្លៃថោក តាមរយៈការប្រើប្រាស់សាច់បង្កកមានភាគុណភាពទាបទំាងនោះ។

បើតាមសេចក្តីថ្លែងការណ៍របស់សមាគមអ្នកចិញ្ចឹមសត្វកម្ពុជា បានថ្លែងអំណរគុណដល់រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ និងរដ្ឋមន្ត្រីក្រសួងពាណិជ្ជកម្ម ដែលកំពុងដឹកនាំប្រកបដោយតម្លាភាពនិងមោទនភាពជាតិខ្ពស់ ណែនាំដល់មន្ត្រីជំនាញក្នុងក្រសួងឱ្យចូលរួមជំរុញ គាំពារ និងអភិវឌ្ឍន៍វិស័យកសិកម្ម និងទីផ្សារផលិតផលកសិកម្មក្នុងស្រុក ឱ្យមានភាពរឹងមាំ ស្ថិរភាព និងវឌ្ឍនភាព ក្នុងបរិបទទីផ្សារប្រកួតប្រជែង។ លើសពីនេះបានសម្តែងនូវការកោតសរសើរ ថ្លែងអំណរគុណ និងការដឹងគុណដ៏ជ្រាលជ្រៅបំផុតជូនដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលកំពុងដឹកនាំរាជរដ្ឋាភិបាលប្រកបដោយគិតិបណ្ឌិត ឈ្លាសវៃនិងមោទនភាពជាតិខ្ពស់ ជាពិសេសផ្តល់នូវអនុសាសន៍ដ៏មានតម្លៃនៅក្នុងវេទិការាជរដ្ឋាភិបាល ផ្នែកឯកជន ដែលមិនអនុញ្ញាតិឱ្យមាននាំចូលផលិតផលសាច់ដែលមានគុណភាពទាបមកក្នុងព្រះរាជាណាចក្រកម្ពុជា៕ តាកែវ

The post សមាគមអ្នកចិញ្ចឹមសត្វកម្ពុជាពេញចិត្តជាខ្លាំងចំពោះការរកឃើញសាច់បង្កកមានគុណភាពទាបយកមកដាក់លក់ក្នុងស្រុក appeared first on .

ដោយមានការសម្របសម្រួលនីតិវិធីពីលោក ម៉ុត ដារ៉ា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ក្រុមការងារអន្តរាគមន៍បង្ក្រាបបទល្មើសចលនាសត្វនៃអគ្គនាយកដ្ឋានសុខភាពសត្វ  និងផលិតកម្មសត្វនៅថ្ងៃទី៤ ខែធ្នូ ឆ្នាំ២០២៣  បានសហការជាមួយការិយាល័យផលិតកម្ម និងបសុព្យាបាលរាជធានីភ្នំពេញ ចុះត្រួតពិនិត្យទីតាំងស្តុកសាច់សត្វបង្កកមួយកន្លែងនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។

ក្រុមការងារបានរកឃើញសាច់បង្កកគ្មានឯកសារច្បាប់ ក្នុងនោះមានគ្រឿងមាន់ សាច់មាន់ សាច់ជ្រូក និងក្របី សរុប ២ ម៉ឺន ៤ ពាន់ ៤២៤ កេះ ស្មើ ៣ សែន ៧ ម៉ឺន និង ៧៨៧ គីឡូក្រាម ។

លោក ហ៊ុន សារ៉ាត់ អនុប្រធាននាយកដ្ឋានសុខភាពសត្វ និងសុខភាពសាធារណៈបសុខព្យាបាល បានឱ្យដឹងថា សាច់សត្វបង្កកខាងលើទាំងអស់នេះត្រូវបាននាំចូលពីបរទេស មកស្តុកទុកនៅក្នុងឃ្លាំង ដោយពុំទាន់មានឯកសារបញ្ជាក់ច្បាស់លាស់ ហើយក្រុមការងារ បានស្នើសុំព្រះរាជអាជ្ញាបិទឃ្លាំងបង្កកសាច់សត្វខាងលើនេះជាបណ្ដោះអាសន្ន ដោយតម្រូវឱ្យម្ចាស់ទីតាំងរកឯកសារពាក់ព័ន្ធទៅបំភ្លឺនៅអគ្គនាយកដ្ឋានសុខភាពសត្វ និងផលិតកម្មសត្វ ។

ពាក់ព័ន្ធនិងសាច់បង្កកកាលថ្មីៗនេះ ឧកញ៉ា ម៉ុង ឬទ្ធី មានប្រសាសន៍ថា «ជាអកុសលវិស័យចិញ្ចឹមសត្វនៅកម្ពុជាកំពុងជួបនឹងវិបត្តិធ្ងន់ធ្ងរនៅឆ្នំា២០២៣នេះ។កត្តាចំម្បងនៃវិបត្តិមិនមែនបណ្តាលមកពីផលប៉ះពាល់ពីជំងឺកូវីដ១៩ ឬសង្គ្រាមរវាង រុស្ស៊ី អ៊ុយក្រែន,សង្គ្រាមអ៊ីស្រាអែលនិងប៉ាលីស្ទិននោះទេ គឺបណ្តាលមកពីការនាំចូលសាច់បង្កកដែលមានគុណភាពទាបខុសប្រក្រតីជាច្រើនមកលក់នៅលើទីផ្សារតូច-ធំនៅក្នុងព្រះរាជាណាចក្រកម្ពុជា»។

ឧកញ៉ា សង្កត់ធ្ងន់ដូច្នេះថា«ការនាំចូលសាច់បង្កកដែលមានគុណភាពទាប គ្មានហេដ្ឋារចនាសម្ព័ន្ធទុកដាក់គ្រប់គ្រាន់ ហើយមិនបានត្រួតពិនិត្យឱ្យបានត្រឹមត្រូវ យកមកដាក់លក់នៅលើទីផ្សារមានតម្លៃទាបហួសប្រមាណគឺកំពុងតែបំផ្លាញវិស័យចិញ្ចឹមសត្វនៅកម្ពុជា និងបំផ្លាញសុខភាពប្រជាពលរដ្ឋកម្ពុជាយើង ព្រោះប្រជាពលរដ្ឋយើងមិនបានដឹង ឃើញតែគេដាក់លក់មានតម្លៃថោកក៏ចេះតែនាំគ្នាទិញយកទៅបរិភោគនិងឃើញនៅតាមភោជនីយដ្ឋានមានលក់អាហារតម្លៃទាបក៏ចេះតែនាំគ្នាចូលហូបពិសេសនៅរៀងរាល់ពេលល្ងាច»។

គួរបញ្ជាក់ថា សាច់បង្កកខុសច្បាប់ បាន និងកំពុងក្លាយជាភាពស្មុគស្មាញយ៉ាងខ្លាំងចំពោះអ្នកពាក់ព័ន្ធ ព្រោះវាត្រូវបានជនមិនសុច្ចរិតប៉ុន្មាននាក់លួចលាក់នាំចូលដោយគ្មានការត្រួតពិនិត្យ និងបានធ្វើឱ្យវិស័យចិញ្ចឹមសត្វក្នុងស្រុកដួលរលំជាបន្តបន្ទាប់ ហើយក៏ត្រូវបានគេគិត និងបារម្ភដែរថា វាកំពុងគំរាមកំហែងយ៉ាងខ្លាំងចំពោះសុខភាពសាធារណៈ ពីព្រោះត្រូវបានគេជឿជាក់ថា សាច់បង្កកខុសច្បាប់ទាំងនោះគឺជាសាច់ខូចគុណភាព ហួសកាលរបរិច្ឆឆេទបរិភោគ៕អត្ថបទ៖សារេត

The post សមត្ថកិច្ចរកឃើញសាច់បង្កកឥតច្បាប់ជិត៤សែនគីឡូក្រាម នៅខណ្ឌសែនសុខ appeared first on .

លោកស្រ៊ុន  ពៅ ប្រធានសមាគមអ្នកចិញ្ចឹមសត្វកម្ពុជា បានឱ្យដឹងថា សិក្ខាសាលាស្តីពីសាច់បង្កកសម្រាប់ប្រជាពលរដ្ឋដែលគ្រោងធ្វើនៅថ្ងៃទី៣០ ខែវិច្ឆិកាខាងមុខនេះ អ្នកជំនាញមកពីប្រទេសថៃ គេមកធ្វើបទបង្ហាញពីការប្រើប្រាស់សាច់បង្កកក៏ដូចជាការរៀបចំ ទុកដាក់សាច់បង្កកជូនដល់ប្រជាពលរដ្ឋឱ្យមានការយល់ដឹងបន្ថែម ហើយក៏មិនមែនបង្ហាញឬវាយប្រហាលើសាច់បង្កកទៀតទេ។ព្រោះសាច់បង្កកនៅពេលសព្វថ្ងៃនេះ គឺខាងសមាគមបានសហការល្អជាមួយសួងពាក់ព័ន្ធទំាងអស់ ធ្វើការចុះត្រួតពិនិត្យនៅតាមឃ្លំាង តបតាមអនុសាសន៍របស់សម្តេចធិបតី ហ៊ុនម៉ាណែតនាយករដ្ឋមន្ត្រី យើងធ្វើបានល្អហើយ។

លោក ស៊្រុន ពៅ មានប្រសាសន៍ថា តាមការសង្កេតកន្លងមកឃើញថាសាច់បង្កកដាក់លក់នៅលើទីផ្សារសព្វថ្ងៃនេះ សម្រាប់ប្រជាពលរដ្ឋយើងមិនសូវទិញយកទៅទទួលនោះទេ អ្នកទទួលបាននៅសាច់បង្កកនេះសព្វថ្ងៃនេះគឺមានតែតាមពិធីបុណ្យ ពិធីមង្គលការ កន្លែងអំាងសាច់ និងនៅតាមភោជណីយ៍ដ្ឋានធំៗ ហើយសព្វថ្ងៃនេះបើតាមខ្ញុំមើលទៅកសិករ ពួកគាត់ក៏មានការយល់ដឹងច្រើនដែរ សាច់ល្មមៗគាត់អត់ទិញនោះទេ។

លោកលើកឡើងថា  ការចុះបង្ក្រាបរបស់ ក.ប.ប. ពិនិត្យឃើញ ចាប់បានតាមរយៈការលូតនាំចូលសាច់បង្កកដែលគ្មានស្តង់ដារ តាមរយៈដឹកជញ្ជូនតាមរ៉ឺម៉ក ឡានក្រុង ហើយយកលក់នៅលើទីផ្សារ បានន័យថាបើសាច់បង្កកនោះល្អវាទាល់តែមាននៅក្នុងទូទឹកកក ដែលបង្កកនៅក្រោមកម្រិតដកសូន្យ(-១៨)។ សព្វថ្ងៃនេះ មានការលក់នៅលើរានឬតូប ដាក់ក្លាសេទឹកកកពីរបីដុំនេះធ្វើឱ្យប៉ះពាល់ទៅដល់សុខភាព ហើយសាច់បង្កងដែលមិនមានគុណភាពនេះវាធ្វើឱ្យពលរដ្ឋអាចកើតជំងឺទឹកនោមផ្អែក ជំងឺលើសឈានជាដើម។

បើតាមសមាគមអ្នកចិញ្ចឹមសត្វកម្ពុជា សិក្ខាសាលាស្តីអំពីសុវត្ថិភាពសាច់បង្កកសម្រាប់សុខភាពប្រជាពលរដ្ឋ នៅថ្ងៃទី៣០ខែវិច្ឆិកា ២០២៣ខាងមុខ សម្រាប់អ្នកចូលរួមពិតជាមានសារៈប្រយោជន៍ក្នុងការបង្កើនចំណេះដឹងនិងយល់ដឹងកាន់តែច្រើនថែមមួមកម្រិតទៀតអំពីសុវត្ថិភាពចំណីនិងគុណភាពសាច់បង្កកសម្រាប់សុខភាពប្រជាពលរដ្ឋនិងវឌ្ឍនភាពវិស័យចិញ្ចឹមសត្វនៅកម្ពុជានាពេលបច្ចុប្បន្ន៕អត្ថបទ៖ សារេត

The post សាច់បង្កកមានតម្រូវការច្រើននៅតាមពិធីបុណ្យ មង្គលការ និងនៅភោជនីយ៍ដ្ឋានធំៗ appeared first on .

សកម្មភាពចុះត្រួតពិនិត្យផលិតផលនិង សាច់បង្កករបស់មន្ត្រីជំនាញនៅតាមស្ថាប័នពាក់ព័ន្ធដែលមានជាបន្តបន្ទាប់នេះ ត្រូវបានប្រធានសមាគមអ្នកចិញ្ចឹមសត្វកម្ពុជា ក្រៅពីសម្តែងការថ្លែងអំណរគុណ លោកចាត់ទុកការចុះត្រួតពិនិត្យតាមរយៈមន្ត្រីជំនាញពាក់ព័ន្ធគឺលោកពេញចិត្ត ហើយទទួលយកបាន។

លោក ស៊្រុន ពៅ បានឱ្យថា ក្នុងនាមជាប្រធានសមាគមអ្នកចិញ្ចឹមសត្វកម្ពុជា បានសម្តែងអំណរគុណដល់មន្ត្រីជំនាញនៃអគ្គនាយកដ្ឋានសុខភាពសត្វនិងផលិតសត្វ ក៏ដូជាអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា (ក.ប.ប) នៃក្រសួងពាណិជ្ជកម្ម បានយកចិត្តទុកបានចុះពិនិត្យនៅតាមទីតំាងរកឃើញសាច់បង្កក និងផលិផតលខូចគុណភាពនេះគឺមានពេញចិត្តនិងទទួលយកបាន ហើយសព្វថ្ងៃនេះលោកបាននិងកំពុងធ្វើការជាមួយក្រុម.ក.ប.ប.នេះបានពីរករណីផងដែរ។

លោកលើកឡើងថា«ផ្អែកលើសម្តេចធិបតីហ៊ុនម៉ាណែតនាយករដ្ឋមន្ត្រី បានគិតគូដល់សុខភាពរបស់ប្រជាពលរដ្ឋនិងបានដាក់ចេញនៅវិធានការសំខាន់ចំនួន៣កន្លងមក ឃើញថាក្រសួងពាក់ព័ន្ធបានយកចិត្តទុកដាក់ខ្ពស់លើការទប់ស្កាត់ ការចុះពិនិត្យគុណភាពផលិតផលដែលបាននាំចូលមកពីខាងក្រៅ បានជាបន្តបន្ទាប់»។

យោងតាម .ក.ប.ប. បង្ហាញថាមន្ត្រីជំនាញអគ្គនាយកដ្ឋាន ក.ប.ប. នាថ្ងៃទី២១ ខែវិច្ឆិកា ឆ្នាំ២០២៣ ក្រោមការចង្អុលបង្ហាញផ្ទាល់ដោយ លោក ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. បានបន្តចុះត្រួតពិនិត្យទីតាំងស្តុកទុកសាច់បង្កកចំនួន២ ស្ថិតនៅក្នុងខណ្ឌឬស្សីកែវ ដែលទទួលបានលទ្ធផលដូចខាងក្រោម៖

ទីតាំងទី១៖ បានសហការជាមួយសមាគមអ្នកចិញ្ចឹមសត្វកម្ពុជា និងអាជ្ញាធរដែនដី ដោយបានរកឃើញ ផលិតផលសាច់គោ ក្របី និងគ្រឿងក្នុង បង្កក ៖១)-សាច់គោខូចគុណភាព ប្រមាណ១ ៥០០គីឡូក្រាម,២)- សាច់គោ ក្របី និងគ្រឿងក្នុង ពុំមានឯកសារបញ្ជាក់អំពីប្រភពច្បាស់លាស់ ចំនួន ១២,៦០០គីឡូក្រាមផលិតផលខាងលើនេះ ត្រូវបានមន្ត្រីជំនាញអគ្គនាយកដ្ឋាន ក.ប.ប. អនុវត្តនីតិវិធីកិបសៀល លើទូរបង្កកសាច់ទាំងនោះ ជាបណ្តោះអាសន្ន ដោយទុករយៈពេល១សប្ហាហ៍ ឱ្យម្ចាស់ទីតាំងរកឯកសារមកបញ្ជាក់ចំពោះមន្ត្រីជំនាញ។

ទីតាំងទី២៖ មានកិច្ចសហការជាមួយអាជ្ញាធរដែនដី បានរកឃើញផលិតផល៖១)- សាច់គោ ក្របី និងគ្រឿងបំណែក ប្រមាណ ៦០ ៥៧០គីឡូក្រាម មានឯកសារនាំចូលត្រឹមត្រូវ និងមានប្រភពមកពីប្រទេសឥណ្ឌា
២)- សាច់មាន់ បរិមាណ ១ ៥០០គីឡូក្រាម ជាការបញ្ជាទិញនៅក្នុងស្រុក។
ទន្ទឹមនឹងនោះ មន្រ្តីជំនាញបានធ្វើតេស្តបឋម និងដកយកគំរូផលិតផលខាងលើបញ្ជូនទៅវិភាគនៅមន្ទីរពិសោធន៍នៃអគ្គនាយកដ្ឋាន ក.ប.ប.។ យ៉ាងណាមិញ ដោយសារលក្ខណ្ឌរក្សាទុក នៅមានកម្រិត (-3) (-7) និង(-11)អង្សារ និងការដឹកជញ្ជូនពុំសមស្របតាមលក្ខណៈបច្ចេកទេស មន្រ្តីយើងបានធ្វើការអប់រំណែនាំឱ្យកែតម្រូវ និងពិន័យអន្តរកាណ៍តាមបទប្បញ្ញត្តិជាធរមាន។

ថ្ងៃទី២០ ខែវិច្ឆិកា ឆ្នាំ២០២៣ នេះ លោកប៊ុន ចំរើន អគ្គយករង នៃអគ្គនាយកដ្ឋាន ក.ប.ប. បានដឹកនាំកម្លាំង សហការជាមួយអាជ្ញាធរដែនដីធ្វើការកម្ទេចចោលទំនិញដែលជាស៊ុតមាន់ចំនួន ៨, ១៩០គីឡូក្រាមក្រោយរកឃើញថាស៊ុតមាន់ទាំងអស់នោះពុំមានអនុលោមភាពត្រឹមត្រូវតាមបទប្បញ្ញត្តិ ពុំមានឯកសារបញ្ជាក់ពីគុណភាពត្រឹមត្រូវ និងពុំបានអនុវត្តលក្ខខណ្ឌតម្រូវនៃម្ហូបអាហារ។ ភាពមិនអនុលោមទាំងអស់នេះគឺពិតជាធ្វើឱ្យមានហានិភ័យលើសុខភាពអ្នកប្រើប្រាស់ និងប៉ះពាល់សុខភាពអ្នកបរិភោគយ៉ាងធ្ងន់ធ្ងរប្រសិនបើស៊ុតទាំងអស់នេះរបូតទៅលើទីផ្សារ។

ថ្ងៃទី១៦ ខែវិច្ឆិកា ឆ្នាំ២០២៣ ក្រោមការចង្អុលបង្ហាញរបស់លោកផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. លោក ប៊ុន ចំរើន អគ្គនាយករង នៃអគ្គនាយកដ្ឋាន ក.ប.ប. បានដឹកនាំកម្លាំងជំនាញនៃអគ្គនាយកដ្ឋាន ក.ប.ប. សហការជាមួយតំណាងសមាគមអ្នកចិញ្ចឹមសត្វកម្ពុជា និងអាជ្ញាធរដែនដីនៃខណ្ឌមានជ័យបានចុះឆែកឆេរទីតាំងឃ្លាំងស្ដុកទុកនិងចែកចាយផលិតផលសាច់បង្កកដែលពុំមានប្រភពច្បាស់លាស់ និងឯកសារត្រឹមត្រូវចំនួន ៤,៧១០គីឡូក្រាម។

ផលិតផលសាច់បង្កកទាំងអស់នោះត្រូវបានមន្រ្តីជំនាញឃាត់ទុកនៅនឹងកន្លែង ដោយតម្រូវឱ្យម្ចាស់ចូលខ្លួនមកបំភ្លឺនៅអគ្គនាយកដ្ឋាន ក.ប.ប. ជាមួយនឹងឯកសារបញ្ជាក់ឱ្យបានត្រឹមត្រូវផងដែរ៕ អត្ថបទ៖ សារេត

The post ក.ប.ប. បង្ហាញស្នាដៃរុករកសាច់បង្កកឃើញជាបន្តបន្ទាប់ក្រោយរាជរដ្ឋាភិបាលដាក់ចេញវិធានការចំនួន៣ appeared first on .

លោក អាន ឬទ្ធី កសិករចិញ្ចឹមជ្រូកមួយកន្លែងនៅខាងខេត្តសៀមរាប បានចោទជាសំនួរថា អ្នកដែលនាំចូលសាច់បង្កកមកកម្ពុជា វាមានគុណភាពបានប៉ុន្មាន ជាពិសេសខ្ញុំចង់សួរទៅខាងក្រសួងមានសមត្ថកិច្ចថាតើយើងបានពិនិត្យទៅលើគុណភាពសាច់បង្កកបានកម្រិតប៉ុន្មានដែរ?

លោកលើកឡើងថា បើយើងពង្រឹងនិងលើកកម្ពស់ទៅដល់កសិករនៅក្នុងស្រុក ឱ្យគាត់ចិញ្ចឹមហើយយើងលក់នៅក្នុងស្រុក ខ្ញុំគិតថាវាប្រហែលជាវាបានល្អប្រសើរជាង ដែលយើងនាំចូលពីក្រៅ ហើយមកជាន់ពន្លិចតម្លៃនៅក្នុងស្រុក។

លោកសង្កត់ធ្ងន់ថា«ក្នុងន័យនេះខ្ញុំចង់បានន័យថា ឱ្យតែសាច់បង្កកនោះនាំចូលមកតំាងពីព្រទេសប្រេស៊ីល ឥណ្ឌាក៏ដូចជានាំចូលមកពីបណ្តាប្រទេសផ្សេងទៀត បើសិនសាច់បង្កកទំាងនោះវាមានគុណភាពពិតប្រាកដ ខ្ញុំជឿថាមិនអាចលក់នៅក្នុងតម្លៃក្រោមទីផ្សារហើយមកប្រកួតប្រជែងជាមួយផលិតផលនៅក្នុងស្រុកបាននោះទេ»។

ទាក់ទងនិងសាច់បង្កកឬសាច់កកនេះដែរ បើយោងតាមសមាគមអ្នកចិញ្ចឹមសត្វកម្ពុជា បានបង្ហាញថា អ្នកបរិភោគក្នុងស្រុកគួស្វែងយល់ខ្លះៗអំពីសាច់កក និងគុណវិបត្តិរបស់វា សាច់កកជ្រូកមាន់ ទា អាចនាំចូលពីប្រទេសប្រេស៊ីល និងសាច់គោ និងក្របីមកពីប្រទេសឥណ្ឌាត្រូវបានដឹកតាមកប៉ាល់តាមប្រទេសវៀតណាម។ គុណវិបត្តិរបស់សាច់កក ពេលវាទន់ហើយមិនអាចយកទៅបង្កកឡើងវិញទេដោយវាបាត់គុណភាព សម្រាប់សាច់កកអាចរក្សាទុកបានប្រហែល១ ឆ្នាំ និង៦ខែ ដោយគេដាក់សាធាតុមួយចំនួនដើម្បីរក្សាគុណភាព និងពណ៌របស់សាច់ នៅពេលសាច់កកជិតផុតថ្ងៃកំណត់ត្រូវបានគេលក់ធូៗថ្លៃមកប្រទេសក្រីក្រ។

សមាគមអ្នកចិញ្ចឹមសត្វកម្ពុជាគូសបញ្ជាក់ថា«ស្ថានភាពសាច់កកលើទីផ្សារប្រទេសកម្ពុជា បច្ចុប្បន្ននេះមានការនាំចូលខុសច្បាប់ច្រើនតាមប្រទេសវៀតណាមហើយបានចែកចាយលើទីផ្សារគ្រប់រូបភាព អ្នកលក់សាច់ និងអ្នកចែកចាយសាច់បានយកសាច់មកបន្ទន់ រួចដាក់លាយជាមួយសាច់ក្នុងស្រុកដើម្បីបន្លំភែ្នកអ្នកទិញពេលនោះអ្នកទិញមិនដឹងថាសាច់នោះជាសាច់កកទេ ពេលមកដល់ផ្ទះពួកគាត់ចាប់ផ្តើមលាងទឹក នឹងដាក់ចូលទូកកឡើងវិញ ពេលនោះសាច់ខូចគុណភាពភាគច្រើន ប៉ុន្តែអ្នកទទួលទានមិនសូវបានដឹងរឿងនេះទេ។ តាមពិតប្រជាជនយើងមិនចូលចិត្តសាច់កកទេ ប៉ុន្តែមិនមានព័ត៌មានគ្រប់គ្រាន់ សព្វថ្ងៃអ្នករស់នៅទីក្រុងភ្នំពេញទទួលទានសាច់កកច្រើនជាងគេ ប្រសិនបើបងប្អូនប្រើសាច់កក គួរកុំយកវាទៅកកឡើងវិញ»។

បើតាមលោក អាន ឬទ្ធី កសិករចិញ្ចឹមជ្រូកនៅខេត្តសៀមរាបថា«ទីផ្សាររបស់ប្រទេសប្រេស៊ីលគេលក់ទៅទីផ្សារមួយណា?ខ្ញុំមិនជឿថាស្តង់ដារបស់អឺរ៉ុបវាថោកជាងស្តង់ដានៅស្រុកខ្មែរយើងនោះទេ អីចឹងស្តង់ដានៅអឺរ៉ុប ខ្ញុំក៏ធ្លាប់ធ្វើដំណើរទៅប្រទេសមួយចំនួននៅលើពិភពលោករួមទាំងនៅអឺរ៉ុប អីចឹងខ្ញុំអាចនិយាយបានថាស្តង់ដារស់នៅរបស់ប្រជាពលរដ្ឋគេគឺខ្ពស់ជាងស្តង់ដារបស់ខ្មែរយើង។ដូចនេះបើសិនជាសាច់បង្កកវាមានគុណភាពអាចទទួលទានបានខ្ញុំគិតថាគេមិននាំចូលមកស្រុកខ្មែរទេ បើទោះបីប្រទេសខ្មែរយើងកំពុងមានការអភិវឌ្ឍយ៉ាងណាក៏ដោយ»។

លោកបញ្ជាក់ថា«ខ្ញុំធ្លាប់បានឃើញដោយផ្ទាល់ភ្នែក នៅសាច់បង្កកនាំចូលមកពីប្រទេសប្រេស៊ីលគឺផលិតតាំងពីថ្ងៃទី១១ខែ៩ឆ្នំា២០២១ ហើយបើគិតមកដល់ម៉ោងនេះក្នុងឆ្នាំ២០២៣ វាមានរយៈពេលជិត២ឆ្នាំ។ តើគុណភាពសាច់អ្វីដែលអាចរក្សាទុកបានជិត២ឆ្នំាបែបហ្នឹង វាមិនអាចទេ ទាល់តែវាប្រើសមាសធាតុគីមីណាមួយដើម្បីរក្សាគុណភាពសាច់ឱ្យវានៅរូបរាងជាសាច់ ប៉ុន្តែគុណភាពសាច់ដែលយើងយកមកទទួលទាន យើងមិនដឹងគុណភាពថាវាជាគុណភាពសាច់ឬវាលែងជាសាច់។នេះជាចម្ងល់ដែលយើងត្រូវចោទសួរ»។

លោកបន្តថា ខ្ញុំមិនដឹងថាខាងណាទេដែលអនុញ្ញាតឱ្យមានការនាំចូលសាច់បង្កកប៉ុន្តែយើងត្រូវចោទសួរថាយើងអនុញ្ញាតឱ្យមានការនាំចូលសាច់បង្កកពីខាងក្រៅ តើយើងមានប្រព័ន្ធគ្រប់គ្រងគុណភាពហើយឬនៅ ហើយបើសិនយើងមិនទាន់មានប្រព័ន្ធគ្រប់គ្រងគុណភាពសាច់បង្កកនោះទេ ខ្ញុំគិតថាយើងមិនគួរគម្បីឱ្យមានការនាំចូលមកកម្ពុជាទេ៕ អត្ថបទ៖សារេត

The post ការនាំចូលសាច់បង្កកកំពុងក្លាយជាចម្ងល់ដែលពិបាកក្នុងការស្វែងរកចម្លើយមកអះអាងបញ្ជាក់ពីគុណភាពសាច់ appeared first on .