ការបង្ហាញអារម្មណ៍យ៉ាងដូច្នេះពីក្រុមវិនិយោគិនចិនធ្វើឡើងក្នុងកិច្ចប្រជុំផ្សព្វផ្សាយស្តីពី«ការផ្តល់អត្ថប្រយោជន៍ពិសេសជូនវិនិយោគិន និងធុរជនក្នុងខេត្តព្រះសីហនុ» នាព្រឹកថ្ងៃពុធ ទី១៣ ខែមីនានេះ ស្ថិតនៅសណ្ឋាគារសុខា ដែលរៀបចំដោយក្រុមការងារជំរុញការវិនិយោគក្នុងខេត្តព្រះសីហនុ ក្រោមការដឹកនាំពីលោក ហ៊ាន សាហុីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ។

ក្រុមវិនិយោគិនចិនបានលើកឡើងស្រដៀងគ្នាថា «ពួកគេបានចូលរួមចំណែកជាសក្ខីភាពមួយនៅក្នុងការអភិវឌ្ឍមានសន្ទុះយ៉ាងលឿនរបស់ប្រទេសកម្ពុជា ហើយពួកយើងដែលអ្នកវិនិយោគបរទេសពិតជាអំណរសាទរចំពោះការដាក់ចេញកម្មវិធីពិសេសជំរុញការដោះស្រាយបញ្ហានៅខេត្តព្រះសីហនុពីរាជរដ្ឋាភិបាលកម្ពុជា»។

ទន្ទឹមនឹងនេះក្រុមវិនិយោគិនទាំងនោះសុទ្ធតែបង្ហាញនូវបញ្ហាចំពោះមួយ ហើយស្នើសុំឲ្យក្រុមការងារជំរុញការវិនិយោគក្នុងខេត្តព្រះសីហនុធ្វើការដោះស្រាយដើម្បីអាចបន្តការសាងសង់។ ជាការឆ្លើយតបប្រធានក្រុមការងារជំរុញការវិនិយោគក្នុងខេត្តព្រះសីហនុ បានប្រកាសស្វាគមន៍រាល់បញ្ហារបស់ក្រុមវិនិយោគិនចិន ព្រមទាំងស្នើឲ្យមានការដាក់សំណើរមកកាន់ក្រុមការងារចូលរួមប្រឹក្សាយោបល់ និងការរៀបចំការស្នើការលើកទឹកចិត្តពិសេស។

ពាក់ព័ន្ធនឹងការលើកឡើងបញ្ហាចំមុខរបស់ក្រុមវិនិយោគិនចិន លោក ហ៊ាន សាហុីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានលើកឡើងថា ការងារនេះគឺជាជំហានទីពីររបស់ក្រុមការងារ ទី១រឿងដោះស្រាយបញ្ហាអគារជាប់គាំង និងទី២ ជំរុញការវិនិយោគថ្មីឆ្នាំ២០២៤ដើម្បីពង្រីកការវិនិយោគរបស់ក្រុមវិនិយោគ។ លោកបញ្ជាក់ថា ក្រុមការងារជំនាញក្រសួងដែនដីនគរូបណីយកម្ម និងសំណង់ បានចូលរួមធ្វើការវាយតម្លៃសំណង់ គិតគូរពីគុណភាព និងច្បាប់ជាដើម។

សូមជម្រាបជូនថា «កម្មវិធីពិសេសជំរុញការវិនិយោគក្នុងខេត្តព្រះសីហនុ ឆ្នាំ២០២៤» ត្រូវបានរៀបចំឡើងដោយឈរលើ​ទស្សន​​ទានគោលចំនួន៤រួមមាន៖  ទី១៖ កែប្រែមុខមាត់ខេត្តព្រះសីហនុ ឱ្យទៅជាខេត្តដែលមានមូល​ដ្ឋាន​សេដ្ឋកិច្ច ពឹងផ្អែកលើឧស្សាហកម្ម, ទេសចរណ៍ និងការវិនិយោគ ទី២៖ ដោះស្រាយបញ្ហាប្រឈមជាក់ស្តែង ដែលផ្តល់លទ្ធផលរហ័ស ទី៣៖ ដាក់ចេញនូវវិធានការអនុវត្តជាក់ស្តែង ដែលមានលក្ខណៈជាការបំពេញបន្ថែម​ប្រកប​ដោយសង្គតិភាព ទៅនឹងគោលនយោបាយ និង យុទ្ធសាស្ត្រនានា របស់រាជរដ្ឋាភិបាល និងទី៤៖ បង្កើនល្បឿននៃការធ្វើបរិវត្តកម្ម និង ការអភិវឌ្ឍឧស្សាហកម្ម ក្នុងខេត្តព្រះសីហនុ ឱ្យមានតម្លៃបន្ថែម និង មានឧត្តមភាពប្រកួតប្រជែងខ្ពស់។

កម្មវិធីពិសេសនេះ មានគោលបំណងលើកកម្ពស់សកម្មភាពវិនិយោគ និងធុរកិច្ច ក្នុងខេត្តព្រះសីហនុ សម្រាប់ឆ្នាំ២០២៤ ឱ្យកាន់តែច្រើន និងមានសម្ទុះលឿន ដោយផ្តោតលើគម្រោងវិនិយោគ ឬ សកម្មភាពធុរកិច្ចចំនួន៣ប្រភេទ រួមមាន៖ ១៖ គម្រោងវិនិយោគ ឬសកម្មភាពធុរកិច្ច ពាក់ព័ន្ធនឹងអគារកំពុងជាប់គាំង និង ចាប់ផ្តើមដំណើរការអនុវត្តភ្លាម នៅក្នុងឆ្នាំ២០២៤ ២៖ គម្រោងវិនិយោគ ឬ សកម្មភាពធុរកិច្ច មិនជាប់ពាក់ព័ន្ធនឹងអគារជាប់គាំង ប៉ុន្តែចាប់ផ្តើម​ដំណើរការ​បាន​ភ្លាមនៅក្នុងឆ្នាំ២០២៤ ៣៖ ការពង្រីកគម្រោងវិនិយោគ ឬ សកម្មភាពធុរកិច្ចមានស្រាប់ ស្របតាមលក្ខណៈវិនិច្ឆ័យជាក់​លាក់ ដែលត្រូវចាប់ផ្តើមដំណើរការនៅក្នុងឆ្នាំ២០២៤៕

The post ក្រុមវិនិយោគិនចិន សាទរ«កម្មវិធីពិសេសជំរុញការវិនិយោគក្នុងខេត្តព្រះសីហនុ» appeared first on .

ក្នុងពិធីអបអរសាទរខួប ១ឆ្នាំ ការបើកឱ្យដំណើរការជាផ្លូវការ ផ្លូវល្បឿនលឿនភ្នំពេញ-ក្រុងព្រះសីហនុកាលពីថ្ងៃទី ៧វិច្ឆិកា២០២៣ លោក Wang Wentian ឯកអគ្គរដ្ឋទូតចិនប្រចាំកម្ពុជាមានប្រសាសន៍បញ្ជាក់ថា «នៅក្នុងរយៈពេលប៉ុន្មានឆ្នំាកន្លងមកនេះមានដំណឹងល្អជាញឹកញាប់អំពីការកិច្ចសហការជាក់ស្តែងរវាងកម្ពុជា ចិននៅក្នុងវិស័យសេដ្ឋកិច្ចនិងពាណិជ្ជកម្ម ក្នុងនោះមានកិច្ចព្រមព្រៀងពាណិជ្ជកម្មសេរីរវាងកម្ពុជា-ចិន បានចូលជាធរមានជាផ្លូវការ ហើយប្រទេសចិននៅតែជាដៃគូពាណិជ្ជកម្មធំបំផុតនិងជាប្រភពនៃការវិនិយោគសំខាន់បំផុតរបស់កម្ពុជា»។

លោកលើកឡើងថា ភាគីទំាងពីរបានរួមគ្នាអនុវត្ត គម្រោងកិច្ចសហប្រតិបត្តិការខ្សែក្រវាត់មួយនិងផ្លូវមួយសំខាន់ៗមួយចំនួននៅក្នុងវិស័យហេដ្ឋារចនាសម្ព័ន្ធ ក្នុងនោះផ្លូវល្បឿនភ្នំពេញ-ក្រុងព្រះសីហនុ ត្រូវបានបើកឱ្យប្រើប្រាស់ជាផ្លូវការ, ផ្លូវល្បឿនលឿន ភ្នំពេញ-បាវិតបានចាប់ផ្តើមសាងសង់ដោយរលូន,អាកាសយានដ្ឋានអន្តរជាតិសៀមរាបអង្គរ បានដាក់ឱ្យប្រើប្រាស់ជាផ្លូវការ។

លោកសង្កត់ធ្ងន់ថា គម្រោងទំាងនេះនឹងជំរុញឱ្យប្រទេសកម្ពុជា បង្កើតនៅបណ្តាញផ្លូវល្បឿនលឿននិងបណ្តាញដឹកជញ្ជូនផ្លូវអាកាសសមរម្យនិងងាយស្រួលក្នុងការជំរុញដល់ការអភិវឌ្ឍសេដ្ឋកិច្ចជាតិ និងការតភ្ជាប់នៅក្នុងតំបន់ និងជួយឱ្យកម្ពុជាសម្រេចបាននូវការរីកចម្រើនយ៉ាងខ្លំាងក្នុងការកសាងហេដ្ឋារចនាសម្ព័ន្ធ។

លោក Wang Wentian មានប្រសាសន៍ថា «ខ្ញុំពិតជាមានសេចក្តីសោមមនស្សរីករាយណាស់ដែលបានឃើញ ផ្លូវល្បឿនលឿនភ្នំពេញ-ក្រុងព្រះសីហនុបានដាក់ឱ្យដំណើរការ ដើម្បីបំពេញនៅសេចក្តីស្រម៉ៃរបស់កម្ពុជា និងជួយឱ្យកម្ពុជាឈានចូលយុគ្គសម័យប្រតិបត្តិការផ្លូវល្បឿនលឿនប្រកបដោយសុវត្ថិភាពនិងស្ថិរភាពអស់រយៈពេលមួយឆ្នំាកន្លងមក និងបានបង្ហាញឱ្យឃើញថាផ្លូវល្បឿនលឿននេះបានកាត់បន្ថយការចំណាយដល់ការដឹកជញ្ជូនច្រើនតាមរយៈផ្លូវមួយនេះ ។ផ្លូវល្បឿនលឿន ភ្នំពេញ-ក្រុងព្រះសីហនុគឺជាសមិទ្ធិផលដ៏សំខាន់មួយទៀត នៃកិច្ចសហប្រតិបត្តិការ ខ្សែក្រវាត់មួយនិងផ្លូវមួយរបស់ចិន និងកម្ពុជា ហើយនឹងក្លាយជាផ្លូវមិត្តភាពមួយទៀតដែលបានតភ្ជាប់រវាងប្រជាជនចិននិងប្រជាជនកម្ពុជា»។

បើតាមលោក Wang Wentian ឆ្នំានេះគឺជាឆ្នំាខូបលើកទី៦៥នៃការបង្កើតទំនាក់ទំនងការទូតរវាងកម្ពុជា ចិននិងជាឆ្នំាមិត្តភាពរវាងកម្ពុជា ចិន ហើយក៏ជាខូបលើកទី១០នៃគំនិតផ្តួចផ្តើមខ្សែក្រវាត់មួយនិងផ្លូវមួយ ចាប់ផ្តើមតំាងពីសម្តេចតេជោហ៊ុនសែន និងសម្តេចធិបតី ហ៊ុនម៉ាណែត នាយករដ្ឋមន្ត្រីបានជួបពិភាក្សាការងារជាច្រើនលើកជាមួយថ្នាក់ដឹកនាំជាន់ខ្ពស់ចិន ហើយភាគីទំាងពីរបានឯកភាពគ្នាក្នុងការបន្តរក្សាចំណងមិត្តភាពពីមួយជំនាន់ទៅមួយជំនាន់, ពង្រឹងកិច្ចសហប្រតិបត្តិការជាយុទ្ធសាស្ត្រ ពន្លឿនការបន្ស៊ីគ្នា នៅក្នុងកម្រិតខ្សែក្រវាត់មួយនិងផ្លូវមួយ និងយុទ្ធសាស្ត្របញ្ចកោណ ពង្រឹងកិច្ចសហប្រតិបត្តិការត្បូងពេជ្រដោយមានវិស័យអាទិភាពចំនួន៦រវាងចិននិងកម្ពុជានិង ក្នុងការជំរុញនិងការសាងសហគមន៍វាសនារួមកម្ពុជាចិន ក្នុងយុគ្គសម័យថ្មី។

លោកគូសបញ្ជាក់ថា «ខ្ញុំជឿជាក់ថា ដោយសារមានការខិតខំប្រឹងប្រែងរួមគ្នារបស់ភាគីទំាងពីរនឹងផ្នែកលើគោលគំនិតនៃការពិគ្រោះយោបល់រួមគ្នា ការចូលរួមចំណែករួមគ្នា និងអត្ថប្រយោជន៍រួមគ្នា កសាងសហគមន៍វាសនារួមចិន និងកម្ពុជា នាយុគ្គសម័យថ្មីប្រាកដជានិងសម្រេចបាននូវសមិទ្ធផលធំៗនិងថ្មីៗបន្តបន្ទាប់ទៀត»៕ អត្ថបទ៖សារេត

The post ចិននៅតែជាដៃគូពាណិជ្ជកម្មធំនឹងជាប្រភពនៃការវិនិយោគយដ៏សំខាន់របស់កម្ពុជា appeared first on .

ក្រសួងព័ត៌មាន បានឱ្យដឹងថា តាមរយៈសន្និសីទសារព័ត៌មានស្តីពី គម្រោងវិនិយោគលើវិស័យកសិ-ឧស្សាហកម្ម កាលថ្ងៃទី១៤ ខែសីហា ឆ្នាំ២០២៣ លោក សៅ ស៊ូជី ប្រធានក្រុមហ៊ុន ដាណុង ឌីវេឡុបមែនគ្រុប បានលើកឡើងថា គោលបំណងនៃការវិនិយោគនេះ នៅក្នុងខេត្តទាំង៤នេះ គឺនឹងផ្តោតលើការដាំដុះ និងបង្កាត់ពូជដំណាំ និងសត្វ ចំនួន៤ប្រភេទ ទី១. ដាំស្មៅ សម្រាប់ចំណីសត្វ, ទី២. បង្កាត់ និងដាំពូជពោត, ទី៣. ដាំ និង កែច្នៃដំឡូមី និងទី៤. បង្កាត់ និងចិញ្ចឹមគោ និងជ្រូក ហើយផលិតផលកសិកម្មទាំងនេះភាគច្រើន គឺសម្រាប់នាំចេញទៅ ប្រទេសចិន ។

តាមរយៈ គម្រោងនេះ អ្នកតាមដានផ្នែកសង្គម និងទំនាក់ទំនងកម្ពុជា-ចិន បានស្វាគមន៍ចំពោះគម្រោងវិនិយោគរបស់ចិននៅកម្ពុជា ដើម្បីកំណើនសេដ្ឋកិច្ចជាតិ និងបង្កើតការងារជូនប្រជាពលដ្ឋកាន់តែច្រើន។

គួរបញ្ជាក់ដែរថា បើតាមទិន្នន័យរបស់អគ្គនាយកដ្ឋានគយ និងរដ្ឋាករកម្ពុជាបង្ហាញថា ក្នុងឆ្នាំ២០២២ ការធ្វើពាណិជ្ជកម្មរវាងកម្ពុជា-ចិន គឺសម្រេចបានក្នុងទំហំទឹកប្រាក់សរុប ជាង ១១ពាន់ប្រាំមួយរយលានដុល្លារ៕ អត្ថបទ៖ ពិសី

The post ក្រុមហ៊ុនចិន គ្រោងបោះទុន ១២,៧ពាន់ដុល្លារ វិនិយោគលើផ្ទៃដី ៧៥ម៉ឺនហិកតានៅខេត្តចំនួន៤ appeared first on .

នៅក្នុងឱកាសនោះ លោក ដួង តារា បានឱ្យដឹងថា ក្រុមវិនិយោគិន នឹងមកធ្វើការស្វែងយល់អំពីសក្ដានុពលនៅក្នុងខេត្តបាត់ដំបង ដើម្បីផ្ដល់ជាធាតុចូលនៃចំណេះដឹង ក្នុងការស្វែងរកឱកាសវិនិយោគលើវិស័យនានានៅក្នុងខេត្តបាត់ដំបង ដោយសារតែខេត្តបាត់ដំបងគឺជាខេត្តគោលដៅដ៏សំខាន់មួយសម្រាប់ព្រះរាជាណាចក្រកម្ពុជា ដែលមានហេដ្ឋារចនាសម្ព័ន្ធឆ្លងកាត់ និងភ្ជាប់ទៅកាន់តំបន់សំខាន់ៗនៅក្នុងប្រទេសបានយ៉ាងល្អប្រសើរផងដែរ។

ជាមួយគ្នានោះ អភិបាលខេត្តបាត់ដំបង បានលើកឡើងថា បាត់ដំបង ជាខេត្តដែលមានសក្ដានុពលខ្លាំងលើវិស័យកសិកម្ម ហើយខេត្តមួយនេះ កំពុងមានតម្រូវការជាច្រើនខាងផ្នែកនេះ ដោយទាមទារឱ្យវិនិយោគិនក្នុងស្រុក និងក្រៅស្រុក ចាប់អារម្មណ៍វិនិយោគផ្នែកកសិឧស្សាហកម្ម ដូចជាការកែច្នៃផ្លែឈើ ការយកផលិតផលកសិកម្មយកទៅកែច្នៃ ដើម្បីធ្វើការលក់ និងនាំចេញទៅក្រៅប្រទេស ព្រោះសព្វថ្ងៃនេះផលិតផលកសិកម្មជាច្រើន នៅមិនទាន់បានយកមកកែច្នៃអស់លទ្ធភាពនៅឡើយទេ ធ្វើឱ្យផលិតផលទាំងនោះលើសតម្រូវការទីផ្សារបណ្ដាលឱ្យមានការធ្លាក់ថ្លៃចុះ។

បន្ថែមពីនោះ អភិបាលខេត្តបាត់ដំបង សង្ឈឹមថាបន្ទាប់ពីការសិក្សាស្វែងយល់អំពីសក្ដានុពល និងឱកាសវិនិយោគនៅក្នុងខេត្តបាត់ដំបងបានចប់រួចរាល់ គម្រោងទាំងអស់នេះនឹងដំណើរការឆាប់ៗដែលអាចផ្តល់ផលប្រយោជន៍ច្រើនដល់បងប្អូនប្រជាពលរដ្ឋក្នុងខេត្តបាត់ដំបងផងដែរ៕

The post អភិបាលខេត្តបាត់ដំបង បង្ហាញសក្តានុពលកាន់វិនិយោគិនចិន ក្នុងឱកាសវិនិយោគលើវិស័យកសិ-ឧស្សាហកម្ម ដើម្បីនាំចេញទៅក្រៅប្រទេស appeared first on .

សម្តេចតេជោបានគូសបញ្ជាក់ថា សេដ្ឋកិច្ចកម្ពុជាក្នុងរយៈពេល១០ឆ្នាំចុងក្រោយ គិតត្រឹមចុងឆ្នាំ២០១៩ សម្រេចបានកំណើនក្នុងរង្វង់៧ភាគរយក្នុងមួយឆ្នាំ។ ជាមួយការ​កាត់បន្ថយភាពក្រីក្រ និងវិសមភាពសង្គមគួរកត់សម្គាល់។ ឈរលើមូលដ្ឋាននេះ កម្ពុជាបាន​ប្រែក្លាយខ្លួនទៅជាប្រទេស​មានចំណូលមធ្យមកម្រិតទាបនៅឆ្នាំ២០១៥។ សមិទ្ធផលទាំងនេះ បានធ្វើឱ្យកម្ពុជាកំណត់ចក្ខុវិស័យ និងបំណងប្រាថ្នារយៈពេល​វែង​ឈានទៅជា​ប្រទេសមានចំណូលមធ្យមកម្រិតខ្ពស់២០៣០ និងឈានទៅប្រទេសមានចំ​ណូលខ្ពស់នៅឆ្នាំ២០៥០ និងសង្ឃឹមចាកចេញពីប្រទេសមានការអភិវឌ្ឍន៍តិចតួច​នៅឆ្នាំ​២០២៧ ដោយបន្តពង្រឹងការអភិវឌ្ឍន៍ពាណិជ្ជកម្ម ដោយឈរលើមូលដ្ឋានស្មើមុខ ស្មើសិទ្ធិលើឆាកពាណិជ្ជកម្មអន្តរជាតិ តាមរយៈការកែទម្រង់ក្នុងប្រទេស និងការធ្វើសមាហរណកម្មសេដ្ឋកិច្ចក្នុងតំបន់ និងពិភពលោក។

សម្តេចតេជោនាយករដ្ឋមន្ត្រីថ្លែងថា “កម្ពុជា ផ្តល់អាទិភាពខ្ពស់ក្នុងការទាក់ទាញវិនិយោគផ្ទាល់​ពីក្រៅប្រទេសសម្រាប់ការអភិវឌ្ឍន៍ និងកំពុងរៀបចំយុទ្ធសាស្ត្រសម្រាប់រាជរដ្ឋាភិបាល​អាណត្តិទី៧។ រាជរដ្ឋាភិបាល បានដាក់ចេញ ហើយឱ្យអនុវត្តន៍នូវច្បាប់វិនិយោគថ្មី និងច្បាប់ស្តីពីភាពជាដៃគូរវាងរដ្ឋ និងវិស័យឯកជន សម្តៅជួយគាំទ្រដោយគ្មាន​ការរើស​អើងដល់វិនិយោគិនបរទេស ដែលសមាមាត្រតាមវិធានបរទេស”។

បើតាមសម្តេចតេជោ ហ៊ុន សែន កម្ពុជា បានវិនិយោគច្រើនលើការកសាងព្រលានយន្តហោះ ផ្លូវថ្នល់ ប្រព័ន្ធលូ និងរមណីយដ្ឋាននានាសម្រាប់វិស័យទេសចរណ៍។ កម្ពុជា ក៏បានដាក់ចេញវិធានការ​កែសម្រួល​ការធ្វើពាណិជ្ជកម្ម ការកែលំអរបរិយាកាសធុរកិច្ច ក៏ដូចជាគោលនយោបាយ។

ទន្ទឹមនឹងនោះ រាជរដ្ឋាភិបាល បាននិងកំពុងរៀបចំតំបន់សេដ្ឋកិច្ចពិសេស​ខេត្តព្រះ​សីហនុ ឱ្យក្លាយទៅជាតំបន់សេដ្ឋកិច្ចពិសេសពហុបំណង បន្ទាប់ពីការ​អភិវឌ្ឍន៍របៀង​ពាណិជ្ជកម្មបានជោគជ័យ។

សម្តេចតេជោ ហ៊ុន សែន ថ្លែងបញ្ជាក់បន្ថែមទៀតថា កម្ពុជា ជាប្រទេសតូច តែកម្ពុជាមានសេដ្ឋកិច្ចបើកចំហរផ្អែកលើប្រព័ន្ធពាណិជ្ជកម្មពហុភាគី និងសមាហរណកម្មសេដ្ឋកិច្ចតំបន់។ កម្ពុជា ជាសមាជិកអង្គការពាណិជ្ជកម្មពិភពលោក ជាសមាជិកអាស៊ាន និងភាគីនៃកិច្ចព្រមព្រៀងអរសិប ជាហត្ថលេខីកិច្ចព្រមព្រៀងពាណិជ្ជកម្មសេរីកម្ពុជា-ចិន, កម្ពុជា-កូរ៉េ និងកំពុងពិនិត្យជាមួយដៃគូផ្សេងទៀត មានដូចជា អារ៉ាប់អេមីរ៉េត ដែលអាចសម្រេចជារូបរៀងក្នុងពេលឆាប់ៗខាងមុខនេះ៕

The post សម្តេច ហ៊ុន សែន អំពាវនាវធុរជនចិនត្រឡប់មកប្រកបអាជីវកម្មនៅកម្ពុជាវិញឱ្យបានច្រើនកុះករ appeared first on .

លោក ដួង តារា ឲ្យបានដឹងថា ភាគីកំពង់ផែភ្នំពេញ បានយល់ព្រមកាត់ដីចំនួន ៣៦ ហិកតានៅ ភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល ជូនទៅ លោក Wu Mei Ming ដើម្បីបញ្ចប់វិវាទ ដែលភាគីទាំងពីរបានផ្តិតមេដៃបញ្ចប់វិវាទទាំងស្រុង ក្រោមការសម្របសម្រួលរបស់ខ្ញុំក្រៅប្រព័ន្ធតុលការឈរលើគោលការណ៍ឈ្នះ-ឈ្នះ សម្តេចតេជោ។

ជាមួយគ្នានេះ លោក Wu Mei Ming បានគោរពអរគុណសម្តេចតេជោនាយករដ្ឋមន្រ្តីដែលបានផ្តល់យុត្តិធម៌ជូនរូបលោក ទោះបីប្រើពេលវេលាយូរបន្តិចក្តី។ លោក Wu សន្យាបន្តចូលរួមវិនិយោគនៅកម្ពុជា ហើយនឹងខិតខំកៀងគរអ្នកវិនិយោគទុនចិនអោយបានច្រើនមកវិនិយោគនៅកម្ពុជាថែមទៀត។

បើតាមលោក ដួង តារា លទ្ធផលដ៏ល្អប្រសើរនេះគឺកើតចេញពីការណែនាំរបស់សម្តេចតេជោនាយករដ្ឋមន្រ្តី ដែលបានជំរុញឲ្យមន្រ្តីយកចិត្តទុកដាក់ខិតខំដោះស្រាយបញ្ចប់បញ្ហាវិវាទដីធ្លីជូនប្រជាពលរដ្ឋក្រៅប្រព័ន្ធតុលាការ​ ដែលជាផ្នែកមួយជួយដល់ការកកស្ទះសំណុំរឿងនៅតុលាការផងដែរ។

គួររម្លឹកឡើងវិញដែរថា លោក Wu Mei Ming ជាពាណិជ្ជករដែលមានបទពិសោធន៍ផ្នែកអភិវឌ្ឍន៍កំពង់ផែនៅប្រទេសចិន បានមកកម្ពុជានៅឆ្នាំ ២០១២ តាមការអំពាវនាវរបស់ប្រមុខរាជរដ្ឋាភិបាល មកដល់ទឹកដីកម្ពុជាលោកបានចុះកិច្ចព្រមព្រៀង សហប្រតិបត្តិការជាមួយកំពុងផែភ្នំពេញ លើការពង្រីកកំពង់ផែកាលពីថ្ងៃទី ១០ មករា ឆ្នាំ២០១៤។

នៅក្នុងអំឡុងឆ្នាំ ២០១២ លោកបានទិញដីចំនួន ៥៨ហិកតា នៅក្នុងគម្រោងពង្រីកកំពង់ផែ។ ជាអកុសល ក៏មាន សជណ លេខ ២៣ឧស ចុះថ្ងៃទី ៦ មករា ២០១៧ និរាករណ៍ចោលប័ណ្ណកម្មសិទ្ធិដីធ្លីមួយចំនួន ក្នុងនោះរួមទាំងដីលោក Wu ដែលមានប្លង់រឹងទាំងអស់។ ទន្ទឹមនោះ លោក Wu Mei Ming ក៏បានទិញដី៦ហិកតាផ្សេងទៀតនៅជិតផែភ្នំពេញ (មានប្លង់រឹង) ហើយក៏មាន វិវាទជាមួយ ភាគីផ្សេងទៀត ដែលបានប្តឹងទាមទារយកដីពីគាត់។ តាមពិតករណីនេះគឺពាក់ព័ន្ធកើតឡើងនៅប្រទេសចិន ហើយការប្តឹងផ្តល់គ្នាគួរធ្វើឡើងនៅប្រទេសចិន។ សរុបទឹកប្រាក់ដែលគាត់បានចំណាយ ទិញដីនៅកម្ពុជាអស់ប្រមាណជាង៦លានដុល្លារ។

លោក Wu Mei Ming បានព្យាយាមក្នុងការដោះស្រាយករណីនេះអស់រយៈពេលជាង៥ឆ្នាំមកហើយ ប៉ុន្តែពុំទទួលបានលទ្ធផលឡេីយ។ ទើបនៅថ្ងៃទី ៤ ខែ សីហា ឆ្នាំ ២០២១ លោកបានដាក់លិខិតគោរពសុំអន្តរាគមន៍មកសម្តេចតេជោនាយករដ្ឋមន្រ្តី៕

The post វិវាទដីធ្លីជាង ៥ឆ្នាំ រវាងកំពង់ផែភ្នំពេញ និងអ្នកវិនិយោគិនចិន ឈានដល់ការបញ្ចប់រឿងក្រៅប្រព័ន្ធតុលាការ appeared first on .