អាស៊ាន-សហរដ្ឋអាមេរិក

លោក ចូ បៃដិន វាយតម្លៃខ្ពស់ចំពោះសម្តេចតេជោ ហ៊ុន សែន រឿងបញ្ហាមីយ៉ាន់ម៉ា

រ៉េត សុកធា — Sat, 12 Nov 2022 12:08:15 +0000

ក្នុងជំនួបទ្វេភាគីរវាងសម្តេចតេជោ ហ៊ុន សែន នាយករដ្ឋមន្ត្រី និងលោក ចូ បៃដិន ប្រធានាធិបតីអាមេរិក នៅល្ងាចថ្ងៃសៅរ៍ទី១២ វិច្ឆិកានេះ លោក ចូ បៃដិន បានជម្រាបជូនសម្ដេចតេជោ ថា សហគមន៍អាស៊ាន គឺមានសារៈសំខាន់ណាស់ចំពោះសហរដ្ឋអាមេរិក ជាពិសេសចំពោះរដ្ឋបាលរបស់លោកផ្ទាល់តែម្ដង ហើយសហរដ្ឋអាមេរិកគាំទ្រមជ្ឈភាពអាស៊ាន និងមិត្តភាពអាស៊ាន។

ទន្ទឹមនឹងនោះ លោកបៃដិន បានវាយតម្លៃខ្ពស់ចំពោះវិធានការរបស់កម្ពុជាប្រធានអាស៊ានក្នុងការប្រឹងប្រែងដោះស្រាយបញ្ហាមីយ៉ាន់ម៉ា ដើម្បីឲ្យវិលត្រឡប់មកស្ថានភាពដើមវិញ។

ថ្លែងក្នុងឱកាសនោះសម្ដេចតេជោ ហ៊ុន សែន បានថ្លែងអំណរគុណដល់លោក ចូ បៃដិន ដែលបានធ្វើដំណើមកចូលរួមក្នុងកិច្ចប្រជុំកំពូលអាស៊ាននៅរាជធានីភ្នំពេញ ដែលនេះសបញ្ជាក់ឲ្យឃើញនូវការយកចិត្តទុកដាក់របស់សហរដ្ឋអាមេរិកចំពោះអាស៊ាន។

សម្ដេចតេជោ ហ៊ុន សែន បានថ្លែងប្រាប់លោក បៃឌិន អំពីកិច្ចសហប្រតិបត្តិការជាមួយជប៉ុន លើការជួយអ៊ុយក្រែនក្នុងការដោះមីន និងប្រឆាំងការប្រើប្រាស់ពាក្យសំដីគំរាមកំហែង ការប្រើប្រាស់នុយក្លេអ៊ែរ។

សូមជម្រាបថា ក្នុងកិច្ចប្រជុំកំពូលអាស៊ាន នៅភ្នំពេញកម្ពុជាជាម្ចាស់ផ្ទះ កៅអីមីយ៉ាន់ម៉ានៅតែរក្សាដដែល ប៉ុន្តែមិនមានឥស្សរជនរូបណាអង្គុយនោះឡើយ។

ទោះបីអវត្តមានរបស់ ភាគីមីយ៉ាន់ម៉ាក្នុងកិច្ចប្រជុំកំពូលអាស៊ានលើក ទី៤០ និង៤១និងកិច្ចប្រជុំពាក់ព័ន្ធក៏ដោយ ក៏ប្រទេសជាសមាជិកអាស៊ានទំាងអស់មានការតាំងចិត្តខ្ពស់ក្នុងចូលរួមចំណែកដោះស្រាយនៅមីយ៉ាន់ម៉ា និងភាពប្រាកដនិយមខ្ពស់ ពាក់ព័ន្ធទៅនឹងលទ្ធភាពអាស៊ានក្នុងការជួយមីយ៉ាន់ម៉ា ដើម្បីចូលរួមចំណែក ជួយទៅដល់ការអនុវត្តន៍កិច្ចព្រមព្រៀងជាឯកច្ឆន្ទប្រាំចំណុច( 5PC)ដើម្បីជាការប្រគល់ជូនប្រជាជនមីយ៉ាន់ម៉ានូវសន្តិភាពនិងប្រក្រតីភាពឡើងវិញ៕

The post លោក ចូ បៃដិន វាយតម្លៃខ្ពស់ចំពោះសម្តេចតេជោ ហ៊ុន សែន រឿងបញ្ហាមីយ៉ាន់ម៉ា appeared first on .

មេដឹកនាំកំពូលអាមេរិក ចូ បៃដិន ស្នាក់នៅសណ្ឋាគារលំដាប់ផ្កាយ៥ មួយនៅរាជធានីភ្នំពេញ

ឧកញ៉ាដែនដី — Sat, 12 Nov 2022 07:58:54 +0000

នាព្រឹកថ្ងៃទី១២ ខែវិច្ឆិកា ឆ្នាំ២០២២ វេលាម៉ោង ៨:៣០ នាទីព្រឹក លោកប្រធានាធិបតីអាមេរិក ចូ បៃដិន បានធ្វើដំណើរមកដល់ប្រទេសកម្ពុជា ដើម្បីចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនានា។ មកដល់រាជធានីភ្នំពេញភ្លាម ក្បួនរថយន្តរបស់លោក បានធ្វើដំណើរពីព្រលានយន្តហោះអន្តរជាតិភ្នំពេញ ឆ្ពោះទៅសណ្ឋាគារលំដាប់ផ្កាយ៥ មួយកន្លែង គឺសណ្ឋាគារ រ៉ាហ្វលឡឺរ៉ូយ៉ាល់ (Raffles Le Royal) ដែលជាកន្លែងសម្រាកស្នាក់នៅ មុនអញ្ជើញទៅចូលរួមកិច្ចប្រជុំ នាពេលព្រលប់។

ដំណើរមកដល់របស់លោកប្រធានាធិបតីទី៤៦ របស់អាមេរិក បានធ្វើឱ្យកម្លាំងសមត្ថកិច្ចបិទចរាចរណ៍ទាំងស្រុង នៅលើកំណត់ផ្លូវសហព័ន្ធរុស្ស៊ី ចាប់ពីមុខព្រលានយន្តហោះអន្តរជាតិភ្នំពេញ រហូតដល់សណ្ឋាគារ រ៉ាហ្វលឡឺរ៉ូយ៉ាល់ តាំងពីម៉ោង ៨:០០នាទីព្រឹក ដល់ម៉ោង ០៩:៣០នាទីព្រឹក ដើម្បីការពារសុវត្ថិភាព និងក្បួនធ្វើដំំណើររបស់លោក។

សណ្ឋាគារ រ៉ាហ្វលឡឺរ៉ូយ៉ាល់ (Raffles Le Royal) មានទីតាំងនៅរុក្ខវិថីលេខ៩២ សង្កាត់វត្តភ្នំ ខណ្ឌដូនពេញ ជាសណ្ឋាគារលំដាប់ប្រណិតផ្កាយ៥ ដែលបានកសាងឡើងនៅសម័យបារាំង ហើយសព្វថ្ងៃសណ្ឋាគារនេះ នៅតែរក្សារចនាបថដើមសឹងតែ១០០ភាគរយ។ សណ្ឋាគារនេះ បើកឱ្យដំណើរការនៅក្នុងឆ្នាំ១៩២៩ ក្រោមព្រះរាជាធិបតីព្រះបាទស៊ីសុវត្ថិ មុនីវង្ស ដែលមកដល់បច្ចុប្បន្ននេះ មានអាយុកាលជិត ១០០ឆ្នាំហើយ។

រ៉ាហ្វលឡឺរ៉ូយ៉ាល់ ជាសណ្ឋាគារ ដែលឥស្សរ:ជនល្បីៗនៅលើពិភពលោកជ្រើសជ្រើសរើស សម្រាប់ការស្នាក់នៅរាល់ពេលមកកម្ពុជា ដែលក្នុងនោះរួមមាន នៅឆ្នាំ១៩៣៦ តារាកំប្លែងជនជាតិអង់គ្លេស Charlie Chaplin (លោក សាកឡូ) និងលោកស្រី Paulette Goddard, អ្នកនិពន្ធរឿងជនជាតិអង់គ្លេសលោក William Somerset Maugham, នៅឆ្នាំ១៩៦៦ លោកប្រធានាធិបតីបារាំង ហ្សាល ដឺហ្គូល (Charles de Gaulle), នៅឆ្នាំ១៩៦៧ ស្ត្រីទី១អាមេរិកលោកស្រី Jacqueline Kennedy (ភរិយារបស់ប្រធានាធិបតីអាមេរិកលោក John F Kennedy), អ្នកនិពន្ធប្រលោមលោកល្បីឈ្មោះជនជាតិបារាំងលោក Andre Malraux និងលោកប្រធានធិបតីសហរដ្ឋអាមេរិកលោក ប៉ារ៉ាក់ អូប៉ាមា (មកចូលរួមកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះ) នៅឆ្នាំ២០១២ ផងដែរ។

សូមជម្រាបជូនថា លោកប្រធានាធិបតី ចូ បៃដិន នឹងចូលរួមកិច្ចប្រជុំកំពូលអាស៊ាន-អាមេរិក លើកទី១០ នៅវេលាម៉ោង ៥:០០ល្ងាច ថ្ងៃទី១២ ខែវិច្ឆិកានេះ នៅសណ្ឋាគារ សុខា ភ្នំពេញ។ លោកនឹងស្នាក់នៅសណ្ឋាគារ រ៉ាហ្វលឡឺរ៉ូយ៉ាល់ (Raffles Le Royal) រយៈពេលមួយយប់ ហើយនឹងមានជំនួបទ្វេរភាគីជាមួយមេដឹកនាំប្រទេសមួយចំនួន នៅព្រឹកថ្ងៃទី១៣ ខែវិច្ឆិកា មុនពេលលោកចាកចេញពីទឹកដីកម្ពុជា នៅរសៀលថ្ងៃដដែល ដើម្បីបន្តដំណើរទៅកាន់ប្រទេសឥណ្ឌូនេស៊ី ដើម្បីចូលរួមកិច្ចប្រជុំ G-20 ពីថ្ងៃទី ១៣ រហូតដល់ថ្ងៃទី១៦ ខែវិច្ឆិកា បន្តទៀត៕

The post មេដឹកនាំកំពូលអាមេរិក ចូ បៃដិន ស្នាក់នៅសណ្ឋាគារលំដាប់ផ្កាយ៥ មួយនៅរាជធានីភ្នំពេញ appeared first on .

លោក ចូ បៃដិន នឹងមកដល់កម្ពុជា នៅម៉ោង៨ព្រឹកស្អែក ជាមួយក្តីរំពឹងដ៏ធំមួយ

ឧកញ៉ាដែនដី — Fri, 11 Nov 2022 13:12:57 +0000

លោកប្រធានាធិបតីអាមេរិកទី៤៦ ចូ បៃដិន (Joe Biden) នឹងអញ្ជើញធ្វើដំណើរមកដល់រាជធានីភ្នំពេញ នៅវេលាម៉ោងប្រមាណ ៨:០៥នាទីព្រឹក ថ្ងៃសៅរ៍ ទី១២ ខែវិច្ឆិកា ឆ្នាំ២០២២ ស្អែកនេះ ដើម្បីចូលរួមកិច្ចប្រជុំកំពូលអាស៊ានលើកទី ៤០ និង ៤១ និងកិច្ចប្រជុំកំពូលអាស៊ាន-អាមេរិក ដែលមានកម្ពុជាជាម្ចាស់ផ្ទះ។ ការធ្វើដំណើរមកកាន់ប្រទេសកម្ពុជានេះ ត្រូវបានគេមើលឃើញថា លោក ចូ បៃដិន មានក្តីរំពឹងដ៏ធំមួយ។

យោងតាមសារព័ត៌មាន Politico បានឱ្យដឹងថា លោកប្រធានាធិបតីអាមេរិក ចូ បៃដិន នឹងធ្វើដំណើរមកដល់ប្រទេសកម្ពុជា នៅព្រឹកថ្ងៃសៅរ៍ ជាមួយនឹងក្តីរំពឹងថា លោកនឹងអាចពង្រឹងឡើងវិញនូវទំនាក់ទំនងរបស់សហរដ្ឋអាមេរិក ជាមួយនឹងសម្ព័ន្ធមិត្តរបស់ខ្លួននៅទូទាំងតំបន់ប៉ាស៊ីហ្វិក រួមទាំងតំបន់អាស៊ាន ខណៈដែលតំបន់ទាំងនេះ កំពុងមានការកើនឡើងឥទ្ធិពលរបស់ចិនយ៉ាងខ្លាំង។

គួររំលឹកថា ក្រុមអង្គរក្ស និងក្រុមការងារពិធីការរបស់លោកប្រធានាធិបតីអាមេរិក បានមកដល់ប្រទេសកម្ពុជា និងបានដឹកទាំងរថយន្ត “The Beast” មកដល់រាជធានីភ្នំពេញ តាំងពីចុងខែតុលា ខណៈដែលនៅព្រឹកថ្ងៃទី១១ ខែវិច្ឆិកា នេះ គេបានប្រទះឃើញរថយន្តប្រធានាធិបតីសហរដ្ឋអាមេរិក “The Beast” ចំនួន២គ្រឿង បានចូលចាក់សាំងនៅស្ថានីយប្រេងឥន្ធនៈមួយកន្លែង នៅលើផ្លូវប៉ាស្ទ័រ (ផ្លូវលេខ៥១) គឺស្ថានីយប្រេងឥន្ធនៈ សូគីមិច រួចរាល់ហើយផងដែរ ដើម្បីត្រៀមជូនដំណើរថ្នាក់ដឹកនាំកំពូលលំដាប់ពិភពលោករូបនេះ មកកាន់ទីកន្លែងនៃកិច្ចប្រជុំ នៅសណ្ឋាគារ សុខា ភ្នំពេញ។

សូមជម្រាបថា មុនមកដល់កម្ពុជា មេដឹកនាំអាមេរិក ចូ បៃដិន ទើបបានចូលរួមអង្គប្រជុំសំខាន់មួយ នៅប្រទេសអេហ្ស៊ីប គឺកិច្ចប្រជុំស្ដីពីបម្រែបម្រួលអាកាសធាតុ រៀបចំឡើងដោយអង្គការសហប្រជាជាតិ COP27 United Nations នៅថ្ងៃទី១១ ខែវិច្ឆិកានេះ ហើយលោកនឹងស្រូតធ្វើដំណើរមកកម្ពុជាឱ្យទាន់កិច្ចប្រជុំកំពូលអាស៊ាននៅថ្ងៃទី ១២ និង ១៣ វិច្ឆិកា មុននឹងលោកត្រូវធ្វើដំណើរទៅកាន់ប្រទេសឥណ្ឌូនេស៊ី ដើម្បីចូលរួមកិច្ចប្រជុំ G20 ពីថ្ងៃទី ១៣ រហូតដល់ថ្ងៃទី១៦ ខែវិច្ឆិកា បន្តទៀត៕

The post លោក ចូ បៃដិន នឹងមកដល់កម្ពុជា នៅម៉ោង៨ព្រឹកស្អែក ជាមួយក្តីរំពឹងដ៏ធំមួយ appeared first on .

លក្ខណៈពិសេស របស់រថយន្តប្រធានាធិបតីអាមេរិក ដែលប្រើប្រាស់មកប្រជុំអាស៊ាននៅកម្ពុជា

ឧកញ៉ាដែនដី — Thu, 10 Nov 2022 04:15:03 +0000

លោកប្រធានាធិបតីសហរដ្ឋអាមេរិក ចូ បៃដិន នឹងត្រូវធ្វើដំណើរមកដល់កម្ពុជា នាថ្ងៃទី១២ ដល់ថ្ងៃទី១៣ ខែវិច្ឆិកានេះ ដើម្បីចូលរួមក្នុងកិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ព័ន្ធនានា ដែលកម្ពុជាធ្វើជាម្ចាស់ផ្ទះ។ វត្តមានលើទឹកដីកម្ពុជានេះ លោកប្រធានាធិបតីអាមេរិក នឹងប្រើប្រាស់រថយន្តផ្ទាល់ខ្លួន The US Presidential Cadillac ឬហៅថា “The Beast”។

បើតាមសារព័ត៌មាន Spyscape បានបង្ហាញឱ្យដឹងត្រួសៗពីលក្ខណៈពិសេសនៃរថយន្ត The Beast របស់ប្រធានាធិបតីទី៤៦ របស់អាមេរិក ចូ បៃដិន ថារថយន្តនេះ មានតម្លៃប្រហែលប្រមាណ ១,៥លានដុល្លារ ប៉ុន្តែក្រុមហ៊ុនផលិតរថយន្ត GM បានចំណាយថវិកាអស់ប្រមាណ ១៥លានដុល្លារ ក្នុងការស្រាវជ្រាវ និងធ្វើបច្ចុប្បន្នភាព (Update) រៀងរាល់ពីរបីឆ្នាំម្តង។ ទោះមិនថ្លៃខ្លាំង តែវាមានលក្ខណៈពិសេសលើសពីតម្លៃ សម្រាប់ជួយការពារសុវត្ថិភាពមេដឹកនាំកំពូលរបស់ពិភពលោក។

ដោយផ្អែកលើគោលការណ៍សុវត្ថិភាពជាកំហិត ព័ត៌មានលម្អិតអំពី The Beast គឺពុំមាននរណាអាចដឹងលម្អិតច្បាស់លាស់ឡើយ គ្រាន់តែយើងអាចដឹងថា វាមានលក្ខណៈពិសេស ៥យ៉ាងរួមមាន៖

១. វាជាប្រភេទរថយន្ត Cadillac One ប៉ុន្តែវាមិនដូចគេទាំងស្រុងនោះទេ ដោយមានលក្ខណៈដូចគ្នាតិចតួចបំផុត ទៅលើម៉ាស៊ីន និងតួខ្លួន ចំណែកគ្រឿងផ្សំដូចជាកន្ទុយ ចង្កៀង និងការរចនាម៉ូដខាងក្រោមផ្នែកខាងមុខ គឺខុសគេទាំងស្រុង។ The Beast មានទម្ងន់ជាង ៩តោន ដោយមានកម្រាស់ដែកក្រាស់ៗសម្រាប់ការពារសន្តិសុខ ហើយកញ្ចក់របស់វា អាចការពារពីការទម្លុះរបស់គ្រាប់កាំភ្លើងបាន ការពារគ្រប់វត្ថុទាំងឡាយដែលនឹងមកក្បែរវា ដើម្បីការពារពីការផ្ទុះ នៅពេលមានការបំបុកដោយផ្ទាល់។

២. វាមានភ្ជាប់សេវាជាមួយយន្តហោះប្រភេទ C17 Global Master (US Air Force) ដែលអាចដឹកជញ្ជូន The Beast, Cadillac One និងរថពាសដែក ដោយភ្ជាប់នឹងផ្កាយរណបយោធា។

៣. The Beast ប្រៀបដូចនឹងរថពាសដែកដែរ ដោយមានស្រោបដែក ៨អ៊ីញ និងបង្អួចការពារគ្រាប់កាំភ្លើងកម្រាស់ ៥អ៊ីញ, សម្បកកង់ប្រភេទយក្សយីហោ Good Year ដែលអាចរត់រាបស្មើ មិនមានភាពរលាក់ ឬរំញ័រឡើយ។ កាបីន ផ្សារភ្ជាប់ពីប្រភពខាងក្រៅ ដើម្បីការពារពីការវាយប្រហារដោយសារធាតុគីមី និងពពុះពិសេសជុំវិញធុងប្រេង ក្នុងករណីមានផលប៉ះពាល់។ The Beast អាចជាន់បានល្បឿន ១០០គីឡូម៉ែត្រក្នុងមួយម៉ោង ត្រឹមតែ១៥វិនាទី។

៤. បំពាក់ដោយឧបករណ៍ពិសេស៖ ឧបករណ៍ពន្លត់អគ្គីភ័យ ធុងអុកស៊ីសែន កាំភ្លើង ឧស្ម័នបង្ហូរទឹកភ្នែក ឧបករណ៍បាញ់គ្រាប់បែកដៃ និងឧបករណ៍ការពារសុវត្ថិភាពជាច្រើន។

៥. អ្នកបើកបរ៖ មិនត្រឹមតែអ្នកបើកបរទេ តែត្រូវរក្សាការសម្ងាត់គ្រប់យ៉ាង និងមានសមត្ថភាពអាចបើកបរបង្វិលខ្លួនរថយន្ត ១៨០ដឺក្រេបាន នៅពេលមានអាសន្ន និងចេះសមយុទ្ធ វិធីសាស្ត្រ គេចពីខ្មាន់កាំភ្លើងយ៉ាងឆាប់រហ័សផងដែរ។

សូមជម្រាបជូនថា សម្តេចតេជោហ៊ុន សែន នាយករដ្ឋមន្ត្រីនៃកម្ពុជា បានឱ្យដឹង តាំងពីថ្ងៃទី០១ ខែវិច្ឆិកា ឆ្នាំ២០២២ ថាសហរដ្ឋអាមេរិក បានដឹករថយន្ត (The Beast) មកដល់ប្រទេសកម្ពុជាហើយ និងសម្ភារៈមួយចំនួន សម្រាប់ការពារប្រធានាធិបតីអាមេរិក ចូ បៃដិន ដែលនឹងអញ្ជើញរួមកិច្ចប្រជុំកំពូលអាស៊ាន-អាមេរិក និងកិច្ចប្រជុំពាក់ព័ន្ធនានា ដែលកម្ពុជាធ្វើជាម្ចាស់ផ្ទះ នៅខែវិច្ឆិកា ឆ្នាំ២០២២នេះ។

សម្តេចតេជោ បានបន្តថា ការបញ្ជូនរថយន្ត និងសម្ភាការពារសន្តិសុខ របស់ប្រធានាធិបតី មកកាន់ប្រទេសណាមួយនោះ វាជាទម្លាប់របស់អាមេរិក មិនមែនសម្រាប់តែមកកម្ពុជាមួយនោះទេ។ សម្តេចតេជោបានថ្លែងថា ដោយឡែក សម្រាប់បណ្តាថ្នាក់ដឹកនាំប្រទេសដទៃទៀត គឺប្រើប្រាស់រថយន្តដែលរៀបចំដោយកម្ពុជា ក្នុងនាមជាប្រធានអាស៊ាន ឆ្នាំ២០២២។

The post លក្ខណៈពិសេស របស់រថយន្តប្រធានាធិបតីអាមេរិក ដែលប្រើប្រាស់មកប្រជុំអាស៊ាននៅកម្ពុជា appeared first on .

មេដឹកនាំអាស៊ាន សហរដ្ឋអាមេរិក ប្តេជ្ញាលើកកម្ពស់ទំនាក់ទំនងសេដ្ឋកិច្ចកាន់តែរឹងមាំ

ឧកញ៉ាកោះក្របី — Sat, 14 May 2022 02:10:22 +0000

កិច្ចប្រជុំកំពូលពិសេសដែលប្រារព្វធ្វើឡើងនៅទីស្តីការក្រសួងការបរទេសអាមេរិក ក្នុងរដ្ឋធានី វ៉ាស៊ីនតោន កាលពីថ្ងៃទី១៣ ខែឧសភា ឆ្នាំ២០២២ មេដឹកនាំនៃប្រទេសអាស៊ាន និងសហរដ្ឋអាមេរិក បានបញ្ជាក់ជាថ្មី នូវការប្ដេជ្ញាចិត្តរួមគ្នា ក្នុងការពង្រឹងនិងកសាងទំនាក់ទំនងយូរអង្វែង រវាងអាមេរិក និងអាស៊ាន ដែលជាទំនាក់ទំនងមិនអាចខ្វះបាន ឲ្យកាន់តែទូលំទូលាយថែមទៀត។

ទន្ទឹមនឹងនោះសម្រាប់ការលើកកម្ពស់ទំនាក់ទំនងសេដ្ឋកិច្ចកាន់តែរឹងមាំ មេដឹកនាំអាស៊ាន សហរដ្ឋអាមេរិក បានប្តេជ្ញារួមគ្នា ធ្វើការ ដើម្បីបំពេញតម្រូវការហេដ្ឋារចនាសម្ព័ន្ធក្នុងតំបន់ ដែលនឹងជំរុញការវិនិយោគលើ គម្រោងហេដ្ឋារចនាសម្ព័ន្ធប្រកបដោយគុណភាពខ្ពស់ និរន្តរភាព ហើយធន់នឹងអាកាសធាតុ ដែលនឹងជំរុញកំណើនសេដ្ឋកិច្ចប្រកបដោយសមធម៌និងនិរន្តភាព។

បន្ថែមទៀតនោះ ក៏នឹងលើកកម្ពស់កិច្ចសហការតាមសមុទ្រ មេដឹកនាំទាំងអស់ បានយល់ព្រមជំរុញកិច្ចសហការដែនសមុទ្រ តាមរយៈយន្តការដឹកនាំដោយអាស៊ាន។ ដោយមានគម្រោងបង្កើតទំនាក់ទំនងថ្មី ក៏ដូចជាជំរុញកិច្ចសហប្រតិបត្តិការ និងការសម្របសម្រួលក្នុងចំណោមភ្នាក់ងារពាក់ព័ន្ធ រួមទាំងភ្នាក់ងារអនុវត្តច្បាប់ដែនសមុទ្រ ដើម្បីសហការគ្នាកែលម្អការយល់ដឹង អំពីផ្នែក លំហសមុទ្រ និងដើម្បីទប់ស្កាត់ការនេសាទខុសច្បាប់ មិនបានរាយការណ៍ និងគ្មានការ ត្រួតពិនិត្យ តាមរយៈការចែករំលែកព័ត៌មាន ឧត្ដម្មានុវត្ត និងជំនាញដែលនឹងបំពេញ បន្ថែម និងមិនត្រួតយន្តការដែលមានស្រាប់។

ក្នុងកិច្ចប្រជុំកំពូលនោះដែរ មេដឹកនាំអាស៊ានសហរដ្ឋអាមេរិក បានប្ដេជ្ញាបន្តកិច្ចខិតខំប្រឹងប្រែងដើម្បីការពារស្តារ និងគ្រប់គ្រងបរិស្ថានសមុទ្រប្រកបដោយនិរន្តរភាព។

ចំណែកលើការពង្រឹងទំនាក់ទំនងរវាងប្រជាជន និងប្រជាជន មេដឹកនាំអាស៊ាន អាមេរិក បានសន្យារួមគ្នាក្នុងការវិនិយោគលើការអភិវឌ្ឍមូលធនមនុស្ស ការផ្តល់សិទ្ធអំណាចដល់យុវជន និងក្រុមងាយរងគ្រោះ និងការពង្រឹងទំនាក់ទំនងរវាងប្រជាជននិងប្រជាជន រួមទាំងការគាំទ្រផ្នែកភាសាអង់គ្លេស ជំនាញឌីជីថល ការអប់រំនិងបណ្ដុះបណ្ដាលបច្ចេកទេស និងវិជ្ជាជីវៈ (TVET) និងវិទ្យាសាស្ត្របច្ចេកវិទ្យា វិស្វកម្ម និងការបណ្តុះបណ្តាលគណិតវិទ្យា (DTEM) ក្នុងតំបន់៕

The post មេដឹកនាំអាស៊ាន សហរដ្ឋអាមេរិក ប្តេជ្ញាលើកកម្ពស់ទំនាក់ទំនងសេដ្ឋកិច្ចកាន់តែរឹងមាំ appeared first on .

សម្តេច ហ៊ុន សែន៖ “បើសេដ្ឋកិច្ចសហរដ្ឋអាមេរិកល្អ នោះសេដ្ឋកិច្ចពិភពលោកក៏ល្អប្រសើរ”

ឧកញ៉ាដែនដី — Fri, 13 May 2022 06:35:09 +0000

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា ប្រសិនបើសេដ្ឋកិច្ចសហរដ្ឋអាមេរិកល្អ នោះសេដ្ឋកិច្ចពិភពលោកក៏ល្អប្រសើរដែរ។ នេះបើតាមប្រសាសន៍របស់សម្តេច ថ្លែងក្នុងពិធីទទួលទានអាហារពេលល្ងាច រៀបចំដោយ ឯកឧត្តមប្រធានាធិបតីសហរដ្ឋអាមេរិក ចូ បៃឌិន នៅថ្ងៃទី១២ ខែឧសភា ឆ្នាំ២០២២។

សម្ដេចតេជោ បានគូសបញ្ជាក់នៅក្នុងឱកាសនោះថា សហរដ្ឋអាមេរិកគឺដើរតួនាទីសំខាន់នៅក្នុងពិភពលោក ហើយតួនាទីនេះ ប្រសិនជាសេដ្ឋកិច្ចសហរដ្ឋអាមេរិកល្អ នោះសេដ្ឋកិច្ចពិភពលោកក៏ល្អប្រសើរផងដែរ ហើយលើសពីនេះ កន្លងមកអាមេរិកបានដើរតួនាទីសំខាន់ក្នុងការប្រយុទ្ធប្រឆាំងនៅកូវីដ-១៩ ក្នុងការផលិតវ៉ាក់សាំងជាដើម។

តាមរយៈសារលើទំព័រហ្វេសបុករបស់សម្តេច នៅក្នុងឱកាសនោះសម្តេចតេជោ ក៏បានអរគុណដល់ប្រធានាធិបតីអាមេរិក ដែលបានផ្ដល់វ៉ាក់សាំងជូនដល់ប្រទេសកម្ពុជារួមទាំងវ៉ាក់សាំង Johnson and Johnson ចំនួន ១លានដូស ហើយនិងមានវ៉ាក់សាំងពីរលានដូស បន្ថែមទៀត ហើយសន្យាថានិងផ្ដល់វ៉ាក់សាំងជាង ៥លានដូសបន្ថែមទៀត សម្រាប់ប្រទេសកម្ពុជា នាពេលខាងមុខនេះ។ បរិយាសកាសដ៏ប្រពៃនេះ បានផ្តល់នូវសញ្ញាជាវិជ្ជមានជាច្រើន សម្រាប់កិច្ចប្រជុំនៅថ្ងៃទី១៣ ឧសភាស្អែកទៀត៕

The post សម្តេច ហ៊ុន សែន៖ “បើសេដ្ឋកិច្ចសហរដ្ឋអាមេរិកល្អ នោះសេដ្ឋកិច្ចពិភពលោកក៏ល្អប្រសើរ” appeared first on .

ប្រធានអាស៊ាន និងប្រធានាធិបតីអាមេរិក ចូ បៃឌិន គ្រោងជួបគ្នាផ្ទាល់មុខពិភាក្សាបញ្ហាកង្វល់រួម

ឧកញ៉ាកោះក្របី — Sun, 17 Apr 2022 03:16:08 +0000

អាស៊ាន និងសហរដ្ឋអាមេរិក គ្រោងនឹងធ្វើកិច្ចប្រជុំកំពូលពិសេស នៅរដ្ឋធានីវ៉ាស៊ីនតោន នៅថ្ងៃទី១២-១៣ ខែឧសភា ឆ្នាំ២០២២ ដើម្បីអបអរសាទរទំនាក់ទំនងដៃគូដែលមានវ័យ៤៥ឆ្នាំមកហើយ។

តាមរយៈសេចក្តីថ្លែងការណ៍មួយទំព័ររបស់ប្រធានអាស៊ាន នៅថ្ងៃសៅរ៍ ទី១៦ ខែមេសានេះ បានបញ្ជាក់ថា កិច្ចប្រជុំកំពូលនេះនឹងជួបមុខគ្នាដោយផ្ទាល់ ខណៈដែលប្រធានអាស៊ាន និងលោកប្រធានាធិបតីអាមេរិក ចូ បៃឌិន នឹងពិភាក្សាគ្នាអំពីមធ្យោបាយ និងវិធីសាស្ត្រនានា ដើម្បីបង្កើនកិច្ចសហប្រតិបត្តិការការឆ្លើយតបនឹងជំងឺកូវីដ-១៩ សន្តិសុខសុខភាពសកល ការផ្លាស់ប្តូរអាកាសធាតុ ការអភិវឌ្ឍប្រកបដោយចីរភាព កិច្ចសហប្រតិបត្តិការលំហសមុទ្រ ការអភិវឌ្ឍធនធានមនុស្ស ការអប់រំ និងចំណងទាក់ទងរវាងប្រជាជន និងប្រជាជន ក៏ដូចជាការតភ្ជាប់ និងទំនាក់ទំនងសេដ្ឋកិច្ច។

លើសពីនេះ កិច្ចប្រជុំកំពូលអាស៊ាន សហរដ្ឋអាមេរិក នឹងពិភាក្សាផ្លាស់ប្ដូរយោបល់គ្នាអំពីបញ្ហាតំបន់ និងអន្តរជាតិដែលជាផលប្រយោជន៍ និងកង្វល់រួមគ្នាផងដែរ។

សេចក្តីថ្លែងការណ៍ដដែល ក៏បានបញ្ជាក់ឡើងវិញផងដែរនូវការប្តេជ្ញាចិត្តរួមគ្នា ដើម្បីរក្សាមជ្ឈភាពនិងឯកភាពអាស៊ាន តាមរយៈយន្តការនានាដែលដឹកនាំដោយអាស៊ាន ក៏ដូចជាបង្កើនជំនឿ និងទំនុកចិត្តគ្នាទៅវិញទៅមកក្នុងការថែរក្សាសន្តិភាព ស្ថិរភាព និងវិបុលភាពនៅក្នុងតំបន់៕

The post ប្រធានអាស៊ាន និងប្រធានាធិបតីអាមេរិក ចូ បៃឌិន គ្រោងជួបគ្នាផ្ទាល់មុខពិភាក្សាបញ្ហាកង្វល់រួម appeared first on .

លោក ចូ បៃដិន ទន្ទឹងរង់ចាំធ្វើការជាមួយកម្ពុជា ខណៈសម្តេច ហ៊ុន សែន បង្ហាញបំណងក្នុងការពង្រឹងទំនាក់ទំនងអាស៊ាន-អាមេរិកបន្ថែមទៀត

ឧកញ៉ាកោះក្របី — Sun, 06 Feb 2022 06:45:09 +0000

រដ្ឋបាលរបស់លោក ចូ បៃដិន ទន្ទឹងរង់ចាំធ្វើការជាមួយកម្ពុជា ក្នុងនាមជាប្រធានអាស៊ាន សម្រាប់ឆ្នាំ២០២២។ ប្រធានាធិបតីអាមេរិក បានគូសបញ្ជាក់ថា ក្រោមភាពជាប្រធានអាស៊ានរបស់កម្ពុជា សហរដ្ឋអាមេរិកសង្ឃឹមថា ទំនាក់ទំនងអាស៊ាន-សហរដ្ឋអាមេរិក នឹងកាន់តែរីកចម្រើន និងបន្តឆ្ពោះទៅសម្រេចគោលដៅរួមនៅក្នុងតំបន់។

តាមរយៈលិខិតមួយទំព័រផ្ញើជូនសម្តេចតេជោ ហ៊ុន សែន នាយករដ្ឋមន្រ្តីកម្ពុជា លោក ចូ បៃដិន បញ្ជាក់អំពីការទន្ទឹងរង់ចាំស្វាគមន៍ សម្តេចទៅចូលរួមកិច្ចប្រជុំពិសេសអាស៊ាន-អាមេរិក នៅរដ្ឋធានីវ៉ាស៊ីនតោន សហរដ្ឋអាមេរិក។

លោក ចូ បៃដិន បានបញ្ជាក់៖ សហរដ្ឋអាមេរិកគាំទ្រមជ្ឈភាពអាស៊ាន ហើយគាំទ្រឥតងាករេចំពោះនិម្មាបនកម្មតំបន់ដែលមានអាស៊ានជាស្នូល និងដែលជាបេះដូងនៃតំបន់ឥណ្ឌូ-ប៉ាស៊ីហ្វិក។

លោកថ្លែង៖ “ខ្ញុំរំពឹងថា សម្តេចតេជោនាយករដ្ឋមន្តី បានជ្រាបរួចហើយតាមរយៈឥណ្ឌូនេស៊ី ដែលជាប្រទេសសម្របសម្រួលទំនាក់ទំនងអាស៊ាន-សហរដ្ឋអាមេរិក ក្នុងការពាំនាំការតាំងចិត្តរបស់ខ្ញុំអញ្ជើញថ្នាក់ដឹកនាំអាស៊ាន ចូលរួមកិច្ចប្រជុំកំពូលពិសេសជាមួយខ្ញុំ នៅរដ្ឋធានីវ៉ាស៊ីនតោន នៅប៉ុន្មានខែខាងមុខនេះទៀត”។

ជាមួយនឹងការទទួលបានលិខិតអញ្ជើញនេះរបស់ប្រធានាធិបតីអាមេរិក ចូ បៃដិន សម្តេចតេជោ ហ៊ុន នាយករដ្ឋមន្រ្តីកម្ពុជា នៅថ្ងៃទី១ ខែកុម្ភៈ បានបញ្ជាក់ថា៖ «ក្នុងនាមកម្ពុជា ជាប្រធានអាស៊ាន ឆ្នាំ២០២២ ខ្ញុំសូមបញ្ជាក់សារជាថ្មី អំពីការប្តេជ្ញា និងការគាំទ្រយ៉ាងពេញទំហឹងចំពោះសហរដ្ឋអាមេរិក ក្នុងការរៀបចំកិច្ចប្រជុំកំពូលពិសេសអាស៊ាន-សហរដ្ឋអាមេរិក នៅរដ្ឋធានីវ៉ាស៊ីនតោន»។

ទន្ទឹមនឹងនោះ សម្តេចតេជោ ក៏បានថ្លែងអរគុណប្រធានាធិបតី ចូ បៃដិន ដែលបានផ្ញើលិខិតបញ្ជាក់អំពីគោលបំណងរបស់លោកអញ្ជើញសម្តេចនិងថ្នាក់ដឹកនាំអាស៊ាន ចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោងរៀបចំនៅក្នុងរយៈពេលប៉ុន្មានខែខាងមុខនេះ និងបំណងប្រាថ្នា ក្នុងការពង្រឹងទំនាក់ទំនងអាស៊ាន-សហរដ្ឋអាមេរិកបន្ថែមទៀត ក្នុងពេលកម្ពុជា ធ្វើជាប្រធានអាស៊ាន។

យ៉ាងណាក៏ដោយ សម្តេចតេជោ ហ៊ុន សែន បង្ហាញសុទិដ្ឋិនិយមថា កិច្ចប្រជុំកំពូលនេះ នឹងផ្តល់នូវកាលានុវត្តភាពល្អមួយសម្រាប់យើងផ្លាស់ប្តូយោបល់គ្នាថាតើត្រូវធ្វើយ៉ាងណា ដើម្បីឱ្យកិច្ចសហប្រតិបត្តិការអាស៊ាន-សហរដ្ឋអាមេរិករីកចំរើនទៅមុខបន្ថែមទៀត។ ហើយសម្តេចក៏បានបញ្ជាក់អំពីការទន្ទឹងរង់ចាំធ្វើការយ៉ាងជិតស្និទ្ធជាមួយលោក ចូ បៃដិន និងជួបជាមួយដោយផ្ទាល់ នៅរដ្ឋធានីវ៉ាស៊ីនតោនផងដែរ៕

The post លោក ចូ បៃដិន ទន្ទឹងរង់ចាំធ្វើការជាមួយកម្ពុជា ខណៈសម្តេច ហ៊ុន សែន បង្ហាញបំណងក្នុងការពង្រឹងទំនាក់ទំនងអាស៊ាន-អាមេរិកបន្ថែមទៀត appeared first on .