ឧកញ៉ា ឃាង ពុទ្ធី

ក្រសួងឧស្សាហកម្ម ចេញប្រកាសទទួលស្គាល់ ឧកញ៉ា៤រូប ជាសមាសភាពក្រុមប្រឹក្សាភិបាល សភាមុខរបរ និងមីក្រូសហគ្រាសកម្ពុជា

ឧកញ៉ាដែនដី — Fri, 08 Sep 2023 02:25:22 +0000

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចេញប្រកាសទទួលស្គាល់សមាសភាពក្រុមប្រឹក្សាភិបាល ការិយាល័យប្រតិបត្តិ អគ្គលេខាធិការដ្ឋាន ហេរញ្ញឹក និងហេរញ្ញឹករង របស់សភាមុខរបរ និងមីក្រូសហគ្រាសកម្ពុជា អាណត្តិទី៤ នីតិកាលទី២ ឆ្នាំ២០២៣-២០២៨ កាលពីថ្ងៃទី០៧ ខែកញ្ញា ម្សិលមិញនេះ ដោយក្នុងនោះសមាសភាពក្រុមប្រឹក្សាភិបាល គឺមានឧកញ៉ាចំនួន ៤រូប។

តាមរយៈប្រកាសក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រុមប្រឹក្សាភិបាលសភាមុខរបរ និងមីក្រូសហគ្រាសកម្ពុជា អាណត្តិទី៤ នីតិកាលទី២ គឺមានចំនួន ១៨រូប ក្នុងនោះមានឧកញ៉ាចំនួន ៤រូប រួមមាន៖ លោកស្រីឧកញ៉ា កែវ មុំ ប្រធានក្រុមប្រឹក្សាភិបាល, លោកឧកញ៉ា ឃាង ពុទ្ធី អនុប្រធាន, លោកស្រីឧកញ៉ា ចាង សុខគីម អនុប្រធាន និងលោកឧកញ៉ា អ៊ុច សោភ័ណ សមាជិក។

គួររំឭកថា លោកស្រីឧកញ៉ា កែវ មុំ ស្ថាបនិក និងជាប្រធានក្រុមប្រឹក្សាភិបាល ក្រុមហ៊ុន លីលី ហ្វ៊ូដ អ៊ិនដាសទ្រី ខូអិលធីឌី ត្រូវបានសមាជិកក្រុមប្រឹក្សាភិបាលនៃសភាមុខរបរ និងមីក្រូសហគ្រាសកម្ពុជា (CPMEC) បោះឆ្នោតគាំទ្រឱ្យជាប់ជា ប្រធានសភាមុខរបរ និងមីក្រូសហគ្រាសកម្ពុជា ក្នុងអាណត្តិទី៤ នីតិកាលទី២ កាលពីថ្ងៃទី១១ ខែសីហា ឆ្នាំ២០២៣។

សភាមុខរបរ និងមីក្រូសហគ្រាសកម្ពុជា ត្រូវបានបង្កើតឡើងដោយព្រះរាជក្រឹត្យ កាលពីថ្ងៃទី២៨ ខែធ្នូ ឆ្នាំ២០០៥។ សភាមុខរបរ និងមីក្រូសហគ្រាសកម្ពុជា មានវិសាលភាពទូទាំងប្រទេសកម្ពុជា ហើយដែលធ្វើសកម្មភាព ដើម្បីបម្រើផលប្រយោជន៍ដល់មុខរបរ និងមីក្រូសហគ្រាស ក្នុងគោលបំណងជំរុញដល់ការអភិវឌ្ឍសេដ្ឋកិច្ច និងសង្គមកិច្ច ជួយបង្កើតធនធានមនុស្ស និងការបង្កើតអាជីវកម្ម តាមរយៈមុខរបរ និងការបណ្តុះបណ្តាលវិជ្ជាជីវៈនៅព្រះរាជាណាចក្រកម្ពុជា។ ក្រុមប្រឹក្សាភិបាល សភាមុខរបរ និងមីក្រូសហគ្រាសកម្ពុជា មានអាណត្តិ ៥ឆ្នាំ៕

The post ក្រសួងឧស្សាហកម្ម ចេញប្រកាសទទួលស្គាល់ ឧកញ៉ា៤រូប ជាសមាសភាពក្រុមប្រឹក្សាភិបាល សភាមុខរបរ និងមីក្រូសហគ្រាសកម្ពុជា appeared first on .

ឧកញ៉ា ឃាង ពុទ្ធី៖ វិស័យអចលនទ្រព្យកម្ពុជា បើគ្មានវិធានការច្បាស់លាស់ទេ គឺអាចឈានដល់ដំណាក់កាលមួយទៅរកវិបត្តិ

រ៉េត សុកធា — Mon, 19 Jun 2023 02:08:48 +0000

ក្នុងសិក្ខាសាលាស្តីពី “ហានិភ័យ និងដំណោះស្រាយ លើការប្រកបអាជីវកម្ម អចលនវត្ថុ នៅកម្ពុជានាពេលបច្ចុប្បន្ន” កាលពីរសៀលថ្ងៃទី១៧ ខែមិថុនា ឆ្នាំ២០២៣ ឧកញ៉ ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញ អចលនទ្រព្យកម្ពុជា គូសបញ្ជាក់ថា មួយរយៈពេលចុងក្រោយនេះ សង្កេតឃើញថា វិស័យអចលនទ្រព្យ មានការប្រែប្រួល ហើយប្រសិនបើជាគ្មានវិធានការ ច្បាស់លាស់ទេ គឺអាចឈានដល់ដំណាក់កាលមួយ នឹងឈានទៅរកវិបត្តិ។ សួរថាមូលហេតុអ្វី វិស័យអចលនទ្រព្យមានភាព ជាប់គាំង មានជនបោកប្រាស់ច្រើនម៉្លេះ បញ្ហាទាំងនេះ យើងកុំដាក់កំហុសទៅអ្នកណា គឺជាការរួមខុសទាំងអស់គ្នា។ បញ្ហាទាំងនេះ មិនមែនកើតមានតែក្នុងប្រទេសកម្ពុជានោះទេ សូម្បីតែប្រទេសសិង្ហបូរី និងម៉ាឡេស៊ី ២០ឆ្នាំ ដំបូង ក៏បញ្ហាច្រើនដែរ។

លោកឧកញ៉បន្តថា៖ តួយ៉ាង អ្នកអភិវឌ្ឍន៍វិញ គឺមានកំហុសមួយដែរ ដោយសារតែចង់់លក់អោយបានច្រើន គឺការបង់រំសល លើការប្រាក់ សូន្យភាគរយ និងមិនមានការសិក្សាអំពីស្ថានភាព របស់អតិថិជន ខ្លួនឯង អោយបានច្បាស់លាស់។ ខ្លួនឯង ដែលជាអ្នកទិញក៏ខុស ធ្ងន់មួយទៀតគឺដោយសារ មិនប៉ាន់ប្រមាណនៃលទ្ធភាព ពីការបង់ប្រាក់ សងរយៈពេលវែង។ កំហុសមួយទៀត គឺការមិនមើលទៅលើ កិច្ចសន្យា អោយបានច្បាស់លាស់។

លោកឧកញ៉ ឃាង ពុទ្ធី បន្ថែមថា៖ រឿងទាំងអស់នេះ ប្រសិនបើយើងមិនចូលរួមដោះស្រាយ ទាំងអស់គ្នាទេ អង្គុយតែបន្ទោសគ្នា។ ប្រជាជនបន្ទោសរដ្ឋ រដ្ឋបន្ទោសអ្នកអភិវឌ្ឍ អ្នកអភិវឌ្ឍបន្ទោសប្រជាជន ដូច្នេះ ចរន្តនេះ គឺនៅតែចង្អុលដាក់គ្នា។

បើតាមលោកឧកញ៉ា បញ្ហាទាំងអស់នេះកើតឡើងគឺដោយសារ បញ្ហាសេដ្ឋកិច្ច បញ្ហាការប្រាក់ ការខ្វះសាច់ប្រាក់ពីទីផ្សារ បញ្ហាបង់រំលសដោយមិនសិក្សាច្បាស់លាស់ និងភាពលោភលន់របស់អ្នកទិញ។

ចំណែកលោក គង់ ចាន់ណា អនុប្រធានក្រុមប្រឹក្សាភិបាលសមាគម ក៏បានរៀបរាប់ពីចំណចមួយចំនួន ចំពោះហានិភ័យ និងដំណោះស្រាយចំពោះអ្នកអភិវឌ្ឍន៍អចលនវត្ថុនៅកម្ពុជា ដោយតម្រូវការតិច, អ្នកផ្គត់ផ្គង់ច្រើន (អ្នកទិញតិច អ្នកលក់ច្រើន), វិបត្តិពិភពលោកដោយសង្គ្រាមរុស្ស៊ីឈ្លានពានអ៊ុយក្រែន, វិវាទដីធ្លី ទំនាស់ដីធ្លី, ស្ថានភាពនយោបាយមុនពេលបោះឆ្នោត, គ្មានចំណេះដឹងលើវិស័យអចលនទព្យ, គ្មានព័ត៌មានច្បាស់លាស់ ឬច្រើនលើវិស័យអចនទ្រព្យសកល, ភាពមិនច្បាស់លាស់នៃអ្នកប្រកបមុខរបរអាជីវកម្មអចលវត្ថុ៕

The post ឧកញ៉ា ឃាង ពុទ្ធី៖ វិស័យអចលនទ្រព្យកម្ពុជា បើគ្មានវិធានការច្បាស់លាស់ទេ គឺអាចឈានដល់ដំណាក់កាលមួយទៅរកវិបត្តិ appeared first on .

ឧកញ៉ា ឃាង ពុទ្ធី៖ វិធានការរបស់រដ្ឋាភិបាលគាំទ្រដល់វិស័យអចលនទ្រព្យ ជារឿងល្អ ប៉ុន្តែមិនទាន់គ្រប់គ្រាន់

ឧកញ៉ាដែនដី — Tue, 18 Apr 2023 12:26:49 +0000

ឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា យល់ឃើញថា វិធានការបន្ថែមជាកញ្ចប់ចំនួន ៨ចំណុច គាំទ្រដល់ការអភិវឌ្ឍវិស័យសំណង់ និងអចលនទ្រព្យផ្នែកបុរី របស់រាជរដ្ឋាភិបាលកម្ពុជា គឺជារឿងមួយល្អ ប៉ុន្តែមិនទាន់គ្រប់គ្រាន់នោះទេ ដែលចំណុចបន្ទាប់គឺត្រូវតែពង្រឹងច្បាប់ឱ្យបានតឹងរឹងបន្ថែម។

លោកឧកញ៉ា ឃាង ពុទ្ធី បានថ្លែងប្រាប់ ឧកញ៉ា ញូស៍ នៅថ្ងៃអង្គារនេះយ៉ាងដូច្នេះថា ក្នុងនាមលោកជាអ្នកជំនាញ និងជាប្រធានសមាគម លោកមើលឃើញបញ្ហាប្រឈមក្នុងវិស័យអចលនទ្រព្យផ្ទាល់តែម្តងគឺ សេចក្តីប្រកាសប៉ុណ្ណឹង ឬវិធានការប៉ុណ្ណឹង ពុំទាន់គ្រប់គ្រាន់នោះទេ ប៉ុន្តែគួរពង្រឹងច្បាប់បន្ថែម។ យើងឃើញថា ប្រជាជន និងអ្នកវិនិយោគទុនក្នុងស្រុកមួយចំនួន បានប្រឈមមុខ ការខាតបង់ថវិកា និងធនធាន ដែលខ្លួនខិតខំប្រឹងប្រែងរកយ៉ាងលំបាក ក្នុងការវិនិយោគលើគម្រោងមួយ ដែលគ្មានភាពច្បាស់លាស់។

លោកឧកញ៉ា បានបន្តថា បច្ចុប្បន្ននេះមានគម្រោងមួយចំនួនហើយ ដែលមានបញ្ហាប្រឈម ហើយនឹងមានមួយចំនួនបន្តទៀតជាបណ្តើរៗ អាចនិយាយថា ក្រដាសមិនអាចខ្ចប់ភ្លើងបាន គឺគម្រោងមិនមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ។ បញ្ហានេះធ្វើឱ្យម្ចាស់គម្រោងខ្លួនឯង និងអ្នកវិនិយោគទុនមានការខាតបង់យ៉ាងធ្ងន់ធ្ងរ ដូច្នេះលោកសូមអំពាវនាវឱ្យរាជរដ្ឋាភិបាល និងអាជ្ញាធរពាក់ព័ន្ធ ត្រូវពង្រឹងច្បាប់ឱ្យមែនទែន រាល់គម្រោងទាំងអស់ ដែលដាក់លក់ ដីឡូត៍ ឬបុរី ត្រូវតែមានច្បាប់អនុញ្ញាត ហើយបើសិនជាពួកគាត់មិនទាន់ជាម្ចាស់កម្មសិទ្ធិពេញលេញលើអចលនទ្រព្យទេ គឺកុំអនុញ្ញាតឱ្យពួកគាត់លក់។

«កន្លងមក យើងឃើញមានបញ្ហាហើយ កក់លុយបន្តិចបន្តួចត្រឹម ១០% ឬ២០% ក៏ធ្វើការលក់ ហើយនៅពេលសេដ្ឋកិច្ចពុំសូវល្អ ចាប់ផ្តើមមានបញ្ហា។ ខ្ញុំនិយាយនេះ មិនមែនឈរតែលើផលប្រយោជន៍អ្នកវិនិយោគ ឬប្រជាជនទេ តែខ្ញុំក៏ឈរលើផលប្រយោជន៍ម្ចាស់គម្រោងដែរ ដែលគាត់ត្រូវតែគិតឱ្យបានមែនទែន មុននឹងចេញលក់។ បើសិនជាគាត់ប្រយ័ត្នប្រយ៉ែង មានផែនការច្បាស់លាស់ មានបណ្ណកម្មសិទ្ធិត្រឹមត្រូវ មានទុនបម្រុងគ្រប់គ្រាន់ ទើបគាត់ជោគជ័យ។ យើងឃើញគម្រោងមួយចំនួន ប្រជាពលរដ្ឋទិញផ្ទះ ទិញដី អត់ទាន់បានផ្ទះ អត់ទាន់បានដី អត់ទាន់បានបណ្ណកម្មសិទ្ធិ ដែលនេះនឹងចេញជាបញ្ហាមួយ ធ្វើឱ្យវិស័យអចលនទ្រព្យយើង នឹងត្រូវរាំងស្ទះគាំង ក្នុងរយៈពេលយូរទៀត»។ លោកឧកញ៉ា ឃាង ពុទ្ធី បានបញ្ជាក់បន្ថែម។

ជាមួយគ្នានេះ លោកឧកញ៉ា ក៏សូមឱ្យនិយ័តករអាជីវកម្មអចលនវត្ថុ និងបញ្ចាំ គួរពង្រឹងពីសមត្ថភាពបន្ថែម និងបង្កើនការផ្សព្វផ្សាយឱ្យបានទូលំទូលាយ យ៉ាងហោចណាស់ក៏អាចឱ្យប្រជាជនយល់ថា គ្រប់ដីឡូត៍ និងបុរី គម្រោងអចលនទ្រព្យទាំងអស់ ត្រូវតែមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ ទើបអាចដាក់លក់បាន។ ដូច្នេះបើសិនជាប្រជាជនយល់ បញ្ហាប្រឈម និងវិបត្តិនឹងកាត់បន្ថយ ហើយម្ចាស់គម្រោងក៏ទទួលបានជោគជ័យដែរ បើគាត់គោរពច្បាប់ និងបទដ្ឋានទាំងឡាយនោះ។

គួររំឭកថា កាលពីថ្ងៃទី១២ ខែមេសា ឆ្នាំ២០២៣ ក្រសួងសេដ្ឋកិច្ច និងហិរញ្ញវត្ថុ បានចេញសេចក្តីប្រកាសព័ត៌មានរបស់រាជរដ្ឋាភិបាល ដែលបានសម្រេចដាក់ចេញនូវវិធានការបន្ថែមជាកញ្ចប់ ចំនួន ៨ចំណុច គាំទ្រដល់ការអភិវឌ្ឍវិស័យសំណង់ និងអចលនទ្រព្យផ្នែកបុរី ដើម្បីរក្សាស្ថិរភាពនៃវិស័យសំណង់ និងអចលនទ្រព្យ ដែលត្រូវបានចាត់ទុកជាវិស័យអាទិភាពមួយ ក្នុងការគាំទ្រដល់កំណើនសេដ្ឋកិច្ចជារួម និងជាពិសេស បន្តរក្សានិរន្តរភាពការងារជូនបងប្អូនកម្មករ ព្រមទាំងលើកកម្ពស់លទ្ធភាពដល់ប្រជាពលរដ្ឋ ដែលមានចំណូលទាប និងមធ្យម អាចមានលទ្ធភាពទិញលំនៅឋានតម្លៃសមរម្យបាន៕

The post ឧកញ៉ា ឃាង ពុទ្ធី៖ វិធានការរបស់រដ្ឋាភិបាលគាំទ្រដល់វិស័យអចលនទ្រព្យ ជារឿងល្អ ប៉ុន្តែមិនទាន់គ្រប់គ្រាន់ appeared first on .

មួយរយៈចុងក្រោយនេះ អ្នកអភិវឌ្ឍន៍បុរី ជួបបញ្ហាច្រើន តើអ្នកជំនាញយល់ឃើញបែបណា?

ឧកញ៉ាដែនដី — Thu, 23 Mar 2023 02:49:43 +0000

មួយរយៈចុងក្រោយនេះ ម្ចាស់បុរី ឬម្ចាស់ទីតាំងអចលនទ្រព្យមួយចំនួន មានបញ្ហារកាំរកូស ដូចជាបញ្ហាផ្លូវច្បាប់ បញ្ហាជាមួយអតិថិជន ជាដើម។ ទទឹមនឹងនោះ និយ័តករអាជីវកម្មអចលនវត្ថុ និងបញ្ចាំ ក៏បានស្នើសុំអំពាវនាវឱ្យគ្រប់អ្នកអភិវឌ្ឍន៍បុរី និងអ្នកអភិវឌ្ឍន៍ដីឡូត៍ទាំងអស់ ចូលខ្លួនមកបង់ពន្ធជាបន្តបន្ទាប់ ខណៈដែលអ្នកជំនាញបានលើកឡើងថា ការដែលមានបញ្ហាក្នុងការធ្វើអាជីវកម្មបុរី ក៏ព្រោះតែអ្នកអភិវឌ្ឍន៍បុរីទាំងនោះ អត់មានច្បាប់ ឬមិនមានបណ្ណកម្មសិទ្ធិច្បាស់លាស់ពីក្រសួងជំនាញ ឬអាជ្ញាធរដែនដី។ ជាមួយគ្នានោះ សម្រាប់អ្នកលក់-អ្នកទិញ ក៏ដូចគ្នាដែរ ដោយសារពេលទិញពុំបានពិនិត្យមើលលើអាជ្ញាបណ្ណ ច្បាប់ និងបណ្ណកម្មសិទ្ធិនោះទេ ហើយក្នុងករណីគម្រោងទី២៩ របស់ក្រុមហ៊ុន ម៉ន ដានី រៀលអ៊ីស្ទេត គឺជាមេរៀនសម្រាប់អ្នកទិញផង និងអ្នកអភិវឌ្ឍន៍បុរីផងដែរ។

ឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានថ្លែងប្រាប់ដល់ឧកញ៉ា ញូស៍ យ៉ាងដូច្នេះថា ករណីខាងលើនេះ លោកមើលឃើញថាជាការធ្វេសប្រហែស ឬកំហុសឆ្គងមួយកើតឡើង ដោយសារម្ចាស់បុរី មិនមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ ដែលយើងឃើញថា មានការប្រកាសព័ត៌មានជាទូទៅតែម្តង។ នេះជាកំហុសឆ្គង ដែលជាបទពិសោធន៍របស់អ្នកអភិវឌ្ឍន៍ ដូច្នេះអ្នកអភិវឌ្ឍន៍គួរតែដាក់ពាក្យស្នើសុំអាជ្ញាបណ្ណ ហើយអតិថិជនទាំងអស់ គួរតែទិញ ឬវិនិយោគសម្រាប់គម្រោងណា ដែលមានអាជ្ញាបណ្ណ ដើម្បីជៀសវាងនូវបញ្ហា ឬហានិភ័យផ្សេងៗ ដែលបានកើតឡើង ដូចយើងឃើញមាន នាពេលបច្ចុប្បន្ន។

លោកឧកញ៉ា បានបន្តយ៉ាងដូច្នេះថា៖ “ជាក់ស្តែងសម្រាប់ខ្ញុំខ្លួនឯង ក្នុងនាមសមាគមអ្នកជំនាញអចលនទ្រព្យកម្ពុជា ខ្ញុំសូមអំពាវនាវឱ្យភាគីពាក់ព័ន្ធទាំងអស់ រួមមានអាជ្ញាធរដែនដី ក្រសួងរៀបចំដែនដី នគរូបនីយកម្ម និងសំណង់ ម្ចាស់ដីដើម ម្ចាស់គម្រោង និងនិយ័តករអាជីវកម្មអចលនវត្ថុ និងបញ្ចាំ អង្គុយពិភាក្សាគ្នារកដំណោះស្រាយណាមួយឱ្យបានសមស្រប ប្រើនូវយុទ្ធសាស្ត្រឈ្នះ-ឈ្នះ ដើម្បីឱ្យគម្រោងហ្នឹង ទៅមុខហើយទទួលបានជោគជ័យ និងដើម្បីរក្សាបាននូវផលប្រយោជន៍របស់អតិថិជន ព្រោះយើងដឹងហើយថា អតិថិជន ពួកគាត់ខំធ្វើការសន្សំប្រាក់លំបាកណាស់ ទម្រាំបានប្រាក់១ម៉ឺន ២ម៉ឺន ឬ៣ម៉ឺនដុល្លារ ទៅបង់រំលស់ ឬបង់ផ្តាច់ ដើម្បីបានលំនៅឋានសមរម្យមួយ សម្រាប់ស្នាក់នៅ”។

លោកឧកញ៉ា ឃាង ពុទ្ធី បានគូសបញ្ជាក់បន្ថែមថា បើបញ្ហានេះនៅជាប់គាំង វានឹងធ្វើឱ្យមានរូបភាពមិនល្អ ជាពិសេសនៅក្នុងវិស័យអចលនវត្ថុក្នុងប្រទេសកម្ពុជាយើង។ ដូច្នេះលោកឧកញ៉ា សង្ឃឹមថា ភាគីទាំងអស់នឹងអង្គុយជជែកគ្នា យោគយល់គ្នា ដើម្បីដោះស្រាយបញ្ហានេះ ឱ្យទទួលបានជោគជ័យ។

គួររំឭកថា កាលពីថ្ងៃទី១៧ ខែមីនា ឆ្នាំ២០២៣ និយ័តករអាជីវកម្មអចលនវត្ថុ និងបញ្ចាំ បានចេញសេចក្តីជូនដំណឹងបញ្ឈប់សកម្មភាពអាជីវកម្មគម្រោងទី២៩ របស់ក្រុមហ៊ុន ម៉ន ដានី រៀលអ៊ីស្ទេត ឯ.ក ព្រមទាំងឱ្យបញ្ឈប់សកម្មភាពដូចជា ការសាងសង់ ការលក់ និងការប្រមូលលុយពីអតិថិជនជាបណ្តោះអាសន្ន រហូតដល់ការដោះស្រាយវិវាទជាមួយម្ចាស់ដីរួចរាល់ ហើយការផ្អាកនេះ គឺដើម្បីការពារផលប្រយោជន៍របស់អតិថិជន ដែលមានរាប់ពាន់គ្រួសារ និងភាគីពាក់ព័ន្ធ។ ជាមួយគ្នានេះ គម្រោងបុរី វីអាយភី ក៏អតិថិជនកំពុងផ្ទុះការតវ៉ាខ្លាំង ដោយពួកគេលើកឡើងថា ម្ចាស់គម្រោងពុំចេញបណ្ណកម្មសិទ្ធិជូន តាមការសន្យាផងដែរ៕

The post មួយរយៈចុងក្រោយនេះ អ្នកអភិវឌ្ឍន៍បុរី ជួបបញ្ហាច្រើន តើអ្នកជំនាញយល់ឃើញបែបណា? appeared first on .

ឧកញ៉ា ៣រូប ទទួលការតែងតាំងជាទីប្រឹក្សាកិត្តិយសនៃសមាគមអ្នកអភិវឌ្ឍន៍ដីឡូត៍កម្ពុជា

ឧកញ៉ាដែនដី — Wed, 15 Mar 2023 01:20:00 +0000

ឧកញ៉ាចំនួន៣រូប បានទទួលការតែងតាំងជាទីប្រឹក្សាកិត្តិយស នៃសមាគមអ្នកអភិវឌ្ឍដីឡូត៍កម្ពុជា អាណត្តិទី២ ឆ្នាំ២០២៣-២០២៥។ នេះបើតាមសេចក្តីសម្រេច ចុះថ្ងៃទី១០ ខែមីនា ឆ្នាំ២០២៣។

ឧកញ៉ា ម៉ន សុខា ប្រធានសមាគមអ្នកអភិវឌ្ឍដីឡូត៍កម្ពុជា

យោងសេចក្តីសម្រេចលេខ០១០/២៣ ស.រ.ស.អ.ដ.ក ចុះថ្ងៃទី១០ ខែមីនា ឆ្នាំ២០២៣ សមាគមអ្នកអភិវឌ្ឍដីឡូត៍កម្ពុជា សម្រេចតែងតាំងបុគ្គលចំនួន៩រូប ជាទីប្រឹក្សាកិត្តិយស នៃសមាគមអ្នកអភិវឌ្ឍដីឡូត៍កម្ពុជា អាណត្តិទី២ ២០២៣-២០២៥ ក្នុងនោះមានឧកញ៉ាចំនួន ៣រូប ដែលមានដូចខាងក្រោម៖

១. ឧកញ៉ា ឃាង ពុទ្ធី ៖ ស្ថាបនិកក្រុមហ៊ុនភ្នាក់ងារអចលនទ្រព្យ Khompound និងជាប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ

២. ឧកញ៉ា ម៉ាន់ ច័ន្ទឌី ៖ អគ្គនាយកក្រុមហ៊ុន អាយ ឃ្យូ អាយ ខេមបូឌា

៣. ឧកញ៉ា ចេង ខេង ៖ អគ្គនាយកក្រុមហ៊ុនអចលនទ្រព្យ CPL

ក្រៅពីឧកញ៉ាចំនួន៣រូប ក៏មានលោក ឃន ជឺ លោក អ៊ិន មាន លោកគ្រូបណ្ឌិត អោម សេងបូរ៉ា លោក សោម សម្បត្តិ លោក យិន លាងគង់ និងលោកគ្រូ អួន សារ៉ាត់ ជាទីប្រឹក្សាកិត្តិយសសមាគមអ្នកអភិវឌ្ឍន៍ដីឡូត៍កម្ពុជា អាណត្តិទី២ ផងដែរ។

កាលពីថ្ងៃទី១៦ ខែកុម្ភៈ ឆ្នាំ២០២៣ សមាគមអ្នកអភិវឌ្ឍន៍ដីឡូត៍កម្ពុជា ដឹកនាំដោយ ឧកញ៉ា ម៉ន សុខា ប្រធានសមាគម ព្រមទាំងក្រុមប្រឹក្សាភិបាល និងថ្នាក់ដឹកនាំជាច្រើនទៀត បានប្រជុំពិភាក្សា និងប្រកាសតែងតាំងសមាជិកគណៈកម្មការប្រតិបត្តិនៃគណៈកម្មាធិការសមាគម ដើម្បីបន្តការអនុត្តក្នុងអាណត្តិទី២ ឆ្នាំ២០២៣-២០២៥ ក្នុងគោលបំណងដើម្បីជួយសម្របសម្រួលដល់អ្នកប្រកបអាជីវកម្ម និងអ្នកអភិវឌ្ឍន៍ដីឡូត៍ទាំងអស់ទទួលបានការយល់ដឹង និងជ្រាបច្បាស់អំពីផ្លូវច្បាប់ និងបទបញ្ញត្តិផ្សេងៗរបស់ព្រះរាជណាចក្រកម្ពុជា។

សូមជម្រាបជូនថា សមាគមអ្នកអភិវឌ្ឍន៍ដីឡូត៍កម្ពុជា បានបង្កើតឡើងថ្ងៃទី១៧ ខែកក្កដា ឆ្នាំ២០២០កន្លងទៅ ខណៈដែលបច្ចុប្បន្នឧកញ៉ា ម៉ន សុខា បន្តជាប្រធាន និងមានអនុប្រធាន ក្រុមប្រឹក្សាភិបាល អគ្គលេខាធិការ ព្រមទាំងសមាជិកច្រើនរូបទៀត ប្រមូលផ្តុំដោយអ្នកអភិវឌ្ឍវិស័យអចលនទ្រព្យ៕

The post ឧកញ៉ា ៣រូប ទទួលការតែងតាំងជាទីប្រឹក្សាកិត្តិយសនៃសមាគមអ្នកអភិវឌ្ឍន៍ដីឡូត៍កម្ពុជា appeared first on .

អ្នករកស៊ីអចលនវត្ថុ និងបញ្ចាំគ្រប់ប្រភេទ ត្រូវស្នើសុំអាជ្ញាបណ្ណពី ន.អ.ប នៃក្រសួងសេដ្ឋកិច្ចជាមុន ជៀសវាងរងការពិន័យ

ឧកញ៉ាកោះក្របី — Fri, 03 Feb 2023 07:21:44 +0000

ជាថ្មីម្តងទៀត ដើម្បីទប់ស្កាត់នូវសកម្មភាពប្រកបអាជីវកម្មដោយគ្មានអាជ្ញាបណ្ណ ព្រមទាំងលើកទឹកចិត្តដល់ការធ្វើធុរកិច្ចប្រកបដោយសុចរិតភាពនៅក្នុងវិស័យអចលនវត្ថុ និងបញ្ចាំគ្រប់ប្រភេទ និយ័តករអាជីវកម្មអចលនវត្ថុ និងបញ្ចាំ (ន.អ.ប) នៃក្រសួងសេដ្ឋកិច្ច ត្រូវស្នើសុំអាជ្ញាបណ្ណពី ន.អ.ប ជាមុនសិន។

សេចក្តីជូនដំណឹងកាលពីចុងខែមករា ឆ្នាំ២០២៣ និយ័តករអាជីវកម្មអចលនវត្ថុ និងបញ្ចាំ បានឲ្យដឹងថា រាល់ការប្រកបអាជីវកម្មអភិវឌ្ឍលំនៅឋាន អាជីវកម្មអភិវឌ្ឍអគារសហកម្មសិទ្ធិ អាជីវកម្មអភិវឌ្ឍដីឡូត៍ អាជីវកម្មផ្តល់សេវាកម្មអចលនវត្ថុ អាជីវកម្មបញ្ចាំ និងអាជីវកម្មប្រតិភោគដោយអនុប្បទាន ត្រូវស្នើសុំអាជ្ញាបណ្ណពី ន.អ.ប ជាមុនសិន។ ទន្ទឹងមនឹងនោះ ប្រសិនពុំបានស្នើសុំអាជ្ញាបណ្ណពី ន.អ.ប គឺជាអំពើខុសច្បាប់ដែលត្រូវតែបញ្ឈប់សកម្មភាព និងរងការពិន័យ ជាទឹកប្រាក់តាមច្បាប់ជាធរមាន។

រូបភាពនៅក្រុងព្រះសីហនុ នាខែកមរា ឆ្នាំ២០២៣

ដើម្បីទប់ស្កាត់នូវសកម្មភាពប្រកបអាជីវកម្មដោយគ្មានអាជ្ញាបណ្ណ ព្រមទាំងលើកទឹកចិត្តដល់ការធ្វើធុរកិច្ចប្រកបដោយសុចរិតភាពរបស់ម្ចាស់អាជីវកម្មអចលនវត្ថុ និងបញ្ចាំគ្រប់ប្រភេទ និយ័តករអាជីវកម្មអចលនវត្ថុ និងបញ្ចាំ ស្នើឲ្យត្រូវមកបំពេញបែបបទ និងនីតិវិធីស្នើសុំអាជ្ញាបណ្ណនៅអាជ្ញាធរសេវាហិរញ្ញវត្ថុមិនមែនធនាគារ (អ.ស.ហ) នៃក្រសួងសេដ្ឋកិច្ច និងហិរញវត្ថុ។

ជាមួយគ្នានេះ អ្នកជំនាញអចលនទ្រព្យ ឧកញ៉ា ឃាង ពុទ្ធី ធ្លាប់បានស្នើសុំទៅនិយ័តករអាជីវកម្មអចលនវត្ថុ និងបញ្ចាំ ធ្វើការរឹតបន្តឹង និងចាត់វិធានការផ្លូវច្បាប់លើក្រុមហ៊ុនផ្តល់សេវាកម្មវាយតម្លៃ សេវាកម្មភ្នាក់ងារអចលនវត្ថុ និងសេវាកម្មគ្រប់គ្រងអចលនវត្ថុ ដែលមិនទាន់មានអាជ្ញាបណ្ណ។ ការស្នើសុំនេះ លោកថា ដើម្បីប្រកួតប្រជែងគ្នាលើសង្វៀនអាជីវកម្មដោយភាពស្មោះត្រង់ និងតម្លាភាព។

ឧកញ៉ា ឃាង ពុទ្ធី ប្រធានក្រុមប្រឹក្សានៃសមាគមអ្នកជំនាញអចលនវត្ថុកម្ពុជា ថ្លែងប្រាប់គេហទំព័រឧកញ៉ាញូស៍ថា៖ «និយ័តករអាជីវកម្មអចលនវត្ថុ និងបញ្ចាំ ត្រូវតែធ្វើការជំរុញការផ្សព្វផ្សាយរាល់ការប្រកបអាជីវកម្មនៅកម្ពុជា ពាក់ព័ន្ធនឹងសេវាកម្មវាយតម្លៃ សេវាកម្មភ្នាក់ងារអចលនវត្ថុ និងសេវាកម្មគ្រប់គ្រងអចលនវត្ថុ ត្រូវតែមានអាជ្ញាបណ្ណប្រកបអាជីវកម្ម និងវិញ្ញាបនបត្រវិជ្ជាជីវៈ ជាមុនសិន»។

ឧកញ៉ា ឃាង ពុទ្ធី

លោកឧកញ៉ាបន្តថា ក្រុមហ៊ុន ភ្នាក់ងារអចលនវត្ថុ បច្ចុប្បន្នឃើញមានច្រើនប្រកួតប្រជែងគ្នាដោយខ្លះគ្មានអាជ្ញាប័ណ្ណ និងវិញ្ញាបនបត្រវិជ្ជាជីវៈ ហើយនិយ័តករអាជីវកម្មអចលនវត្ថុ និងបញ្ចាំ គ្មានវិធានការផ្លូវច្បាប់លើក្រុមហ៊ុន ឫភ្នាក់ងារអចលនវត្ថុណាមួយនៅឡើយ។ លោកបន្ថែមទៀត «ប្រសិនបើគ្មានវិធានការច្បាប់ គ្មានការផ្សព្វផ្សាយ ស្មើនឹងអត់ធ្វើការ ដូច្នេះក្រសួងសេដ្ឋកិច្ច និងហិរញ្ញវត្ថុ គួរតែនិរាករណ៍លុបអាជ្ញាបណ្ណ និងវិញ្ញាបនបត្រវិជ្ជាជីវៈនោះតែម្តង ទុកឱ្យក្រុមហ៊ុន ភ្នាក់ងារអចលនវត្ថុទាំងនោះធ្វើការប្រកួតប្រជែងតាមអំពើចិត្តតែម្តងទៅ»។

គួររំលឹកថា រាជរដ្ឋាភិបាលកម្ពុជា បានសម្រេចផ្ទេរអំណាច និងសិទ្ធិនៃការដោះស្រាយវិវាទអចលនទ្រព្យ និងការបញ្ជាំ ពីស្ថាប័នចាស់ (នាយកដ្ឋានគ្រប់គ្រងអាជីវកម្មអចលនវត្ថុ បញ្ចាំ និងប្រាតិភោគដោយអនុប្បទាន) ទៅស្ថាប័នថ្មីមួយ ដែលមានឈ្មោះថា និយ័តករអាជីវកម្មអចលនវត្ថុ និងបញ្ចាំ (ន.អ.ប) កាលពីឆ្នាំ២០២១។ និយ័តករនេះ នឹងមានតួនាទីផ្សះផ្សា និងដោះស្រាយវិវាទ នូវរាល់ពាក្យបណ្តឹងរបស់គូភាគីនៃកិច្ចសន្យាលក់-ទិញអចលនវត្ថុ កិច្ចសន្យាទទួលបញ្ចាំ និងកិច្ចសន្យាទទួលប្រាតិភោគដោយអនុប្បទានជាដើម៕

The post អ្នករកស៊ីអចលនវត្ថុ និងបញ្ចាំគ្រប់ប្រភេទ ត្រូវស្នើសុំអាជ្ញាបណ្ណពី ន.អ.ប នៃក្រសួងសេដ្ឋកិច្ចជាមុន ជៀសវាងរងការពិន័យ appeared first on .

ឧកញ៉ា២រូប យល់ថាការវិនិយោគលើដីកសិកម្ម នឹងផ្តល់ឱកាសចំណេញខ្ពស់ នៅឆ្នាំ២០២៣

ឧកញ៉ាដែនដី — Fri, 20 Jan 2023 03:07:34 +0000

លោកឧកញ៉ាពីររូប យល់ថាការវិនិយោគលើដីកសិកម្ម នឹងផ្តល់លើកឡើងពីឱកាសចំណេញខ្ពស់ នៅឆ្នាំ២០២៣នេះ ដោយសារស្ថានភាពសេដ្ឋកិច្ចកម្ពុជា នឹងងើបឡើងវិញកាន់តែប្រសើរឡើង ហើយដីកសិកម្ម នៅមានតម្លៃធូរថ្លៃនៅឡើយ។

លោកឧកញ៉ា តេង រិទ្ធី អគ្គនាយកក្រុមហ៊ុន R Investment Group បានមានប្រសាសន៍នៅថ្ងៃទី១៨ ខែមករា ឆ្នាំ២០២៣ ថា វិស័យអចលនទ្រព្យនៅកម្ពុជាក្នុងឆ្នាំ២០២៣ ឱកាសចំណេញនៅតែមាន ជាពិសេសឱកាសក្នុងការវិនិយោគលើប្រភេទអចលនទ្រព្យ ចាំបាច់សម្រាប់ការអភិវឌ្ឍ ដូចជា លំនៅឋាន អចលនទ្រព្យឧស្សាហកម្ម និងការវិនិយោគលើដីធ្លីកសិកម្មជាដើម។

លោកឧកញ៉ា បានបន្តថា ការវិនិយោគលើវិស័យកសិកម្ម ក៏ជាឱកាសល្អ ក្នុងការហុចផលចំណេញខ្ពស់ ដោយសារអត្រាតម្លៃដីធ្លីដ៏សមរម្យ នៅធូរថ្លៃនៅឡើយ និងការអភិវឌ្ឍជាតំបន់ដាំដុះដំណាំផ្សេងៗ។ ជាពិសេស ដីធ្លីកសិកម្ម ក៏ជាប្រភេទអចលនទ្រព្យដែលនឹងមានតម្រូវការខ្ពស់ខ្លាំង នៅក្រោយពេលស្ថានភាពទីផ្សារងើបឡើងវិញ។

យ៉ាងណាមិញ លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យ ក៏យល់ឃើញថា ការវិនិយោគលើដីកសិកម្មជាឱកាសល្អ និងអាចទទួលបានផលចំណេញខ្ពស់ផងដែរ។ លោកឧកញ៉ា បានលើកឡើងថា យោងតាមការសិក្សា បានរកឃើញថា ការិវនិយោគលើដីធ្លីប្រភេទកសិកម្ម ជាជម្រើសវិនិយោគមួយ ដែលផ្តល់ផលចំណេញខ្ពស់ តាមរយៈការទិញបានក្នុងអត្រាតម្លៃដីធ្លីសមរម្យបំផុត ហើយការអភិវឌ្ឍនៅលើដីធ្លីប្រភេទនោះ នឹងហុចមកវិញនូវផលចំណេញខ្ពស់ ក្នុងរយៈពេលកំណត់មួយនៃការវិនិយោគ។

សូមជម្រាបជូនថា ដីកសិកម្ម ត្រូវបានរាជរដ្ឋាភិបាលកម្ពុជាចាត់ទុកជាផ្នែកមួយដ៏សំខាន់ ខណៈដែលវិស័យនេះត្រូវបានកំណត់នៅក្នុងជ្រុងមួយនៃយុទ្ធសាស្ត្រចតុកោណ។ ជាមួយគ្នានេះ រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បានប្រកាសជាចំហរថា កម្ពុជាមិនយកពន្ធលើដីកសិកម្មនោះទេ។ សម្តេច ធ្លាប់បានបញ្ជាក់ថា ដរាបណាសម្តេចនៅជានាយករដ្ឋមន្ត្រី នោះពន្ធលើដីស្រែចំការ ត្រូវបានលើកលែង ហើយរយៈពេលជាង ៤០ឆ្នាំមកនេះ គ្មានការយកពន្ធលើដីកសិកម្មនោះទេ។ កត្តាទាំងនេះ ជាការលើកទឹកចិត្ត និងជួយលើកកម្ពស់ជីវភាពប្រជាជន ហើយក៏ជាឱកាសល្អសម្រាប់អ្នកវិនិយោគលើដីកសិកម្មផងដែរ៕

The post ឧកញ៉ា២រូប យល់ថាការវិនិយោគលើដីកសិកម្ម នឹងផ្តល់ឱកាសចំណេញខ្ពស់ នៅឆ្នាំ២០២៣ appeared first on .

អ្នកជំនាញទទួចស្នើឲ្យរាជរដ្ឋាភិបាលពិនិត្យលទ្ធភាពជួយស្ថាបនាប្រព័ន្ធទឹក-ភ្លើងក្នុងគម្រោងដីឡូតិ៍

ឧកញ៉ាកោះក្របី — Sun, 04 Dec 2022 02:11:50 +0000

ជាមួយភាពរីកចម្រើនផ្នែកសេដ្ឋកិច្ច និងស្ថិរភាពនយោបាយ វិស័យអចលនទ្រព្យ និងសំណង់នៅកម្ពុជា ត្រូវបានមើលឃើញថា មានការរីកចម្រើនយ៉ាងលឿនក្នុងរយៈពេល ២ ទសវត្សរ៍ចុងក្រោយនេះ ពិសេសក្នុងរាជធានីភ្នំពេញ និងខេត្តព្រះសីហនុ។

ឧកញ៉ា ឃាង ពុទ្ធី ទីប្រឹក្សាសមាគមអភិវឌ្ឍន៍ដីឡូតិ៍កម្ពុជា ថ្លែងនៅក្នុងមហាសន្និបាតប្រចាំឆ្នាំ ២០២២ របស់សមាគមអភិវឌ្ឍន៍ដីឡូតិ៍កម្ពុជា កាលពីថ្ងៃទី៣ ខែធ្នូម្សិលមិញ បានអំពាវនាវឲ្យរាជរដ្ឋាភិបាល ជាពិសេសរដ្ឋាករទឹក និងអគ្គិសនីកម្ពុជា ពិនិត្យមើលគម្រោងដីឡូតិ៍ដែលបានពុះបែងចាយក្បាលដីរួចរាល់ធ្វើអាជីវកម្ម ហើយបានលក់ជូនអតិថិជន ជួយស្ថាបនាហេដ្ឋារចនាសម្ព័ន្ធប្រព័ន្ធទឹក-ភ្លើង ដើម្បីឲ្យប្រជាជនសាងសង់ផ្ទះបានក្នុងតម្លៃសមរម្យ។

ការស្នើសុំយ៉ាងដូច្នេះពីឧកញ៉ា ឃាង ពុទ្ធី បន្ទាប់ពីលោកមើលឃើញអ្នកទិញដីឡូតិ៍នៅប្រទេសកម្ពុជាមានចំនួនច្រើនរហូតដល់ ៤០ម៉ឺនឡូតិ៍មកដល់ពេលបច្ចុប្បន្ន។ ការណ៍នេះ ដើម្បីសម្រួលដល់បងប្អូនកម្មករ កម្មការិនី និងអ្នកប្រកបមុខរបរតិចតួចដែលមានជីវភាពកម្រិតទៅមធ្យម ដោយលោកឧកញ៉ាចាត់ទុកថា ដីឡូតិ៍ល្អសម្រាប់ពួកគាត់ដែលមានពុំទាន់មានលទ្ធភាពទិញផ្ទះបានក្នុងតម្លៃប្រហែល ៥ម៉ឺនទៅ ១០ម៉ឺនដុល្លារ។

លោកពន្យល់ថា ការទិញដីឡូតិ៍ពួកគាត់អាចបង់រំលោះបានដោយគ្រាន់តែមាន ៥ពាន់ដុល្លារទៅ១ម៉ឺនដុល្លារហើយបង់បន្តិចម្តងៗ ដល់ពេលថ្ងៃក្រោយមានលទ្ធភាពអាចសង់ផ្ទះបានក្នុងតម្លៃសមរម្យ។

ថ្លែងមកកាន់គេហទំព័រឧកញ៉ាញូស៍ ឧកញ៉ា ឃាង ពុទ្ធី បានបញ្ជាក់ថា វិស័យអចលនទ្រព្យដើរតួនាទីយ៉ាងសំខាន់ជួយទ្រទ្រង់សេដ្ឋកិច្ច តាមរយៈគម្រោងវិនិយោគ ឬអភិវឌ្ឍអចលនទ្រព្យនានា។ ដើម្បីបង្កើនទំនុកចិត្តដល់អតិថិជន បើតាមអ្នកជំនាញរូបនេះ អ្នកអភិវឌ្ឍអចលនទ្រព្យត្រូវតែអភិវឌ្ឍមានគុណភាព និងសំណង់សាងសង់ទៅតាមច្បាប់ក្រសួងដែនដីនគរូបនីយកម្ម និងសំណង់ តាមនិយាមការត្រឹមត្រូវផងដែរ។

ទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថា ក្នុងរយៈពេល ២ ទសវត្សរ៍ចុងក្រោយនេះ ក្រសួងបានចេញលិខិតអនុញ្ញាតឱ្យសាងសង់ជាង ៥៧ ០០០ ការដ្ឋានសំណង់នៅទូទាំងប្រទេស។ តាមការប៉ាន់ស្មានវិនិយោគសរុបក្នុងវិស័យសំណង់នារយៈពេល ២ ទសវត្សរ៍ចុងក្រោយនេះ មានប្រមាណជាង ៦៦ ពាន់លានដុល្លារអាមេរិក ហើយវិស័យនេះបានផ្តល់ការងារជាមធ្យម ១៥ ម៉ឺននាក់ក្នុង ១ ថ្ងៃ។

ទន្ទឹមនឹងនេះដែរ រដ្ឋបាលរាជធានីភ្នំពេញ បានឱ្យដឹងថា នៅដើមឆ្នាំ ២០២២ ក្នុងរាជធានីភ្នំពេញមានសំណង់បុរី និងបណ្ដុំផ្ទះល្វែងចំនួន ៣១០ កន្លែង និងអគារខ្ពស់ៗចំនួន ១ ៦០៣ អគារ ដោយក្នុងនោះអគារកម្ពស់ចាប់ពី ២០ ជាន់ឡើងទៅមានចំនួន ២២៥ អគារ។ ដោយឡែកក្នុងខេត្តព្រះសីហនុ គិតមកទល់ពេលនេះ អគារដែលសាងសង់រួច និងកំពុងដំណើរការមានចំនួន ២៧៨ អគារ និងអគារដែលបានបញ្ចប់ការសាងសង់ តែមិនដំណើរការមានចំនួន ២៥១ អគារ៕

The post អ្នកជំនាញទទួចស្នើឲ្យរាជរដ្ឋាភិបាលពិនិត្យលទ្ធភាពជួយស្ថាបនាប្រព័ន្ធទឹក-ភ្លើងក្នុងគម្រោងដីឡូតិ៍ appeared first on .

អ្នកជំនាញ ស្នេីសុំរដ្ឋាភិបាលលុបចោលអាជ្ញាប័ណ្ណភ្នាក់ងារអចលនវត្ថុនៅកម្ពុជា

ឧកញ៉ាកោះក្របី — Tue, 29 Nov 2022 13:55:33 +0000

អ្នកជំនាញអចលនទ្រព្យ ឧកញ៉ា ឃាង ពុទ្ធី បានស្នើសុំទៅនិយ័តករអាជីវកម្មអចលនវត្ថុ និងបញ្ចាំ នៃក្រសួងសេដ្ឋកិច្ច និងហិរញ្ញវត្ថុ ធ្វើការរឹតបន្តឹង និងចាត់វិធានការផ្លូវច្បាប់លើក្រុមហ៊ុនផ្តល់សេវាកម្មវាយតម្លៃ សេវាកម្មភ្នាក់ងារអចលនវត្ថុ និងសេវាកម្មគ្រប់គ្រងអចលនវត្ថុ ដែលមិនទាន់មានអាជ្ញាបណ្ណ។ ការស្នើសុំនេះ លោកថាដើម្បីប្រកួតប្រជែងគ្នាលើសង្វៀនអាជីវកម្មដោយភាពស្មោះត្រង់ និងតម្លាភាព។

ឧកញ៉ា ឃាង ពុទ្ធី ប្រធានក្រុមប្រឹក្សានៃសមាគមអ្នកជំនាញអចលនវត្ថុកម្ពុជា ថ្លែងប្រាប់គេហទំព័រឧកញ៉ាញូស៍ថា៖ “និយ័តករអាជីវកម្មអចលនវត្ថុ និងបញ្ចាំ ត្រូវតែធ្វើការជំរុញការផ្សព្វផ្សាយរាល់ការប្រកបអាជីវកម្មនៅកម្ពុជា ពាក់ព័ន្ធនឹងសេវាកម្មវាយតម្លៃ សេវាកម្មភ្នាក់ងារអចលនវត្ថុ និងសេវាកម្មគ្រប់គ្រងអចលនវត្ថុ ត្រូវតែមានអាជ្ញាបណ្ណប្រកបអាជីវកម្ម និងវិញ្ញាបនបត្រវិជ្ជាជីវៈ ជាមុនសិន”។

លោកឧកញ៉ាបន្តថា ក្រុមហ៊ុន ភ្នាក់ងារអចលនវត្ថុ បច្ចុប្បន្នឃើញមានច្រើនប្រកួតប្រជែងគ្នាដោយខ្លះគ្មានអាជ្ញាប័ណ្ណ និងវិញ្ញាបនបត្រវិជ្ជាជីវៈ ហើយនិយ័តករអាជីវកម្មអចលនវត្ថុ និងបញ្ចាំ គ្មានវិធានការផ្លូវច្បាប់លើក្រុមហ៊ុន ឫភ្នាក់ងារអចលនវត្ថុណាមួយនៅឡើយ ស្ងាត់ឈឹង។ លោកបន្ថែមទៀត ប្រសិនបើគ្មានវិធានការច្បាប់ គ្មានការផ្សព្វផ្សាយ ស្មើនឹងអត់ធ្វើការ ដូច្នេះក្រសួងសេដ្ឋកិច្ច និងហិរញ្ញវត្ថុ គួរតែនិរាករណ៍លុបអាជ្ញាប័ណ្ណ និងវិញ្ញាបនបត្រវិជ្ជាជីវៈនោះតែម្តង ទុកឱ្យក្រុមហ៊ុន ភ្នាក់ងារអចលនវត្ថុទាំងនោះធ្វើការប្រកួតប្រជែងតាមអំពើចិត្តតែម្តងទៅ។

ទន្ទឹមនឹងនេះ ឧកញ៉ា ឃាង ពុទ្ធី ក៏បានលើកអំពីច្បាប់នៅប្រទេសថៃ ដោយមិនបានតម្រូវឱ្យក្រុមហ៊ុន ភ្នាក់ងារអចលនវត្ថុ ទៅស្នើសុំអាជ្ញាប័ណ្ណ និងវិញ្ញាបនបត្រវិជ្ជាជីវៈឡើយ សម្រាប់ប្រកបអាជីវកម្មអចលនវត្ថុ លើកលែងតែអ្នកវិនិយោគក្រៅបរទេសទើបរដ្ឋាភិបាលតម្រូវការឱ្យធ្វើអាជ្ញាបណ្ណ។

លោកឧកញ៉ាថ្លែងថា៖ ដើម្បីដំណើរការភ្នាក់ងារអចលនទ្រព្យនៅក្នុងប្រទេសថៃ ក្រុមហ៊ុន ភ្នាក់ងារអចលនវត្ថុមិនត្រូវការអាជ្ញាប័ណ្ណទេ ប៉ុន្តែក្នុងនាមជាជនបរទេស នឹងត្រូវការទិដ្ឋាការត្រឹមត្រូវ និងទទួលបានប័ណ្ណការងារ។ ជនជាតិថៃអាចធ្វើការជាអចលនទ្រព្យបានដោយគ្មានការរឹតបន្តឹងអ្វីឡើយ។

យ៉ាងណា លោកឧកញ៉ាបានគូសបញ្ជាក់ថា បើទោះបីជាបែបនេះសម្រាប់នៅស្រុកថៃ ប៉ុន្តែនៅប្រទេសគេមានវគ្គបណ្តុះបណ្តាលជាច្រើន ដើម្បីស្វែងយល់អំពីឧស្សាហកម្មអចលនទ្រព្យ។

ទន្ទឹមនឹងនេះ លោកឧកញ៉ា ឃាង ពុទ្ធី ក៏បានបង្ហាញក្តីព្រួយបារម្ភផងដែរអំពីសាលាបង្រៀនអចលនទ្រព្យដែលគ្រោងនឹងនាំចូលមកកម្ពុជា ដោយអាចមានការរាំងស្ទះ។ ការណ៍នេះលោកថា ប្រហែលនិយ័តករអាជីវកម្មអចលនវត្ថុ និងបញ្ចាំ មិនផ្តល់អាជ្ញាប័ណ្ណឱ្យបើកដំណើរការសាលាបង្រៀនអចលនទ្រព្យនៅកម្ពុជា ខណៈបច្ចុប្បន្នសាលានេះមានបង្រៀននៅក្រសួងសេដ្ឋកិច្ ចនិងហិរញ្ញវត្ថុ រួមទៅហើយ។

សូមជម្រាបថា រដ្ឋាភិបាលកម្ពុជា បានសម្រេចផ្ទេរអំណាច និងសិទ្ធិនៃការដោះស្រាយវិវាទអចលនទ្រព្យ និងការបញ្ជាំ ពីស្ថាប័នចាស់ (នាយកដ្ឋានគ្រប់គ្រងអាជីវកម្មអចលនវត្ថុ បញ្ចាំ និងប្រាតិភោគដោយអនុប្បទាន) ទៅស្ថាប័នថ្មីមួយ គឺនិយ័តករអាជីវកម្មអចលនវត្ថុ និងបញ្ចាំ (ន.អ.ប) កាលពីឆ្នាំ២០២១កន្លងទៅ។

និយ័តករនេះ នឹងមានតួនាទីផ្សះផ្សា និងដោះស្រាយវិវាទ នូវរាល់ពាក្យបណ្តឹងរបស់គូភាគីនៃកិច្ចសន្យាលក់-ទិញអចលនវត្ថុ កិច្ចសន្យាទទួលបញ្ចាំ និងកិច្ចសន្យាទទួលប្រាតិភោគដោយអនុប្បទានជាដើម៕

The post អ្នកជំនាញ ស្នេីសុំរដ្ឋាភិបាលលុបចោលអាជ្ញាប័ណ្ណភ្នាក់ងារអចលនវត្ថុនៅកម្ពុជា appeared first on .

អ្នកជំនាញ ព្យាករថា ឆ្នាំ២០២៣ វិស័យអចលនទ្រព្យក៏អត់មានការងើបកម្រើកឡើងខ្លាំងដែរ

រ៉េត សុកធា — Fri, 25 Nov 2022 04:32:12 +0000

អ្នកជំនាញអចលនទ្រព្យ បានបង្ហាញទស្សនៈយល់ឃើញថា នៅចុងឆ្នាំ២០៣ខាងមុខ ស្ថានភាពវិស័យអចលនទ្រព្យប្រទេសកម្ពុជានឹងមានសន្ទុះងើបឡើងវិញ ប៉ុន្តែអ្វីៗស្ថិតក្នុងស្ថានភាពមួយត្រូវតែមានការប្រុងប្រយ័ត្ន។

ឧកញ៉ា ឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនវត្ថុកម្ពុជា បានប្រាប់គេហទំព័រឧកញ៉ាញូស៍ថា វិស័យអចលនទ្រព្យកម្ពុជា គិតត្រឹមខែវិច្ឆិកា ឆ្នាំ២០២២នេះ ស្ថានភាពហាក់គ្មានអ្វីប្រែប្រួលជាដុំកំភួននៅឡើយ។ ការណ៍នេះ លោកថា ក៏ព្រោះផ្អែកលើចរន្តទិញលក់មិនទាន់មានសកម្មភាពផុសផល បើប្រៀបធៀបនឹងកាលមុនជួបវិបត្តិកូវីដ១៩ ម្យ៉ាងសេដ្ឋកិច្ចនិងហិរញ្ញវត្ថុរបស់អ្នកវិនិយោគ និងប្រជាជន ហាក់ស្ថិតក្នុងស្ថានភាពមិនប្រាកដប្រជានៅឡើយដែរ។

លោកឧកញ៉ាថ្លែងថា បើនិយាយដល់ជំងឺរាតត្បាតកូវីដ១៩ វាលែងជាក្តីព្រួយបារម្ភទៀតហើយ សម្រាប់កម្ពុជានិយាយដោយឡែក តែសម្រាប់បញ្ហាប្រឈមក្នុងវិស័យអចលនទ្រព្យនៅឆ្នាំ២០២២នេះ ឃើញថាមានសកម្មភាពងើបកម្រើកតិចតួចប៉ុណ្ណោះ។ លោកឧកញ៉ាបន្តថា សម្រាប់ឆ្នាំ២០២៣ខាងមុខ លោកព្យាករថាវិស័យអចលនទ្រព្យក៏អត់មានការងើបឡើងខ្លាំងដែរ ប៉ុន្តែសម្រាប់ចុងឆ្នាំ២០២៣វិញ អាចនឹងមានការងើបវិញ។

វិស័យអចលនទ្រព្យនៅប្រទេសកម្ពុជាយើងឆ្នាំ២០២៤-២០២៥ ខ្ញុំអាចទស្សន៍ទាយថា នឹងងើបឡើងវិញក្នុងកម្រិតខ្ពស់មួយ តែគ្រប់យ៉ាងអាស្រ័យលើស្ថានភាពសេដ្ឋកិច្ច និងវិបត្តិសង្គ្រាមបន្តអូសបន្លាយពេលតទៅទៀត។ ឧកញ៉ា ឃាង ពុទ្ធី ថ្លែងបញ្ជាក់បន្ថែម។

សូមជម្រាបថា រាជរដ្ឋាភិបាលកម្ពុជា បន្តបញ្ជាក់ថាសេដ្ឋកិច្ចកម្ពុជាត្រូវបានព្យាករថា នឹងសម្រេចបានអត្រាកំណើនក្នុងរង្វង់ ៦,៦% ខណៈដែលឆ្នាំ ២០២២នេះ សេដ្ឋកិច្ចមានកំណើនក្នុងអត្រាប្រមាណ ៥,៤%។ តាមសេចក្តីព្រាងច្បាប់ថវិកាឆ្នាំ២០២៣ កំណើនសេដ្ឋកិច្ចកម្ពុជានឹងត្រូវពឹងផ្អែកទៅលើវិស័យមួយចំនួនដូចជាវិស័យឧស្សាហកម្ម វិស័យសេវាកម្ម និងវិស័យកសិកម្មជាដើម។

ទោះយ៉ាងនេះក្តីសេចក្តីព្រាងច្បាប់ថវិកាឆ្នាំ ២០២៣ បញ្ជាក់ថាប្រទេសកម្ពុជានៅត្រូវបានហ៊ុមព័ទ្ធដោយភាពមិនប្រាកដប្រជាខ្ពស់ ជាពិសេសបញ្ហាប្រឈម ឬហានិភ័យដែលបង្កឡើងដោយភាពមិនអំណោយផលនៃកត្តាខាងក្រៅមួយចំនួន ដែលអាចធ្វើឲ្យកំណើនសេដ្ឋកិច្ចកម្ពុជាមិនសម្រេចបានតាមការគ្រោងទុក ឬក៏បន្ទុយបង្អាក់ដល់កំណើន។

កត្តាទាំងអស់នោះ រួមមានការបន្តកើនឡើងនូវសម្ពាធអតិផរណា ការរឹតបន្តឹងកាន់តែលឿន និងកាន់តែខ្លាំងជាងមុននូវគោលនយោបាយរូបិយវត្ថុរបស់ប្រទេសអភិវឌ្ឍន៍ ជាពិសេសការតម្លើងអត្រាការប្រាក់នៃធនាគារកណ្តាលអាមេរិក។ ការថមថយកំណើនសេដ្ឋកិច្ចចិន ភាពតានតឹងនៃភូមិសាស្ត្រនយោបាយ ជាពិសេសការអូសបន្លាយសង្គ្រាមនៅអ៊ុយក្រែន និងបញ្ហាតៃវ៉ាន់ ការបែងចែកប្លុកសេដ្ឋកិច្ច ពាណិជ្ជកម្មសកលលោក នៅក្នុងសង្គ្រាមពាណិជ្ជកម្ម និងបច្ចេកវិទ្យា ជាដើម សុទ្ធសឹងជាកត្តាដែលគួរឲ្យព្រួយបារម្មណ៍ពីការបង្អាក់ល្បឿនកំណើនសេដ្ឋកិច្ចកម្ពុជា៕

The post អ្នកជំនាញ ព្យាករថា ឆ្នាំ២០២៣ វិស័យអចលនទ្រព្យក៏អត់មានការងើបកម្រើកឡើងខ្លាំងដែរ appeared first on .