ឯកឧត្តម ហ៊ុន ម៉ានី បានបន្តថា ស្មារតីនៅជាមួយ ជាតិ កងកម្លាំង និង ជនភៀសសឹក គ្រប់វេលាជូនចំពោះអាជ្ញាធរដែនដី កងកម្លាំងប្រដាប់អាវុធគ្រប់ប្រភេទ ក្រសួង-ស្ថាប័នពាក់ព័ន្ធ ដៃគូសហការទាំងអស់ ព្រមទាំងបងប្អូនបុគ្គលិកអនាម័យ គ្រប់ៗរូប។ឯកឧត្តមថា ការប្រព្រឹត្តទៅដោយរលូន និងជោគជ័យនៃព្រឹត្តិការណ៍នគរសង្ក្រាន្ត និងការអបអរសាទរពិធីបុណ្យចូលឆ្នាំថ្មី រយៈពេល៦ថ្ងៃនេះ មិនអាចខ្វះបាននូវការចូលរួមយ៉ាងសកម្ម និងមានការទទួលខុសត្រូវខ្ពស់ពីអ្នកទាំងអស់គ្នា។

ជាមួយគ្នានេះ ឯកឧត្តមបញ្ជាក់ថា៖« ខ្ញុំពិតជាសូមថ្លែងអំណរគុណយ៉ាងជ្រាលជ្រៅ ចំពោះរដ្ឋបាលរាជធានីភ្នំពេញ អាជ្ញាធរខណ្ឌដូនពេញ និងខណ្ឌចំការមន និងមូលដ្ឋានពាក់ព័ន្ធ ព្រមទាំងមន្ត្រីនគរបាលជាតិ កងរាជអាវុធហត្ថ និងកម្លាំងប្រជាការពារ ដែលបានលះបង់កម្លាំងកាយ និងកម្លាំងចិត្ត ចូលរួមយ៉ាងសស្រាក់សស្រាំក្នុងការរៀបចំ សម្របសម្រួល និងថែរក្សាសន្តិសុខ សណ្តាប់ធ្នាប់សាធារណៈ។ ជាពិសេស ខ្ញុំសូមថ្លែងអំណរគុណដល់បងប្អូនបុគ្គលិកអនាម័យ ដែលបានខិតខំប្រឹងប្រែង ដោយមិនខ្លាចនឿយហត់ ក្នុងការថែរក្សាសោភ័ណភាព និងបរិស្ថានស្អាតសម្រាប់បងប្អូនប្រជាពលរដ្ឋយើង។ សមិទ្ធផល និងភាពជោគជ័យនៃព្រឹត្តិការណ៍ទាំងនេះ ជារបស់អ្នកទាំងអស់គ្នា»។

សូម​បញ្ជាក់​ថា ឆ្នាំ​នេះ​ព្រឹត្តិការណ៍ «​នគរ​សង្ក្រាន្ត​» ត្រូវ​បាន​រៀបចំ​ឡើង រយៈពេល​៦​ថ្ងៃ​នៅ​រាជធានី​ភ្នំពេញ ចាប់ពី​ថ្ងៃ​ទី​១៤​ដល់​ថ្ងៃ​ទី​១៩ ខែមេសា ឆ្នាំ​២០២៦ ដែលបាន​រៀបចំ​ឡើង​ដោយ​សហភាព​សហព័ន្ធ​យុវជន​កម្ពុជា (​ស​.​ស​.​យ​.​ក​.) និង​រដ្ឋបាល​រាជធានី​ភ្នំពេញ​៕ អត្ថបទ៖ហ្សាលីន

The post ឯកឧត្តម ហ៊ុន ម៉ានី៖ ព្រឹត្តិការណ៍នគរសង្ក្រាន្ត បានប្រព្រឹត្តទៅដោយរលូន និងជោគជ័យ appeared first on .

ក្នុងបរិបទកម្ពុជា កំពុងឆ្ពោះទៅកាន់ការអភិវឌ្ឍសេដ្ឋកិច្ច ការរៀបចំប្រព័ន្ធ និងគោលការណ៍យុទ្ធសាស្ត្រដ៏សមស្រប គឺជាកិច្ចការមួយដ៏សំខាន់មិនអាចមើលរំលងបាន ក្នុងការជំរុញឱ្យសាលាភូមិន្ទរដ្ឋបាល បន្តពង្រឹងសមត្ថភាព គុណភាព និងនវានុវត្តន៍ឱ្យកាន់តែប្រសើរ ដើម្បីឆ្លើយតបទៅនឹងតម្រូវការសាធារណៈ។

មានប្រសាសន៍ចាប់ផ្តើមកិច្ចប្រជុំ ឯកឧត្តមឧបនាយករដ្ឋមន្ត្រី បានលើកឡើងថា “កិច្ចប្រជុំរបស់យើងនាពេលនេះ គឺជាការពិភាក្សា និងតម្រង់ទិសការងាររបស់សាលាភូមិន្ទរដ្ឋបាល ដើម្បីសម្រេចចក្ខុវិស័យក្លាយជាគ្រឹះស្ថានបណ្តុះបណ្តាលមន្ត្រីរាជការឈានមុខ ទាំងគុណភាព ទាំងនវានុវត្តន៍ ឆ្លើយតបទៅនឹងគោលនយោបាយអភិវឌ្ឍន៍របស់រាជរដ្ឋាភិបាល។ ក្នុងន័យនេះមតិយោបល់របស់ឯកឧត្តមបណ្ឌិតសភាចារ្យ ឯកឧត្តមបណ្ឌិត លោកជំទាវបណ្ឌិត ឯកឧត្តម លោកជំទាវ ជាសមាជិកក្រុមប្រឹក្សាទាំងអស់ នឹងក្លាយជាធាតុចូលដ៏មានតម្លៃ នឹងក្លាយទៅជាគោលបំណងរួមនៃការអភិវឌ្ឍសាលាភូមិន្ទរដ្ឋបាលឱ្យកាន់តែមានភាពរីកចម្រើន”។

កិច្ចប្រជុំនាព្រឹកនេះ បានពិនិត្យ និងពិភាក្សាទៅលើរបៀបវារៈចំនួន៧ រួមមាន៖ (១)របាយការណ៍វឌ្ឍនភាពការងាររយៈពេល៩ខែ របស់សាលាភូមិន្ទរដ្ឋបាល (ស.ភ.រ), (២)សេចក្ដីព្រាងផែនការយុទ្ធសាស្ត្រ៥ឆ្នាំ (២០២៦-២០៣០) របស់ស.ភ.រ, (៣)ការត្រៀមលក្ខណៈបែងចែកកន្លែងបំពេញការងាររបស់សិស្សមន្ត្រីក្រមការ ជំនាន់ទី១១, (៤)សំណើជ្រើសរើសសិស្សមន្ត្រីក្រមការ ជំនាន់ទី១២, (៥)សំណើជ្រើសរើសកម្មសិក្សាការីនៃវគ្គវិក្រឹតការ ឆ្នាំ២០២៦, (៦)ប្លង់ទីតាំងនៃអគារថ្មី របស់ស.ភ.រ. និង (៧)បញ្ហាផ្សេងៗ។

ក្រោយពេលដែលបានស្តាប់មតិយោបល់របស់សមាជិកក្រុមប្រឹក្សាសាលាភូមិន្ទរដ្ឋបាល ក្នុងការពិភាក្សាយោបល់យ៉ាងផុលផុសលើគម្រោងផែនការយុទ្ធសាស្ត្រ និងទិសដៅការងារឆ្ពោះទៅមុខលើការពង្រឹងគុណភាពបណ្តុះបណ្តាលធនធានមនុស្ស តាមរយៈសាលាភូមិន្ទរដ្ឋបាលឱ្យកាន់តែល្អប្រសើរ រួចមក ឯកឧត្តមឧបនាយករដ្ឋមន្ត្រី បានបញ្ជាក់ថា អ្វីដែលជាកិច្ចពិភាក្សារបស់យើងជារួម ផ្គួបផ្សំនឹងផែនការយុទ្ធសាស្ត្រឆ្នាំ២០២៦-២០៣០ គឺឆ្លុះបញ្ចាំងបញ្ជាក់ថា យើងមិនមែនគិតត្រឹមតែមុំនៃវគ្គបណ្តុះបណ្តាល ទៅលើវិជ្ជាជីវៈ ឬសមត្ថភាពរបស់មន្ត្រីរាជការ ដែលត្រូវចេញទៅបម្រើប្រទេសជាតិតែមួយមុខនោះទេ គឺយើងបានគិតគូរទៅលើមនសិការ ស្មារតី និងឥរិយាបថរបស់មន្ត្រីបន្ថែមទៀត។

“សាលាភូមិន្ទរដ្ឋបាល ដើរតួសំខាន់ក្នុងការបណ្តុះបណ្តាលមន្ត្រីរាជការ ដែលជាឆ្អឹងខ្នងនៃការអនុវត្តកម្មវិធីគោលនយោបាយរបស់រាជរដ្ឋាភិបាល គឺត្រូវមានសមត្ថភាព ទាំង Hard skills ទាំង Soft skills និងចាំបាច់ណាស់ត្រូវយល់ពីបុព្វហេតុរួមក្នុងការបម្រើប្រជាជនខ្មែរ។” ឯកឧត្តមឧបនាយករដ្ឋមន្ត្រីបន្ថែម៕

The post ឧបនាយករដ្ឋមន្ត្រី ហ៊ុន ម៉ានី ដឹកនាំកិច្ចប្រជុំតម្រង់ទិសការងាររបស់សាលាភូមិន្ទរដ្ឋបាល កំណត់ចក្ខុវិស័យក្លាយជាគ្រឹះស្ថានបណ្តុះបណ្តាលមន្ត្រីរាជការឈានមុខគេ appeared first on .

ដោយឯកឧត្តមថ្លែងថា ជាមួយនឹងការតាមដានដោយយកចិត្តទុកដាក់ពីការវិវត្តជាបន្តបន្ទាប់នៃស្ថានភាពព្រំដែនកម្ពុជា-ថៃ ផ្តើមតាំងពីព្រឹត្តិការណ៍កងទ័ពថៃវាយប្រហារមកលើកម្ពុជាដែលបណ្តាលឱ្យបាត់បង់ជីវិតទាហានខ្មែរម្នាក់កាលពីថ្ងៃទី២៨ខែឧសភា, ការបិទច្រកព្រំដែនជាឯកតោភាគី(ថ្ងៃទី៧ខែមិថុនា) និងឈានដល់ការផ្ទុះអាវុធ (នាថ្ងៃទី២៤ ខែកក្កដា)  យើងទាំងអស់គ្នាពិតជាបានកត់សម្គាល់យ៉ាងច្បាស់ពីកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលក្នុងការគ្រប់គ្រង់ការដ្ឋានស្នូលសំខាន់ៗ ក្នុងនោះក៏មានការអនុវត្តជាយុទ្ធសាស្ត្រនូវនយោបាយការទូត ដោយប្រកាន់ជំហរដោះស្រាយបញ្ហាដោយសន្តិវិធី, ផ្តល់តម្លៃលើការអនុវត្តច្បាប់អន្តរជាតិ (ការស្វែងរកដំណោះស្រាយផ្លូវច្បាប់នៅតុលាការយុត្តិធម៌អន្តរជាតិ ICJ) និងយន្តការចរចាតាមផ្លូវការទូត។

ជាក់ស្តែង កិច្ចប្រជុំពិសេសរវាងសម្តេចធិបតីនាយករដ្ឋមន្ត្រី និងនាយករដ្ឋមន្ត្រីស្តីទីថៃ ដោយមានការសម្របសម្រួលពីនាយករដ្ឋមន្ត្រីម៉ាឡេស៊ីក្នុងនាមជាប្រធានអាស៊ាន រួមជាមួយតំណាងសហរដ្ឋអាមេរិក និងសាធារណរដ្ឋប្រជាមានិតចិនជាសាក្សី នាថ្ងៃទី២៨ ខែកក្កដា បានសម្រេចបានការនូវបទឈប់បាញ់បន្ទាន់ឥតលក្ខខណ្ឌ ដែលបានចូលជាធរមាននៅយប់ម៉ោង០០:០០ ឈានចូលថ្ងៃទី២៩ ខែកក្កដា ឆ្នាំ២០២៥។

តាមរយៈលទ្ធផលនៃកិច្ចប្រជុំបានបើកច្រកបន្តដល់ការរៀបចំឱ្យមានកិច្ចប្រជុំវិសាមញ្ញនៃគណៈកម្មាធិការព្រំដែនទូទៅកម្ពុជា-ថៃ (GBC) ដែលបានឯកភាពលើលក្ខខណ្ឌនៃបទឈប់បាញ់ និងការរៀបចំយន្តការអនុវត្ត (ថ្ងៃទី០៧ ខែសីហា) ព្រមទាំងកិច្ចប្រជុំគណៈកម្មាធិការព្រំដែនថ្នាក់យោធភូមិភាគ (RBC) ក្នុងគោលដៅរក្សាឱ្យបាននូវភាពស្ងប់ស្ងាត់ និងអនុវត្តបទឈប់បាញ់ឱ្យមានប្រសិទ្ធភាព។

ឯកឧត្តម ហ៊ុន ម៉ានី បានគូសបញ្ជាក់ថា កម្ពុជា បើកចំហច្រកការទូតគ្រប់កម្រិត ប្រកបដោយដោយភាពបុរេសកម្មក្នុងនោះរួមមាន ការសម្របសម្រួលផ្តល់ព័ត៌មានអំពីការវិវត្តថ្មីៗនៃសភាពការណ៍ព្រំដែនកម្ពុជា-ថៃ តាមរយៈការធ្វើបទបង្ហាញដល់សមាជិកអង្គទូតបរទេស និងទីភ្នាក់ងារអន្តរជាតិជាប្រចាំ និងការដឹកនាំគណៈប្រតិភូ អង្គទូត និងអនុព័ន្ធយោធាទៅពិនិត្យ សង្កេតការណ៍ ដោយផ្ទាល់នៅទីតាំងរងផលប៉ះពាល់ពីជម្លោះប្រដាប់អាវុធ និងស្ថានភាពជនភៀសសឹក។ ថ្មីៗនេះ ឯកឧត្តមប្រាក់ សុខុន ឧបនាយករដ្ឋមន្ត្រី រដ្ឋមន្រ្តីការបរទេសកម្ពុជា ក៏បានជួបប្រជុំក្រៅផ្លូវការជាមួយឯកឧត្តម វ៉ាង យី រដ្ឋមន្រ្តីការបរទេស នៃសាធារណរដ្ឋប្រជាមានិតចិន និង ឯកឧត្តមរដ្ឋមន្ត្រីការបរទេសថៃ ក្នុងឱកាសកិច្ចប្រជុំរដ្ឋមន្ត្រីការបរទេសនៃកិច្ចសហប្រតិបត្តិការមេគង្គ-ឡានឆាង លើកទី១០ កាលពីថ្ងៃទី១៤ ខែសីហា នេះផង ដែលបានបង្ហាញនូវសុឆន្ទៈរបស់កម្ពុជាក្នុងការស្វែងរកសន្តិភាព និងស្ថិរភាព នៃតំបន់ព្រំដែនត្រលប់មកវិញ តាមគ្រប់មធ្យោបាយ។

ឯកឧត្តមបានបន្ថែមថា សកម្មភាពខាងលើនេះ បានសរបញ្ជាក់ពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការគ្រប់គ្រងសមរភូមិការទូតយ៉ាងណែន ដើម្បីការពារផលប្រយោជន៍ជាតិ និងបង្ហាញនូវភាពត្រឹមត្រូវរបស់កម្ពុជាលើឆាកអន្តរជាតិ។ អ្វីៗដែលរាជរដ្ឋាភិបាលកំពុងធ្វើ បានបង្ហាញភាពខ្លាំងរបស់ព្រះរាជាណាចក្រកម្ពុជា តាមរយៈការរួបរួមគ្នាជាធ្លុងមួយរបស់រាជរដ្ឋាភិបាល កងទ័ព និងប្រជាជន។ ក្នុងន័យនេះ ឯកឧត្តមសូមឱ្យបងប្អូនប្រជាពលរដ្ឋខ្មែរបន្តជឿជាក់ និងគាំទ្រចំណាត់ការដ៏ម៉ឹងម៉ាត់ ប្រាកដនិយម និងច្បាស់លាស់ប្រកបដោយការគិតគូរល្អិតល្អន់ឈ្លាសវៃបំផុតរបស់រាជរដ្ឋាភិបាល ដើម្បីនាំមកនូវស្ថានភាព ប្រក្រតីភាព និងសុខសន្តិភាពពេញលេញឡើងវិញឱ្យបានឆាប់រហ័ស៕

The post ឯកឧត្តម ហ៊ុន ម៉ានី៖ កម្ពុជាប្រកាន់ជំហរដោះស្រាយបញ្ហាដោយសន្តិវិធី ផ្តល់តម្លៃលើការអនុវត្តច្បាប់អន្តរជាតិ និងយន្តការចរចាតាមផ្លូវការទូត appeared first on .

តាមរយៈបញ្ហាដែលបានកើតឡើងបន្ទាប់ពីមានបញ្ហារវាងកម្ពុជា-ថៃ បានបង្ហាញឱ្យឃើញកាន់តែច្បាស់ បន្ទរកាន់តែឮពីទឹកចិត្តស្នេហាជាតិបស់កូនខ្មែរ ដែលបានចេញមករួមគ្នាក្រោកឈរធ្វើសកម្មភាពគ្រប់បែបយ៉ាង ដើម្បីជាតិមាតុភូមិ នៅពេលដែលប្រទេសជាតិត្រូវការ។ នេះជាការលើកឡើងរបស់ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា។

ក្រោមដំបូងផ្ទះតែមួយ ឯកឧត្តម ហ៊ុន ម៉ានី បានបង្ហាញនូវមោទនភាពដែលបានកើតមកជាកូនខ្មែរ។ ឯកឧត្តម ក៏សូមថ្លែងអំណរគុណយ៉ាងជ្រាលជ្រៅបំផុត សម្រាប់ទឹកចិត្តដែលមិនអាចកាត់ថ្លៃបានរបស់កូនខ្មែរគ្រប់រូប ដែលបានចូលរួមតាមរយៈសកម្មភាពតូចធំជាច្រើនរាប់មិនអស់ រួមបញ្ចូលទាំងការផ្ដល់ឱ្យនូវចេកមួយស្និត ទឹកមួយយួរ និងសកម្មភាពសម្បុរសធម៌នានាជាច្រើននៅទូទាំងព្រះរាជាណាចក្រកម្ពុជា។

តាមរយៈសកម្មភាព កាយវិការ និងសំឡេងនៃការគាំទ្ររបស់កូនខ្មែរម្នាក់ៗគឺជាការបង្ហាញពីឆន្ទៈដ៏មុះមុតក្នុងការការពារបូរណភាពទឹកដីប្រកបដោយមនោសញ្ចេតនាដែលកើតចេញពី DNA របស់ខ្មែរ។

សូមបញ្ជាក់ថា ចាប់ពីមានបញ្ហារវាងកម្ពុជា-ថៃ រហូតកើតមានការផ្ទុះអាវុធដែលបង្កឡើងដោយភាគីថៃ ចាប់ពីថ្ងៃទី២៤ កក្កដា ប្រជាពលរដ្ឋកម្ពុជាគ្រប់មជ្ឃដ្ឋានបានបង្ហាញនូវក្តីបារម្ភ ទឹកមុខស្រពាប់ស្រពោន បង្ហាញការឈឺចាប់នឹងស្ថានភាពអាប់អួរមួយនេះ។

ប្រមុខរាជរដ្ឋាភិបាលកម្ពុជា បានស្វះស្វែង ខិតខំរិះរកគ្រប់មធ្យោបាយ ដើម្បីធ្វើយ៉ាងណាឱ្យប្រទេសជាតិទទួលបាននូវស្ថានភាពល្អប្រឡើងឡើងវិញ ពោលចាប់តាំងពីការប្រយុទ្ធគ្នាបានផ្ទុះឡើងទៅថ្ងៃទី ២៤ កក្កដា ប្រមុខរាជរដ្ឋាភិបាលបានយកចិត្តទុកដាក់ចំពោះអាយុជីវិតរបស់កងកម្លាំងរបស់កម្ពុជា ក៏ដូចជារបស់ប្រជាពលរដ្ឋខ្មែរដែលរស់នៅក្នុងតំបន់ប្រយុទ្ធគ្នា។ ដែលកិច្ចការនេះ គឺជាអាទិភាពធំបំផុតរបស់រាជរដ្ឋាភិបាល។ ហេតុដូច្នេះហើយ បានជារាជរដ្ឋាភិបាលខិតខំធ្វើយ៉ាងណាដើម្បីឱ្យមានបទឈប់បាញ់ឱ្យបានឆាប់ជាទីបំផុត ដែលបទឈប់បាញ់នេះមានឡើងនៅត្រឹមម៉ោង១២យប់ ថ្ងៃទី២៨ ឈានចូល២៩ កក្កដា ២០២៥។

រយៈពេល៤ថ្ងៃ នៃវិបត្តិសង្គ្រាម បានបង្ហាញពីសាមគ្គីភាពរវាងបងប្អូនខ្មែរនិងខ្មែរ ក្រោមដំបូងជាតិខ្មែរតែមួយ ឈាមតែមួយ បានបង្ហាញឱ្យឃើញកាន់តែច្បាស់ បន្ទរកាន់តែឮពីទឹកចិត្តស្នេហាជាតិបស់កូនខ្មែរ ដែលបានចេញមករួមគ្នាក្រោកឈរធ្វើសកម្មភាពគ្រប់បែបយ៉ាង ដើម្បីជាតិមាតុភូមិ នៅពេលដែលប្រទេសជាតិត្រូវការ៕

The post រាប់ចាប់ពីចេកមួយស្និត ទឹកមួយយួរ ជាទឹកចិត្តមិនអាចកាត់ថ្លៃបានរបស់កូនខ្មែរគ្រប់រូប ដើម្បីជាតិមាតុភូមិ នៅពេលប្រទេសជាតិត្រូវការ appeared first on .